निङ्वाॽफु साम्लोसुम् 19 - लिम्बुनावागे़न् चइःत्तो निङ्वाॽफुमाङ्ङिल्ले़ कुमिङ्सो साम्लो के़हुॽबाल्ले़ लागि दाउदरे़ कुसाम्लो 1 ताङ्साक्पाल्ले़ निङ्वाॽफुमाङ्ङिल्ले़ कुमिमिदिङ्ङिन् ओसेःन्दाङ् चोगुरो॥ हे़क्क्याङ् खेःम्सिक्पाहाॽलाम् खुने़ॽ कुहुक्किल्ले़ चोगुबा याःम्बक्किन् निदे़त्लो॥ 2 मनाहाॽ ताॽमे़जे़ङ्बा हे़क्के थिक्याःन्धक्पा ये़न्निल्ले़ निङ्वाॽफुमाङ्ङिल्ले़ कुमिमिदिङ्ङिन् ताःन्दिक्पा ये़न्निन् चे़क्तुरो॥ हे़क्क्याङ् से़न्दिक्किल्ले़आङ् निङ्वाॽफुमाङ्ङिल्ले़ कुसिक्कुम् निङ्वान् ताःन्दिक्पा से़न्दिक्किन् चे़क्तुरो॥ 3 खे़ल्ले़ सुत्ला मेःन्ने पान् पाःत्तुरो, खुने़ॽ कुइक्लाआङ् खे़म्मे़दे़त्ने़ल्लो॥ 4 हे़क्केसाङ् खे़ल्ले़ काक् इक्सादिङ् खाम्बेःक्मान् लोःक्खुरो, खे़न् इङ्घङ्ङिन् खाम्बेःक्माल्ले़ कुयाओ थे़म्बा के़रे़आङ् वाॽरो॥ निङ्वाॽफुमाङ्ङिल्ले़ ताङ्साक्पो नाम्मिल्ले़ कुलागि याङ्धोःक्मादे़न् चोगु पिरुआङ् पत्लो॥ 5 नाम्मिङ्ग मेःक्खिम् साःङ्गालाम् के़लःम्बा मेःक्खिम्साबा हे़क्के तानाम्सा लःन्लो, हे़क्क्याङ् लोःक्मा के़नाःम्बाआङ् के़सःप्पा हे़क्के लॽरो॥ 6 ताङ्साक्पाल्ले़ थिक् कुयाओ खे़न् लिङ्ङाङ् वेॽसमा कुयाओ थारिक् खिर्लि कबुरो, हे़क्क्याङ् से़ःक्किल्ले़ थेःन्नाङ् चिङ्सिङ्मा मे़सुक्ने़ल्लो॥ यहवे दाङ्बे़ल्ले़ कुसाम्योथिम् 7 यहवे दाङ्बे़ल्ले़ कुइङ्जाङ्हाॽ कुलिङ्दो के़गे़प्पा चोक्लो, खे़न् इङ्जाङ्हाॽरे़ मनाहाॽ याम्मो के़धुम्बा चोगुसिरो॥ यहवे दाङ्बे़ल्ले़ कुनिसाम्हाॽ निङ्वाॽइरे़ खोःप्तुरो हे़क्क्याङ् निङ्वाॽ के़सुःम्बाहाॽ सिक्कुम् निङ्वाॽ पिरुसिरो॥ 8 यहवे दाङ्बे़ल्ले़ कुसाम्योथिम्हाॽ नुबा चोक्लो, सिक्लुङ्मो सःप्मा एःप्मा के़दाःप्पा चोक्लो॥ यहवे दाङ्बे़ल्ले़ कुइङ्जाङ्हाॽ से़दिङ्दिङ् के़ओःप्पा चोक्लो हे़क्क्याङ् सिक्कुम्दिङ् निङ्वाॽ आबिरो॥ 9 यहवे दाङ्बान् मिङ्सो इङ्धाङ् पिमाग नुबा पाःन्लो, खे़ङ्ग आभे़ल्ले़साङ् पोङ्लो॥ यहवे दाङ्बे़ल्ले़ कुसाम्योथिम्हाॽ से़क्खाबा नु साम्योबा चोक्लो॥ 10 खे़ङ्हाॽ कुमे़ल्लुङ् के़घिःक्पा साम्म्याङ् इसेःङ्बानुःल्ले़आङ् साॽरिक् सिराॽगे़धाङ्बा चोक्लो हे़क्क्याङ् सक्वाघुनुःल्ले़आङ् साॽरिक् के़लिम्बा चोक्लो॥ 11 खे़ङ्हाॽलाम्बाए के़से़वारोबाहाॽरे़ खाहुन् मे़घोसुरो, खे़ङ्हाॽ इःप्मा नाःप्माल्ले़ नुबा पाःन्हाॽ खोदे़त्लो॥ 12 आबाङे फेःम्मनाबा याःम्बक्हाॽ हाःत्ले़आङ् निङ्वाॽ मे़घोसुन्लो॥ यहवे दाङ्बाए, आङ्गाॽ निङ्वाॽ मे़ङ्घोए फेःन्दुङ्बा पाःन्हाॽलाम् से़ःप्ताङ्ङे़ॽओ॥ 13 निनिबा लायो चोःक्मालाम् आङ्गाॽ के़से़वारोबान् थेःक्ताङ्ङे़ॽओ, हे़क्तङ्बा लायोहाॽरे़ आङ्गाॽ मे़युक्कान्लरो॥ हे़क्क्याङ्लक् आङ्गाॽ आप्तिक् मेःन्नेबा पोङ्ङारो, हे़क्केलॽरिक् यम्बा लायो के़जोःक्पा मे़बोङ्ङाल्लरो॥ 14 यहवे दाङ्बे, आइःम्सिङ्मादे़न् याक्पेॽ नु आसे़न्लप्दाङ्बाए, आबाःन्सुत्लाहाॽ नु आसिक्लुङ्मो निङ्वाॽ इःत्तुङ्बा पाःन्हाॽ ताःक्ते़ॽओ फाॽआङ् पेलि फाक्ने़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.