निङ्वाॽफु साम्लोसुम् 18 - लिम्बुयहवे दाङ्बे़ल्ले़ कुनारा फोमा ( २ सामु २२ ) साम्लो के़हुॽबाल्ले़ लागि कुनिङ्मिहाॽ नु सावलरे़ कुहुक्लाम्बा यहवे दाङ्बे़ल्ले़ ताङ्से़ःप्तुल्ले़बा दाउदरे़ कुसाम्लो 1 यहवे दाङ्बाए, आमुक्साम्मे, खे़ने़ॽ मिःम् मे़त्ने़रो॥ 2 यहवे दाङ्बान् आयाक्पेॽरो, खुने़ॽग आयक् नु आसे़न्लप्दाङ्बारो॥ आनिङ्वाॽफुमाङ्ङिन् आङ्गाॽ आयाक्पेॽरो खुने़ॽओए आङ्गाॽ इःम्सिङ्ङारो॥ खोःल्ले़ आङ्गाॽ थेःक्काबा कुइसिक् खुने़ॽ से़ःप्पाआङ् नुरिक् कत्तारो॥ 3 आङ्गाॽ यहवे दाङ्बान् उःत्तुङ्लो, खुने़ॽ कुनारा फोमा लाॽरुरो, हे़क्क्याङ् आनिङ्मिहाॽलाम्बा खुने़ॽ से़ःप्पारो॥ 4 आसे़त्से़प्पा इदाःक्किल्ले़ किर्गप् कबाङ्लो, आमे़ङ्मे़ङ्बा के़गुङ्बा च्वाःत्तिल्ले़ आङ्गाॽ सुरुत् सुःन्दाङ्ङाङ् वये़रो॥ 5 खे़मादिङ् यङ्सङ्बा थाक्पाःल्ले़ आङ्गाॽ कित्ताङ्लो, सिमे़न्ले़ चे़न्नो आङ्गाॽ थामा कोःत्ताङ्लो॥ 6 आदुक्खे आलाक्खेओ यहवे दाङ्बान् उःत्तुङ्लो, कुभाॽरे़ लागि आनिङ्वाॽफुमाङ्ङिन् आङ्गाॽ यम्बा इक्लाःल्ले़ उःत्तुङ्लो॥ कुहिम्मो आङ्गाॽ आइक्लान् खे़प्सुरो, खुने़ॽ उःत्तुङ्बा आङ्गाॽ आइक्लान् खुने़ॽ कुने़क्खोॽओए के़रे़रो॥ 7 इक्सादिङ् खाम्बेःक्मान् यक्खे़रो, हे़क्क्याङ् लुप्लि थाङे़रो, कोःक्मा फाङ्जङ्हाॽरे़ कुयुक्नाहाॽ यक्खे़रो॥ खे़ङ्हाॽ थे़गक्कक् यक्खे़रो थेआङ्भे़ल्ले़ खुने़ॽ कुसिक् पोगे़आङ् वये़रो॥ 8 कुन्बोहङ्लाम्बा मिःक्खुॽ लःन्दे़रो, हे़क्क्याङ् कुम्ब्राओलाम्बा आमे़ङ्मे़ङ्बा मिन् लःन्दे़रो, खे़प्मोलाम् मिधुङ् मिराःक् तिरे़रो॥ 9 साङ्ग्राम्पेदाङ्ङिन् हन्दुआङ् खुने़ॽ यो थ्ये़रो, माक्स्दिःङ्ग्याःप्पा खाॽमिःप्पान् कुलाङ्भोसाङ् पत्छे़रो॥ 10 खुने़ॽ करुब मे़प्मनाबा माङ्लाइङ्बान् युक्तुआङ् पे़रे़रो, हे़क्क्याङ् सुरिःत्तिल्ले़ पक्खुआङ् के़बे़बा पु हे़क्के थाःङ् पे़रे़रो॥ 11 खामाक्मान् खुने़ॽ कुघुःङ्मा चोगुरो, च्वाःत् के़बङ्बा माक्के़लॽबा खाप्मिःप्पाल्ले़ पन्छिङ्लो॥ 12 माक्सिःङ्ग्याःप्पा खाप्मिःप्पाल्ले़ खुने़ॽ कुबेसाङ्बा मिक् के़जे़म्बा ओःत्तिःन् पन्छुरो, हे़क्क्याङ् खे़प्मोलाम् फःन् नु मिघाङ्ग्रोःक्हाॽ थ्ये़रो॥ 13 साङ्ग्राम्पेदाङ्लाम्बा यहवे दाङ्बान् अःक्ते़रो, हे़क्क्याङ् के़रे़क्नुःल्ले़ पयम् यम्बा निङ्वाॽफुमाङ्ङिल्ले़ कुइक्लान् खे़म्दे़त्ते़रो॥ 14 खुने़ॽ तोःङ्ङिल्ले़ आबुसिआङ् कुनिङ्मिहाॽ फुत्छिङ्ज्याङ् से़सुदेसुसिरो, हे़क्क्याङ् मुन्धाङ् सेरिःल्ले़ हःन्दा मे़ले़क्ते़र याःन्दुसिरो॥ 15 यहवे दाङ्बाए, खे़ने़ॽ के़भे़ःक्तुसिल्ले़ के़न्बोओलाम के़लःम्बा सक्मान् फक्ते़ल्ले़ वरःङ्ङोबा च्वाःत्हाॽ चबे़आङ् ने़वाला लुम्बाःत्हाॽ निधाबे़रो हे़क्क्याङ् इक्सादिङ् खाम्बेःक्माल्ले़ कुयुक्नाहाॽ निधाबे़रो॥ 16 खुने़ॽ थाःङ्लाम्बा कुहुक्किन् सन्छुआङ् आङ्गाॽ ते़म्साङ्लो, खुने़ॽ कुदिम्बे केःम्बा वरःङ्लाम्बा उःक्खाङ् लःत्ताङ्लो॥ 17 खुने़ॽ आङ्गाॽ के़धुम्बा आनिङ्मिहाॽलाम्बा ताङ्से़ःप्ताङ्लो, हे़क्क्याङ् आङ्गाॽनुःल्ले़आङ् खे़ङ्हाॽ साॽरिक् के़धुम्बा मे़जोगे़रो॥ 18 तुक्खे तुमुङ्ङाङ् वयाङ्ङिल्ले़ खे़ङ्हाॽरे़ मे़भत्ताङ्लो, कर यहवे दाङ्बे़ल्ले़ आङ्गाॽ फाॽराङ्लो॥ 19 खुने़ॽ ताम्दाम्बा ते़न्नो आङ्गाॽ ताराङ्लो, खुने़ॽ आङ्गाॽ ताङ्से़ःप्ताङ्लो, थेआङ्भे़ल्ले़ आङ्गाॽनु कुनिङ्वाॽ त्ये़आङ् वये़रो॥ 20 यहवे दाङ्बे़ल्ले़ आङ्गाॽ साम्योबा आयाःम्बक् कुइसिक् हाङ्से़म् पिराङ्लो, थेआङ्भे़ल्ले़ चोःक्मा के़नुॽबा पाःन्लक् चोगुङ्लो॥ हे़क्क्याङ् पान् मे़म्भेःन्ने वयाङ्बाल्ले़ चोगुल्ले़ आङ्गाॽ मुॽइसाम् पिराङ्लो॥ 21 थेआङ्भे़ल्ले़ आङ्गाॽ यहवे दाङ्बे़ल्ले़ कुलाम्मिन् नाःत्तुङ्ङाङ् वाॽआरो, हे़क्क्याङ् फे़न्याःम्बक् चोगुङ्बा होप्लो खे़ब्याङ् आनिङ्वाॽफुमाङ्लाम्बा आङ्गाॽ माःङ्घा मे़म्बेःक्के वाॽआरो॥ 22 के़रे़क् कुसाम्योथिम्हाॽ इःत्तुङ् नाःत्तुङ्ङाङ् वाॽआरो, हे़क्क्याङ् कुइङ्जाङ्हाॽ आभे़ल्ले़आङ् मे़न्ले़त्ते वाॽआरो॥ 23 खुने़ॽ फोत्या मेःन्नेबा निसाङ्लो, हे़क्क्याङ् ताप्फे़ःम्बा पाःन्हाॽ चोःक्मालाम् आङ्गाॽ लाःत्लाःत् वयाङ्लो॥ 24 खुने़ॽ कुलिङ्दो के़गे़प्पा निसाङ्लो, थेआङ्भे़ल्ले़ चोःक्मा के़नुॽबा पाःन्लक् चोगुङ्लो॥ 25 खे़ने़ॽग नसाःन्साबाहाॽनु नसाःन्साबाए के़जोःक्लो, कुलिङ्दो के़गे़प्पाहाॽनु कुलिङ्दो के़गे़प्पाए के़जोःक्लो॥ 26 सुत्थोबाहाॽनु खे़ने़ॽ सुत्थोबाए के़धाःम्सिङ्लो, कर कुनिङ्वाॽ के़जिःप्पाहाॽनु चाःत्चाःप्पा के़धाःम्सिङ्लो॥ 27 चुङ्जिगे़न् नःम्नःम्बाहाॽ के़से़ःप्तुसिरो, कर यम्बा के़हे़न्छिङ्बाहाॽ यो के़धासुसिरो॥ 28 यहवे दाङ्बाए, आङ्गाॽ सेमिःल्ले़ थोॽराङ्ङे़ॽओ, आनिङ्वाॽफुमाङ्ङे आङ्गाॽओबा खागे़माक्पे़न् खाओःत्ल चोगे़ॽओ॥ 29 के़भाॽआबाल्ले़ चोगुल्ले़ आनिङ्मिहाॽ नाःम्मा सुक्तुङ्सिङ्लो, हे़क्क्याङ् आनिङ्वाॽफुमाङ्ङिल्ले़ फाॽआबाल्ले़ आक्तङ्बा लुङ्धाक्साङ् काःक्मा सुक्तुङ्लो॥ 30 निङ्वाॽफुमाङ्ङिल्ले़ कुबान् पाःप्माने़भग्र, कुलाम्मिन् कुलिङ्दो के़गे़प्पा चोक्लो, यहवे दाङ्बे़ल्ले़ कुबाःन्जाक्किन् साङ्मनाबा साम्म्याङ् हे़क्के लॽरो॥ खुने़ॽओ इःम्सिङ्से़ के़दाबाहाॽ खोःल्ले़ थेःक्तुसिबा कुइसिक् खुने़ॽ थेःक्तुसिरो॥ 31 थेआङ्भे़ल्ले़ यहवे दाङ्बान्लक् निङ्वाॽफुमाङ्लो हे़क्क्याङ् निङ्वाॽफुमाङ्ङिल्ले़रक् आनिॽ आसे़ःप्लो॥ 32 हाबा खे़न् निङ्वाॽफुमाङ्ङिल्ले़ए मुक्के़गुबा चोःक्कारो, हे़क्क्याङ् आलाम्मिन् कुलिङ्दो के़त्तुरो॥ 33 खुने़ॽए आलाङ्हाॽ पे़ःङ्वालाङ् कुइसिक् के़गाम्बा चोगुरो, हे़क्क्याङ् थाःङ् चम्जम्बा ते़न्नो ये़प्मा के़सुक्पा चोःक्काॽरो॥ 34 आङ्गाॽ के़रे़क्नुःल्ले़ के़लिःप्पा लिन् याङ्मा सुक्तुङ्ल फाॽआङ् खुने़ॽ थङ् चोःक्मा हुॽआरो॥ 35 यहवे दाङ्बाए, खे़ने़ॽ आङ्गाॽ के़नाङाङ्लो हे़क्क्याङ् के़से़न्लप्रे़ खोःन् के़बिराङ्लो, खे़ने़ॽ के़भाॽराङ् के़जोगाङ्बाल्ले़ चोगुल्ले़ यम्बा पोःक्खाङ्लो हे़क्क्याङ् के़मुक्साम्मिल्ले़ नुरिक् कत्ताङ्ङाङ् वाॽआरो॥ 36 आलाम्मिन् ताम्दाम्बा के़जोगुरो, हे़क्केःल्ले़ आङ्गाॽ आभे़ल्ले़आङ् मे़जोःन्दाङ्ङिन्लो॥ 37 आनिङ्मिहाॽ नाःत्तुङ्सिङ्ङाङ् सिॽरुङ्सिङ्लो हे़क्क्याङ् खे़ङ्हाॽ मे़म्मे़ङ्सिङ्ङे थारिक् मे़न्नुःङ्बारो॥ 38 खे़ङ्हाॽ पोःक्मा मे़न्छुक्मना मे़बोःक्खे़र थारिक् हिप्तुसिङ्लो, खे़ङ्हाॽ आलाङ् सिगाङ् चिल्ले़क् मे़ले़क्खे़रो॥ 39 थङ् चोःक्माओ मुक्के़गुबा के़जोगाङ्लो, हे़क्क्याङ् आङ्गाॽ आनिङ्मिहाॽ आलाङ्ङो खे़ने़ॽ थुङ्बोहजॽ के़युङ्सिङ्बा के़जोगुसिरो॥ 40 आङ्गाॽ आनिङ्मिहाॽ खे़ने़ॽ याङ्ना के़नुःङ्बाआङ् के़घे़त्छिङ्बा के़जोगुसिरो, हे़क्क्याङ् आनिङ्मिहाॽ मे़क्खुङ्सिङ्लो॥ 41 खे़ङ्हाॽ आभाॽरे़ फाॽआङ् मे़अःक्ते़रो, कर खे़ङ्हाॽ के़से़ःप्पा हाःत्ताङ् होःप्ते़रो॥ खे़ङ्हाॽरे़ यहवे दाङ्बान्नाङ् मे़उःत्तुरो कर खुने़ॽ खे़ङ्हाॽ नोगप् मे़बिरुन्सिन्लो॥ 42 सुरित् केजङ्ङिल्ले़ मुःत्तुबा खाम्हिःक् हे़क्के खे़ङ्हाॽ फुत्लुम् थ्यःङ् तेसुङ्सिङ्लो, लाम्मोबा ले़क्वा हे़क्के खे़ङ्हाॽ तोॽरुङ्सिङ्लो॥ 43 मनाहाॽरे़ मे़भत्ताङ्ङिल्ले़ खे़ने़ॽ के़से़ःप्ताङ्लो, खे़ने़ॽ इक्सादिङ् खाम्बेःक्मोबा मे़न्छाम् सुवाङ्हाॽरे़ खुनिॽ लाम्लोबा के़जोगाङ्ङाङ् वाॽआरो हे़क्क्याङ् कुसिङ् मे़निःत्तासिङ्ङिन्बा मनाहाॽ आङ्गाॽ आयुक्को मे़वाॽरो॥ 44 खे़ङ्हाॽरे़ आइङ्जाङ्ङिन् मे़घे़प्सुनुमे़ःन्ने मे़इःत्तु मे़नाःत्तुरो, हे़क्क्याङ् वेॽ लाजेॽबा मनाहाॽ आङ्गाॽ आदगि मे़नःम्सिङ्लो॥ 45 खे़ङ्हाॽरे़ खुनिॽ यङ्माआङ् के़त्लो आबाङे खुनिॽ यक्लाम्बा किमाल्ले़ खे़ङ्हाॽ थे़गक्कक् मे़यङ्ल मे़लःन्लो॥ 46 यहवे दाङ्बान् कुहिङ्वे़त् चोक्लो, आयाक्पेॽइल्ले़ ने़म्भोगे़न् कुनारा पोररो॥ आसे़न्लप्दाङ्बा निङ्वाॽफुमाङ्ङिल्ले़ थाःङ्धाःङ् कुमिङ्सो कुधाःङ्सो पोङ्लरो॥ 47 खुने़ॽग निङ्वाॽफुमाङ्लो, खुने़ॽए आनिङ्मिहाॽ के़नाःम्बा चोःक्कारो, खुने़ॽ मे़न्छाम् सुवाङ्हाॽ आयुक्को तारुसि पिआरो॥ 48 हे़क्क्याङ् खुने़ॽ आनिङ्मिहाॽरे़ खुनिॽ हुक्को थामा मे़भाःक्काआन्लो॥ खुने़ॽ आनिङ्मिहाॽ सम्धाङ् आङ्गाॽ मिङ्सो इङ्धाङ्साबा चोःक्कारो, ते़न्धङ् केजोःक्पाहाॽलाम् के़से़ःप्पारो॥ 49 खे़ल्ले़चोगुल्ले़ यहवे दाङ्बाए, इक्सादिङ् खाम्बेःक्मोबा मे़न्छाम् सुवाङ्लुम्मो आङ्गाॽ के़नारा फोसुङ्लो, हे़क्क्याङ् साम्लोआर के़नारा फोसुङ्लो॥ 50 खुने़ॽ कुहाङ्ङिन् पयम् यम्बा थङ् के़नाःम्बा चोगुरो, हे़क्क्याङ् खुने़ॽ सेःन्दुबा दाउद हाङ्ङिन् नु कुमुॽइदाङ्साहाॽ सदादिङ् चक्मे़ल्लॽए लुङ्माॽ तुक्तुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.