निङ्वाॽफु साम्लोसुम् 143 - लिम्बुके़साक्पो आधाःल्ले़बा पेलि दाउदरे़ कुसाम्लो 1 यहवे दाङ्बाए, आबेलिगे़न् तुवान् खे़प्से़ॽओ, आङ्गाॽ लुङ्माॽ तुक्ताङ्ङे़ॽ फाॽआङ् पेलि फाक्ने़बान् निङ्वाॽ पिरे़ॽओ॥ हे़क्क्याङ् खे़ने़ॽ नसाःन्साबा नु साम्योबा के़जोःक्पा कुइसिक् खे़ने़ॽ आङ्गाॽ नुगप् पिराङ्ङे़ॽओ॥ 2 आबाङे के़से़वारोबान् खासे़न्नो मे़धासे़न्ने़ॽओ, थेआङ्भे़ल्ले़ खे़ने़ॽ के़दगि साम्योबा के़लाॽबा आत्तिन्नाङ् होप्लो॥ 3 आनिङ्मिहाॽरे़ आङ्गाॽ मे़नाःत्तारो, खे़ङ्हाॽरे़ आङ्गाॽ खाम्मो मे़धाम्माआङ् चिदोॽ चिदोॽ मे़दोॽआरो॥ खे़ङ्हाॽरे़ आङ्गाॽ इरिक् ये़म् थारिक् खागे़माक्पादे़न्नो कुसिवे़त् मनान् ने़मनाबा हे़क्के मे़युक्खाङ्ङाङ् युङ्ङारो॥ 4 खे़ल्ले़चोगुल्ले़ आनिङ्वाॽ सिगाङ् आङ्गाॽ आसक्मा पुॽरो, हे़क्क्याङ् किमाल्ले़ आसिक्लुङ्मान् यङ्लो॥ 5 आङ्गाॽ के़बेःक्पा ये़म्मिन् निङ्वाॽ इःत्तुङ्लो, हे़क्क्याङ् के़रे़क् के़याःम्बक्हाॽ निङ्वाॽ लिङ्सुङ्लो, खे़ब्याङ् खे़ने़ॽ के़जोगुबा काक् के़याःम्बक्हाॽ आङ्गाॽ आनिङ्वाॽ सुम्लॽरो॥ 6 आङ्गाॽ पेलि फाक्काल्ले़ आहुक्हाॽ के़दगि सन्छुङ्लो, के़हेबाआङ् के़ने़बा खाम्बाङ् कुइसिक् आनिङ्वाॽसाम्मिन् खे़ने़ॽ के़मिःप्माल्ले़ तरुरो॥ सेला 7 यहवे दाङ्बाए, आल्लो हारा नुगप् पिराङ्ङे़ॽओ, आङ्गाॽ आसक्मा पुॽरे़आङ् वाॽरो॥ आङ्गाॽलाम् माःङ्घा मे़बोःक्खे़न्ने़ॽओ, मेःन्ने़भग्र आङ्गाॽग खे़मा यङ्सङ्ङो के़बेःक्पा कुइसिक् पोङ्ङारो॥ 8 थिक्याःन्धक् ताःन्छोदिङ् तानाम्मो चक्मे़ल्लॽए लुङ्माॽ के़दुक्काबान् आङ्गाॽ आनिङ्वाॽ सुम् लॽर याःन्दाङ्ङे़ॽओ॥ थेआङ्भे़ल्ले़ आङ्गाॽ खे़ने़ॽओ आनिङ्वाॽ युक्खुङ्ङाङ् वाॽआरो॥ लाङ्घेःक्मा के़बोङ्बा लाम्मिन् आङ्गाॽ ओसेःन्धाक्ताङ्ङे़ॽओ, थेआङ्भे़ल्ले़ आयाम्साम्मिन् आङ्गाॽ खे़ने़ॽओ तोःन्दुङ्लो॥ 9 यहवे दाङ्बाए, आनिङ्मिहाॽलाम् आङ्गाॽ से़ःप्ताङ्ङे़ॽओ, आङ्गाॽग खे़ने़ॽओ से़ःप्सिङ्से़ तोःन्छिङ्ङाआङ् वाॽआरो॥ 10 खे़ने़ॽग आङ्गाॽ आनिङ्वाॽफुमाङ्ने़रो, खे़ने़ॽ के़निङ्वाॽ कुइसिक् चोःक्मा आङ्गाॽ हुॽराङ्ङे़ॽओ॥ आङ्गाॽ सेसे के़माङ्ङिल्ले़ नुरिक् मे़त्ताङ्ङे़ॽओ हे़क्क्याङ् कुदोःप्मा लाम्मो लाम्लोसाङ्ङे़ॽओ॥ 11 यहवे दाङ्बाए, के़मिङ्सो इङ्धाङ्ले़ लागि से़ःप्ताङ्ङे़ॽओ॥ खे़ने़ॽ साम्योबा के़जोःक्पाल्ले़ चोगुल्ले़ आङ्गाॽ तुक्खे लाक्खेलाम्बा चोःक्युम्भो पिराङ्ङे़ॽओ॥ 12 से़क्खा लुङ्माॽ के़दुक्काबाल्ले़ चोगुल्ले़ आङ्गाॽ आनिङ्मिहाॽ मे़क्खे़से़ॽओ॥ हे़क्क्याङ् आनिङ्मिहाॽ खाप्पुथ्यःङ् चोगे़से़ॽओ, थेआङ्भे़ल्ले़ आङ्गाॽग खे़ने़ॽ के़से़वारोबाआरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.