निङ्वाॽफु साम्लोसुम् 42 - लिम्बुकुलक् ने़त्छि ( निङ् सुम् ४२–७२ ) माःङ्घाबा मनाःल्ले़ कुबेलि साम्लो के़हुॽबाल्ले़ लागि मस्किल मे़प्मनाबा कोरहरे़ कुस्साहाॽरे़ खुन्छि साम्लो 1 पे़ःङ्वान् वामिमाल्ले़ तरुल्ले़ वहःङ्ङोबा च्वाःत्तिन् थुङुङ्गो लॽरो, हे़क्केलॽरिक्के निङ्वाॽफुमाङ्ङे आयाम्साम्मिल्ले़ खे़ने़ॽ ओमे़प्मा नु तुम्मा साॽरिक्के निङ्वाॽ चोगुरो॥ 2 आयाम्साम्मिल्ले़ कुहिङ्वे़त् निङ्वाॽफुमाङ्ङिन् ओमे़प्मा नु तुम्मा साॽरिक्के कुसिराॽ थाङ्लो॥ आभे़ल्ले़ निङ्वाॽफुमाङ्ङिन् पेःक्माआङ् तुम्मा सुक्तुङ्बे? 3 आङ्गाॽ से़न्दिक् ले़न्दिक् हाःप्पारो, आङ्गाॽ चामा थुङ्माआङ् मे़सुक्काल्लो, हे़क्क्याङ् आनिङ्मिहाॽरे़ चक्मे़ल्लॽए अक्खे मे़मे़त्तारो, “के़निङ्वाॽफुमाङ्ङिन् आत्तो वाॽबे?” 4 उन्छेःम्बा पाःन्हाॽ इःत्तुङ्ङिल्ले़ आलुङ्माॽ हिःम्लो, के़बेःक्पा ये़म्हाॽओ मनाहाॽनु तङ्सिङ्ङारो, हे़क्क्याङ् खे़ङ्हाॽ तगितगि लाम्लोसुङ्सिङ्ल निङ्वाॽफुमाङ्ङिल्ले़ कुहिम्मो पेगाङ्लो, कुनिङ्वाॽ के़दाबा मनाहाॽनु सोरिक् साम्लोरिगे़र अःक्तिगे़र वयिगे़रो॥ 5 थेआङ् आङ्गाॽ आनिङ्वाॽ ताॽजे़ङ्बाबे? आङ्गाॽ थेआङ् अक्खेलॽरिक् आसक्मा हिःक्हिःक् लॽबाबे? आङ्गाॽग निङ्वाॽफुमाङ्ङिन् ओमे़त्तुङ्लो, हे़क्क्याङ् याम्मोआङ् आसे़न्लप्दाङ्बा नु आनिङ्वाॽफुमाङ्ङिन् कुनारा फोसुङ्लो॥ 6 आनिङ्वाॽफुमाङ्ङे! आङ्गाॽ साॽरिक् आनिङ्वाॽ ताॽजे़क्खे़आङ् वाॽरो॥ कर यर्दन यङ्घङ्बा लाजेॽलाम्बा हे़क्क्याङ् हर्मोन नु मिसार कोःक्मालाम्बा आङ्गाॽ निङ्वाॽ इःत्ने़रो॥ 7 के़वाधाःम्लाम्बा के़लःम्बा इक्लाओ वरःङ्ङिल्ले़ वरःङ्ङिन् मिङ् लोःक्खुरो, हे़क्क्याङ् काक् वाभे़ल्ले़ङ्ङिन् नु कुबुःत्थुङ्वाःल्ले़ ते़प्ताङ्ङाङ् वाॽआरो॥ 8 यहवे दाङ्बे़ल्ले़ थिक्याःन्धक् आभे़ल्ले़आङ् मे़म्बुॽए लुङ्माॽ तुक्कारो॥ हे़क्क्याङ् से़न्दिक् थप्मे आङ्गाॽ निङ्वाॽफुसाम्लोन् साम्मे़त्तुङ्लो, आङ्गाॽ हिङ्मन् के़बिबा निङ्वाॽफुमाङ्ङो तुवा चोःक्कारो॥ 9 आङ्गाॽ आयाक्पेॽ आनिङ्वाॽफुमाङ्ङिन् अक्खे मे़त्तुङ्ङाङ् पत्तारो, “थेआङ् खे़ने़ॽ निङ्वाॽ के़भेःत्छाङ्बाबे? थेआङ् आनिङ्मिहाॽरे़ तुक्खे मे़जाःत्तार के़साक्पा तुमुङ्ङाङ् वाॽबाबेॽ?” 10 आनिङ्मिहाॽरे़ के़निङ्वाॽफुमाङ्ङिन् आत्तो वाॽबे? लॽरिक् नाम्धाधा कुनामे़न्छाॽ मे़मे़त्तारो, हे़क्क्याङ् आङ्गाॽग खे़ङ्हाॽरे़ आनामे़धासुआङ् साॽरिक् आनिङ्वाॽ तुगे़आङ् वाॽआरो॥ 11 थेआङ् आङ्गाॽ आनिङ्वाॽ ताॽजे़ङ्बाबे? आङ्गाॽ थेआङ् अक्खेलॽरिक् आसक्मा हिःक्हिःक् लॽबाबे? आङ्गाॽग निङ्वाॽफुमाङ्ङिन् ओमे़त्तुङ्लो॥ हे़क्क्याङ् याम्मोआङ् आसे़न्लप्दाङ्बा नु आनिङ्वाॽफुमाङ्ङिन् कुनारा फोसुङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.