निङ्वाॽफु साम्लोसुम् 22 - लिम्बुतुक्खेलाक्खेओबा पेलि साम्लो के़हुॽबाल्ले़ लागि “तानाम्बा पे़ःङ्वा” इत्लाओबा दाउदरे़ कुसाम्लो 1 आनिङ्वाॽफुमाङ्ङे, आनिङ्वाॽफुमाङ्ङे, थेआङ् आङ्गाॽ लाप्गे़भुसाङ्बे? आङ्गाॽ फाॽराङ्ङे़ॽ फाॽआङ् उःत्ने़ल्ले़ थेआङ् माःङ्घा के़बोःक्खे़बाबे? 2 आनिङ्वाॽफुमाङ्ङे, ले़न्दिक् उःत्ने़रो कर आङ्गाॽ नुगप् के़म्बिआल्लो, से़न्दिक्काङ् आङ्गाॽ स्वाःत् मे़युङ्ङान्लो॥ 3 हे़क्केसाङ् खे़ने़ॽ के़रे़क्नुःल्ले़ सेसेबा के़जोःक्लो, हाङ्युक्नाओ के़युङ्, इस्राइलिहाॽरे़ के़नारा मे़भोसुरो॥ 4 आनिगे पाधे़बाहाॽरे़ खे़ने़ॽओए नसान् मे़युक्खुआङ् मे़वये़रो, खे़ङ्हाॽरे़ नसान् मे़युक्खुआङ् खे़ङ्हाॽ के़से़ःप्तुसिरो॥ 5 खे़ङ्हाॽरे़ खे़ने़ॽ कुभाॽ के़म्नाःक्ते़ हे़क्क्याङ् के़से़ःप्तुसिरो, खे़ङ्हाॽरे़ खे़ने़ॽओ नसान् मे़युक्खुआङ् नाधामो मे़न्ध्ये़ने़न्लो॥ 6 कर आङ्गाॽग मनाआ मे़न्आ कर फेॽबात् हे़क्तङ्बाआरक्लो, के़रे़क् मनाहाॽरे़ आङ्गाॽ नामे़न्छाॽआन् हे़क्क्याङ् हिनाःम् मे़मे़त्तारो॥ 7 आङ्गाॽ याप्मि के़निबा के़रे़क्ले़ मे़गेॽआरो॥ खे़ङ्हाॽरे़ खुनिॽ मुरा वसेःन् मे़ले़क्खुर थे़गेक्पान् तघुम्तघुम् मे़मे़त्तुर अक्खे मे़बाःत्तुरो, 8 “यहवे दाङ्बे़ल्ले़ से़ःप्पा फाॽआङ् खे़ल्ले़ नसान् चोगुरो, लु खुने़ॽए खे़न् ताङ्से़ःप्तुररो॥ यहवे दाङ्बे़ल्ले़ खे़न् फाॽरुररो थेआङ्भे़ल्ले़ खुने़ॽ खे़न् कुसिराॽ थाङे़आङ् वाॽरो॥” 9 हे़क्केसाङ् खे़ने़ॽए आङ्गाॽ आम्मारे़ कुसाप्पोःक्कोलाम् के़लःत्ताङ्लो॥ आम्मारे़ कुभक्तुङ्मो वयाङ्ङिल्ले़साए खे़ने़ॽ नसान् के़जोःक्पा के़जोगाङ्लो॥ 10 आङ्गाॽ सावाःन्छिङ्ङाबा ये़न्नाङ्धोए आङ्गाॽ खे़ने़ॽओ मे़दोःन्दाङ्लो, आम्मारे़ आङ्गाॽ कत्ताङ्ङाङ्धोए खे़ने़ॽ आङ्गाॽ आनिङ्वाॽफुमाङ्ने़रो॥ 11 आङ्गाॽनु माःङ्घा मे़बोःक्खे़न्ने़ॽओ, थेआङ्भे़ल्ले़ ये़त्तुक्खे तुम्मा ये़म् तार पत्लो, हे़क्क्याङ् आङ्गाॽ याप्मि के़भाॽबा हाःत्ताङ् होप्लो॥ 12 यरिक् आनिङ्मिहाॽरे़ आधोःङ्धोःङ्बा पित् हे़क्के आङ्गाॽ मे़गबाङ्ङाङ् वाॽआरो, हे़क्क्याङ् बासान लाजेॽबा किप्मा के़घुबा पित्हाॽ के़रे़क् पिसाङ् आङ्गाॽ आघिरि मे़वाॽरो॥ 13 साक्किल्ले़ तरुसिबा के़हुःक्पा खिरिङ्बाहाॽ हे़क्के आनिङ्मिहाॽरे़ आङ्गाॽ से़प्मा मे़इःत्तारो॥ 14 खाम्बाङ्ङो के़वे़प्पा च्वाःत्तिन् चप्पेःक्पा हे़क्के आङ्गाॽ आसक्मा आसाॽइ होप्लो, हे़क्क्याङ् आङ्गाॽ आलाङ् आहुक्कोबा आये़प्पाहाॽरे़ आङ्गाॽ मे़दक्कान्लो॥ के़योःम्बा थुम्बुॽ हे़क्के आसिक्लुङ्मान् पोःक्खे़आङ् वाॽरो॥ 15 के़हेबा कुसुम् मे़न्दम्मनाबा खाम् हे़क्के आङ्गाॽ मे़न्धुम्मनाबा पोःक्खाङ्ङाङ् वाॽआरो, हे़क्क्याङ् आल्सोःप्पान् आघाःम्दाःक्मो खिप्तु पेआङ् पत्लो॥ निङ्वाॽफुमाङ्ङे, आङ्गाॽ सिआर फाॽआङ् खाम्हिःक्को के़ले़राङ्ङाङ् वाॽआरो॥ 16 ख्याबाहाॽरे़ हे़क्के आनिङ्मिहाॽरे़ कब्रिङ् मे़गबाङ्ङाङ् वाॽरो, फे़न्याःम्बक् के़जोःक्पाहाॽरे़ मे़गबाङ्ङाङ् वाॽरो, खे़ङ्हाॽरे़ आलाङ् आहुक्हाॽ मे़हङ्घुआङ् पत्लो॥ 17 के़रे़क् आबिम्बा आये़प्पाहाॽ निमा सुक्ते़त्लो, मनाहाॽरे़ मे़जिःत्तार अदक्तक्काङ् ओमे़मे़त्तारो॥ 18 खे़ङ्हाॽ आजाङ्ङिन् मे़हाःत्छिङ्लो, हे़क्क्याङ् आजाङ्ङिन् तॽयाःन्सोन् मे़गे़सुरो॥ 19 कर यहवे दाङ्बाए, खे़ने़ॽग आङ्गाॽलाम् माःङ्घा मे़बोःक्खे़न्ने़ॽओ! खे़ने़ॽए आङ्गाॽ के़धुम्बा के़जोःक्कारो, आङ्गाॽ हारा फाॽराङ्ङे़ॽओ॥ 20 आनिङ्मिहाॽरे़ ताभेःल्ले़ से़प्मा मे़ङ्घोआन्लरो हे़क्क्याङ् ख्याबाहाॽ हे़क्तङ्बा आनिङ्मिहाॽलाम् इमे़ल्लुङ्बा आहिङ्मन् से़ःप्ते़ॽओ॥ 21 खिरिङ्बाहाॽरे़ आङ्गाॽ चामा मे़ङ्घोआन्लरो, हे़क्क्याङ् आधोःङ्धोःङ्बा साम्बित्हाॽलाम् आङ्गाॽ से़ःप्ताङ्ङे़ॽओ॥ 22 आमनाहाॽरे़ खुनिॽ तगि के़मिङ्ङिन् इङ्भोसुङ्लो, चुम्लुङ्लुम्मो आङ्गाॽ के़नारा फोसुङ्लो॥ 23 यहवे दाङ्बान् मिङ्सो इङ्धाङ् पिरे़म्मे़ॽर कुनारा फोसे़म्मे़ॽओ॥ याकुबरे़ कुमुॽइदाङ्सासे, कुमिमिदिङ् चोगे़म्मे़ॽओ, इस्राइलरे़ कुमुॽइदाङ्सासे, खुने़ॽ से़वा मे़त्ताम्मे़ॽओ॥ 24 थेआङ्भे़ल्ले़ ये़त्तुक्खे के़जाबाहाॽरे़ खुनिॽ तुक्खेन् खुने़ॽ मे़जिःत्तुन्लो कर खुने़ॽ निङ्वाॽ इःत्तुरो॥ खे़ङ्हाॽलाम् खुने़ॽ कुनारान् मे़जिक्खुन्लो कर खे़ङ्हाॽरे़ आभाॽरे़ मे़मे़त्तुल्ले़ फाॽरुसिरो॥ 25 यरिक् मना के़जुम्बाहाॽरे़ खुनिॽ लुम्मो खे़ने़ॽ के़जोगुबा याःम्बक्किन् इङ्धाङ् पिरुङ्लो, खे़ने़ॽ से़वा के़मे़प्पाहाॽरे़ खुनिॽ पेसाङ् आङ्गाॽ माङ्हे़क् चोगुङ्बा सिदुङ्जभान् के़त्तुङ्लो॥ 26 याङ्गे़साॽबाहाॽरे़ मे़ज मे़धुङुआङ् खुनिॽ सिक्चिम्लो, निङ्वाॽफुमाङ्ङिन् के़गोःप्पाहाॽरे़ खुने़ॽ कुनारा मे़भोसुरो! खिनिॽ सिक्लुङ्मान् सदादिङ् हाङ्हाङ् लॽररो॥ 27 काक् इक्सादिङ् खाम्बेःक्मो के़रे़क् मे़न्छाम् सुवाङ्हाॽरे़ यहवे दाङ्बान् निङ्वाॽ मे़इःत्तुरो हे़क्क्याङ् खुने़ॽ ले़प्माङ् मे़नुःङ्लो॥ के़रे़क् मे़न्छाम् सुवाङ्हाॽरे़ खुनिॽ हिम्सयङ्हाॽरे़ खुने़ॽए से़वा मे़मे़त्तुरो॥ 28 थेआङ्भे़ल्ले़ यहवे दाङ्बाङ्ग हाङ्लो, के़रे़क् इक्सादिङ् खाम्बेःक्मोबा मे़न्छाम् सुवाङ्हाॽ सम्धाङ् खुने़ॽ हाङ्चोक्लो॥ 29 इक्सादिङ् खाम्बेःक्मो के़रे़क् याङ्साकुन्धेसाबाहाॽ चामुक् थिमुक् मे़जोःक्काङ् से़वा मे़जोक्लो, सागे़वाःन्छिङ्बाआङ् के़सिबा के़बेःक्पाहाॽ के़रे़क् खुने़ॽ कुदगि साम्बोन् मे़बत्लो॥ 30 याङ्सि के़दाबा मुॽइदाङ्साहाॽरे़ कुसे़वा मे़जोगुरो, खे़ङ्हाॽरे़ खुनिॽनुःल्ले़ एगाङ् के़दाबाहाॽ यहवे दाङ्बे़ल्ले़ कुयाःम्बेओ मे़जे़क्तुसिरो॥ 31 खे़ङ्हाॽरे़ आइन् थारिक् सामे़न्वाःन्छिङ्ङे के़वाॽबा सुवाङ्हाॽ यहवे दाङ्बे़ल्ले़ कुमनाहाॽ आक्खेलॽरिक् से़ःप्तुसि के़लॽबा पाःन्निन् मे़जे़क्तुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.