निङ्वाॽफु साम्लोसुम् 7 - लिम्बुखासे़न् खोमारे़ लागि पेलि बे़न्जामिनि, कुसरे़ कुलागि यहवे दाङ्बाओ दाउदरे़ साम्मे़त्तुबा सिग्गियोन् मे़प्मनाबा साम्लो 1 यहवे दाङ्बा आनिङ्वाॽफुमाङ्ङे, आङ्गाॽग खे़ने़ॽओ इःम्सिङ्से़ ताआरो॥ याप्मि निङ्घे़म् के़मे़प्पाहाॽलाम् से़ःप्ताङ्ङे़ॽओ हे़क्क्याङ् नुरिक्काङ् कत्ताङ्ङे़ॽओ॥ 2 मेःन्ने़भग्र खिरिङ्बाल्ले़ कुइसिक् मे़धे़ःङ्ङारो, याप्मि के़नाङ्बा मेःन्ने वाॽआल्ले़ मे़धे़ःङ्ङाॽ मे़मे़त्तारो॥ 3 यहवे दाङ्बा आनिङ्वाॽफुमाङ्ङे, आङ्गाॽ याःम्बक् फेःन्दुङ्ङाङ् आहुक्कोलाम्बा लायो पोःक्खे़आङ् वाॽने़भग्र, 4 आङ्गाॽनु सनारुङ्ङो के़वाॽबान् ताप्फे़ःल्लिक् मे़त्तुङ्ङाङ् वाॽआने़भग्र, इग्र आनिङ्मिःल्ले़ थेआङ् ताप्फे़ःम्बा याःम्बक् मे़न्जोःक्के कुजिगःक्वाहाॽ नाप्तुङ्ङाङ् वाॽआने़भग्र, 5 आनिङ्मिःल्ले़ नाःत्ताआङ् सिॽआररो॥ खे़ल्ले़ आङ्गाॽ चे़प्पाआङ् से़त्ताररो हे़क्क्याङ् आधक्किन् खाम्मो लाप्फुसुररो॥ सेला 6 यहवे दाङ्बाए, साॽरिक् खुनिॽ सिक्के़बोःक्पा आनिङ्मिहाॽरे़ खुनिॽ तक्ले़ङ्वाओ के़साक्के़न् फोःक्खे़ॽआङ् फाॽराङ्ङे़ॽओ! हे़क्क्याङ् पोगे़ॽआङ् खे़ङ्हाॽ खासे़न् चोगे़से़ॽओ॥ 7 के़रे़क् मे़न्छाम् सुवाङ्हाॽ के़घिरि सुप्से़से़ॽओ, हे़क्क्याङ् खे़ङ्हाॽ थोलाम्बा हाङ्युक् चोगे़से़ॽओ॥ 8 यहवे दाङ्बे़ल्ले़ मे़न्छाम् सुवाङ्हाॽ खासे़न् लोःन्दुसिरो, यहवे दाङ्बाए, आङ्गाॽ साम्योबा नु कुदोःप्मा चोःक्काबा कुइसिक् आङ्गाॽ ले़प्माङ् खासे़न् लोःन्दे़ॽओ॥ 9 साम्योबा निङ्वाॽफुमाङ्ङे, आनिगे निङ्वाॽ नु सिक्लुङ्मान् के़साॽरुरो॥ ताक्के़भे़ॽबाहाॽरे़ खुनिॽ फे़न्याःम्बक्किन् नुप्से़ॽओ हे़क्क्याङ् साम्योबा मनाहाॽ हाङ्से़म् पिरे़से़ॽओ॥ 10 निङ्वाॽफुमाङ्ङिन् याप्मि ताङ्गे़से़ःप्पा खोरो, हे़क्क्याङ् कुइङ्जाङ् के़इःप्पा के़नाःप्पाहाॽ से़ःप्तुसिरो॥ 11 निङ्वाॽफुमाङ्ङिन् साम्योबा खासे़न्दाङ्बा चोक्लो, हे़क्क्याङ् थिक्याःन्धक् ताक्के़भे़ॽबाहाॽ पाःन्धिक्तुसिरो॥ 12 खे़ङ्हाॽरे़ लायो चोःक्मा मे़न्ले़रुन्ने़भग्र निङ्वाॽफुमाङ्ङिल्ले़ कुदाभेन् याराप्तुरो, हे़क्क्याङ् आप्मा फाॽआङ् तोङ् लिन् याङ्सिङ्लो॥ 13 खुने़ॽ आसे़त्से़प्पा कुभे़जुम् कुभे़याहाॽ याङ्सिङ्ङाङ् वाॽरो, हे़क्क्याङ् खुने़ॽ कुदोःङ्हाॽ आप्मारे़ लागि मिगे़दिःप्पा चोगुआङ् याङ्सिङ्लो॥ 14 आत्तिन्हाॽरे़ ताप्फे़ःम्बा मे़इःत्तुआङ् निङ्वाॽओ मे़युक्खुॽ, खे़ङ्हाॽरे़ ताप्फे़ःम्बा याःम्बक् मे़जोगुरो॥ 15 खे़ङ्हाॽरे़ याप्मिहाॽ थामासि फाॽआङ् मे़भाःन्दुबा लुम्बाःत्तो आबाङे मे़धारो॥ 16 खे़ङ्हाॽरे़ मे़जोगुबा फे़न्याःम्बक्किन् आबाङे खुनिॽ थे़गेःक्पो थारो, हे़क्क्याङ् वेॽहाॽ खाःम्मासि मे़लॽरो कर आबाङे मे़घाःन्छिङ्लो॥ 17 निङ्वाॽफुमाङ्ङिन् नुगे़न् पिरुङ्लो, थेआङ्भे़ल्ले़ खुने़ॽ साम्योबा चोक्लो, हे़क्क्याङ् के़रे़क्नुःल्ले़ पयम् यम्बा यहवे दाङ्बे़ल्ले़ कुनारा फोसुङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.