निङ्वाॽफु साम्लोसुम् 148 - लिम्बुइक्सादिङ् खाम्बेःक्मो निङ्वाॽफुमाङ्ङिन् कुनारा फोमा 1 यहवे दाङ्बे़ल्ले़ कुनारा फोसे़म्मे़ॽओ! साङ्ग्राम्पेदाङ्लाम्बा यहवे दाङ्बे़ल्ले़ कुनारा फोसे़म्मे़ॽओ, चन्जम्बादे़न्नो खुने़ॽ कुनारा फोसे़म्मे़ॽओ॥ 2 साङ्ग्राम्पेदाङ्बा के़रे़क् कुमाङ्लाइङ्बासे, खुने़ॽ कुनारा फोसे़म्मे़ॽओ, साङ्ग्राम्पेदाङ्बा के़रे़क् कुधक्सुबासे, खुने़ॽ कुनारा फोसे़म्मे़ॽओ॥ 3 नाम् नु लाबासे, खुने़ॽ कुनारा फोसे़त्छे़ॽओ, पओःत् के़ओःप्पा खेःम्सिक्पासे, खुने़ॽ कुनारा फोसे़म्मे़ॽओ॥ 4 के़रे़क्नुःल्ले़आङ् थाःङ्धाक्पा ताङ्साक्पाए, हे़क्क्याङ् खे़न् ताङ्साक्पान्नुःल्ले़आङ् थो के़ने़बा च्वाःत्छे, खुने़ॽ कुनारा फोसे़म्मे़ॽओ॥ 5 खे़ङ्हाॽ के़रे़क्ले़ यहवे दाङ्बे़ल्ले़ कुमिङ्सो कुधाःङ्सो मे़जोगुररो, थेआङ्भे़ल्ले़ खुने़ॽ इङ्जाङ् चोगुआङ् खे़ङ्हाॽ के़रे़क् नावागे़न् चइःत् पोःक्खे़रो॥ 6 खुने़ॽ सदादिङ्ले़ लागि खे़ङ्हाॽ फत्छुसिआङ् पत्लो, हे़क्क्याङ् खे़न् चोगुबा पाःन्हाॽ आप्फाल्ले़आङ् मे़ले़क्ने़न् मे़बेःक्ने़ल्लो॥ 7 च्वाःत् सिगाङ् के़याक्पा पयम् यम्बा पाधुङ् ले़ःक्ङासे, हे़क्क्याङ् कुदिम्बे केःम्बा वरःङ्से, इक्सादिङ् खाम्बेःक्मोलाम्बा यहवे दाङ्बे़ल्ले़ कुनारा फोसे़म्मे़ॽओ॥ 8 साःम्भे नु फःन्, नाःङ् नु खाॽमित्, खुने़ॽ कुबान् इःप्मा नाःप्मा के़दे़म्बा खइक् खइक् के़इक्सिङ्बा सुरित् केजङ्से, खुने़ॽ कुनारा फोसे़म्मे़ॽओ॥ 9 नाङ्जङ्लुङ् नु के़रे़क् थे़गुसे, कुजाॽ के़धोःक्पा सिङ्बुङ् नु साम्माङ् सिङ्से, खुने़ॽ कुनारा फोसे़म्मे़ॽओ॥ 10 ताम्भुङ् थक्सा नु के़रे़क् हिम्थक्सासे, के़उःङ्सिङ्बा के़सःन्छिङ्बा थक्सा नु के़बे़बा पुसासे, खुने़ॽ कुनारा फोसे़म्मे़ॽओ! 11 इक्सादिङ् खाम्बेःक्मोबा हाङ्से, हे़क्क्याङ् के़रे़क् मे़न्छाम् सुवाङ्से, खे़ब्याङ् हाङ्सा नु के़रे़क् युक्साबासे, खुने़ॽ कुनारा फोसे़म्मे़ॽओ॥ 12 थाङ्बे़न् नु मे़न्छ्यासे, काप्पोबा नु अङे़ःक्वासे, यहवे दाङ्बे़ल्ले़ कुनारा फोसे़म्मे़ॽओ॥ 13 खे़ङ्हाॽ के़रे़क्ले़ यहवे दाङ्बे़ल्ले़ कुनारा मे़भोसुररो, थेआङ्भे़ल्ले़ खुने़ॽ कुमिङ्ङिन् वेॽ के़रे़क् मिङ्हाॽनुःल्ले़ यम्बा चोक्लो, खुने़ॽ कुमिमिदिङ्ङिन् इक्सा खाम्बेक् हे़क्क्याङ् ताङ्साक्पान्नुःल्ले़आङ् कुधुङ्धोबा चोक्लो॥ 14 खुने़ॽ कुमनाहाॽ के़धुम्बा चोगुसिरो, कुनिङ्वाॽरे़ खोःप्तुसिबा कुसेसे मना इस्राइलबा मनाहाॽरे़ खुने़ॽ मिङ्सो इङ्धाङ् मे़बिरुरो॥ यहवे दाङ्बे़ल्ले़ कुनारा फोसे़म्मे़ॽओ! |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.