निङ्वाॽफु साम्लोसुम् 5 - लिम्बुसे़ःप्सिङ्मा पेलि साम्लो के़हुॽबाल्ले़ लागि मुफ्रामा मुक्लानु साम्मे़प्नाबा दाउदरे़ कुसाम्लो 1 पेलिगे़न् आबाःन्हाॽ खे़प्से़ॽओ, यहवे दाङ्बाए, आङ्गाॽ याःत्ताआल्ले़ खे़प्साङ्ङे़ॽओ॥ 2 आहाङ् नु आनिङ्वाॽफुमाङ्ङे, चोगुङ्बा तुवान् खे़प्साङ् पिराङ्ङे़ॽओ हे़क्क्याङ् आङ्गाॽ फाॽराङ्ङे़ॽओ, थेआङ्भे़ल्ले़ आङ्गाॽ खे़ने़ॽरक् तुवा चोःक्ने़रो॥ 3 यहवे दाङ्बाए, तानाम्सा आइक्लान् खे़प्से़ॽओ, खाओःत्तिल्ले़सा खे़ने़ॽ के़दगाङ् आदुवान् तोःन्दुङ्लो, हे़क्क्याङ् निङ्साङ् चोगुङ्ल हाङ्घुङ्लो॥ 4 ताप्फे़ःम्बा पाःन्नो के़सःप्पा निङ्वाॽफुमाङ्ने़ग मेःन्लो, खे़ने़ॽनु ताप्फे़ःम्बा पान् वाॽमा मे़सुक्ने़ल्लो॥ 5 के़हे़न्छिङ्बा मनाःङ्ग खे़ने़ॽ के़दगि ये़प्मा मे़सुक्ने़ल्लो, फे़न्याःम्बक् के़जोःक्पा के़रे़क् खे़ने़ॽ के़जिःत्तुसिरो॥ 6 इङ्ले़क् के़बाःप्पाहाॽग खे़ने़ॽ के़मे़क्खुसिरो, मना के़से़प्पाहाॽ नु इङ्ले़क् के़जोःक्पाहाॽ के़रे़क् के़जिःत्तुसिरो॥ 7 कर खे़ने़ॽग साॽरिक् लुङ्माॽ आदुक्तुक्पा के़जोःक्लो खे़ल्ले़चोगुल्ले़ आङ्गाॽ के़हिम्मो लाःत्ताॽरो, सेसे के़हिम्मो साम्बोन् फन्छिङ्ङाआङ् से़वा मे़त्ने़रो॥ 8 यहवे दाङ्बाए, आनिङ्मिहाॽरे़ मे़सुक्कार मे़वाॽरो खे़ल्ले़चोगुल्ले़ के़साम्योनिमा लाम्मो लाम्लोसाङ्ङे़ॽओ, के़माराम्मिन् आदगि तोःन्दोन् चोगाङ् पिराङ्ङे़ॽओ॥ 9 खे़ङ्हाॽरे़ खुनिॽ मुराओ से़क्खान् होप्लो, हे़क्क्याङ् खुनिॽ सिक्लुङ्मान् ताप्फे़ःम्बा पाःन्निल्ले़ के़दिम्बा चोक्लो, खुनिॽ मुरान् हल्ले़क् के़ने़बा इपुङ् कुइसिक् चोक्लो, खे़ङ्हाॽग इङ्ले़क्लक् मे़बाःत्लो॥ 10 निङ्वाॽफुमाङ्ङे, खे़ङ्हाॽ आप्तिक् कुःत्ते़से़ॽओ हे़क्क्याङ् खुम्दिङ् पिरे़से़ॽओ, खुनिॽ चे़म्भन्निल्ले़ आबाङे मे़मे़क्निरो॥ खे़ङ्हाॽ यरिक् खुनिॽ लायोल्ले़ चोगुल्ले़ लाप्फुसे़से़ॽओ, थेआङ्भे़ल्ले़ खे़ङ्हाॽ के़दक्ले़ङ्वाओ मे़बोगे़आङ् मे़वाॽरो॥ 11 कर खे़ने़ॽओ ताङ्से़ःप्सिङ्से़ के़इःम्सिङ्बाहाॽ के़रे़क् मे़सःत्लरो, हे़क्क्याङ् सदादिङ् खुन्छिॽ सिक्सम्माङ् साम्मे़लोररो॥ खे़ने़ॽ आबाङे खे़ङ्हाॽ ताङ्से़ःप्ते़से़ॽओ, के़मिङ्ङिन् मिङ्सो इङ्धाङ् के़बिबाहाॽ खे़ने़ॽओ मे़सःत्लरो॥ 12 थेआङ्भे़ल्ले़ यहवे दाङ्बाए, साम्योबाहाॽ हाङ्वामुॽइ के़धासु के़बिरुसिरो, खोःल्ले़ आधेःक्पा कुइसिक् के़मिःम्जिःल्ले़ खे़ङ्हाॽ के़से़ःप्तुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.