निङ्वाॽफु साम्लोसुम् 21 - लिम्बुथङ् थक्मा नाःम्मे़ल्ले़बा नोगे़न् साम्लो के़हुॽबाल्ले़ लागि दाउदरे़ कुसाम्लो 1 यहवे दाङ्बाए, खे़ने़ॽ मुक्साम् के़बिरुबाल्ले़ चोगुल्ले़ हाङ्ङिन् सःत्ते़आङ् वाॽरो, हे़क्क्याङ् खुने़ॽ कुनिङ्मिहाॽ के़नाःम्बा के़जोगुबाल्ले़ चोगुल्ले़ साॽरिक् कुनिङ्वाॽ त्ये़आङ् वाॽरो॥ 2 खुने़ॽ कुनिङ्वाॽओ इःत्तुबा पाःन्निन् खे़ने़ॽ के़गे़त्तु के़बिरुआङ् के़वाॽरो, हे़क्क्याङ् खुने़ॽ चोगुबा पेलिगे़न् तुवान् के़घे़प्सु के़बिरुआङ् वाॽरो॥ सेला 3 साॽरिक् नुबा मुॽइसाम् के़बिरुआङ् लाम्गे़दाःक्तुरो, हे़क्क्याङ् साम्म्याङ् इसेःङ्बा तिचःन् के़घुःक्तुरो॥ 4 खे़ल्ले़ खे़ने़ॽ इरिक् हिङ्मा के़नाःक्ते़रो हे़क्क्याङ् खुने़ॽ मे़न्नुप्मनाबा हिङ्मन् के़बिरुरो॥ 5 कुनिङ्मिहाॽ के़नाःम्बा के़जोगुबाल्ले़ चोगुल्ले़ खुने़ॽ कुमिङ् इङे़आङ् वाॽरो॥ खुने़ॽ कुमिङ् के़दिःप्पा के़जोगुआङ् मिङ्सोइङ्धाःङ् के़बिरुआङ् वाॽरो॥ 6 से़क्खाए सदादिङ् मुॽइसाम् के़बिरुआङ् के़वाॽरो, हे़क्क्याङ् खुने़ॽनु के़वाॽआङ् कुनिङ्वाॽ त्ये़र के़जोगुरो॥ 7 थेआङ्भे़ल्ले़ हाङ्ङिल्ले़ यहवे दाङ्बान् ताःक्पो चोगुआङ् वाॽरो, हे़क्क्याङ् के़रे़क्नुःल्ले़ पयम् यम्बा निङ्वाॽफुमाङ्ङिल्ले़ खुने़ॽ लुङ्माॽ तुक्तुरो, खे़ल्ले़चोगुल्ले़ आभे़ल्ले़आङ् अयाक् मे़लॽने़न्लो॥ 8 हाबा के़हुक्लाम्बाए के़रे़क् के़निङ्मिहाॽ खे़ने़ॽ के़गोःत्तु के़लःत्तुसिरो, हे़क्क्याङ् खे़ने़ॽ के़जिःप्पा के़रे़क् के़निङ्मिहाॽ के़जुप्साङ् हुक्किल्ले़ ते़म्सुसिरो॥ 9 खे़ने़ॽ के़धाःन्छिङ्ङिल्ले़ खे़ङ्हाॽ के़दिःप्पा मिहाप्पो लाप्के़भुसुसिरो॥ कुसिक् पोःक्किल्ले़ यहवे दाङ्बे़ल्ले़ खे़ङ्हाॽ मे़क्खुसिरो, हे़क्क्याङ् खे़ङ्हाॽ मिधुङ्दिङ् मिराःक्ले़ थ्यःङ् चोगुसिरो॥ 10 खे़ङ्हाॽरे़ खुनिॽ सामे़न्छाॽहाॽ इक्सादिङ् खाम्बेःक्मोलाम् खे़ने़ॽ के़मासुसिरो, हे़क्क्याङ् मे़न्छाम् सुवाङ्लुम्मोनु खुनिॽ थाःक्हाॽ के़दुगु के़देसुसिरो॥ 11 खे़ङ्हाॽरे़ के़दक्ले़ङ्वाओ फे़न्निङ्वाॽ मे़इःत्तुरो, ताप्फे़ःम्बा चे़म्भन् मे़जोगु करसाङ् खे़ङ्हाॽ कुलिङ्दो मे़ङ्गे़त्ने़न्लो॥ 12 खे़ङ्हाॽ के़घे़त्छिङ् के़बेःक्पा के़जोगुसिरो, थेआङ्भे़ल्ले़ तोःङ्ङिन् लिओ के़भत्छुआङ् खे़ने़ॽ खे़ङ्हाॽ के़सोःक्तुसिरो॥ 13 यहवे दाङ्बाए, खे़ने़ॽ के़धुम्बा के़जोःक्पा पाःन्निन् ओसेःन्धाङ् चोगे़ॽओ, आनिगे़ग खे़ने़ॽ के़मुक्साम्गे़न् याःम्बक्किन् से़वासाम्लो साम्मे़त्नु इङ्धाङ् पिरुम्बे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.