निङ्वाॽफु साम्लोसुम् 132 - लिम्बुमाङ्हिम्ले़ लागि पेलि फाक्मा लाम्दिक् चोःक्मा साम्लो 1 यहवे दाङ्बाए, दाउदे़न् निङ्वाॽ इःत्ते़ॽओ, हे़क्क्याङ् खुने़ॽ तुमुबा के़रे़क् ये़त्तुक्खेहाॽ निङ्वाॽ लिङ्से़ॽओ॥ 2 खुने़ॽग यहवे दाङ्बे़ल्ले़ कुमिङ्ङो माङ्हुप् चोगुरो॥ हे़क्क्याङ् इस्राइलसमा मुक्साम्दाङ्बा निङ्वाॽफुमाङ्ङिन्नु माङ्हे़क्सिङ्लो, 3 “आङ्गाॽ आहिम्मो मे़लाःत्तान्लो, हे़क्क्याङ् आने़त्नाओआङ् मे़बेःक्कान्लो॥ 4-5 यहवे दाङ्बे़ल्ले़ कुलागि कुवाॽमादे़न् मे़ङ्घोए थारिक् आङ्गाॽ आमिक्युमा तामे़भाःक्काल्लो॥ हे़क्क्याङ् इस्राइलसमा मुक्साम्दाङ्बा निङ्वाॽफुमाङ्ङिल्ले़ कुसेसेदे़न् मे़न्जोःक्के थारिक् आङ्गाॽ आमिक्किन् चिघिम्माङ् मे़मे़त्ताल्लो॥” 6 आनिगे़ग बेथले़हे़म्मो वयिगे़ल्ले़ माङ्हुप् सन्दोक्किल्ले़ कुयाःम्बेओ खे़प्सुम्बे़रो, हे़क्क्याङ् याआरबा ते़म्बेॽओ खे़न् खोसुम्बे़रो॥ 7 आनिगे अक्खे पाःत्तुम्बे़रो, “आल्ल यहवे दाङ्बे़ल्ले़ कुहिम्मो आनिॽ पेगिरो, खुने़ॽ कुयुङ्मादे़न् तगि खुने़ॽ से़वा मे़त्तुम्लो॥” 8 यहवे दाङ्बाए, मुक्साम्गे़न् मिक्सेःन्निल्ले़ सन्दोक्किन् याङ्सिङ्ङे़ॽओ हे़क्क्याङ् खे़ने़ॽ के़नाःम्सिङ्मादे़न्नो त्ये़ॽओ॥ 9 खे़ने़ॽओ से़वा के़जोःक्पा निङ्वाॽफुसाम्बाहाॽरे़ आभे़ल्ले़साङ् साम्योबा पाःन्हाॽ मे़जोगुररो, हे़क्क्याङ् सेसे के़मनाहाॽ मे़सःत्ताङ् के़नारा मे़भोसुररो॥ 10 यहवे दाङ्बाए, के़से़वारोबा दाउदे़न्नु माङ्हुप् के़जोगुरो, खे़ने़ॽ के़सेगुबा हाङ्ङिन् मे़नाॽरे़न्ने़ॽओ॥ 11 यहवे दाङ्बे़ल्ले़ दाउदे़न्नु लत्छा माङ्हुप् चोगुरो, खे़न् माङ्हुप्पिन् खुने़ॽ के़त्तुएरो, “खे़ने़ॽ के़स्साहाॽओ थिक्पा हाङ् चोगुङ्लो, खे़ने़ॽ के़एगाङ् खे़न् हाङ् पोङ्लो॥ 12 के़स्साहाॽरे़ आङ्गाॽ आमाङ्हुप्पिन् नु हुॽरुङ्सिङ्बा आङ्गाॽ आनिसाम्हाॽ मे़इःत्तु मे़नाःत्तुर पोङ्लो, हे़क्केलॽरिक् मे़इःत्तु मे़नाःत्तुने़भग्र खे़ङ्हाॽरे़ खुनिॽ सामे़न्छाॽहाॽआङ् सदादिङ् सदादिङ् हाङ् मे़बोङ्लो॥” 13 थेआङ्भे़ल्ले़ निङ्वाॽफुमाङ्ङिल्ले़ग सियोने़न् सेगुआङ् वाॽरो, कङ्ग कुवाॽमादे़न् चोःक्मा कुनिङ्वाॽ वाॽरो॥ 14 खुने़ॽ पाःत्तु, “कङ्ग सदादिङ्ले़ लागि आङ्गाॽ आनाःम्सिङ्मादे़न्लो, आङ्गाॽ आम्भा कप्मो युङ्मा आनिङ्वाॽ वाॽरो॥ 15 सियोनओ चाहाब् के़जोःक्पा के़रे़क् कुजाहाॽ आङ्गाॽ के़क्कुङ्ल चोगुङ्लो, हे़क्क्याङ् खे़प्मोबा याङ्गे़साॽबाहाॽ पघा मे़घार कुजा पिरुङ्सिङ्लो॥ 16 खे़प्मोबा निङ्वाॽफुसाम्बाहाॽरे़ खुनिॽ याःम्बक्को आङ्गाॽ हाङ्वागे़न् मुॽइसाम् पिरुङ्सिङ्लो, हे़क्क्याङ् खे़ॽयोबा सेसे मनाहाॽ मे़सःत्ताङ् साम्मे़लोरो॥ 17 कप्मो आङ्गाॽ दाउदरे़ कुस्साहाॽओ लत्छा पयम् यम्बा हाङ् चोगुङ्लो, हाबा खे़प्मो आङ्गाॽ सेगुङ्बा हाङ्ङिल्ले़ कुहाङ्युक् पोङ्ल चोगुङ्लो॥ 18 खुने़ॽ हाङ्युक् चोगुबा ते़न्नो नुॽमा तामा पोङ्लो, कर खुने़ॽ कुनिङ्मिहाॽ आङ्गाॽ खुन्छिॽ नाधार याःन्दुङ्सिङ्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.