निङ्वाॽफु साम्लोसुम् 80 - लिम्बुलाजेॽओ नुॽमा तामा पेलि साम्लो के़हुॽबाल्ले़ लागि “माङ्हुप्पिल्ले़ ले़क्वाभुङ्हाॽ” मे़प्मनाबा इत्लाओ आसाफरे़ कुसाम्लो 1 इस्राइलबा मनाहाॽ कम्ब्राङ् के़मे़प्पा मे़ल्लुक्कम्बाए, नुरिक्काङ् खे़प्से़ॽओ खे़ने़ॽ के़मे़ल्लुक्हाॽ लाम्गे़लोसुसिबा हे़क्केए युसुफे़न् लाम्गे़लोसुरो॥ खे़ने़ॽग करुब मे़प्मनाबा माङ्लाइङ्बाहाॽ लुम्मो के़युक्खुबा हाङ्युक्नाओ के़युङ्, ओःत्ते़ॽओ॥ 2 एफ्राइम, बेन्यामिन नु मनस्सेबा सुवाङ्हाॽरे़ खुनिॽ तगि के़मुक्साम्मिन् ओसेःन्दाङ् चोगे़ॽओ, हे़क्क्याङ् आनिगे आसे़ःप्ते़ॽओ॥ 3 निङ्वाॽफुमाङ्ङे, याम्मो आभोःक्खे़ॽओ, आनिगे लुङ्माॽ आदुक्ते़ॽओ हे़क्केलॽरिक् हिङ्मा सुक्तिगे़ररो॥ 4 मुक्साम्दाङ्बा यहवे दाङ्बा निङ्वाॽफुमाङ्ङे, आभे़ल्ले़ थारिक् के़मनाहाॽरे़ पेलि के़म्भाक्किल्ले़ के़याःक्ले़ॽबाबे? 5 चामारे़ कुले़क्वा खे़ङ्हाॽरे़ खुनिॽ निङ्वाॽ के़दुक्खु के़बिरुसिरो, हे़क्क्याङ् थुङ्मारे़ कुले़क्वा खे़ङ्हाॽरे़ खुनिॽ मिक्वा के़धासु के़बिरुसिरो॥ 6 आनिगे खिरिबा सुवाङ्हाॽ आनिगे़नु खे़माॽ चोःक्मा के़बाङ्घुसिआङ् वाॽरो, हे़क्क्याङ् आनिगे निङ्मिहाॽरे़ कुनामे़न्छाॽ मे़मे़त्तिगे़रो॥ 7 मुक्साम्दाङ्बा निङ्वाॽफुमाङ्ङे, आनिगे याम्मो आभोःक्खे़ॽओ॥ आनिगे लुङ्माॽ आदुक्ते़ॽओ, हे़क्केलॽरिक् हिङ्मा सुक्तिगे़ररो॥ 8 खे़ने़ॽ मिस्र लाजेॽलाम्बा चे़ल्ले़क्सेल्ले़ कुबुङ् हे़क्के आनिगे याप्मि के़धाक्ते़रो, खे़ने़ॽ खे़प्मोबा मे़न्छाम् सुवाङ्हाॽ के़नाःत्तु के़देसुसिरो हे़क्क्याङ् खे़ङ्हाॽरे़ खुनिॽ लाजेॽओ आनिगे याप्मि के़युक्खे़रो॥ 9 खे़न् चिनॽनॽ लॽरिक् पोधाङ्ल फाॽआङ् खाम्मिन् के़साःक्तुरो, हे़क्क्याङ् खे़न् कुसाःप् लेःत्छिङ्ङाङ् लाजेॽ खाराक् उःङ्सिङ्ल ताबे़बेरो॥ 10 खे़ल्ले़ कोःक्मा फाङ्जङ्हाॽ इःप्तुरो, हे़क्क्याङ् कुबोराक्हाॽरे़ यम्बयम्बा साम्माङ्सिङ्हाॽ थेःक्तुरो॥ 11 कुबोराक्हाॽ लुम्बाङ् वरःङ् थारिक् से़रे़रो, हे़क्क्याङ् कुनःक्हाॽ युफ्रेतिस वहःङ् थे़म्बा के़रे़रो॥ 12 खे़प्मो कब्रिङ् से़प्मनाबा लुङ्धाक्किन् खे़ने़ॽ थेआङ् के़धुप्सुबाबे? हे़क्क्याङ् लाङ्गे़घेःक्पा के़रे़क्ले़ खे़प्मो के़धोःक्पा चे़ल्ले़क्सेॽहाॽ मे़दुबु मे़जरो॥ 13 से़रा फाक्हाॽरे़ खे़न् चिसॽ चिसॽ मे़सॽरुरो, हे़क्क्याङ् ताम्भुङ् थक्साहाॽ खे़प्मो चामे़राम्लो॥ 14 मुक्साम्दाङ्बा निङ्वाॽफुमाङ्ङे, आनिगे लुम्मो याम्मो नुःक्खे़ॽओ, साङ्ग्राम्पेदाङ्लाम्बा यो इक्सादिङ् खाम्बेःक्मो ओआमे़त्ते़ॽओ॥ चे़ल्ले़क्सेॽइल्ले़ कुबुङ्ङिन् हे़क्के आनिगे़आङ् कम्ब्राङ् आमे़त्ते़ॽओ॥ 15 आबाङे के़लेःत्तुबा चे़ल्ले़क्सेल्ले़ कुबुङ्ङिन् खे़ने़ॽ से़ःप्ते़ॽओ, खे़न् चुक्सा कुबुङ्ङिन् कम्म्याक् यम्बा के़जोगुआङ् वाॽरो॥ 16 खे़ने़ॽ के़जे़ल्ले़क्से़ॽइल्ले़ कुबुङ्ङिन् के़निङ्मिहाॽरे़ मे़ले़ःक्खुरो हे़क्क्याङ् खे़ङ्हाॽरे़ मिओ मे़हाःन्दुआङ् वाॽरो, के़सिक् पोःक्मो खे़ङ्हाॽ ओमे़त्ते़से़ॽओ, हे़क्क्याङ् खे़ङ्हाॽ मे़क्खे़से़ॽओ॥ 17 खे़ने़ॽ के़सेगुबा मनान् सेःप्ते़ॽआङ् ताङ्घे़ॽओ, खे़न् आबाङे के़स्सा पोङ्से़ के़सेगुरो॥ 18 खे़ने़ॽलाम्बा आनिगे आभे़ल्ले़आङ् मे़नुःक्खिगे़न् मे़बेगिगे़न्लो, आनिगे कुहिङ्वे़त् आगत्ते़ॽओ, हे़क्क्याङ् आनिगे के़नारा फोसुम्बे़रो॥ 19 मुक्साम्दाङ्बा यहवे दाङ्बा निङ्वाॽफुमाङ्ङे, आनिगे याम्मो आभोःक्खे़ॽओ॥ आनिगे लुङ्माॽ आदुक्ते़ॽओ, हे़क्केलॽरिक् आनिगे हिङ्मा सुक्तिगे़ररो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.