निङ्वाॽफु साम्लोसुम् 16 - लिम्बुनिङ्वाॽफुमाङ्ङो पेलि फाक्मा मिक्ताम् मे़प्मनाबा दाउदरे़ कुसाम्लो 1 निङ्वाॽफुमाङ्ङे, से़ःप्ताङ्ङे़ॽओ, थेआङ्भे़ल्ले़ आङ्गाॽ खे़ने़ॽओ इःम्सिङ्से़ ताआल्ले़ के़नाङ्ङा फाॽआङ् निसुङ्लो॥ 2 यहवे दाङ्बान् आङ्गाॽ मे़त्तुङ्ङाङ् वाॽआरो, “खे़ने़ॽग आङ्गाॽ आदाङ्बाने़रो, आङ्गाॽ कत्तुङ्बा के़रे़क् नुबा पाःन्हाॽ खे़ने़ॽए के़बिराङ्बारो॥” 3 निङ्वाॽफुमाङ्ङिल्ले़ सेसे कुमनाहाॽग साॽरिक् नुबा मे़जोक्लो, हे़क्क्याङ् खे़ङ्हाॽनु वाॽमा खोसुङ्ङिल्ले़ आङ्गाॽ साॽरिक् आनिङ्वाॽ तारो॥ 4 वेॽ माङ्साम्माङ्हाॽ माङ्गे़घबाहाॽरे़ आबाङे तुक्खेःन्लक् मे़भोसुरो॥ खे़न् माङ्साम्माङ्हाॽ सामाक्खिॽ से़सुङ्ल माङ्मे़घआसिङ्ङिल्लो, हे़क्क्याङ् खुन्छिॽ मिङ्ङाङ् मे़लोःक्खुङ्ङिन्लो॥ 5 यहवे दाङ्बाए, खे़ने़ॽ आङ्गाॽ आलागि के़रे़क् पाःन्हाॽरे़ कुबुन्ने़रो॥ हे़क्क्याङ् चाहाब् चोःक्काबा के़रे़क् पाःन्हाॽ के़बिआरो, ताये़म्बा आहिङ्मन् के़हुक्को वाॽरो॥ 6 खे़ने़ॽ के़बिराङ्बा लाजेन् साॽरिक् पनुनुबा चोक्लो, से़क्खाए, आङ्गाॽ आसिक् पसम् के़सम्बा आलक्किन् खोसुङ्ङाङ् वाॽआरो॥ 7 आङ्गाॽ यहवे दाङ्बे़ल्ले़ कुनारा फोसुङ्लो, थेआङ्भे़ल्ले़ खुने़ॽ सुजा पिआरो॥ हे़क्क्याङ् आसिक्लुङ्माल्ले़ से़न्दिक्काङ् आङ्गाॽ खाहुन् पिआरो॥ 8 सदादिङ् आन्दाङ्बे़ङ्ग आदगाङ् निसुङ्लो॥ खुने़ॽ आजुप्साङ् ले़प्माङ् वाॽबाल्ले़ चोगुल्ले़ आङ्गाॽ मे़गिआन्लो॥ 9 खे़ल्ले़चोगुल्ले़ आनिङ्वाॽ ताआङ् सःत्तारो, आधक्किन् योधो मे़लॽने़ल्लो, 10 थेआङ्भे़ल्ले़ निङ्वाॽफुमाङ्ङे, आयाम्साम्मिन् खे़मा यङ्सङ्ङो पक्के़न्धने़न्लो॥ हे़क्क्याङ् सेसे के़से़वारोबाल्ले़ कुधक्किन् इःप्पुङ्ङो किमा यःप्मा के़म्बाङ्घुन्लो॥ 11 खे़ने़ॽ हिङ्मन्नो के़देॽबा लाम् ओसेःन्गे़धाक्ताङ्ङाङ् वाॽरो॥ हे़क्क्याङ् के़दगाङ् युङ्ङाल्ले़ साॽरिक् सःत्तारो, हे़क्क्याङ् खे़ने़ॽनु वाॽआल्ले़ सदादिङ् आनिङ्वाॽ तारो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.