निङ्वाॽफु साम्लोसुम् 142 - लिम्बुके़साक्पो आधाःल्ले़बा पेलि दाउदे़न् लुङ्फुक्कोओ वये़ल्ले़ पेलिरे़ लागि मस्किल कुसाम्लो 1 यम्बा इक्लाओ आङ्गाॽ यहवे दाङ्बान् उःत्तुङ्लो, आङ्गाॽ लुङ्माॽ तुक्ताङ्ङे़ॽ फाॽआङ् यहवे दाङ्बान् पेलि फाक्तुङ्लो॥ 2 खुने़ॽ कुदगि आलुङ्हान् पाःन्हाॽ तोःन्दुङ्लो, के़रे़क् आदुक्खे आलाक्खेहाॽ आङ्गाॽ खुने़ॽए चे़क्तुङ्लो॥ 3 आसक्मा पुॽइल्ले़ थे चोःक्मा पोङ्, खे़न् खुने़ॽए निसुरो॥ आङ्गाॽ आलाङ्घेःक्मा लाम्मो आनिङ्मिहाॽरे़ स्वाःत्ताङ् इमे़युक्ताङ्ङाङ् ने़रो॥ 4 आङ्गाॽ आबेसाङ् याप्मि के़भाॽबा मनाहाॽ कोःत्तुङ्सिङ्लो, कर याप्मि कम्ब्राङ् के़मे़प्पा मना आत्तिन्हाॽआङ् मे़होप्लो, आङ्गाॽ आइःम्सिङ्दे़न् आत्तिआङ् होप्लो, आङ्गाॽ हाःत्ले़आङ् निनि मे़ल्लाप्पाल्लो॥ 5 यहवे दाङ्बाए, फाॽराङ्ङे़ॽ फाॽआङ् आङ्गाॽ खे़ने़ॽ उःत्ने़रो, खे़ने़ॽग आङ्गाॽ आइःम्सिङ्मा दे़न्ने़रो, हे़क्क्याङ् आङ्गाॽ आहिङ्मन्नो चाहाब् चोःक्काबा के़रे़क् पाःन्हाॽग खे़ने़ॽएरो॥ 6 आङ्गाॽ आबेलिन् खे़प्से़ॽओ, थेआङ्भे़ल्ले़ साॽरिक् के़साक्पो आङ्गाॽ थ्याङ्ङाङ् वाॽआरो॥ आङ्गाॽ याप्मि के़नाःप्पा आनिङ्मिहाॽलाम्बा से़ःप्ताङ्ङे़ॽओ, खे़ङ्हाॽ आङ्गाॽनुःल्ले़आङ् साॽरिक् के़धुम्बा मे़जोक्लो॥ 7 आङ्गाॽ पुङ्लाहिम्मोलाम्बा लःत्ताङ्ङे़ॽओ, आङ्गाॽ के़नारा फोसुङ्लो॥ खे़ने़ॽ आङ्गाॽ नुरिक् के़मे़त्ताङ्बाल्ले़ चोगुल्ले़ के़मनाहाॽ आङ्गाॽ आघिरि मे़जुम्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.