निङ्वाॽफु साम्लोसुम् 8 - लिम्बुयहवे दाङ्बे़ल्ले़ निङ्वाॽ के़माबा कुमिङ् साम्लो के़हुॽबाल्ले़ लागि गित्तिथ कुइसिक् दाउदरे़ कुसाम्लो 1 यहवे दाङ्बा, आनिगे दाङ्बाए, काक् इक्सादिङ् खाम्बेःक्मो खे़ने़ॽ के़मिङ्ङिन् मिङ्सो इङ्धाङ् पिमा के़लाॽबा चोक्लो! मनाहाॽरे़ के़नारा मे़भोसुबान् थाःङ् साङ्ग्राम्पेदाङ्ङो थारिक् के़रे़आङ् वाॽरो! 2 हिन्जाॽबित्छाहाॽ नु नुगे़धुङ्बा अङे़ःक्वाहाॽरे़आङ् खे़ने़ॽ के़नारा मे़भोसुरो, खे़ल्ले़चोगुल्ले़ के़रे़क् के़निङ्मिहाॽ नु के़दक्ले़ङ्वाओ के़बोःक्पाहाॽरे़ थेआङ् मे़प्मा के़मे़न्छुक्ने़ल्लो॥ 3 खे़ने़ॽ के़जोगुबा तरक्के़न् ताङ्साक्पान्, हे़क्क्याङ् के़भत्छुबा लाबा नु खेःम्सिक्पाहाॽ आङ्गाॽ ओमे़त्तुङ्सिङ्ङिल्ले़ निङ्वाॽ इःत्छिङ्ङारो, 4 मे़न्छाम् याप्मिहाॽ थेसिआङ् निङ्वाॽ के़इःत्तुसिबे? नासिङ्गे़न् थक्लाओ के़सिबा के़बेःक्पाहाॽ हाःत्छिआङ् कम्ब्राङ् के़मे़त्तुसिबे? 5 खे़ङ्हाॽग खे़ने़ॽनुःल्ले़ च्यॽरक् योयोक्पा के़जोगुसिरो, मिमिदिङ्ङिन् नु मिङ्सो इङ्धाङ्ले़ तिचःन् खे़ङ्हाॽ के़घुःक्तुसिरो॥ 6 आबाङे के़जोगुबा के़रे़क् पाःन्हाॽ सम्धाङ् खे़ङ्हाॽ युक्साबा के़जोगुसिआङ् वाॽरो॥ काक् पाःन्हाॽ खे़ङ्हाॽरे़ खुनिॽ युक्को के़युक्खुरो— 7 के़रे़क् मे़ल्लुक्, मे़ःन्दाक्, पित्, साःङ्वे़त् नु ताम्भुङ् थक्साहाॽ, 8 ताङ्साक्पो के़बे़बा पुहाॽ नु वरःङ्ङो के़याक्पा ङाहाॽ, हे़क्क्याङ् खे़प्मो के़याक्पा काक् पाधुङ्साहाॽ खुनिॽ युक्को मे़वाॽर के़याःन्दुसिरो॥ 9 यहवे दाङ्बा, आनिगे दाङ्बाए, काक् इक्सादिङ् खाम्बेःक्मो के़मिङ्ङिन् मिङ्सो इङ्धाङ् पिमा के़लाॽबा चोक्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.