निङ्वाॽफु साम्लोसुम् 122 - लिम्बुयरुसले़ःम्मो सनारुङ् पोङ्ल पेलि लाम्दिक् चोःक्मारे़ लागि दाउदरे़ कुसाम्लो 1 खे़ङ्हाॽरे़ आङ्गाॽ मे़मे़त्ताङ्लो, “आनिॽ यहवे दाङ्बे़ल्ले़ कुहिम्मो पेगिरो” हे़क्केःल्ले़ आङ्गाॽ सःत्ताङ्लो॥ 2 हे़क्क्याङ् आल्लो आनिॽ कप्मो आवाॽरो, यरुसले़ःम्बा ताःक्हन् लाम्धेःप्पा सिगाङ् आनिॽ आये़प्लो॥ 3 यरुसले़म ये़क्यक्किन् नुरिक् मे़गाम्सुआङ् मे़जोगुबा चोक्लो, कन् मे़गाम्सुबा लुङ्धाक्हाॽ लुःम्मा सुक्मे़न्दे़प्मनाबा चोक्लो॥ 4 यहवे दाङ्बे़ल्ले़ कुमना इस्राइलबा के़रे़क् सुवाङ्हाॽ से़वा चोःक्से़ कप्मो मे़दारो, कुइङ्जाङ्ङिल्ले़ पाःत्तुबा कुइसिक् इस्राइलिहाॽरे़ खुने़ॽ नुगे़न् मे़बिरुरो॥ 5 कप्मो कुदोःप्मा खासे़न् लोःम्मादे़न्हाॽ ने़रो, दाउद हाङ्ङिल्ले़ कुमुॽइदाङ्साहाॽरे़ खुनिॽ हाङ्युक्नाहाॽ कप्मोए युङ्लो॥ 6 यरुसले़म ये़क्यक्को सनारुङ् पोङ्ल फाॽआङ् अक्खेलॽरिक् पेलि फाक्ते़म्मे़ॽओ, “कन् ये़क्यक्किन् मिःम् के़मे़प्पाहाॽ मे़नुॽमे़दाररो॥ 7 ये़क्यक्कोबा लुङ्धाक् सिगाङ् सनारुङ् ताररो, हे़क्क्याङ् हाङ्यक् कब्रिङ् नुॽमा तामा पोङ्लरो॥” 8 आन्जुम् आन्देङ् नु आगाॽइहाॽरे़ लागि यरुसले़ःम्मिन् मे़त्तुङ्लो, “खे़ने़ॽओ सनारुङ् ताररो॥” 9 कङ्ग यहवे दाङ्बा आनिॽ निङ्वाॽफुमाङ्ङिल्ले़ कुहिम्मिल्ले़ लागिरो, ये़क्यक्को नुॽमादामा पोङ्ल फाॽआङ् आङ्गाॽ पेलि फाक्तुङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.