निङ्वाॽफु साम्लोसुम् 55 - लिम्बुइङ्मे़ले़क्तुबा मनाःल्ले़ कुबेलि साम्लो के़हुॽबाल्ले़ लागि अन्मे मुक्लाहाॽनुबा दाउदरे़ मस्किल कुसाम्लो 1 निङ्वाॽफुमाङ्ङे, चोगुङ्बा तुवान् खे़प्साङ् पिराङ्ङे़ॽओ, हे़क्क्याङ् पेलि फाक्ने़बान् खे़म्मा मे़नाॽरे़न्ने़ॽओ॥ 2 आङ्गाॽ पाःत्तुङ्बा पाःन्निन् खे़प्से़ॽओ, हे़क्क्याङ् नुगप् पिराङ्ङे़ॽओ, आनिङ्वाॽबाल्ले़ ये़ःङ्ङाआङ् नासाङ्ङाङ् वाॽआरो॥ 3 आनिङ्मिहाॽरे़ आङ्गाॽ यङ्मा मे़से़त्तारो हे़क्क्याङ् कुइगे़भे़म्बाहाॽरे़ तुक्खे मे़जाःत्ताबाल्ले़ चोगुल्ले़ आङ्गाॽ यराङ्ङाङ् वाॽआरो॥ खे़ङ्हाॽरे़ आसम्दाङ् तुक्खे लाक्खे मे़दारुरो, खे़ङ्हाॽरे़ खुनिॽ सिक्पोःक्काङ् मे़जिःत्तारो॥ 4 आङ्गाॽ पगिकिआर वाॽआरो, हे़क्क्याङ् आसि फाॽआङ् किमारे़ यङ्ङारो॥ 5 किमा नु यङ्माल्ले़ कब्रिङ् कबाङ्ङाङ् वाॽआरो, हे़क्केलॽरिक् यङ्मा के़प्माल्ले़ एःप्ताङ्ङाङ् वाॽआरो॥ 6 पुत्तुःक्के हे़क्के आलाप् पत्छे़ल्ले़ग आङ्गाॽ पे़राङ् पेगाङ्बा वये़मे़न्लो हे़क्क्याङ् नाःम्सिङ्ङाबा वये़मे़न्लो॥ 7 हे़क्केलॽरिक् माःङ्घा पे़राङ् पेगाङ्बा वये़मे़न्लो, हे़क्क्याङ् मुरे़ःक् खे़रे़ःक् थेआङ् के़होप्पादे़न्नो आङ्गाॽ वयाङ्मे़न्लो॥ सेला 8 किप्मा के़घुबा सुरित् केजङ्लाम् माःङ्घा, से़ःप्सिङ्मा ते़न्नो हारा चात्ताङ्ल पेगाङ्बा वये़मे़न्लो॥ 9 यहवे दाङ्बाए, फे़न्याःम्बक् के़जोःक्पाहाॽरे़ चोःक्मा मे़गोःत्तुबा याःम्बक्हाॽ फे़त्लाःन्दे़ पिरे़से़ॽओ॥ हे़क्क्याङ् खे़ङ्हाॽरे़ खुनिॽ पाःन्दाङ्हाॽआङ् फोःत्ते़ पिरे़से़ॽओ॥ थेआङ्भे़ल्ले़ ये़क्यक्को खे़माॽ नु से़त्छिङ्मा पोःक्खे़बा निसुङ्लो॥ 10 से़न्दिक् ले़न्दिक् खे़ङ्हाॽरे़ ये़क्यक् खिरिबा लुङ्धाक्किन् मे़लिङुआङ् कम्ब्राङ् मे़मे़त्तुरो कर खे़न् ये़क्यक्किङ्ग लायो लासोत् नु फे़न्याःम्बक् इसेःङ्बा चोक्लो॥ 11 के़रे़क् पिसाङ् मे़क्मासिमा पोःक्खे़आङ् वाॽरो, यङ्मा से़त्छिङ्मा नु इङ्ले़क् मे़त्छिङ्मा पाःन्हाॽरे़ खे़प्मोबा लाम्हाॽ तिम्से़आङ् ने़रो॥ 12 आनिङ्मिहाॽरे़ आजाःत्थि मे़देसुबा वये़ल्ले़ग आङ्गाॽ आसिक् नःम्नःम् मे़त्तुङ्बा वये़मे़न्लो॥ आनिङ्मिहाॽरे़ मे़भत्ताङ्ङिल्ले़ग आङ्गाॽ चिङ्सिङ्मा सुक्ताङ्बा वये़मे़न्लो॥ 13 कर खे़ङ्ग आङ्गाॽनुए याःम्बक् के़जोःक्पा मनाःल्लो, हे़क्क्याङ् आङ्गाॽनु के़दङ्बा आन्देङ्बान्लो॥ 14 कुभा ये़म्मो खे़न्नु आन्छिगे साॽरिक् नुरिक् तङे़सिगे़आङ् वये़सिगे़रो, हे़क्क्याङ् माङ्हिम्मो लत्छा पोःक्खे़सिगे़आङ् से़वा चोगे़सिगे़रो॥ 15 आङ्गाॽ आनिङ्मिहाॽ मे़सिररो, हे़क्क्याङ् खे़ङ्हाॽ कुहिङ्वे़त्ते खे़मा यङ्सङ्ङो मे़लाःत्लरो, थेआङ्भे़ल्ले़ खे़ङ्हाॽरे़ खुनिॽ लुम्मो फे़न् पाःन्निन् याङ्धोःक्ते़आङ् वाॽरो॥ 16 कर आङ्गाॽग यहवे दाङ्बा निङ्वाॽफुमाङ्ङिन् फाॽराङ्ङे़ॽ फाॽआङ् मे़त्तुङ्लो हे़क्क्याङ् खुने़ॽ ताङ्से़ःप्पारो॥ 17 आङ्गाॽ आदुक्खेओ तानाम्, ले़न्दिक् हे़क्क्याङ् युःन्छिक् खुने़ॽ पेलि फाक्तुङ्लो, हे़क्क्याङ् खुने़ॽ आङ्गाॽ आइक्लान् खे़प्सुरो॥ 18 आङ्गाॽ थङ्थक्काबा ते़न्नो मे़न्जोःन्ने मे़ङ्गाःन्ने खुने़ॽ से़ःप्पारो, हे़क्केसाङ् यरिक्ले़ मे़अत्तारो॥ 19 उनाहुरिआङ्धो हाङ्गे़जोःक्पा निङ्वाॽफुमाङ्ङिल्ले़ आङ्गाॽ पेलि फाक्तुङ्बान् खे़प्सुआङ् आनिङ्मिहाॽ हारि चाःत्तुसिरो॥ सेला थेआङ्भे़ल्ले़ खे़ङ्हाॽरे़ खुनिॽ लाम्मिन् तोःम्मा निङ्वाॽ मे़न्जोगुन्लो हे़क्क्याङ् निङ्वाॽफुमाङ्ङिन् मे़ङ्गिरुन्लो॥ 20 आन्देङ्बाल्ले़ आबाङे कुन्जुम्हाॽ हिप्तुसि फत्तुसिरो, हे़क्केलॽरिक् खे़ल्ले़ चोगुबा कुमाङ्हुप्पिन् फेःन्दुआङ् वाॽरो॥ 21 खे़ल्ले़ कुबाःन्निङ्ग कुघे़म् के़नुॽबा चोःक्साङ् कुनिङ्वाॽइन्ग ताप्फे़ःम्बा चोक्लो॥ खे़ल्ले़ कुबाःन्निन् चुन्जुम्बा चोःक्साङ् खे़ङ्ग खागे़सुक्पा ताभे कुइसिक् चोक्लो॥ 22 के़दुक्खे के़लाक्खेहाॽ यहवे दाङ्बाओ युक्खे़ॽओ, हे़क्क्याङ् खुने़ॽए ओगे़मे़त्लो॥ खुने़ॽग साम्योबा मनाहाॽ आभे़ल्ले़आङ् यो मे़धासुसिन्लो॥ 23 कर यहवे दाङ्बाए, कुइगे़भे़म्बा मनाहाॽग मे़क्मासिमा लुम्बाःत्तो लाप्के़भुसुसिरो॥ मना के़से़प्पाहाॽ नु इङ्ले़क् के़जोःक्पा मनाहाॽ खुनिॽ थाःक् सॽआङ् इरिक् मे़न्हिङ्ने़ल्लो, कर आङ्गाॽग खे़ने़ॽओ ताःक्पो युक्खुङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.