निङ्वाॽफु साम्लोसुम् 25 - लिम्बुलाम्लोमा नु से़ःप्सिङ्मा पेलि दाउदरे़ कुसाम्लो 1 यहवे दाङ्बाए, आसिक्लुङ्मोलाम् आङ्गाॽ खे़ने़ॽ पेलि फाक्ने़रो, 2 आनिङ्वाॽफुमाङ्ङे, आङ्गाॽ खे़ने़ॽओए आनिङ्वान् युक्खुङ्ङाङ् वाॽरो, आनिङ्मिहाॽरे़ आङ्गाॽ मे़न्नाःन्नाल्लरो, हे़क्क्याङ् आङ्गाॽ आना मे़धाने़ल्लरो॥ 3 खे़ने़ॽ के़लाम् ओगे़मे़प्पा आत्तिन्हाॽआङ् सिरिङ्ममो मे़न्धाने़न्लो, कर खे़ने़ॽ इङ्गे़ले़क्पाहाॽ नाधामो मे़धारो॥ 4 यहवे दाङ्बे, के़लाम्मो लाङ्घेःक्मा हुॽराङ्ङे़ॽओ, आङ्गाॽ लाङ्घेःक्मा के़बोङ्बा लाम्मो तोःन्दाङ्ङे़ॽओ॥ 5 के़से़क्खाबा लाम्मो लाम्लोसाङ्ङे़ॽआङ् हुॽराङ्ङे़ॽओ, थेआङ्भे़ल्ले़ खे़ने़ॽग आङ्गाॽ के़से़ःप्पा आनिङ्वाॽफुमाङ्ने़रो, हे़क्क्याङ् आभे़ल्ले़साङ् खे़ने़ॽ के़लाम् ओमे़त्तुङ्लो॥ 6 यहवे दाङ्बाए, चक्मे़ल्लॽए लुङ्माॽ के़दुक्ताङ्बान् नु मिःम्जि के़मे़त्ताबान् निङ्वाॽ इःत्ते़ॽओ, थेआङ्भे़ल्ले़ खे़ङ्ग उनाहुरिआङ्धोए ओसेःन्दाङ् के़जोगुआङ् के़वाॽरो॥ 7 आङ्गाॽ थाङ्बे़न् वयाङ्ङिल्ले़ चोगुङ्बा लायोहाॽ निङ्वाॽ मे़इःत्ते़न्ने़ॽओ, खे़ने़ॽ लुङ्माॽ के़दुक्काबा कुइसिक् कुनुॽकुदाओ निङ्वाॽ इःत्ताङ्ङे़ॽओ॥ थेआङ्भे़ल्ले़, यहवे दाङ्बाए, खे़ने़ॽ लुङ्गुम्दाङ्बा के़जोःक्लो॥ 8 यहवे दाङ्बान् साम्योबा नु के़नुॽबा चोक्लो, खे़ल्ले़चोगुल्ले़ लायो के़जोःक्पाहाॽ नुःक्तुसिरो हे़क्क्याङ् खे़ङ्हाॽरे़ नाःप्मा के़बोङ्बा नुबा लाम्मिन् ओसेःन्धाक्तुसिरो॥ 9 चुङ्जिगे़न् नःम्नःम्बाहाॽ नुबा याःम्बक् चोःक्मारे़ लागि खुने़ॽ लाम्लोसुसिरो, हे़क्क्याङ् हे़क्तङ्बाहाॽ कुलाम्मिन् नाःप्मा हुॽरुसिरो॥ 10 यहवे दाङ्बे़ल्ले़ कुमाङ्हुप् नु कुइङ्जाङ्हाॽ के़इःप्पा के़नाःप्पाहाॽ थधप् मे़ल्लए लुङ्माॽ तुक्तुसिरो हे़क्क्याङ् खुने़ॽ नुरिक्काङ् लाम्लोसुसिरो॥ 11 यहवे दाङ्बाए, के़मिङ्सो इङ्धाङ्ङिल्ले़ चोगुल्ले़ आङ्गाॽ चोगुङ्बा यरिक् लायोहाॽ खे़त्ताङ् पिराङ्ङे़ॽओ॥ 12 आत्तिन्हाॽरे़ यहवे दाङ्बान् मिङ्सो इङ्धाङ् मे़बिरु खुने़ॽ खे़ङ्हाॽ लाङ्घेःक्मा के़बोङ्बा लाम्मिन् ओसेःन्धाक्तुसिरो॥ 13 खे़ङ्हाॽ मे़नुॽमे़दाआङ् मे़वाॽरो हे़क्क्याङ् खे़ङ्हाॽरे़ खुनिॽ मुॽइदाङ्साहाॽरे़ इक्सादिङ् खाम्बेःक्मान् मे़युक्तुरो॥ 14 यहवे दाङ्बाङ्ग खुने़ॽ मिङ्सो इङ्धाङ् के़बिबाहाॽरे़ खुनिॽ चुम्लो, खुने़ॽ खे़ङ्हाॽ कुमाङ्हुप्पिन् हुॽरुसिरो॥ 15 कुभाॽ खोमारे़ लागि सदादिङ् आङ्गाॽ यहवे दाङ्बान् ओमे़त्तुङ्लो, आनिङ्मिहाॽरे़ मे़गे़सुबा इजोओ आङ्गाॽ थाआल्ले़ खुने़ॽए लःत्तारो॥ 16 यहवे दाङ्बाए, आङ्गाॽ ले़प्माङ् हिसिङ्ङे़ॽआङ् लुङ्माॽ तुक्ताङे़ॽओ, थेआङ्भे़ल्ले़ आङ्गाॽ के़भाॽबा तेःङ्जुम् मेःन्ने एःक् तुक्खे तुमाङ्ङाङ् वाॽआरो॥ 17 आदुक्खे आलाक्खेहाॽ पोरे़आङ् वाॽरो, कन् ये़त्तुक्खे चामालाम् से़न्दाङ्ङे़ॽओ॥ 18 आङ्गाॽ आदुक्मा आलाःक्मा नु आङ्गाॽ आदुक्खेन् निङ्वाॽ इःत्ते़ॽओ, हे़क्क्याङ् के़रे़क् आलायोहाॽ खे़त्ते़देसे़ॽओ॥ 19 ओमे़त्ते़ साॽरे़से़, आनिङ्मिहाॽ आक्खे़न् यरिक् मे़वाॽ! खे़ङ्हाॽरे़ साॽरिक् ताप्फे़ःम्बा मे़इःत्तारो मे़जिःत्तारो॥ 20 थेःक्ताङ्ङे़ॽआङ् आङ्गाॽ कम्ब्राङ् मे़त्ताङ्ङे़ॽओ, आङ्गाॽ सिरिङ्ममो थामा मे़बोङ्ने़ल्लरो थेआङ्भे़ल्ले़ आङ्गाॽ खे़ने़ॽओ इःम्सिङ्से़ ताआरो॥ 21 नुबा नु कुदोःप्मा आयाःम्बक्किल्ले़ से़ःप्पाररो, थेआङ्भे़ल्ले़ आङ्गाॽग खे़ने़ॽ नसान् चोःक्ने़रो॥ 22 निङ्वाॽफुमाङ्ङे, के़मना इस्राइलिहाॽ तुक्खे लाक्खेहाॽओ मे़धाःल्ले़ से़ःप्ते़से़ॽओ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.