निङ्वाॽफु साम्लोसुम् 59 - लिम्बुसे़ःप्सिङ्मारे़ लागि पेलि फाक्मा साम्लो के़हुॽबाल्ले़ लागि “मे़मे़क्खे़न्ने़ॽ” के़लॽबा इत्लाओ दाउदरे़ मिक्ताम् कुसाम्लो 1 आनिङ्वाॽफुमाङ्ङे, आनिङ्मिहाॽलाम् से़ःप्ताङ्ङे़ॽओ, आदक्ले़ङ्वाओ के़बोःक्पाहाॽलाम् नाङाङ्ङे़ॽओ॥ 2 ताक्के़भे़ॽबाहाॽलाम् से़ःप्ताङ्ङे़ॽओ, हे़क्क्याङ् मना के़से़प्पाहाॽलाम् नाङाङ्ङे़ॽओ॥ 3 ओमे़त्ते़ॽओ, खे़ङ्हाॽरे़ से़प्मा फाॽआङ् आङ्गाॽ मे़सुक्काआङ् मे़युङ्लो॥ यहवे दाङ्बाए, आङ्गाॽ थेआङ् याःम्बक् मे़म्भेःन्ने वाॽआरो हे़क्क्याङ् लायोए मे़न्जोःक्के वाॽआसाङ् कुइगे़भे़म्बा मनाहाॽरे़ आङ्गाॽ आदक्ले़ङ्वाओ चे़म्भन् मे़जोगुरो॥ 4 थेआङ् मे़म्मे़त्छेसाङ् खे़ङ्हाॽरे़ आङ्गाॽ हिप्मा थक्मा मे़जोःक्कारो॥ आङ्गाॽ के़साक्पो थ्याङ्बान् ओमे़त्ते़ॽआङ् आङ्गाॽ आभाॽसे़ पोगे़ॽओ॥ 5 मुक्साम्दाङ्बा यहवे दाङ्बाए, खे़ने़ॽग इस्राइलसमा निङ्वाॽफुमाङ्ने़रो, के़रे़क् इक्सादिङ् खाम्बेःक्मोबा मे़न्छाम् सुवाङ्हाॽ खुम्दिङ् पिमासिरे़ लागि पोगे़ॽओ, हे़क्क्याङ् ताक्के़भे़ॽबा इङ्ले़क्स्वाबाहाॽ लुङ्माॽ मे़दुक्ते़से़न्ने़ॽओ॥ सेला 6 युःन्छिक् थक्मा खे़ङ्हाॽग ख्याबा कुइसिक् ङे़र्ङे़र मे़लॽर ये़क्यक् खिरि ताक्मे़गन्लो॥ 7 खे़ङ्हाॽरे़ आङ्गाॽ मे़भे़ःक्काआङ् आजाःत्थि मे़देसुबान् खे़प्से़ॽओ, खे़ङ्हाॽरे़ खुनिॽ ले़सोःप्पान् ताभे हे़क्के लॽरो, हे़क्केसाङ् आनिगे हाःत्ले़ खे़प्सिगे़बे लॽरिक् मे़इःत्तुरो॥ 8 कर यहवे दाङ्बाए, खे़ङ्हाॽ ओगे़मे़त्तुसिआङ् के़एःत्लो, के़रे़क् इक्सादिङ् खाम्बेःक्मोबा मे़न्छाम् सुवाङ्हाॽ खे़ने़ॽ किनाःन्दि के़बिरुसिरो॥ 9 खे़ने़ॽग आङ्गाॽ आमुक्साम्ने़रो, आङ्गाॽ के़से़ःप्पा फाॽआङ् नसान् चोगुङ्लो, निङ्वाॽफुमाङ्ङे खे़ने़ॽग आइःम्सिङ्मादे़न् यक्ने़रो॥ 10 आनिङ्वाॽफुमाङ्ङिल्ले़ आङ्गाॽ लुङ्माॽ तुक्कारो, हे़क्क्याङ् निङ्वाॽफुमाङ्ङिन् आदगि पेःक्काङ् आङ्गाॽ आनिङ्मिहाॽ नाःन्दुङ्सिङ्बान् ओमे़प्मा खोसुङ्ल चोःक्कारो॥ 11 कर आनिगे याप्मि ताङ्गे़से़ःप्पा खो आनिगे निङ्वाॽफुमाङ् यहवे दाङ्बाए, खे़ने़ॽ खे़ङ्हाॽ मे़से़रे़से़न्ने़ॽओ, मेःन्ने़भग्र आमनाहाॽरे़ खे़ङ्हाॽ निङ्वाॽ मे़भेःत्छुसिरो॥ के़मुक्साम्मिल्ले़ खे़ङ्हाॽ काक् पिसाङ् फुत्छिङ्छाःङ् से़से़से़ॽआङ् यो मक्थासे़से़ॽओ॥ 12 खे़ङ्हाॽ लायो इस्सेःङ्बा पान् मे़बाःप्पाल्ले़ चोगुल्ले़ आङ्दिङ् लॽमा इजोओ मे़धाररो, थेआङ्भे़ल्ले़ साक्मुरा माङ्दे मे़बाःत्ताङ् खे़ङ्हाॽ इङ्ले़क् मे़जोक्लो॥ 13 के़साक्के़न् फोःक्खे़ॽआङ् खे़ङ्हाॽ मे़क्खे़से़ॽओ, खे़ङ्हाॽ खाप्पुथ्यःङ् मे़म्बोङ्ङे मे़ले़रे़से़न्ने़ॽओ॥ हे़क्क्याङ् निङ्वाॽफुमाङ्ङिल्ले़ इस्राइल लाजेॽओ हाङ् चोगु के़लॽबान् काक् इक्सादिङ् खाम्बेःक्मोबा के़रे़क् मनाहाॽरे़ निङ्वाॽ मे़घोसुरो॥ सेला 14 युःन्छिक् थक्मा खे़ङ्हाॽग ख्याबा हे़क्के ङे़र्ङे़र मे़लॽरो हे़क्क्याङ् ये़क्यक् खिरि ताक्मे़गन्लो॥ 15 खे़ङ्हाॽ कुजा मे़गोःत्ल ताक्मे़गन्लो, हे़क्केसाङ् खाघा कुजा चामा मे़ङ्घोसुन्नाङ् खे़ङ्हाॽ इम्से़ मे़बेःक्लो॥ 16 कर आङ्गाॽग के़मुक्साम्मिल्ले़ कुयाःम्बेओ साम्लोआरो, हे़क्क्याङ् तानाम्सा के़मिःम्जिःल्ले़ कुयाःम्बेओ नारा फोसुङ्लो, थेआङ्भे़ल्ले़ खे़ने़ॽग आयक् नु तुक्खे तुम्माबा ये़म्मो आइःम्सिङ्मादे़न् के़बोक्खे़आङ् के़वाॽरो॥ 17 निङ्वाॽफुमाङ्ङे, खे़ने़ॽग आमुक्साम्मिल्ले़ कुबुन्ने़रो, आङ्गाॽ साम्लोआर के़नारा फोसुङ्लो, खे़ने़ॽग आसे़ःप्सिङ्मादे़न् यक्ने़रो, हे़क्क्याङ् आङ्गाॽ लुङ्माॽ के़दुक्पा निङ्वाॽफुमाङ्ने़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.