निङ्वाॽफु साम्लोसुम् 41 - लिम्बुके़दुक्पा मनाःल्ले़ फाक्तुबा पेलि साम्लो के़हुॽबाल्ले़ लागि दाउदरे़ कुसाम्लो 1 याङ्गे़साॽबाहाॽ कम्ब्राङ् के़मे़प्पाहाॽग मुॽइसाबासिरो, थेआङ्भे़ल्ले़ खे़ङ्हाॽ तुक्खेओ मे़धाःल्ले़ यहवे दाङ्बे़ल्ले़ खे़ङ्हाॽ से़ःप्तुसिरो॥ 2 यहवे दाङ्बे़ल्ले़ खे़ङ्हाॽ से़ःप्तुसिरो हे़क्क्याङ् खुने़ॽ खे़ङ्हाॽ हिङ्घुसिरो॥ इक्सादिङ् खाम्बेःक्को खे़ङ्हाॽ खुने़ॽ मे़नुॽमे़दार याःन्दुसिरो, हे़क्क्याङ् निङ्मिहाॽरे़ खुन्छिॽ हुक्को खे़ङ्हाॽ थामा मे़बाङ्घुसिन्लो॥ 3 यहवे दाङ्बे़ल्ले़ खे़ङ्हाॽ मे़दुक् मे़लाःक्किल्ले़ ओमे़त्तुसिरो, हे़क्क्याङ् खे़ङ्हाॽ याम्मो वेःन्दुसिरो॥ 4 आङ्गाॽ पाःत्तुङ्, “यहवे दाङ्बाए, आङ्गाॽ लुङ्माॽ तुक्ताङ्ङे़ॽओ हे़क्क्याङ् आङ्गाॽ वेःन्दाङ्ङे़ॽओ, थेआङ्भे़ल्ले़ आङ्गाॽ के़सिराॽ मे़न्धाङ्मना लायोबा याःम्बक् चोगुङ्ङाङ् वाॽआरो॥” 5 आनिङ्मिहाॽरे़ आङ्गाॽ मे़जिःत्तारो, हे़क्क्याङ् अक्खे मे़लॽरो “खे़न् आभे़ल्ले़ सिआङ् कुमिङ् माबे?” 6 आसाॽसे़ के़दाबाहाॽ नुबा निङ्वाॽओ मे़न्दाने़ल्लो, खे़ङ्हाॽ आत्ति मे़बेःक्साङ् आङ्गाॽ आयाःम्बेओ चे़ॽयारक् मे़बाःत्लो॥ 7 आङ्गाॽ के़जिःप्पाहाॽ सोरिक् मे़जुम्माङ् खुसुक् खुसुक् मे़जे़ङ्ङारो॥ हे़क्क्याङ् ताप्फे़ःम्बा मे़इःत्तारो, 8 खे़ङ्हाॽरे़ अक्खे मे़बाःत्तुरो, “खे़ङ्ग आप्फाल्ले़आङ् मे़न्वेःप्मनाबा तुक्माल्ले़ याङ्घुआङ् वाॽरो, खे़न् आप्फाल्ले़आङ् पोःक्मा मे़सुक्ने़ल्लो॥” 9 आङ्गाॽ आनिङ्वाॽ युक्खुङ्बा के़दङ्बा आङ्गाॽनु सोरिक् चा के़जाबा आन्जुम्मिन्नाङ् आदक्ले़ङ्वाओ पोगे़आङ् वाॽरो॥ 10 कर यहवे दाङ्बाए, आनिङ्मिहाॽरे़ मे़मे़त्ताङ्बाल्ले़ कुले़क्वा नुःक्मा सुक्तुङ्ल फाॽआङ् लुङ्माॽ तुक्ताङ्ङे़ॽआङ् वेःन्दाङ्ङे़ॽओ॥ 11 खे़ङ्हाॽरे़ नाःम्मा मे़न्छुक्कान्बाल्ले़ चोगुल्ले़ आङ्गाॽनु के़सःत्ते़आङ् के़वाॽबान् निङ्वाॽ खोसुङ्लो॥ 12 कुदोःप्मा याःम्बक् चोःक्काबाल्ले़ के़भाॽआरो, हे़क्क्याङ् के़वाॽमादे़न्नो सदादिङ् के़गत्तारो॥ 13 इस्राइलबा यहवे दाङ्बा निङ्वाॽफुमाङ्ङिल्ले़ आल्लो नु सदादिङ् कुनारा फोसे़म्मे़ॽओ॥ आमिन्! आमिन्!! |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.