निङ्वाॽफु साम्लोसुम् 57 - लिम्बुनिङ्वाॽफुमाङ्ङो पेलि फाक्मा साम्लो के़हुॽबाल्ले़ लागि “मे़मे़क्खे़न्ने़ॽ” के़लॽबा इत्लाओ दाउदरे़ मिक्ताम् कुसाम्लो 1 आङ्गाॽ लुङ्माॽ तुक्ताङ्ङे़ॽओ, आनिङ्वाॽफुमाङ्ङे, लुङ्माॽ तुक्ताङ्ङे़ॽओ, थेआङ्भे़ल्ले़ आङ्गाॽ खे़ने़ॽओए से़ःप्सिङ्ङारो, कन् तुक्खेन् वाॽर थारिक् आङ्गाॽ खे़ने़ॽ के़लाप् सिगाङ् इःम्सिङ्ङारो॥ 2 के़रे़क्नुःल्ले़ पयम् यम्बा निङ्वाॽफुमाङ्ङिन् उःत्तुङ्लो, आलागि खुने़ॽ चोःक्मा कोःत्तुबा पाःन्हाॽ के़त्तुरो॥ 3 खुने़ॽ साङ्ग्राम्पेदाङ्लाम्बा नुगप् पिआआङ् से़ःप्पारो, हे़क्क्याङ् आङ्गाॽ तुक्खे के़जाःप्पाहाॽ फे़ःक्तुसिॽरो॥ निङ्वाॽफुमाङ्ङिल्ले़ थधप् मे़ल्लॽमनाबा कुमिःम्जिन् नु नसान् चोःक्मा सुक्के़दे़प्पा चोःक्पा पाःन्निन् ओसेःन्दाङ् चोगुरो॥ सेला 4 मना के़जाबा खिरिङ्बाहाॽ कुइसिःक्पा आनिङ्मिहाॽरे़ आङ्गाॽ मे़गप्पारो॥ खे़ङ्हाॽरे़ खुनिॽ हाबोॽबाङ्ग लाःक् नु तोङ् हे़क्के लॽरो, हे़क्क्याङ् खुनिॽ ले़सोःप्पान् ताभे कुइसिक् चोक्लो॥ 5 निङ्वाॽफुमाङ्ङे, खे़ने़ॽग साङ्ग्राम्पेदाङ्नुःल्ले़आङ् थोधोक् के़युङ्बा के़जोःक्लो, हे़क्क्याङ् के़मिमिदिङ्ङिल्ले़ काक् इक्सादिङ् खाम्बेःक्मान् ते़प्तुआङ् वाॽरो॥ 6 आनिङ्मिहाॽरे़ आङ्गाॽ आदे़म्से़ इमे़युक्ताङ्ङाङ् ने़रो, निङ्वाॽ तुक्खे चामारे़ आङ्गाॽ योःन्दाङ्ङाङ् वाॽआरो॥ खे़ङ्हाॽरे़ आलाङ्घेःक्मा लाम्मो लुम्बात् मे़दयुआङ् ने़रो कर खे़ङ्हाॽ आबाङे खे़प्मो मे़ध्ये़आङ् मे़वाॽरो॥ सेला 7 निङ्वाॽफुमाङ्ङे, आसिक्लुङ्मान् हाङ्हाङ् लॽरो, हे़क्क्याङ् आङ्गाॽ साम्लोआर मुक्ला मुक्खुङ्लो॥ 8 आङ्गाॽ आनिङ्वाॽसाम्मे, पोगे़ॽओ, तुङ्ना नु कङ्निन् लागे़इक्पा पोःक्खे़ॽओ, आङ्गाॽ नाम् के़त्ल याःन्दुङ्लो॥ 9 यहवे दाङ्बाए, मे़न्छाम् सुवाङ्लुम्मो के़नारा फोसुङ्लो, इक्सादिङ् खाम्बेःक्मोबा मे़न्छाम् सुवाङ्हाॽलुम्मो आङ्गाॽ नुगे़न् पिने़र साम्लोआरो॥ 10 थेआङ्भे़ल्ले़ चक्मे़ल्लॽमना के़मिःम्जिन् साङ्ग्राम्पेदाङ् थारिक् के़त्लो हे़क्क्याङ् नसान् चोःक्मा सुक्के़दे़प्पा के़जोक् के़लॽबा पाःन्निन् काक् ताङ्साङ्धो के़त्लो॥ 11 निङ्वाॽफुमाङ्ङे, खे़ने़ॽग साङ्ग्राम्पेदाङ्नुःल्ले़आङ् थोधोक् के़युङ्बा के़जोःक्लो, हे़क्क्याङ् के़मिमिदिङ्ङिल्ले़ काक् इक्सादिङ् खाम्बेःक्मान् ते़प्तुआङ् वाॽरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.