निङ्वाॽफु साम्लोसुम् 51 - लिम्बुलायोलाम् हिम्मा पेलि माङ्निङ्वाॽपान् के़बाःप्पा नाथाने़न् खुने़ॽओ त्ये़आङ् एगाङ् साम्लो के़हुॽबाल्ले़ लागि दाउदरे़ कुसाम्लो 1 निङ्वाॽफुमाङ्ङे, आभे़ल्ले़साङ् चक्मे़ल्लॽए लुङ्माॽ के़दुक्काबा हे़क्के नुरिक् मे़त्ताङ्ङे़ॽओ, पयम् यम्बा के़मिःम्जिःल्ले़ आङ्गाॽ आलायोन् खे़त्ते़देसे़ पिराङ्ङे़ॽओ॥ 2 के़रे़क् आलायोहाॽ वाहप्ते़ पिराङ्ङे़ॽओ, हे़क्क्याङ् लायो लासोःत्ले़ मे़न्दे़त्ते आङ्गाॽ सुत्थो चोगाङ्ङे़ॽओ॥ 3 थेआङ्भे़ल्ले़ आङ्गाॽ लायो चोगुङ्बा पाःन्नो ते़न्नारो, हे़क्क्याङ् आभे़ल्ले़साङ् आलायोहाॽ निङ्वाॽ खोसुङ्लो॥ 4 खे़ने़ॽ के़दक्ले़ङ्वाओ, खे़ने़ॽए के़दक्ले़ङ्वाओ आङ्गाॽ लायो चोगुङ्ङाङ् वाॽआरो, हे़क्क्याङ् खे़ने़ॽ के़निसुल्ले़ ताप्फे़ःम्बा निगे़धाःप्पा पाःन्हाॽए आङ्गाॽ चोगुङ्ङाङ् वाॽआरो॥ खे़ल्ले़चोगुल्ले़ के़भे़ःक्काबान् लाॽरुरो, हे़क्क्याङ् खासे़न् के़लोःन्नाबान्नाङ् यारुरो॥ 5 से़क्खाए, सावाःन्छिङ्ङाले़ए लायोबा वयाङ्लो, आम्मारे़ कुसाप्पोःक्को यागाङ्बा ये़न्नाङ्धोए आङ्गाॽ लायोबा चोःक्कारो॥ 6 से़क्खासाङ् खे़ने़ॽग से़क्खा नु नसाःन्साबा पोङ्ङाबा के़सिराॽधाङ्लो, हे़क्क्याङ् आसिक्लुङ्मोए सिक्कुम्दिङ् निङ्वाॽरे़ पाःन्हाॽ के़हुॽआरो॥ 7 हिसप्पिन् आङ्गाॽ आसम्दाङ् साक्खे़ॽओ हे़क्क्याङ् आङ्गाॽ सुत्थो पोङ्ङारो॥ वाहप्ताङ्ङे़ॽओ हे़क्क्याङ् नाःङ् कुइसिक् आङ्गाॽ फगे़लॽबा पोङ्ङारो॥ 8 सःप्मा नु सिराॽगे़धाङ्बा इक्लाहाॽ आङ्गाॽ खे़म्मा खोसुङ्लरो, हे़क्क्याङ् आये़प्पाहाॽ यरे़र के़याःन्दुरो, हे़क्केसाङ् आङ्गाॽ सःत्ताररो॥ 9 आलायोहाॽ ले़प्माङ् के़नारान् मे़हिसे़न्ने़ॽओ, हे़क्क्याङ् के़रे़क् माङ्दे साङ्ग्रारे़ आङ्गाॽ ते़त्ताङ्बाहाॽ तुगे़देसे़ॽओ॥ 10 निङ्वाॽफुमाङ्ङे, आसिक्लुङ्मान् सुत्थो चोगाङ् पिराङ्ङे़ॽओ, हे़क्क्याङ् कुसङ् नु खे़ने़ॽ ले़प्माङ् के़वाॽबा याम्साम् पिराङ्ङे़ॽओ॥ 11 के़दगिलाम् आङ्गाॽ मे़घे़त्ताङ्ङिन्ने़ॽओ, हे़क्केलॽरिक्के के़सेसेमाङ्ङिन् आङ्गाॽओनु मे़देॽरे़न्ने़ॽओ॥ 12 के़से़न्लप्लाम्बा के़दाबा सःप्मान् याम्मो पिराङ्ङे़ॽओ, हे़क्क्याङ् आयाम्साम्मिन् खे़ने़ॽ के़बान् खे़म्मा कुसिराॽ के़धाङ्बा चोगाङ् पिराङ्ङे़ॽओ॥ 13 खे़ब्याङ् लायोबाहाॽ के़निसाम्मिन् हुॽरुङ्सिङ्लो, हे़क्क्याङ् खे़ङ्हाॽ खे़ने़ॽओ मे़नुःङ्लो॥ 14 निङ्वाॽफुमाङ्ङे, से़न्लप्दाङ्बा आनिङ्वाॽफुमाङ्ङे माक्खिॽ से़मा आप्तिक्को थामालाम् से़ःप्ताङ्ङे़ॽओ, हे़क्क्याङ् खे़ने़ॽ साम्योबा के़जोःक्पा पाःन्निल्ले़ साम्लोन् साम्मे़त्तुङ्लो॥ 15 दाङ्बाए, आम्ब्रा हन्दाङ् पिराङ्ङे़ॽओ, हे़क्क्याङ् आल्सोःप्पाल्ले़ के़नारा फोसुङ्लो॥ 16 थेआङ्भे़ल्ले़ खे़ने़ॽग सिदुङ्जभाओ के़न्छःत्ने़ल्लो, मेःन्ने़भग्र खे़ने़ॽओ सिदुङ्जभा तोःन्दुङ्बा मे़न्लो, मिधिङ्मनादेमनाबा सिदुङ्जभान् खे़ने़ॽ के़सिराॽ मे़धाङ्ने़ल्लो॥ 17 निङ्वाॽफुमाङ्ङे, के़नःम्सिङ्बा याम्साम्मिल्ले़ सिदुङ्जभान् खे़ने़ॽ ताःक्मा के़सिराॽधाङ्लो, हे़क्क्याङ् कुसिक् के़नःम्बाआङ् लायोलाम् के़नुःङ्बा सिक्लुङ्मान् के़न्नाॽरुन्लो॥ 18 खे़ने़ॽ के़निङ्वाॽ कुइसिक् सियोन कोःक्माओ नुॽमादामा तारे़ॽओ, यरुसले़ःम्बा लुङ्धाक्हाॽ याम्मो से़त्ते़ॽओ॥ 19 खे़ब्याङ् नुबा निङ्वाॽलाम्बा तोःम्मनाबा, मिधिङ्मनादेमनाबा सिदुङ्जभाहाॽ के़सिराॽ थाङ्लो, के़रे़क् मिधिङ्मनादेमनाबा सिदुङ्जभाहाॽ हे़क्क्याङ् से़गम्बाहाॽरे़न् सिदुङ्जभान् खे़ने़ॽ के़लागि ले़त्ति तोःम्मादे़न्नो याम्मो तोःन्दुम्बे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.