निङ्वाॽफु साम्लोसुम् 73 - लिम्बुकुलक् सुम्सि ( निङ् सुम् ७३–८९ ) निङ्वाॽफुमाङ्ङिल्ले़ कुघासे़न् आसाफरे़ कुसाम्लो 1 इस्राइलिहाॽरे़ खुनिॽ लागि, नुबा सिक्लुङ्मा के़गप्पाहाॽरे़ लागि निङ्वाॽफुमाङ्ङिन् से़क्खाए के़नुॽबा चोक्लो॥ 2 कर आङ्गाॽग, खप्मे़न् ले़ःक्खाङ् पेगाङ्लो, आङ्गाॽ आलाङ् तोॽमादे़न्निन्नाङ् खा मामादेमा चोगुङ्ङाङ् वयाङ्लो॥ 3 थेआङ्भे़ल्ले़ ताक्के़भे़ॽबाहाॽरे़ ताप्फे़ःम्बा याःम्बक् मे़जोगुसाङ् खे़ङ्हाॽ मे़नुरे़ मे़दासे़बा निसुङ्सिङ्लो, हे़क्क्याङ् खे़न् आङ्दिङ् के़लॽबाहाॽ आङ्गाॽ नाहे़त्तुङ्सिङ्लो॥ 4 खे़ङ्हाॽ तुक्खे लाक्खे मे़न्जाने़न्लो, खे़ङ्हाॽ मे़न्दुक्ने़न् मे़ल्लाःक्ने़न्नाङ् के़धुम्बा मे़जोक्लो॥ 5 याप्मि मनाहाॽ हे़क्के खे़ङ्हाॽ के़साक्पो मे़न्धाने़ल्लो, वेॽहाॽ हे़क्के खे़ङ्हाॽरे़ तुक्खे मे़न्दुमुल्लो॥ 6 खे़ल्ले़चोगुल्ले़ खे़ङ्हाॽरे़ आङ्दिङ् लॽमान् कान्धि कुइसिक् मे़वारुरो, हे़क्क्याङ् खे़ङ्हाॽरे़ खे़माॽ चोःक्मान् चाङ् चाङ्मनाबा कुइसिक् मे़जाक्खुरो॥ 7 खे़ङ्हाॽरे़ खुनिॽ निङ्वाॽ चिःप्मालाम् ताप्फे़ःम्बा पाःन्हाॽ लःन्लो, हे़क्क्याङ् खे़ङ्हाॽरे़ खुनिॽ आङ्दिङ् लॽमा फे़न्निङ्वान् कम्भ्यारिक् यम्बा चोक् फाॽआङ् पाःप्मा सुक्मे़दे़त्ने़ल्लो॥ 8 खे़ङ्हाॽरे़ वेॽहाॽ मे़येःत्तुसिरो, हे़क्क्याङ् ताप्फे़ःम्बा पान् मे़बाःत्लो, खे़ब्याङ् आबाङे आङ्दिङ् मे़लॽआङ् वेॽहाॽ तुक्खे चाःप्मासि फाॽआङ् मे़भे़ःक्तुसिरो॥ 9 साङ्ग्राम्पेदाङ्बा निङ्वाॽफुमाङ्ङिन् खे़ङ्हाॽरे़ चे़ॽयापान् मे़मे़त्तुरो, हे़क्क्याङ् खे़ङ्हाॽरे़ खुनिॽ मुराःल्ले़ आङ्दिङ् मे़लॽर “इक्सादिङ् खाम्बेःक्मान् आनिगे़न् मे़बाःत्तुरो॥” 10 खे़ल्ले़चोगुल्ले़ निङ्वाॽफुमाङ्ङिल्ले़ कुमनाहाॽआङ् खे़ङ्हाॽ ले़प्माङ् मे़हिसिङ्लो, हे़क्क्याङ् खे़ङ्हाॽरे़ मे़बाःत्तुबान् खिमो नसान् मे़जोगुरो॥ 11 खे़ङ्हाॽरे़ अक्खे मे़बाःत्तुरो, “आक्खेआङ् निङ्वाॽफुमाङ्ङिल्ले़ निसु ले़सुबे? के़रे़क्नुःल्ले़ पयम् यम्बा निङ्वाॽफुमाङ्ङिल्ले़ आनिॽ चोःक्मनाबान् निङ्वाॽ खोसुबि?” 12 ओमे़त्ते़म्मे़ॽ, ताक्गे़भे़बाहाॽ हे़क्तङ्बा मे़जोक्लो, सदादिङ् खे़ङ्हाॽरे़ वे़त्ते़सरे़ मे़गत्तुरो, हे़क्क्याङ् आभे़ल्ले़साङ् याङ्साकुन्धे मे़भोसुरो॥ 13 हे़क्केःल्ले़ आनिङ्वान् हने़ सेसे कत्तुङ्बि? हे़क्क्याङ् लायो मे़न्जोःक्के वाॽआबान् थेनाधे पोःक्खे़बि? 14 निङ्वाॽफुमाङ्ङे, खे़ने़ॽ आङ्गाॽ ले़न्दिक् नाम्धाधा तुक्खे के़जाःत्ताङ्ङाङ् वाॽआरो, हे़क्क्याङ् तानाम् थप्मे आङ्गाॽ खुम्दिङ् के़बिराङ्ङाङ् वाॽआरो॥ 15 कम्भलॽरिक् वेॽहाॽ मे़त्तुङ्सिङ्ङाङ् वये़ल्ले़गमे़न्, के़मुॽइदाङ्साहाॽ इङ्ले़क्तुङ्सिङ्बा वये़मे़न्॥ 16 आल्ल कन् के़रे़क् पाःन्हाॽ कुसिङ् निःप्मा कोःत्तुङ्लो, कर कङ्ग आलागि कुसिङ् निःप्मा साॽरिक् साक्ते़रो॥ 17 आङ्गाॽ निङ्वाॽफुमाङ्ङिल्ले़ कुसेसेदे़न्नो लासाङ्लो, हे़क्क्याङ्लक् ताक्के़भे़ॽबाहाॽ आक्तङ्बा मे़बोङ् के़लॽबान् आङ्गाॽ कुसिङ् निःत्तुङ्लो॥ 18 से़क्खासाङ् खे़ङ्हाॽ आले़ःङ्ले़ःङ्बा ते़न्नो के़ये़प्सुसिरो, हे़क्केलॽरिक् खे़ङ्हाॽ मे़क्मासिमा ते़न्नो मे़ले़ःङ् मे़धारो॥ 19 खे़ङ्हाॽ हक्चघत् मे़क्मा ते़न्नो मे़बेःक्लो, हे़क्क्याङ् च्वाःत्तिल्ले़ वदेॽरुसिबा कुइसिक् किमा यङ्मारे़ पक्खु तेॽरुसिरो॥ 20 खे़ङ्हाॽग तानाम् सोमाआङ् पोःक्माल्ले़बा से़प्माङ् कुइसिःक्लक् मे़लॽरो॥ यहवे दाङ्बाए, के़बोःक्किल्ले़ खे़ङ्हाॽ मे़मा मे़बेःक्लो॥ 21 आङ्गाॽ आनिङ्वाॽ तुगे़आङ् वये़रो, हे़क्क्याङ् आसिक्लुङ्मान् लक्तुआङ् वये़रो॥ 22 आङ्गाॽग अदङ् कुइसिक् पोःक्खाङ्ङाङ् आनिङ्वाॽ पाःक्ते़आङ् वयाङ्लो, हे़क्क्याङ् खे़ने़ॽ के़दगि थक्सा कुइसिक् आङ्गाॽ पोःक्खाङ्ङाङ् वयाङ्लो॥ 23 हे़क्केसाङ् आङ्गाॽग सदादिङ् खे़ने़ॽनुए वाॽआरो, हे़क्क्याङ् खे़ने़ॽ आजुप्साङ् हुक्किन् के़दे़म्सुआङ् आङ्गाॽ के़भाॽआरो॥ 24 खे़ने़ॽ आबाङे निसाम् के़हुॽआरो हे़क्क्याङ् आङ्गाॽ लाम्गे़लोआरो, खे़ब्याङ् ताःन्दि मिङ्सोइङ्धाःङ् के़बिआर आङ्गाॽ के़दाःक्कारो॥ 25 साङ्ग्राम्पेदाङ्ङो खे़ने़ॽनुःल्ले़ वेॽ आङ्गाॽ हात् कत्तुम्बे़? हे़क्क्याङ् इक्सादिङ् खाम्बेःक्मोआङ् आसिराॽगे़धाङ्बा खे़ने़ॽनुःल्ले़ वेॽ हात् वाॽआङ्बे? 26 आधक्किन् मे़न्धुम्मनाबा पोङ्बिलारो हे़क्क्याङ् आनिङ्वाॽइन् कुसुम् मे़न्दम्मनाबा पोङ्बिलारो, कर निङ्वाॽफुमाङ्ङिल्ले़ सदादिङ् आङ्गाॽ आसिक्लुङ्मो के़धुम्बा चोःक्कारो हे़क्क्याङ् आङ्गाॽ चाहाब् के़जोःक्पा के़रे़क् पाःन्हाॽग निङ्वाॽफुमाङ्ङिन्नेरो॥ 27 हे़क्क्याङ् आत्तिन्हाॽरे़ खे़ने़ॽ के़म्ले़त् खे़ङ्हाॽ से़क्खासाङ् मे़मे़क्लो, हे़क्क्याङ् नसाःन्साबा मे़ःम्बाहाॽ खे़ने़ॽ के़रे़क् के़मे़क्खुसिरो॥ 28 कर आलागिग निङ्वाॽफुमाङ्ङिल्ले़ कुबेसाङ् वाॽमा नुबा पोङ्लो॥ यहवे दाङ्बा निङ्वाॽफुमाङ्ङिन् आङ्गाॽ आइःम्सिङ्मादे़न् चोगुङ्ङाङ् वाॽरो हे़क्क्याङ् खुने़ॽ चोगुबा याःम्बक्हाॽ इङ्भोसुङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.