निङ्वाॽफु साम्लोसुम् 81 - लिम्बुतङ्नाम्ले़ लागि साम्लो साम्लो के़हुॽबाल्ले़ लागि गित्तिथ कुइसिक् आसाफरे़ कुसाम्लो 1 निङ्वाॽफुमाङ्ङो सःत्ते़म्मेॽर साम्लोरे़म्मे़ॽओ, खुने़ॽग आनिॽ मुक्साम्लो, हे़क्क्याङ् खे़म्गे़दे़प्पा इक्लाओ याकुबरे़ कुनिङ्वाॽफुमाङ्ङिल्ले़ कुनारा फोसे़म्मे़ॽओ॥ 2 से़वासाम्लोन् साम्मे़त्ते़म्मे़ॽओ, छिङ्छिङ्ग्या ताहिप्पिन् मुक्खे़म्मे़ॽओ, हे़क्क्याङ् लुङ्माॽ हिःम्ल अन्मेन् नु तुङ्नाःन् हिप्ते़म्मे़ॽओ॥ 3 लादुप्पो के़दाबा तङ्नाम्मो थुत्तुरिःप्पान् मुक्खे़म्मे़ॽओ॥ हे़क्क्याङ् लाबा ओःत्तिःल्ले़ के़दाबा तङ्नाम्मिन् तोसे़म्मे़ॽओ॥ 4 कङ्ग इस्राइलबा लत्छा थिम् नु, याकुबरे़ कुनिङ्वाॽफुमाङ्ङिल्ले़ कुइङ्जाङ्लो॥ 5 निङ्वाॽफुमाङ्ङिन् मिस्रबा मनाहाॽरे़ खुनिॽ तक्ले़ङ्वाओ पोगे़ल्ले़ कन् इङ्जाङ्ङिन् कुमना इस्राइलिहाॽ पिरुसिरो, खे़प्मो खुने़ॽ कुसिङ् निःप्मे़न्दे़प्मनाबा पाःन्दाङ्ङो पारे़बा आनिगे खे़प्सुम्बे़रो, युसुफरे़ कुलागि लत्छा कन् इङ्जाङ्ङिल्ले़ कुबुङ् युक्खुरो॥ 6 खुने़ॽ अक्खे पाःत्तुरो, “खिनिॽ के़गुयुम्बा पलिःप् के़लिःप्पा कक्किन् आङ्गाॽ पक्खुङ्ङाङ् वाॽआरो, खिनिॽ हुक्किल्ले़ के़जोगुम्बा पसाक्के़साक्पा याःम्बक्किन् आङ्गाॽ खे़त्तुङ्ङाङ् वाॽआरो॥ 7 इनोगे़न् तुक्खेओ के़ध्ये़ॽइल्ले़ याप्मि पेलि के़भाक्तिआङ् से़ःप्निङ्लो, खाॽमित् नु मि के़इक्सिङ्बा मुन्धाङ्दिङ् सेरिलाम्बा आङ्गाॽ नुगप् पिनिङ्लो, हे़क्क्याङ् मेरिबाओ के़बुम्बा च्वाःत् पेसाङ् खिनिॽ निङ्वाॽ साॽरुङ्लो॥ सेला 8 आमनासे, आङ्गाॽ साम्दिङ् पिनिङ्लो खिनिॽ नुरिक्काङ् खे़प्से़म्मे़ॽओ, इस्राइलिसे, आङ्गाॽ आबाःन्निन् के़घे़प्सुम्ल के़लॽबा निङ्वाॽ चोगुङ्ङाङ् वाॽआरो॥ 9 माङ्साम्माङ्हाॽ खिनिॽ माङ्घमासि मे़नुॽने़ल्लो, खिनिॽ वेॽ लाजेॽबा माङ्हाॽ आभे़ल्ले़आङ् से़वा मे़प्मासि मे़नुॽने़ल्लो॥ 10 आङ्गाॽ यहवे दाङ्बा खिनिॽ निङ्वाॽफुमाङ्आरो, आङ्गाॽए मिस्र लाजेॽलाम्बा खिनिॽ लःत्निङ् थाक्निङ्बारो॥ खिनिॽ मुरान् हा मे़त्ते़म्मे़ॽओ, आङ्गाॽ नुःब्नुबा पाःन्हाॽरे़ थिम्सुङ् पिनिङ्लो॥ 11 “कर आङ्गाॽ आमनाहाॽरे़ आबाःन्निन् मे़ङ्घे़प्सुन्लो॥ इस्राइलबा मनाहाॽरे़ आइङ्जाङ्ङिन् इःप्मा नाःप्मा मे़न्दे़न्दे़ल्लो॥ 12 खे़ल्ले़चोगुल्ले़ खे़ङ्हाॽ आबाङे खुनिॽ हादिङ्धक्मा पाःन्हाॽओ वाॽ पाङ्घुङ्सिङ्लो, हे़क्क्याङ् खे़ङ्हाॽ खुनिॽ सिराॽधाङ्धाङ् आङ्गाॽ चोक् फाःक्तुङ्सिङ्लो॥ 13 आमनाहाॽरे़ आबाःन्निन् मे़घे़प्सुल्ले़ग, इस्राइलबा मनाहाॽ आलाम्मो लाङ्मे़घेःक्के़ल्ले़ग, 14 हाराए खे़ङ्हाॽरे़ खुनिॽ निङ्मिहाॽ हारि चाःत्तुङ्सिङ्बामे़न्लो॥ हे़क्क्याङ् खे़ङ्हाॽरे़ खुनिॽ तक्ले़ङ्वाओ के़बोक्पाहाॽ के़रे़क् आहुक्किल्ले़ साःप्सुङ्सिङ्बामे़न्लो॥ 15 यहवे दाङ्बान् के़जिःप्पाहाॽ खुने़ॽ कुदगि पगि मे़गिआङ् हार्गिङ् मे़बेःक्लो, हे़क्केसाङ् खे़ङ्हाॽरे़ खुनिॽ खुम्दिङ्ङिङ्ग आभे़ल्ले़आङ् मे़नुप्ने़ल्लो॥ 16 कर आङ्गाॽग काक्नुःल्ले़ नुबा मासिन् खिनिॽ चाःत्निङ्बा वये़मे़न्लो, हे़क्क्याङ् याक्पेॽओबा माङ्वा सक्वाघुन् खिनिॽ सिक्एःप्तुर पिनिङ्बा वये़मे़न्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.