निङ्वाॽफु साम्लोसुम् 71 - लिम्बुखदाक्मि मनाःल्ले़ फाक्तुबा पेलि 1 यहवे दाङ्बाए, खे़ने़ॽओ इःम्सिङ्से़ त्याङ्ङाङ् वाॽआरो, आङ्गाॽ आभे़ल्ले़आङ् सिरिङ्ममा मे़बोङ्ने़ल्लरो॥ 2 खे़ने़ॽग साम्योबा के़जोःक्लो, कम्ब्राङ् मे़त्ताङ्ङे़ॽआङ् से़न्लप् पिराङ्ङे़ॽओ, हे़क्क्याङ् आबेलिगे़न् तुवान् खे़प्से़आङ् से़ःप्ताङ्ङे़ॽओ॥ 3 से़ःप्सिङ्मा थेःक्सिङ्मारे़ लागि आभे़ल्ले़साङ् तामा सुक्काबा याक्पेॽ पोःक्खे़ॽओ॥ के़बाःन्निल्ले़ आङ्गाॽ से़ःप्ताङ्ङे़ॽओ, थेआङ्भे़ल्ले़ खे़ने़ॽग आइःम्सिङ्मादे़न् यक्ने़रो॥ 4 निङ्वाॽफुमाङ्ङे, ताक्के़भे़ॽबा मनाहाॽरे़ थेआङ् मे़प्मा मे़ङ्घोए से़ःप्ताङ्ङे़ॽओ, कुइगे़भे़म्बा नु कुनिङ्वाॽ के़जिःप्पाहाॽरे़ खुनिॽ हुक्को मे़न्धाए कम्ब्राङ् मे़त्ताङ्ङे़ॽओ॥ 5 थेआङ्भे़ल्ले़ यहवे दाङ्बा निङ्वाॽफुमाङ्ङे, खे़ने़ॽए निङ्साङ् चोःक्ने़आङ् वाॽरो॥ आङ्गाॽ थाङ्बे़न् वयाङ्ङाङ्धोए खे़ने़ॽ के़से़ःप्पा फाॽआङ् थधप् मे़ल्लॽए आङ्गाॽ नसान् चोःक्ने़आङ् वाॽरो॥ 6 आङ्गाॽ सावाःन्छिङ्ङाआङ्धोए खे़ने़ॽ आङ्गाॽ ताःक्पो चोःक्ने़आङ् वाॽआरो॥ आम्मारे़ कुसाप्पोःक्को यागाङ्ङाङ्धोए आङ्गाॽ कम्ब्राङ् के़मे़त्ताङ्लो, चक्मे़ल्लॽए आङ्गाॽ के़नारा फोसुङ्लो॥ 7 आङ्गाॽग यरिक् मनाहाॽरे़ खुन्छिॽ कुबि पोःक्खाङ्ङाङ् वाॽआरो, थेआङ्भे़ल्ले़ खे़ने़ॽग आङ्गाॽ आइःम्सिङ्मादे़न् के़बोक्खे़आङ् के़वाॽरो॥ 8 चक्मे़ल्लॽए आङ्गाॽ के़नारा फोसुङ्लो, हे़क्क्याङ् ले़न्दिक् नाम्धाधा के़हाङ्वा के़माङ्वान् इङ्भन् चोगुङ्लो॥ 9 आङ्गाॽ काप्पोबा तुम्माआङ् वाॽआल्ले़ खे़ने़ॽ मे़नाॽराङ्ङिन्ने़ॽओ, हे़क्क्याङ् आङ्गाॽ मे़न्धुम्मनाबा पोङ्ङाल्ले़ खे़ने़ॽ लाप्मे़भुसाङ्ङिन्ने़ॽओ॥ 10 थेआङ्भे़ल्ले़ आनिङ्मिहाॽरे़ चे़ॽया मे़मे़त्तारो, हे़क्क्याङ् आङ्गाॽ से़प्मा निङ्वाॽ मे़जोगुआङ् खे़ङ्हाॽरे़ चे़म्भन् मे़जोगुरो॥ 11 खे़ङ्हाॽरे़ अक्खे मे़बाःत्तुरो, “निङ्वाॽफुमाङ्ङिल्ले़ खे़न् नाॽरुआङ् वाॽरो, खे़न् नाःत्ते़म्मे़ॽआङ् ते़म्से़म्मे़ॽओ, थेआङ्भे़ल्ले़ खे़न् आत्तिल्ले़आङ् मे़से़ःप्तुल्लो॥” 12 निङ्वाॽफुमाङ्ङे, आङ्गाॽलाम् खे़ने़ॽ माःङ्घा मे़वये़न्ने़ॽओ, आनिङ्वाॽफुमाङे, आभाॽसे़ हारा त्ये़ॽओ॥ 13 आङ्गाॽ पान् याप्मि के़धिक्पाहाॽ सिरिङ्ममो मे़धाआङ् मे़मे़क्लरो, हे़क्क्याङ् आङ्गाॽ खाःम्मा के़गोःप्पाहाॽरे़ खुनिॽ कुनामे़न्छाॽ पोङ्लरो हे़क्क्याङ् खे़ङ्हाॽरे़ खुनिॽ चाःत्थि पेःक्लरो॥ 14 कर आङ्गाॽग चक्मे़न्लॽए खे़ने़ॽ निङ्साङ् चोःक्ने़रो, हे़क्क्याङ् आल्लसाङ् यरिक् के़नारा फोसुङ्लो॥ 15 के़साम्योबा याःम्बक्किल्ले़ कुयाःम्बेओ पाःत्तुङ्लो, हे़क्क्याङ् खे़ने़ॽलाम्बा के़दाबा से़न्लप्पिल्ले़ कुयाःम्बेओ खक्पे़त् कुसिङ् मे़निःत्तान्छाङ् खे़न् पाःन्निन् ले़न्दिक् नाम्धाधा आङ्गाॽ चे़क्खुङ्लो॥ 16 यहवे दाङ्बा निङ्वाॽफुमाङ्ङे, मुक्साम्साबा के़याःम्बक्हाॽ आङ्गाॽ इङ्भोसुङ्लो, हे़क्क्याङ् साम्योबा के़याःम्बक्किन्लक् उवा चोगुङ्लो॥ 17 निङ्वाॽफुमाङ्ङे, थाङ्बे़न् वयाङ्ङाङ्धोए आङ्गाॽ निसाम् के़हुॽराङ्ङाङ् वाॽआरो, हे़क्क्याङ् निङ्वाॽ के़माबा के़याःम्बक्हाॽ आङ्गाॽ आल्लसाङ् इङ्भोसुङ्लो॥ 18 निङ्वाॽफुमाङ्ङे, आङ्गाॽ काप्पोबा तुम्माआङ् आधे़गेक्पान् फुत्त्रिःङ्यारिक् फुत्खे़त्छाङ् आङ्गाॽ मे़नाॽराङ्ङिन्ने़ॽओ॥ हे़क्क्याङ् के़मुक्साम्मिल्ले़ कुयाःम्बेओ के़दाबा के़रे़क् मे़न्छाम् थाःक्हाॽ इङ्मे़म्भोसे थारिक् मे़ले़राङ्ङिन्ने़ॽओ॥ 19 खे़ने़ॽ साम्योबा के़याःम्बक्हाॽ साङ्ग्राम्पेदाङ् थाःङ् थारिक् के़त्लो॥ खे़ने़ॽग पयम् यम्बा याःम्बक्हाॽ के़जोगुआङ् वाॽरो, निङ्वाॽफुमाङ्ङे, खे़ने़ॽ हे़क्तङ्बा हात् वाॽआङ्बे? 20 खे़ने़ॽग साॽरिक् तुक्खे लाक्खेहाॽ आङ्गाॽ तुमुङ्ल के़याःन्दाङ्लो, करसाङ् याम्मो के़धुम्बा के़जोःक्कारो, इक्सादिङ् खाम्बेःक्मोबा लुम्बाःत्तोनु आङ्गाॽ याम्मो थाःङ् के़लःत्तारो॥ 21 खे़ने़ॽ आमिङ्सो आधाःङ्सो के़भोआ के़बिआरो, हे़क्क्याङ् याम्मो हाङ्हाङ् के़मे़त्तारो॥ 22 आनिङ्वाॽफुमाङ्ङे, खे़ने़ॽग नसाःन्साबा के़जोःक्लो, आङ्गाॽ तुङ्ना मुक्खुङ्ल के़नारा फोसुङ्लो॥ इस्राइलबा सेसे निङ्वाॽफुमाङ्ङे, आङ्गाॽ अन्मे मुक्खुङ्ल के़नारा फोसुङ्लो॥ 23 ने़म्भोगे़न् के़नारा फोसुङ्ङिल्ले़ आङ्गाॽ आम्ब्रा अदाॽअदाॽ लॽरो हे़क्क्याङ् आङ्गाॽ सःत्तार अःक्कारो, थेआङ्भे़ल्ले़ खे़ने़ॽए के़धे़ॽराङ्ङाङ् वाॽरो॥ 24 आङ्गाॽ ले़न्दिक् नाम्धाधा साम्योबा के़याःम्बक्हाॽ चे़क्खुङ् पाःत्तुङ्लो, थेआङ्भे़ल्ले़ आङ्गाॽ याप्मि ताप्फे़ःम्बा मे़प्मा निङ्वाॽ के़इःप्पाहाॽ सिरिङ्ममो मे़ध्ये़आङ् मे़नाक्ते़ मे़बेआङ् मे़वाॽरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.