निङ्वाॽफु साम्लोसुम् 139 - लिम्बुनिङ्वाॽफुमाङ्ङिल्ले़ कुनारा फोमा साम्लो के़हुॽबाल्ले़ लागि दाउदरे़ कुसाम्लो 1 यहवे दाङ्बाए, खे़ने़ॽ आङ्गाॽ आनिङ्वाॽ के़साॽरुआङ् वाॽरो, हे़क्क्याङ् आङ्गाॽ कुसिङ् के़निःत्तारो॥ 2 आङ्गाॽ चोगुङ्बा के़रे़क् आयाःम्बक्हाॽ खे़ने़ॽ के़निसुरो, माःङ्घा लाम्बाए आङ्गाॽ आनिङ्वाॽबान् कुसिङ् के़निःत्तुरो॥ 3 आङ्गाॽ याःम्बक् चोःक्कासाङ् नाःम्सिङ्ङासाङ् खे़ने़ॽ नुरिक्काङ् के़निआरो, हे़क्क्याङ् आङ्गाॽ चोगुङ् पाःत्तुङ्बाहाॽ के़रे़क् खे़ने़ॽ के़निसुरो॥ 4 यहवे दाङ्बाए, आङ्गाॽ पाःप्मा इःत्तुङ्बान् तगिसा निङ्वाॽ के़घोसुरो, खे़न् थिक्काङ् मेःन्ने आङ्गाॽ पाःप्मानुःल्ले़ तगिसा सरक् कुसिङ् के़निःत्तुरो॥ 5 आङ्गाॽ आएगाङ् आदगाङ् आत्तिसाङ् खे़ने़ॽ के़वाॽरो, हे़क्क्याङ् के़मुक्साम्मिल्ले़ आङ्गाॽ कम्ब्राङ् के़मे़त्तारो॥ 6 अक्तङ्बा सिक्कुम् निङ्वाॽग आलागि साॽरिक् निङ्वाॽ के़माबा चोक्लो, कन् कुसिङ् निःप्मा आलागि चाॽरिक् के़साक्पा चोक्लो॥ 7 खे़ने़ॽ के़याम्साम्लाम्बा आङ्गाॽ खे़त्छिङ्मा मे़सुक्काल्लो, के़दगिलाम्बा आत्तोआङ् आङ्गाॽ पेःक्मा मे़सुक्काल्लो॥ 8 आङ्गाॽ ताङ्साक्पो पेःक्कासाङ् खे़ने़ॽ खे़त्थो के़वाॽरो, आङ्गाॽ खे़मा यङ्सङ्ङो पेःक्कासाङ् खे़ने़ॽग खे़प्मोआङ् के़वाॽरो॥ 9 नाङ्गे़न् पिसाङ् आङ्गाॽ साॽरिक् माःङ्घा पे़आ पेःक्कासाङ्, इग्र नाम्धा ले़प्साङ् के़रे़क्नुःल्ले़ माःङ्घा पेःक्काआङ् याङ्धोःक्कासाङ्, 10 आङ्गाॽ लाम्लोमारे़ लागि खे़प्मो के़वाॽरो, आङ्गाॽ फाॽमारे़ लागि खे़प्मोआङ् के़दे़म्मारो॥ 11 आङ्गाॽ अक्खे पाःप्मा सुक्तुङ्बिला, “माक्चिगे़न् खादाम्माल्ले़ सुःप्ताङ्ङे़ॽओ, हे़क्क्याङ् खाओःप्मान् आङ्गाॽ आघिरि से़न्दिक् पोःक्खे़ॽओ॥” 12 करसाङ् माक्चिगे़न् खादाम्मे़न् खे़ने़ॽ के़लागि माक्सिःङ्ग्याःप्पा मे़बोङ्ने़ल्लो, हे़क्क्याङ् से़न्दिक्किन् ले़न्दिक् हे़क्के खाओःत्लो, खे़ने़ॽ के़लागि से़न्दिक् नु ले़न्दिक् लत्छारो॥ 13 खे़ने़ॽ आधक्ला आलिङ्गे़न् के़रे़क् के़जोगुरो, आम्मारे़ कुसाप्पोःक्को के़जोगाङ्लो॥ 14 आङ्गाॽ ने़हिनिङ्वाॽरे़ मे़न्धाप्पे के़जोगाङ्बाल्ले़ चोगुल्ले़ के़नारा फोसुङ्लो, कन् के़रे़क् पाःन्हाॽ आनिङ्वाॽ सिगाङ्लाम् आङ्गाॽ कुसिङ् निःत्तुङ्लो॥ 15 आङ्गाॽ आलुङ्सिहाॽ पोःक्खे़र पत्छे़ल्ले़, आङ्गाॽ आम्मारे़ कुसाप्पोःक्को खे़ङ्हाॽ चक्सिङ्ल पत्छे़रो॥ हे़क्क्याङ् मे़न्निए मे़न्धाए आङ्गाॽ खे़प्मो पोराङ्ल पत्छाङ्लो, खे़म्भे़ल्ले़ आङ्गाॽ खे़प्मो वयाङ्बान्नाङ् खे़ने़ॽ के़निसुरो॥ 16 आङ्गाॽ आम्मारे़ कुसाप्पोःक्कोलाम् लःम्मानुःल्ले़ तगि खे़ने़ॽ के़निसाङ्बारो, आङ्गाॽ आहिङ्मन्निल्ले़ कुहेःक्सिङ्मो कम्भ्यारिक् ये़म् हिङ्ङा के़लॽबा पाःन्हाॽ तगिए खे़ने़ॽ के़साप्पन्नो साप्ते़आङ् पत्छे़रो॥ 17 यहवे दाङ्बाए, खे़ने़ॽ के़इःत्तुबा पाःन्हाॽ आलागि साॽरिक् इमे़ल्लुङ्बा चोक्लो, हे़क्क्याङ् के़इःत्तुबा पाःन्हाॽ आङ्गाॽ निःप्मा मे़सुक्कान्लो॥ 18 खे़न् के़इःत्तुबा पाःन्हाॽ आङ्गाॽ निःप्मा कोःत्तुङ्साङ्, खे़न् ये़ःङ्घानुःल्ले़आङ् यरिक् चोक्लो॥ आङ्गाॽ आमिक्युमालाम् सोआधाङ्ङाल्ले़ आङ्गाॽ खे़ने़ॽनुए वाॽआरो॥ 19 निङ्वाॽफुमाङ्ङे, के़रे़क् ताप्फे़ःम्बा मनाहाॽ खे़ने़ॽ के़हुक्लाम् मे़मे़क्लरो॥ मना के़से़प्पाहाॽ आङ्गाॽलाम् माःङ्घा मे़बोङ्लरो॥ 20 खे़ङ्हाॽरे़ खे़ने़ॽ के़याःम्बेओ ताप्फे़ःम्बा पाःन्हाॽ मे़बाःत्तुरो, खे़ने़ॽ के़मिङ्ङिल्ले़ कुदक्ले़ङ्वाओ मे़न्वाॽमना पान् मे़बाःत्तुरो॥ 21 यहवे दाङ्बाए, खे़ने़ॽ के़जिःप्पा मनाहाॽ आङ्गाॽ साॽरिक् चिःत्तुङ्सिङ्लो, खे़ने़ॽ के़अप्पाहाॽ, चाॽरिक् आसिक्मे़ले़ःङ्लो॥ 22 आङ्गाॽ खे़ङ्हाॽ साॽरिक् चिःत्तुङ्सिङ्लो, खे़ङ्हाॽ आनिङ्मि लेःत्तुङ्सिङ्लो॥ 23 निङ्वाॽफुमाङ्ङे, आनिङ्वाॽ कोःत्ते़ॽओ, हे़क्क्याङ् आङ्गाॽ आनिङ्वाॽओबा पाःन्हाॽ कुसिङ् निःत्ते़ॽओ, आनिङ्वाॽ पाःन्हाॽ हक्से़ॽओ हे़क्क्याङ् इःत्तुङ्बा पाःन्हाॽ निसे़ॽओ॥ 24 आङ्गाॽओ ताप्फे़ःम्बा पाःन्हाॽ वाॽबि, कोःत्ते़ॽओ, हे़क्क्याङ् आप्फाल्ले़आङ् मे़न्नुप्मनाबा हिङ्मन्ले़ लाम्मो लाम्लोसाङ्ङे़ॽओ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.