निङ्वाॽफु साम्लोसुम् 12 - लिम्बुकुभाॽरे़ लागि पेलि साम्लो के़हुॽबाल्ले़ लागि सेम्मिनिथ कुइसिक् दाउदरे़ कुसाम्लो 1 यहवे दाङ्बाए, आभाॽरे़ॽओ, थेआङ्भे़ल्ले़ के़मनाहाॽ मे़मारे़रो॥ नसाःन्साबा मना लत्छाआङ् होप्लो, आइन् ताःन्दिक् कुदोःप्मा मना खोमे़न्दे़त्ने़ल्लो॥ 2 खे़ङ्हाॽ के़रे़क् आबाङे इङ्ले़क् पान् मे़मे़त्छिङ्लो, मुर्ले़ःम्बा पान् मे़बाःत्ताङ् आबाङे इङ्मे़ले़क्सिङ्लो॥ 3 मुर्ले़ःम्बा पान् के़बाःप्पा नु आङ्दिङ् के़लॽबाहाॽरे़ खुनिॽ मुरान् यहवे दाङ्बे़ल्ले़ हुॽरु पिरुसिररो॥ 4 आनिगे पाःत्तुम्बे़बा पाःन्निल्ले़ नाःन्दुम्बे़रो, आनिगे निङ्वाॽ कुइसिःक्लक् पारिगे़रो, आनिगे पारिगे़ल्ले़ हाःत्ले़ साक्मा सुक्तिगे़बे? 5 यहवे दाङ्बे़ल्ले़ अक्खे मे़त्तुसिरो, “आल्ल आङ्गाॽ पोःक्कारो, थेआङ्भे़ल्ले़ मे़न्धुम्मनाबाहाॽ मे़युक्तुसिआङ् मे़वाॽरो, याङ्गे़साॽबाहाॽ उघुइ मे़लॽरो हे़क्क्याङ् तुक्खे के़जाःप्पाहाॽलाम् खे़ङ्हाॽ नाङुङ्सिङ्लो॥” 6 हे़क्क्याङ् यहवे दाङ्बे़ल्ले़ कुबाःन्जाक्किङ्ग नसान् चोःक्मा सुक्के़दे़प्पा चोक्लो, खे़ङ्ग फुजिक्को नुसिले़ङ् थारिक् योःम्नाबा नुबा युप्पा इस्सेःङ्बा हे़क्के चोक्लो॥ 7 खे़ल्ले़चोगुल्ले़ यहवे दाङ्बे, तुक्खे मे़जाःत्तुसिबाहाॽ के़से़ःप्तुसिरो के़लॽबान् आनिगे निसुम्बे़रो॥ कन् इङ्ले़क्के थाःक्हाॽलाम् खे़ङ्हाॽ आप्फाल्ले़साङ् के़दाङ्घुसिरो॥ 8 मे़न्छाम् याप्मिलुम्मो ताप्फे़ःम्बा याःम्बक् मे़जोगुरो हे़क्क्याङ् मिङ्सोइङ्धाःङ् पोङ्ङिल्ले़ कुइगे़भे़म्बाहाॽ आङ्गाॽएःक् लॽरिक् ताक्मे़गन्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.