निङ्वाॽफु साम्लोसुम् 141 - लिम्बुसुत्थो पोङ्मारे़न् युःन्छिक्पा पेलि दाउदरे़ कुसाम्लो 1 यहवे दाङ्बाए, खे़ने़ॽ हाराए त्ये़ॽओ फाॽआङ् आङ्गाॽ उःत्ने़रो॥ आङ्गाॽ फाॽराङ्ङे़ॽ फाॽआङ् पेलि फाक्ने़बान् खे़प्से़ॽओ॥ 2 आङ्गाॽ पेलि फाक्ने़बान् के़दगि कुनाम्गे़नुॽबा साङ्सिङ् कुइसिक् पोङ्लरो, हे़क्क्याङ् आहुक्हाॽ फोःक्खुङ्ङिल्ले़ युन्धोःक्पा वयागे़न् सिदुङ्जभा हे़क्के पोङ्लरो॥ 3 यहवे दाङ्बाए, आङ्गाॽ फे़न्पान् पाःप्मा मे़बाङ्घाङ्ङिन्ने़ॽओ, आङ्गाॽ आम्ब्राओलाम् ताप्फे़ःम्बा पान् लःम्मा मे़भाःक्ते़न्ने़ॽओ॥ 4 फे़न्याःम्बक् मे़न्जोःक्मारे़ लागि ताप्फे़ःम्बा याःम्बक् के़जोःक्पाहाॽनु आङ्गाॽ आनिङ्वाॽ मे़दङ्ने़ल्लरो, हे़क्क्याङ् खे़ङ्हाॽरे़ मे़जबा कुजागे़नुॽबा कुजान् आङ्गाॽ चामा मे़बोङ्ने़ल्लरो॥ 5 साम्योबा मनाहाॽरे़ आङ्गाॽ मे़हिप्पाररो, खे़ङ्ग आलागि लुङ्माॽ मे़दुक्काबा पोङ्लो॥ खे़ङ्हाॽरे़ आङ्गाॽ मे़भे़ःक्काररो, खे़ङ्ग आङ्गाॽ आलागि आध्गेक्ओ निःङ्गेॽ हुःप्मनाबा पोङ्लो॥ खे़न् आङ्गाॽ मे़अत्ताल्लो॥ हे़क्केसाङ् ताक्के़भे़ॽबा मनाहाॽरे़ मे़जोगुबा फे़न्याःम्बक्किल्ले़ कुदक्ले़ङ्वाओ आङ्गाॽ सदादिङ् तुवा चोःक्कारो॥ 6 खे़ङ्हाॽरे़ खुनिॽ युक्साबाहाॽ याक्पेओलाम्बा यो लाप्मे़भुसुसिल्ले़ ताक्के़भे़ॽबा मनाहाॽरे़ आङ्गाॽ आबाःन्निन् से़क्खा फाॽआङ् कुसिङ् मे़निःत्तुरो॥ 7 खे़ङ्हाॽरे़ अक्खे मे़बाःत्तुरो, “के़क्चु थोङ्माल्ले़ लुङ्हाॽ ले़ङ्लःन्लो, हे़क्केलॽरिक्के आनिॽ ये़प्पाहाॽ इपुङ्ङो से़रे़आङ् ने़रो॥” 8 यहवे दाङ्बा निङ्वाॽफुमाङ्ङे, आङ्गाॽ खे़ने़ॽ तक्पे़त् ओमे़त्ने़रो, खे़ने़ॽग आङ्गाॽ आइःम्सिङ्मादे़न्ने़रो, आङ्गाॽ आसक्मा पेक् मे़बाङ्घे़न्ने़ॽओ॥ 9 खे़ङ्हाॽरे़ आङ्गाॽ इयुक्मा मे़गोःत्ताङ्लो, फे़न्याःम्बक् के़जोःक्पाहाॽरे़ मे़गे़सुबा चे़न्नोलाम् आङ्गाॽ से़ःप्ताङ्ङे़ॽओ॥ 10 कुइगे़भे़म्बाहाॽरे़ मे़गे़सुबा चे़न्नो आबाङे खुन्छिॽ मे़धाररो, कर आङ्गाॽग थेआङ् मे़ल्लॽए पेःक्कारो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.