निङ्वाॽफु साम्लोसुम् 44 - लिम्बुसे़ःप्सिङ्मारे़ लागि पेलि साम्लो के़हुॽबाल्ले़ लागि कोरहरे़ कुस्साहाॽरे़ खुन्छि मस्किल 1 निङ्वाॽफुमाङ्ङे, यरिक् तङ्बे तगि खे़ने़ॽ के़जोगुबा निङ्वाॽ के़माबा याःम्बक्हाॽ आनिगे पाधे़बाहाॽरे़ मे़जे़क्तिगे़रो, खे़न् आनिगे आबाङे ने़क्खोबाल्ले़ खे़प्सुम्बे़आङ् वाॽरो॥ 2 निङ्वाॽफुमाङ्ङिन् नसान् मे़न्जोःक्मनाबा सुवाङ्हाॽ इक्सादिङ् खाम्बेःक्मोबा के़मुक्साम्मिल्ले़ के़नाःत्तु के़देसुसिरो हे़क्क्याङ् खुन्छिॽ लाजेॽओ आनिगे पाधे़बाहाॽ के़युक्खुसिरो॥ आनिगे पाधे़बाहाॽरे़ खुनिॽ निङ्मिहाॽ यो के़धासुसिरो खे़ब्याङ् आनिगे पाधे़बाहाॽ नुॽमा तामा के़बिरुसिरो॥ 3 के़मनाहाॽरे़ लाजेन् फे़जाःल्ले़ मे़नाःन्दुबा मेःन्लो हे़क्क्याङ् आबाङे मे़धुम्दे़आङ् मे़नाःन्दुबाआङ् मेःन्लो कर के़मुक्साम् नु के़धुम्मिल्ले़ मे़नाःन्दुबारो॥ हे़क्क्याङ् खे़ने़ॽ खुन्छिॽनु के़वाॽ के़लॽबा ने़हिनिङ्वाॽरे़ निःन्धो मे़गत्तुबाल्ले़ चोगुल्ले़ थङ् मे़नाःन्दुबारो, थेआङ्भे़ल्ले़ खे़ङ्हाॽ खे़ने़ॽ लुङ्माॽ के़दुक्तुसिरो॥ 4 खे़ने़ॽग आहाङ् नु आनिङ्वाॽफुमाङ्ने़रो, खे़ने़ॽ याकुबरे़ कुसुवाङ्हाॽ निङ्मि के़नाःम्बा के़जोगुसिरो॥ 5 खे़ने़ॽ के़मुक्साम्लाम्बा आनिगे निङ्मिहाॽ नाःन्दुम्सिम्बे़रो, के़मिङ्ङोलाम्बा आनिगे तक्ले़ङ्वाओ के़बोक्पाहाॽ आनिगे लाःक्तुम्सिम्बे़रो॥ 6 कत्तुङ्बा लिःल्ले़ से़ःप्पा फाॽआङ् मे़इःत्ताल्लो, हे़क्क्याङ् कत्तुङ्बा ताभेःल्ले़आङ् आङ्गाॽ थङ् के़नाःम्बा मे़जोःक्काल्लो॥ 7 कर खे़ने़ॽने आनिगे निङ्मिहाॽ के़नाःम्बा आगे़जोगे़आङ् वाॽरो, हे़क्क्याङ् आनिगे तक्ले़ङ्वाओ के़बोःक्पाहाॽरे़ खुनिॽ नागे़धासु के़बिरुसिरो॥ 8 निङ्वाॽफुमाङ्ङे, आनिगे़ग सदादिङ् के़नारा फोसुम्बे़रो, हे़क्क्याङ् आभे़ल्ले़साङ् खे़ने़ॽ नुगे़न् पिआसिगे़रो॥ सेला 9 कर आल्लोग खे़ने़ॽ याप्मि के़नाॽरे़आङ् वाॽरो, हे़क्क्याङ् हारि त्ये़ॽइगे़र के़याःन्दुआङ् वाॽरो, आनिगे थक्सुबाहाॽ थङ् चोःक्मा के़म्भाॽरुन्छिल्लो॥ 10 निङ्मिहाॽनु थक्तिगे़ल्ले़ हारिगे़दाबाआङ् के़घे़त्छिङ्बा याप्मि के़जोगे़आङ् वाॽरो, हे़क्क्याङ् आनिगे तक्ले़ङ्वाओ के़बोःक्पाहाॽरे़ थ्याङ्ध्याङ् मे़नाप्तिगे़ मे़देॽरिगे़आङ् वाॽरो॥ 11 मे़ल्लुक् कुइसिक् आनिगे मे़से़रिगे़र फाॽआङ् इक्सादिङ् खाम्बेःक्मोबा मे़न्छाम् सुवाङ्हाॽओ याप्मि के़बिरे़आङ् वाॽरो॥ हे़क्क्याङ् वेॽ लाजेॽहाॽओ आनिगे याप्मि हत्छे़ के़से़से़आङ् वाॽरो॥ 12 आबाङे के़मना आनिगे़ग साॽरिक् सुःल्लिक् कुमे़ल्लुङ्ङो आग्सङ्घे़रो, खे़ॽयोलाम्बा थेआङ् इन्धाःक् के़ङ्घोसुल्लो॥ 13 आनिगे पाङ्भेॽसाबाहाॽरे़ खुनिॽ तगि आनिगे कुनामे़न्छाॽ याप्मि के़जोःक्लो, आनिगे खिर्लि के़वाॽबा मनाहाॽरे़आङ् नामे़न्छाॽ मे़मे़त्तिगे़आङ् मे़एःत्लो॥ 14 इक्सादिङ् खाम्बेःक्मोबा मे़न्छाम् सुवाङ्हाॽरे़ खुनिॽ चे़ङ्मालाम् आनिगे याप्मि के़जोगे़आङ् वाॽरो, खे़ङ्हाॽरे़ आनिगे मे़निसिगे़आङ् कुनामे़न्छाॽ मे़मे़त्तिगे़र खुन्छिॽ थे़गेःक्किन् तघुम्तघुम् मे़मे़त्तुरो॥ 15 ले़न्दिक् नाम्धाधा आजाःत्थि पेःक्मा नु नामे़न्छाॽ मे़मे़त्ताबा पाःन्हाॽ आङ्गाॽ खे़प्सुङ्ङाङ् आनाधाधा लॽरो॥ 16 आभे़ल्ले़साङ् कुनामे़न्छाॽ पोःक्खाङ्ङाङ् वाॽआरो, हे़क्क्याङ् आङ्गाॽ आनिङ्मिहाॽ नु आङ्गाॽ के़जिःप्पाहाॽरे़ मे़मे़त्ताबा खुनिॽ नामे़न्छाॽ पाःन्निन् खे़म्मारे़ खे़म्मारे़ आङ्गाॽ आनाध्ये़आङ् वाॽरो॥ 17 आनिगे खे़ने़ॽ निङ्वाॽमे़म्मुःन्ने वयिगे़रो, हे़क्क्याङ् खे़ने़ॽ आनिगे़नु के़जोगुबा माङ्हुप्पिन् के़त्तुम्बे़आङ् वयिगे़रो, हे़क्केसाङ् कन् के़रे़क् तुक्खेहाॽ तुमुम्बे़आङ् वयिगे़रो॥ 18 आनिगे खे़ने़ॽ निङ्वाॽ इःप्मा मे़न्ले़त्ते वयिगे़रो, के़लाम्मिन् ले़रुम्बे़आङ् वेॽ लाम्मो मे़म्बेःक्के वयिगे़रो॥ 19 कर खे़ने़ॽ आनिगे थे़युःत् थे़युःत् याप्मि के़युःत्ते़आङ् ताम्भुङ् थक्सा खा कुइसिक् याप्मि के़ले़रे़रो, माक्सिःङ्ग्याःप्पा खामाक्मो याप्मि लाप्के़भुसे़रो॥ 20 आनिगे निङ्वाॽफुमाङ्ङिल्ले़ कुमिङ्ङिन् निङ्वाॽफेःत्छुम्बे़आङ् वाॽने़भग्र इग्र वेॽ माङ्साम्माङ् ले़प्माङ् आनिगे निङ्वाॽ पिरुम्बे़आङ् वाॽने़भग्र, 21 से़क्खासाङ् निङ्वाॽफुमाङ्ङिल्ले़ निङ्वाॽ खोसुबा वये़मे़न्लो, थेआङ्भे़ल्ले़ खुने़ॽग निङ्वाॽ सिगाङ्बा सिबिॽ पाःन्हाॽ निसुरो॥ 22 कर खे़ने़ॽ नसान् चोःक्कासिगे़बाल्ले़ ले़न्दिक् खाराक् आनिगे़ग से़प्मा मे़गोःत्तिगे़रो, से़प्मा के़बोङ्बा मे़ल्लुक् हे़क्के मे़इःत्तिगे़आङ् वाॽरो॥ 23 दाङ्बाए, थेआङ् खे़ने़ॽ स्वाःत् के़युङ्बाबे! पोगे़ॽओ, सदादिङ्ले़ लागि लाप्आम्भुसे़न्ने़ॽओ॥ 24 थेआङ् खे़ने़ॽ के़जिङ्सिङ्बाबे! हे़क्क्याङ् आनिगे तुक्खे तुमिगे़आङ् निङ्घे़म्मो थ्ये़ॽइगे़ल्ले़ थेआङ् मे़न्निमना के़ले़ङ्सिङ्बाबे? 25 आनिगे़ग खाम्बाङ्ङो चोःन्दिगे़आङ् ने़स्सिगे़रो, हे़क्क्याङ् खाम्हिःक्को तङिगे़आङ् वयिगे़रो॥ 26 खे़ने़ॽ आनिगे फाॽसे़ ये़ॽओ! चक्मे़ल्लॽए आनिगे याप्मि लुङ्माॽ के़दुक्पाल्ले़ चोगुल्ले़ आसे़ःप्ते़ॽओ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.