निङ्वाॽफु साम्लोसुम् 119 - लिम्बुयहवे दाङ्बे़ल्ले़ कुसाम्योथिम् 1 यहवे दाङ्बे़ल्ले़ कुसाम्योथिम् इङ्जाङ्हाॽ के़इःप्पा के़नाःप्पाहाॽ नुबा ये़प्ले़क् के़गप्पा मनासिरो, खे़ङ्हाॽग सदादिङ् मे़सःत्ताङ् मे़वाॽरो॥ 2 खुने़ॽ कुइङ्जाङ्हाॽ के़इःप्पा के़नाःप्पाहाॽ मुॽइसाबासिरो, खे़ङ्हाॽरे़ग सिक्लुङ्मोलाम्बाए खुने़ॽ मे़गोःत्तुरो॥ 3 खे़ङ्हाॽरे़ आभे़ल्ले़आङ् फे़न्याःम्बक् मे़न्जोगुन्लो, खे़ङ्हाॽ यहवे दाङ्बे़ल्ले़ कुलाम्मो लाङ्मे़घेःक्लो॥ 4 यहवे दाङ्बाए, खे़ने़ॽग के़साम्यो इङ्जाङ्हाॽ आनिगे आगे़बिरे़आङ् वाॽरो, हे़क्क्याङ् खे़न् नुरिक्काङ् इःत्ते़म्मे़ॽ नाःत्ते़म्मे़ॽ फाॽआङ् याप्मि के़मे़त्ते़आङ् वाॽरो॥ 5 के़हुॽराङ्बा निसाम्हाॽ इःत्तुङ् नाःत्तुङ्ङिल्ले़ग आक्खे़न् नसाःन्साबा पोङ्माबे फाॽआङ् आङ्गाॽ निङ्वाॽ इःत्तुङ्लो॥ 6 खे़ने़ॽ के़रे़क् के़इङ्जाङ्हाॽ आङ्गाॽ आनिङ्वाॽ इगेःक्काङ् इःत्तुङ् नाःत्तुङ्लो, हे़क्केःल्ले़ आभे़ल्ले़आङ् आङ्गाॽ सिरिङ्ममो मे़धाआन्लो॥ 7 साम्योबा के़साम्योथिम् इङ्जाङ्हाॽ हुॽसिङ्ङारो, हे़क्केलॽरिक् कुदोःप्मा निङ्वाॽरे़ के़नारा फोसुङ्लो॥ 8 के़साम्योथिम् इङ्जाङ्हाॽ इःत्तुङ् नाःत्तुङ्लो, आफाल्ले़आङ् मे़ले़राङ्ङिन् मे़देसाङ्ङिन्ने़ॽओ॥ यहवे दाङ्बे़ल्ले़ कुसाम्योथिम् इङ्जाङ्ङिन् इःप्मा नाःप्मा 9 आक्खेलॽरिक् नालिगे़न् थाङ्बे़न्हाॽ सेसे फुङ्भुङ् वाॽमा मे़सुक्पे? खे़ङ्ग खे़ने़ॽ के़इङ्जाङ्हाॽ मे़इःत्तु मे़नाःत्तुआङ्ङेरो॥ 10 के़रे़क् आसिक्लुङ्मो लाम्बाए आङ्गाॽ खे़ने़ॽ कोःत्ने़रो, आङ्गाॽ के़साम्योथिम् इङ्जाङ्हाॽ मे़म्भेःम्मनाबा चोगाङ्ङे़ॽओ॥ 11 आङ्गाॽ खे़ने़ॽ के़दक्ले़ङ्वाओ लायो मे़जोःक्काल्लो, खे़ल्ले़चोगुल्ले़ के़बाःन्जाःक्किन् आसिक्लुङ्मो युक्खुङ्लो॥ 12 यहवे दाङ्बाए, आङ्गाॽ के़नारा फोसुङ्लो, के़साम्योथिम् इङ्जाङ्हाॽ हुॽराङ्ङे़ॽओ॥ 13 ये़त्ले़ङ् ये़त्ले़ङ् यम्बा इक्लाओ, के़रे़क् के़साम्योथिम् इङ्जाङ्हाॽ आङ्गाॽ पोधक् चोगुङ्लो॥ 14 यरिक् याङ्साकुन्धे खोमाल्ले़ सिक्सम्लो, खे़न्नुःल्ले़आङ् के़इङ्जाङ्हाॽ इःप्मा नाःप्माओ आङ्गाॽ आसिक्सम्लो॥ 15 आङ्गाॽ के़घाहुन्हाॽ निङ्वाॽ इःत्तुङ्लो, हे़क्क्याङ् के़हुॽराङ्बा निसाम्हाॽ निङ्वाॽ पिरुङ्लो॥ 16 खे़ने़ॽ के़इङ्जाङ्हाॽओ आङ्गाॽ सःत्तारो, के़बाःन्जाःक्हाॽ आङ्गाॽ निङ्वाॽ मे़भेःन्नाल्लो॥ यहवे दाङ्बे़ल्ले़ कुसाम्योथिम्मो सःप्मा 17 आङ्गाॽ के़से़वारोबान् नुरिक् मे़त्ताङ्ङे़ॽओ, हे़क्केःल्ले़ आङ्गाॽ कुहिङ्वे़त् वाॽआआङ् के़हुॽराङ्बा निसाम्हाॽ इःत्तुङ् नाःत्तुङ्लो॥ 18 आमिक्किन् हन्दाङ् पिराङ्ङे़ॽओ हे़क्क्याङ् के़इङ्जाङ्ङोबा निङ्वाॽ के़माबा से़क्खान् निमा सुक्तुङ्लरो॥ 19 आङ्गाॽग कन् इक्सादिङ् खाम्बेःक्मो सप्मारे़ लागिरक् वाॽआरो, के़इङ्जाङ्हाॽ आङ्गाॽलाम् लाःत्लाःत् मे़जोगे़न्ने़ॽओ॥ 20 के़रे़क् ये़म्मो खे़ने़ॽ के़घासे़न्हाॽ आङ्गाॽ ले़मा आसिराॽ थाङ्लो, खे़न् कुसिङ् निःप्मारे़ लागि आसिक्सम्लो॥ 21 खे़ने़ॽग आङ्दिङ् के़लॽबाहाॽ के़भे़ःक्तुसिरो, के़इङ्जाङ् इःप्मा नाःप्मा मे़न्दे़म्मबाहाॽ माङ्दे साङ्ग्रारे़ ते़त्तुसिरो॥ 22 आनाधामा नु आनामे़न्छाॽ मे़प्मा खे़ङ्हाॽ मे़भाःक्ते़से़न्ने़ॽओ, थेआङ्भे़ल्ले़ के़साम्योथिम् इङ्जाङ्हाॽ आङ्गाॽ इःत्तुङ् नाःत्तुङ्ङाङ् वाॽआरो॥ 23 हाङ्युक्पाहाॽ चुम्लुङ् मे़जोःक्काङ् आदक्ले़ङ्वाओ चे़म्भन् मे़जोक्लो, कर आङ्गाॽग के़हुॽराङ्बा निसाम्हाॽओए निङ्वाॽ पिरुङ्लो॥ 24 खे़ने़ॽ के़घाहुन् पाःन्हाॽओ आसिक्सम्लो, खे़प्मो सिक्कुम् निङ्वाॽरे़ सुजाहाॽ खोसुङ्लो॥ यहवे दाङ्बे़ल्ले़ कुसाम्योथिम् इङ्जाङ् इःप्मा नाःप्मा निःन्धो 25 आङ्गाॽग सिमालिङ्धो के़राङ्ङाङ् वाॽआरो, खे़ने़ॽ माङ्हुप् के़जोगुबा कुइसिक् आङ्गाॽ याम्मो फोःक्खाङ्ङे़ॽओ॥ 26 चोगुङ्बा के़रे़क् पाःन्नो हिन्दाङ्लो, हे़क्क्याङ् नुगप् के़बिराङ्लो, आङ्गाॽ के़साम्योथिम् इङ्जाङ्ङो लाङ्घेःक्मा हुॽराङे़ॽओ॥ 27 आङ्गाॽ के़साम्योथिम् इङ्जाङ्हाॽ कुसिङ् निःप्मा फाॽराङ्ङे़ॽओ, खे़ब्याङ् निङ्वाॽ के़माबा के़याःम्बक्हाॽओ आङ्गाॽ निङ्वाॽ पिरुङ्लो॥ 28 निङ्वाॽ तुक्खे चामारे़ आङ्गाॽ योःन्दाङ्ङाङ् वाॽआरो, माङ्हुप् के़जोगुबा हे़क्के के़धुम्बा चोगाङ्ङे़ॽओ॥ 29 इङ्ले़क्पा लाम्मो लाङ्घेःक्मा मे़म्बोङ्ङे आङ्गाॽ लाःत्लाःत् कत्ताङ्ङे़ॽओ, खे़ने़ॽ के़इङ्जाङ्लाम्बा लुङ्माॽ तुक्ताङ्ङे़ॽओ॥ 30 आङ्गाॽ के़इङ्जाङ्हाॽ के़इःप्पा के़नाःप्पा पोङ्मा निङ्वाॽ चोगुङ्ङाङ् वाॽआरो, खे़ने़ॽ के़इङ्जाङ्हाॽ आङ्गाॽ निङ्वाॽ पिरुङ्ङाङ् वाॽआरो॥ 31 यहवे दाङ्बाए, आङ्गाॽ के़घाहुन्हाॽ थधप् मे़ल्लॽए इःत्तुङ् नाःत्तुङ्ङाङ् वाॽआरो, सिरिङ्ममो मे़धासाङ्ङिन्ने़ॽओ॥ 32 आङ्गाॽ आसिक् पसम्सम्ल के़इङ्जाङ्हाॽ इःत्तुङ् नाःत्तुङ्लो, थेआङ्भे़ल्ले़ आङ्गाॽ आल्लसाङ् यरिक् खासिङ्निःप्मा निङ्वाॽ के़बिराङ्ङाङ् वाॽरो॥ खासिङ्निःप्मा निङ्वाॽ खोमारे़ लागि पेलि फाक्मा 33 यहवे दाङ्बाए, के़साम्योथिम् इङ्जाङ्हाॽ इःप्मा नाःप्मा हुॽराङ्ङे़ॽओ, हे़क्क्याङ् सदादिङ् खे़न् तिम्दुङ् नाःत्तुङ्लो॥ 34 के़साम्योथिम् इङ्जाङ्ङिल्ले़ कुबेन् आङ्गाॽ हन्दाङ् पिराङ्ङे़ॽओ, हे़क्क्याङ् खे़न् इःत्तुङ् नाःत्तुङ्लो, खे़न् के़रे़क् आसिक्लुङ्मो लाम्बाए आङ्गाॽ तिम्दुङ् नाःत्तुङ्लो॥ 35 के़इङ्जाङ्हाॽ के़इःप्पा के़नाःप्पा चोगाङ्ङे़ॽओ, थेआङ्भे़ल्ले़ आङ्गाॽ खे़प्मो सःप्मा खोआरो॥ 36 आनिङ्वान् के़इङ्जाङ् ले़प्माङ् हिसे़ॽओ, याङ्साकुन्धे ले़प्माङ् मेःल्लो॥ 37 हने़बा पाःन्हाॽओ निङ्वाॽ पिमालाम् आङ्गाॽ से़ःप्ताङ्ङे़ॽओ॥ माङ्हुप् के़जोगुबा हे़क्के आङ्गाॽ नुरिक् मे़त्ताङ्ङे़ॽओ॥ 38 आङ्गाॽ के़से़वारोबान् के़बिराङ्बा माङ्हुप्पिन् के़त्ते़ॽओ, हे़क्क्याङ् के़इङ्जाङ् के़इःप्पा के़नाःप्पाहाॽरे़ खे़ने़ॽ मिङ्सो इङ्धाङ् के़म्बिररो॥ 39 आङ्गाॽ किरुङ्बा आनाधामा पाःन्निन् खे़त्ताङ्देसाङ् पिराङ्ङे़ॽओ, थेआङ्भे़ल्ले़ के़धिम्हाॽ निङ्वाॽ के़माबा चोक्लो॥ 40 ओमे़त्ते़ॽओ, आङ्गाॽ के़इङ्जाङ्हाॽ इःप्मा नाःप्मा निङ्वाॽ चोगुङ्लो, आङ्गाॽ कुसङ् हिङ्मन् पिराङ्ङे़ॽओ, थेआङ्भे़ल्ले़ खे़ने़ॽग साम्योबा के़जोःक्लो॥ यहवे दाङ्बे़ल्ले़ कुसाम्योथिम् इङ्जाङ्ङो निङ्वाॽ पिमा 41 यहवे दाङ्बाए, आङ्गाॽ आक्खे़न् लुङ्माॽ के़दुक्का, ओसेःन्धाक्ताङ्ङे़ॽओ, हे़क्क्याङ् माङ्हुप् के़जोगुबा कुइसिक् आङ्गाॽ से़ःप्ताङ्ङे़ॽओ॥ 42 हे़क्क्याङ्लक् आजाःत्थि के़देबाहाॽ आङ्गाॽ नुगप् पिमा सुक्तुङ्सिङ्लो, थेआङ्भे़ल्ले़ के़बाःन्जाःक्को आङ्गाॽ निङ्वाॽ पिरुङ्लो॥ 43 आभे़ल्ले़साङ् से़क्खा पाःप्मा मुक्साम् पिराङ्ङे़ॽओ, के़घासे़न्हाॽओ आङ्गाॽ आनिङ्वाॽ युक्खुङ्लो॥ 44 सदादिङ् के़साम्योथिम् इङ्जाङ्हाॽ आङ्गाॽ इःत्तुङ् नाःत्तुङ्लो॥ 45 आङ्गाॽ चोःक्युम्भोबा पोङ्ङाआङ् वाॽआरो, थेआङ्भे़ल्ले़ आङ्गाॽग के़निसाम्हाॽ इःप्मा नाःप्मा निङ्वाॽ चोगुङ्ङाङ् वाॽआरो॥ 46 के़इङ्जाङ्हाॽ हाङ्हाॽ चे़क्तुङ्सिङ्लो, हे़क्के चोःक्मा आङ्गाॽ मे़नुःन्नाल्लो॥ 47 के़इङ्जाङ्हाॽ इःत्तुङ् नाःत्तुङ्ङिल्ले़ आङ्गाॽ आसिक्सम्लो, थेआङ्भे़ल्ले़ खे़न् के़इङ्जाङ्हाॽ आङ्गाॽ आसिराॽ थाङ्लो॥ 48 के़इङ्जाङ्हाॽ आसिराॽधाङ्ङाङ् आङ्गाॽ मिङ्सो इङ्धाङ् पिरुङ्लो, के़घाहुन्हाॽओ आङ्गाॽ निङ्वाॽ पिरुङ्लो॥ यहवे दाङ्बे़ल्ले़ कुइङ्जाङ्ङो निङ्वाॽ युङ्मा 49 आङ्गाॽ के़से़वारोबान्नु माङ्हुप् के़जोगुबान् निङ्वाॽ इःत्ते़ॽओ, खे़ल्ले़ आङ्गाॽ हाङ्हाङ् मे़त्ताङ्ङाङ् वाॽरो॥ 50 आङ्गाॽ आदुक्खे आलाक्खेओआङ् आःन्छिङ्मा खोसुङ्ङाङ् वाॽआरो, थेआङ्भे़ल्ले़ के़माङ्हुप्पिल्ले़ आङ्गाॽ हिङ्मन् पिराङ्ङाङ् वाॽआरो॥ 51 आङ्दिङ् के़लॽबाहाॽरे़ सदादिङ् कुनामे़न्छाॽ मे़मे़त्तारो, कर के़साम्योथिम् इङ्जाङ्हाॽ आङ्गाॽ आभे़ल्ले़आङ् मे़ले़त्तान्लो॥ 52 यहवे दाङ्बाए, तगिबा के़घासे़न्हाॽ आङ्गाॽ निङ्वाॽ इःत्तुङ्लो, खे़न् के़घासे़न्हाॽरे़ हाङ्हाङ् मे़त्तारो॥ 53 ताक्के़भे़ॽबाहाॽरे़ के़साम्योथिम् इङ्जाङ्हाॽ मे़भेःन्दुरो, खे़न् निसुङ्ङाङ् साॽरिक् आसिक् पोःक्लो॥ 54 इक्सादिङ् खाम्बेःक्मो आत्ति वाॽआसाङ् खे़ने़ॽ के़इङ्जाङ्हाॽरे़ कुयाःम्बेओ आङ्गाॽ साम्लोहाॽ साप्तुङ्लो॥ 55 यहवे दाङ्बाए, से़न्दिक् खे़ने़ॽ के़मिङ्ङिन् आङ्गाॽ निङ्वाॽ इःत्तुङ्लो, हे़क्क्याङ् के़साम्योथिम् इङ्जाङ्ङिन् आङ्गाॽ निङ्वाॽ लिङ्सुङ्लो॥ 56 के़इङ्जाङ्हाॽ इःत्तुङ् नाःत्तुङ्लो, हे़क्केःल्ले़ आङ्गाॽ सःत्तारो॥ यहवे दाङ्बे़ल्ले़ कुसाम्योथिम् इङ्जाङ्ङो निङ्वाॽ पिमा 57 यहवे दाङ्बाए, खे़ने़ॽ आङ्गाॽइन्नेरो, के़साम्योथिम् इङ्जाङ्हाॽ आङ्गाॽ इःप्मा नाःप्मा माङ्हुप् चोगुङ्लो॥ 58 आसिक्लुङ्मो लाम्बाए खे़ने़ॽ पेलि फाक्ने़रो, माङ्हुप् के़जोगुबा कुइसिक् आङ्गाॽ लुङ्माॽ तुक्ताङ्ङे़ॽओ॥ 59 आये़प्ले़क्किन् निङ्वाॽ इःत्तुङ्ङाङ् वाॽआरो, हे़क्क्याङ् के़घाहुन्हाॽ इःप्मा नाःप्मा माङ्हुप् चोगुङ्ङाङ् वाॽआरो॥ 60 आङ्गाॽग चात्तारो के़इङ्जाङ्हाॽ इःप्मा नाःप्मा मे़सुआन्लो॥ 61 ताक्के़भे़ॽबाहाॽरे़ इमे़युक्ताङ्लो, हे़क्केसाङ् के़साम्योथिम् इङ्जाङ्ङिन् आङ्गाॽ निङ्वाॽ मे़भेःत्छुङ्ङिन्लो॥ 62 से़न्दिक् से़त्लुम्भक्किल्ले़ पोःक्कारो, साम्योबा के़घासे़न्हाॽरे़ लागि आङ्गाॽ के़नारा फोसुङ्लो॥ 63 आङ्गाॽग खे़ने़ॽ मिङ्सो इङ्धाङ् के़बिबाहाॽरे़ खुनिॽ तेःङ्आरो, हे़क्क्याङ् के़साम्योथिम् इङ्जाङ्हाॽ के़इःप्पा के़नाःप्पाहाॽरे़ खुनिॽ चुम्आरो॥ 64 यहवे दाङ्बाए, इक्सादिङ् खाम्बेःक्मोबा मनाहाॽ निरिक्काङ् लुङ्माॽ के़दुक्तुसिरो, के़इङ्जाङ्हाॽ आङ्गाॽ हुॽराङ्ङे़ॽओ॥ यहवे दाङ्बे़ल्ले़ कुसाम्योथिम् इङ्जाङ्ङिल्ले़ कुमे़न् 65 यहवे दाङ्बाए, माङ्हुप् के़जोगुबान् खे़ने़ॽ के़गे़त्तुआङ् वाॽरो, हे़क्क्याङ् आङ्गाॽ के़से़वारोबान् नुरिक् के़मे़त्ताङ्ङाङ् वाॽरो॥ 66 आङ्गाॽ सिक्कुम्दिङ् निङ्वाॽ नु ने़हिनिङ्वाॽ पिराङ्ङे़ॽओ, थेआङ्भे़ल्ले़ के़इङ्जाङ्हाॽ आङ्गाॽ नसान् चोगुङ्लो॥ 67 खे़ने़ॽ आङ्गाॽ खुम्दिङ् पिमानुःल्ले़ तगि ताप्पे़ॽराङ्ङाङ् वयाङ्लो, कर आल्लग के़बाःन्जाःक्किन् आङ्गाॽ इःत्तुङ् नाःत्तुङ्लो॥ 68 खे़ने़ॽ साॽरिक् के़नुॽबा नु याप्मि लुङ्माॽ के़दुक्पा के़जोःक्लो, आङ्गाॽ के़इङ्जाङ्हाॽ हुॽराङ्ङे़ॽओ॥ 69 आङ्दिङ् के़लॽबा मनाहाॽरे़ आयाःम्बेओ इङ्ले़क् मे़बाःत्तुआङ् वाॽरो, कर आसिक्लुङ्मो लाम्बाए के़बिआबा खाहुन्हाॽ इःत्तुङ् नाःत्तुङ्लो॥ 70 खे़न् मनाहाॽरे़ थेआङ् खासिङ् निःप्मा निङ्वाॽ मे़ङ्गत्तुल्लो, कर के़साम्योथिम् इङ्जाङ्हाॽओ आङ्गाॽ आसिक्सम्लो॥ 71 तुक्खे लाक्खे तुमुङ्बान् नुबै पोःक्खे़रो, थेआङ्भे़ल्ले़ खे़ल्ले़ग के़इङ्जाङ्हाॽ आङ्गाॽ हुॽसिङ्मा पाङ्घाङ्लो॥ 72 आङ्गाॽ साम्योथिम् इङ्जाङ्हाॽ के़बिराङ्लो, खे़न् के़बिराङ्बाहाॽ इक्सादिङ् खाम्बेःक्मोबा के़रे़क् याङ्सा कुन्धेःन्नुःल्ले़आङ् साॽरिक् इमे़ल्लुङ्बा चोक्लो॥ यहवे दाङ्बे़ल्ले़ कुइङ्जाङ्ङो के़वाॽबा खासे़न् 73 खे़ने़ॽग आङ्गाॽ नावागे़न् चइःत् के़जोगाङ्लो, खासिङ्निःप्मा सिक्कुम् निङ्वाॽ पिराङ्ङे़ॽओ हे़क्केलॽरिक् आङ्गाॽ के़साम्यो इङ्जाङ्हाॽ हुॽसिङ्मा सुक्काररो॥ 74 खे़ने़ॽ मिङ्सो इङ्धाङ् के़बिबाहाॽरे़ आङ्गाॽ मे़निआआङ् मे़सःत्लो, थेआङ्भे़ल्ले़ के़माङ्हुप्पो आङ्गाॽ आनिङ्वाॽ युक्खुङ्लो॥ 75 यहवे दाङ्बाए, के़घासे़न्हाॽ साम्योबा चोक् फाॽआङ् आङ्गाॽ निसुङ्लो, नसाःन्साबा के़जोःक्पाल्ले़ चोगुल्ले़ए के़घुम्साङ्बा फाॽआङ् कुसिङ् निःत्तुङ्लो॥ 76 चक्मे़ल्लॽए आङ्गाॽ लुङ्माॽ के़दुक्काबान् आलागि आआःन्छिङ्मा पोङ्लरो, के़से़वारोबान् के़बिरुबा माङ्हुप् कुइसिक् कन् के़त्लरो॥ 77 आङ्गाॽ लुङ्माॽ तुक्ताङ्ङे़ॽओ हे़क्क्याङ् आङ्गाॽ हिङ्ङारो, थेआङ्भे़ल्ले़ के़इङ्जाङ्ङो सःत्तारो॥ 78 आङ्गाॽ इङ्ले़क्के फोत्या के़गुःप्पा के़हे़न्छिङ्बाहाॽ सिरिङ्ममो मे़धाररो, कर आङ्गाॽग के़इङ्जाङ्हाॽओ निङ्वाॽ पिरुङ्लो॥ 79 खे़ने़ॽ मिङ्सो इङ्धाङ् के़बिबाहाॽ आङ्गाॽओ मे़दाररो, हे़क्केलॽरिक् खे़ङ्हाॽरे़ के़इङ्जाङ्हाॽ इःप्मा नाःप्पा मे़हुॽसिङ्लरो॥ 80 खे़ने़ॽ के़इङ्जाङ्हाॽ निरिक्काङ् आङ्गाॽ इःप्मा नाःप्मा सुक्तुङ्लरो, हे़क्केलॽरिक् हारि तामालाम् आङ्गाॽ सिरिङ्ममा मे़बोङ्ने़ल्लरो॥ से़ःप्सिङ्मारे़ लागि पेलि फाक्मा 81 यहवे दाङ्बाए, आप्फाल्ले़ ताङ्गे़से़ःप्पाबे फाॽआङ् के़लाम् ओमे़प्मारे़ नासाङ्लो, के़बाःन्जाःक्को आनिङ्वाॽ युक्खुङ्लो॥ 82 खे़ने़ॽ के़जोगुबा माङ्हुप्पिन् के़त् फाॽआङ् के़लाम् ओमे़प्मारे़ आङ्गाॽ आमिक्हाॽ खामे़न्निमनाबा पोःक्खे़आङ् वाॽरो, आङ्गाॽ अक्खे पाःत्तुङ्लो, “खे़ने़ॽ आभे़ल्ले़ के़भाॽआबाबे॥” 83 चे़ल्ले़क्सेल्ले़ कुवा याङ्मा लाप्फुमनाबा सिहोब् सुक्वा कुइसिक् कुसुम् मे़न्दम्मनाबा पोःक्खाङ्ङाङ् वाॽआरो, हे़क्केसाङ् आङ्गाॽ के़इङ्जाङ्हाॽ निङ्वाॽ मे़न्भेःन्ने वाॽआरो॥ 84 आल्लसाङ् आप्फाल्ले़ थारिक् हाङ्घुङ्बाबे? आङ्गाॽ याप्मि तुक्खे के़जाःप्पाहाॽ आप्फाल्ले़ खुम्दिङ् के़बिरुसिबाबे? 85 के़इङ्जाङ् इःप्मा नाःप्मा मे़न्दे़म्मनाबा आङ्दिङ् के़लॽबा मनाहाॽ मे़वाॽरो, खे़ङ्हाॽरे़ आङ्गाॽ थाआर फाॽआङ् लुम्बात् मे़दयुआङ् ने़रो॥ 86 के़इङ्जाङ्हाॽ के़रे़क् नसान् चोःक्मा सुक्के़दे़प्पा चोक्लो, मनाहाॽरे़ इङ्ले़क्पा पाःन्हाॽ मे़बाःत्तुआङ् तुक्खे मे़जाःत्तारो, खे़ने़ॽ आङ्गाॽ फाॽराङ्ङे़ॽओ॥ 87 खे़ङ्हाॽरे़ आङ्गाॽ खप्मे़न् मे़से़राङ्लो, कर आङ्गाॽ के़इङ्जाङ्हाॽ निङ्वाॽ मे़न्भेःन्ने कत्तुङ्लो॥ 88 खे़ने़ॽ सदादिङ् लुङ्माॽ के़दुक्काबाल्ले़ चोगुल्ले़ आङ्गाॽ हिङ्ङाररो, हे़क्केःल्ले़ के़साम्योथिम् इङ्जाङ्ङिन् आङ्गाॽ इःत्तुङ् नाःत्तुङ्लो॥ यहवे दाङ्बे़ल्ले़ कुसाम्योथिम्मो निङ्वाॽ युङ्मा 89 यहवे दाङ्बाए, के़बाःन्जाःक्किन् सदादिङ् वाॽरो, कङ्ग साङ्ग्राम्पेदाङ्ङो आभे़ल्ले़साङ् वाॽरो॥ 90 खे़ने़ॽ नसाःन्साबा के़जोक् के़लॽबा पाःन्निन् थाःक्थाःक्को थारिक् वाॽरो, खे़ने़ॽ इक्सादिङ् खाम्बेःक्मान् के़युक्खुआङ् खे़न् मे़म्मुन्ने युङ्लो॥ 91 खे़ने़ॽ के़इङ्जाङ्ङिल्ले़ के़रे़क् पाःन्हाॽ आइन् थारिक् मे़म्मुन्ने वाॽरो, थेआङ्भे़ल्ले़ खे़ङ्हाॽ के़रे़क्ले़ के़से़वा मे़जोगुरो॥ 92 के़साम्योथिम् इङ्जाङ्ङिन् आसःप्माल्ले़ कुबुन्लो, मेःन्ने़भग्र आङ्गाॽग तुक्खे च्याङ्ङाङ् स्याङ्बा मे़न्लो॥ 93 आङ्गाॽग के़घाहुन्हाॽ आभे़ल्ले़आङ् निङ्वाॽ मे़भेःन्नाल्लो, थेआङ्भे़ल्ले़ खे़न्लाम्बा आङ्गाॽ कुहिङ्वे़त् के़गत्तारो॥ 94 आङ्गाॽग खे़ने़ॽ के़मनाआ, से़ःप्ताङ्ङे़ॽओ, थेआङ्भे़ल्ले़ के़इङ्जाङ्हाॽ इःप्मा नाःप्मा निङ्वाॽ चोगुङ्ङाङ् वाॽआरो॥ 95 ताक्के़भे़ॽबाहाॽरे़ से़प्मा फाॽआङ् आङ्गाॽ मे़सुक्काआङ् मे़युङ्लो, कर के़साम्योथिम् इङ्जाङ्हाॽओ आङ्गाॽ निङ्वाॽ पिरुङ्लो॥ 96 के़रे़क् पाःन्हाॽ कुलिङ्दो मे़गे़त्ने़न् फाॽआङ् निसुङ्ङाङ् वाॽआरो, कर खे़ने़ॽ के़इङ्जाङ्हाॽ कुलिङ्दो के़गे़प्पा चोक्लो॥ यहवे दाङ्बे़ल्ले़ कुसाम्योथिम् इङ्जाङ्ङिन् सिराॽथाङ्मा 97 खे़ने़ॽ के़साम्योथिम् इङ्जाङ्ङिन् आङ्गाॽ साॽरिक् आसिराॽ थाङ्लो, ले़न्दिक् नाम्धाधा खे़ॽयो आङ्गाॽ निङ्वाॽ पिरुङ्लो॥ 98 खे़ने़ॽ के़इङ्जाङ्हाॽ आभे़ल्ले़साङ् कत्तुङ्लो, हे़क्क्याङ् खे़ल्ले़ आनिङ्मिहाॽनुःल्ले़आङ् आङ्गाॽ चाःप्पा चोःक्कारो॥ 99 आसिक्साम्बाहाॽनुःल्ले़आङ् यरिक् आङ्गाॽ पान् कुसिङ्निःत्तारो, थेआङ्भे़ल्ले़ के़इङ्जाङ्हाॽओ आङ्गाॽ निङ्वाॽ पिरुङ्लो॥ 100 खदाक्मिहाॽनुःल्ले़आङ् यरिक् आङ्गाॽ सिक्कुम्साबा चोःक्कारो, थेआङ्भे़ल्ले़ के़इङ्जाङ्हाॽ आङ्गाॽ इःत्तुङ् नाःत्तुङ्लो॥ 101 ताप्फे़ःम्बा लाम्मो लाङ्मे़घेःक्कान्लो, थेआङ्भे़ल्ले़ आङ्गाॽ के़बाःन्जाःक्किन् इःप्मा नाःप्मा निङ्वाॽ चोगुङ्लो॥ 102 खे़ने़ॽ के़घाहुन्हाॽलाम् आङ्गाॽ माःङ्घा मे़म्बोङ्ङे वाॽआरो, थेआङ्भे़ल्ले़ खे़ने़ॽए के़हुॽराङ्ङाङ् वाॽरो॥ 103 खे़ने़ॽ के़घाहुन् पाःन्हाॽ साॽरिक् कुजा के़नुॽबा चोक्लो, खे़ङ्हाॽग सक्वाघुनुःल्ले़ लिम्लो॥ 104 के़साम्योथिम् इङ्जाङ्हाॽओलाम् सिक्कुम् निङ्वाॽ खोसुङ्लो, कल्ले़चोगुल्ले़ आङ्गाॽ के़रे़क् फे़न्याःम्बक्हाॽ चिःत्तुङ्लो॥ यहवे दाङ्बे़ल्ले़ कुसाम्योथिम्मो ओःत्ति 105 खे़ने़ॽ के़बाःन्जाःक्किङ्ग आङ्गाॽ याप्मि लाम्गे़लोबा सेमिरो, हे़क्क्याङ् आलागि लाम् के़धोॽबा ओःत्तिरो॥ 106 आङ्गाॽ माङ्हे़क्सिङाआङ् साम्योबा के़इङ्जाङ्हाॽ इःप्मा नाःप्मा निःन्धो चोगुङ्ङाङ् वाॽआरो॥ 107 यहवे दाङ्बाए, आङ्गाॽ साॽरिक् के़साक्पा तुक्खेहाॽ तुमुङ्ङाङ् वाॽआरो, माङ्हुप् के़जोगुबा कुइसिक् आङ्गाॽ कुहिङ्वे़त् कत्ताङ्ङे़ॽओ॥ 108 यहवे दाङ्बाए, आङ्गाॽ नुगे़न् पिने़बा पेलिगे़न् तुवान् ताःक्ते़ॽओ, हे़क्क्याङ् के़इङ्जाङ्हाॽ हुॽराङ्ङे़ॽओ॥ 109 आभे़ल्ले़साङ् सिमालिङ्धोओ आङ्गाॽ के़राङ्ङाङ् वाॽआरो, कर खे़ने़ॽ के़इङ्जाङ्ङिन् आङ्गाॽ निङ्वाॽ मे़म्भेःन्ने कत्तुङ्लो 110 ताक्के़भे़ॽबा मनाहाॽरे़ इयुक्मा मे़गोःत्तारो, कर आङ्गाॽग के़साम्योथिम् इङ्जाङ्हाॽ निङ्वाॽ मे़म्भेःन्ने वाॽआरो॥ 111 खे़ने़ॽ के़इङ्जाङ्हाॽ आङ्गाॽ आलागि सदादिङ्बा आयाङ्सा कुन्धे पोःक्खे़आङ् वाॽरो, खे़न् याङ्साकुन्धेहाॽरे़ आङ्गाॽ सःत्तार याःन्नारो॥ 112 आङ्गाॽ मे़न्छिए थारिक् के़इङ्जाङ्हाॽ आङ्गाॽ इःत्तुङ् नाःत्तुङ्लो, कन् पाःन्निन् निःन्धो चोगुङ्आङ् वाॽरो॥ यहवे दाङ्बे़ल्ले़ कुसाम्योथिम् इङ्जाङ्ङो से़ःप्सिङ्मा 113 निरिक्काङ् खे़ने़ॽओ निङ्वाॽ मे़म्बिमनाबाहाॽ चिःत्तुङ्सिङ्लो, कर आङ्गाॽग खे़ने़ॽ के़इङ्जाङ्हाॽ आङ्गाॽ आसिराॽ थाङ्लो॥ 114 खे़ने़ॽए आइःम्सिङ्मादे़न् नु आङ्गाॽ याप्मि के़धेःक्पा खोने़रो, के़माङ्हुप्पो आनिङ्वाॽ युक्खुङ्लो॥ 115 लायो के़जोःक्पासे, आङ्गाॽलाम् खिनिॽ माःङ्घा पेगिन्ने़ॽओ, आङ्गाॽग आनिङ्वाॽफुमाङ्ङिल्ले़ कुइङ्जाङ्हाॽ इःत्तुङ् नाःत्तुङ्लो॥ 116 खे़ने़ॽ माङ्हुप् के़जोगुबा कुइसिक् आङ्गाॽ के़धुम्बा चोगाङ्ङे़ॽओ, हे़क्क्याङ् आङ्गाॽ हिङ्ङारो, आनिङ्साङ् पुक्ल मे़याःन्दाङ्ङिन्ने़ॽओ॥ 117 आहुक्को ते़म्साङ्ङे़ॽआङ् आङ्गाॽ मे़न्जोःन्ने तक्ताङ्ङे़ॽओ, हे़क्केलॽरिक् सदादिङ् के़इङ्जाङ्हाॽओ आङ्गाॽ निङ्वाॽ पिमा सुक्तुङ्लो॥ 118 खे़ने़ॽ के़साम्योथिम् इङ्जाङ्हाॽ मे़न्इःप्मना मे़न्नाःप्मनाबाहाॽ के़रे़क् के़नाॽरुसिरो, खे़ङ्हाॽरे़ खुनिॽ इङ्ले़क्हाॽ कुसुम् मे़न्दम्मनाबा चोक्लो॥ 119 इक्सादिङ् खाम्बेःक्मोबा के़रे़क् कुइगे़भे़म्बाहाॽ ताम्जिॽ हे़क्के के़दुगु के़देसुसिरो, खे़ल्ले़चोगुल्ले़ खे़ने़ॽ के़निसाम्हाॽ आङ्गाॽ आसिराॽ थाङ्लो॥ 120 खे़ने़ॽ के़जोगुल्ले़ पगि किआरो, खे़ने़ॽ के़घासे़न्हाॽरे़ चोगुल्ले़ आङ्गाॽ थे़गक्कक्ना यङ्ङारो॥ यहवे दाङ्बे़ल्ले़ कुसाम्योथिम् इङ्जाङ्ङिन् इःप्मा नाःप्मा 121 आङ्गाॽ नुबा नु कुदोःप्मा याःम्बक्हाॽ चोगुङ्ङाङ् वाॽआरो, आनिङ्मिहाॽरे़ खुनिॽ हुक्को आङ्गाॽ मे़धासाङ्ङिन्ने़ॽओ॥ 122 आङ्गाॽ के़से़वारोबान् “फाॽने़” फाॽआङ् माङ्हुप् चोगे़ॽओ, आङ्दिङ् के़लॽबाहाॽरे़ आङ्गाॽ तुक्खे चाःप्मा मे़ङ्घोआन्लरो॥ 123 खे़ने़ॽ आङ्गाॽ याप्मि ताङ्से़ःप्मा नु फाॽमा माङ्हुप् के़जोगुआङ् वाॽरो, आङ्गाॽ के़से़न्लप्पिन् ओमे़प्मा निङ्वाॽ चोगुङ्ङाङ् वाॽआरो॥ 124 लुङ्माॽ के़दुक्काबा हे़क्के आङ्गाॽ नुरिक् मे़त्ताङ्ङे़ॽओ, हे़क्क्याङ् के़साम्योथिम् इङ्जाङ्ङिन् आङ्गाॽ हुॽराङ्ङे़ॽओ॥ 125 आङ्गाॽग के़से़वारोबाआरो, खासिङ्निःप्मा निङ्वाॽ पिराङ्ङे़ॽओ, हे़क्क्याङ् के़निसाम्हाॽ कुसिङ् निःप्मा ने़हिनिङ्वाॽ खोसुङ्लो॥ 126 यहवे दाङ्बाए, आल्ल खे़ने़ॽ याःम्बक् चोःक्मा के़बोङ्बा ये़म् त्ये़आङ् वाॽरो, मनाहाॽरे़ के़इङ्जाङ्ङिन् इःप्मा नाःप्मा मे़ले़रुआङ् वाॽरो॥ 127 आङ्गाॽग के़इङ्जाङ्हाॽ साम्म्याङ्नुःल्ले़आङ् आसिराॽ थाङ्लो, के़रे़क्नुःल्ले़ नुबा योःम्मनाबा इसेःङ्बा साम्म्याङ्नुःल्ले़आङ् साॽरिक् लुङ्माॽ तुक्तुङ्लो॥ 128 खे़ल्ले़चोगुल्ले़ के़घाहुन्हाॽ के़रे़क् आङ्गाॽ से़क्खा इःत्तुङ् नाःत्तुङ्लो, हे़क्क्याङ् काक् फे़न्याःम्बक्हाॽ चिःत्तुङ्लो॥ यहवे दाङ्बे़ल्ले़ कुसाम्योथिम् इङ्जाङ्ङिन् इःप्मा नाःप्मा निङ्वाॽ 129 खे़ने़ॽ के़निसाम्हाॽ निङ्वाॽ के़माबा चोक्लो, खे़ङ्हाॽ के़रे़क् आसिक्लुङ्मो लाम्बाए आङ्गाॽ इःत्तुङ् नाःत्तुङ्लो॥ 130 खे़ने़ॽ के़निसाम्हाॽरे़ कुबे हन्निल्ले़ आनिगे से़न्दाङ्गे़न् ओःत्ति खोसुम्बे़रो, कुनिङ्वाॽ के़धुङ्बाहाॽरे़ सिक्कुम्दिङ् निङ्वाॽ मे़घोसुरो॥ 131 खे़ने़ॽ के़इङ्जाङ्हाॽ इःप्मा नाःप्मा साॽरिक् आसिराॽ थाङ्लो, खे़ल्ले़ कुमिःप्माल्ले़ आङ्गाॽ आम्ब्रा हा मे़त्तुङ्, हे़क्क्याङ् हे़ङ्गे़ःक् हे़ङ्गे़ःक् लॽआरो॥ 132 खे़ने़ॽ के़मिङ्ङिन् मिःम् के़मे़प्पाहाॽ खे़ने़ॽ लुङ्माॽ के़दुक्तुसिरो हे़क्क्याङ् ओगे़मे़त्तुसिरो, बा हे़क्केलॽरिक्के आङ्गाॽआङ् नुरिक् मे़त्ताङ्ङे़ॽओ॥ 133 खे़ने़ॽ माङ्हुप् के़जोगुबा कुइसिक् आङ्गाॽ चोःम्मालाम् से़ःप्ताङ्ङे़ॽओ, ताप्फे़ःम्बा पाःन्हाॽरे़ मे़नाःन्नाल्लरो॥ 134 आङ्गाॽ याप्मि तुक्खे के़जाःप्पाहाॽलाम् आङ्गाॽ से़ःप्ताङ्ङे़ॽओ, हे़क्केलॽरिक् आङ्गाॽ के़इङ्जाङ्हाॽ इःप्मा नाःप्पा सुक्तुङ्लरो॥ 135 लुङ्माॽ तुक्ताङ्ङे़ॽर ओमे़त्ताङ्ङे़ॽआङ् हाङ्वा माङ्वा पिराङ्ङे़ॽओ, हे़क्क्याङ् के़साम्यो थिम्हाॽ हुॽराङ्ङे़ॽओ॥ 136 आमिक्कोलाम् आमिक्वा ते़रे़रे़ थाप्लो, थेआङ्भे़ल्ले़ याप्मिहाॽरे़ के़साम्यो इङ्जाङ्ङिन् मे़न्इःत्तुन् मे़न्नाःत्तुन्लो॥ यहवे दाङ्बे़ल्ले़ कुसाम्योथिम्मो कुदोःप्मा खासे़न् 137 यहवे दाङ्बाए, खे़ने़ॽग साम्योबा के़जोःक्लो, हे़क्क्याङ् के़साम्योथिम् इङ्जाङ्हाॽ के़लाॽबा चोक्लो॥ 138 याप्मि के़बिरे़बा साम्योथिम् इङ्जाङ्हाॽ साम्योबा चोक्लो, खे़ङ्हाॽ के़रे़क् नसान् चोःक्मा सुक्के़दे़प्पा चोक्लो॥ 139 आङ्गाॽ आसिक्किल्ले़ मि कुइसिक् पोङ्ङारो, थेआङ्भे़ल्ले़ आनिङ्मिहाॽरे़ के़इङ्जाङ्हाॽ मे़न्इःत्तुन् मे़न्नाःत्तुन्लो॥ 140 खे़ने़ॽ के़माङ्हुप्हाॽ साॽमाल्ले़ से़क्खाबा चोक्लो, खे़न् के़माङ्हुप्हाॽ साॽरिक् आसिराॽ थाङ्लो॥ 141 आङ्गाॽ मे़न्जोबा चोःक्का हे़क्क्याङ् कुनामे़न्छाॽ मे़मे़त्तारो, कर खे़ने़ॽ के़निसाम्हाॽ निङ्वाॽ मे़भेःन्नाल्लो॥ 142 खे़ने़ॽग सदादिङ् साम्योबा के़जोःक्लो, हे़क्क्याङ् के़साम्योथिम् इङ्जाङ्ङिन् आभे़ल्ले़साङ् से़क्खाबा चोक्लो॥ 143 तुक्खे नु लाक्खेहाॽ आङ्गाॽ आसम्दाङ् चुक्ते़आङ् वाॽरो, कर के़इङ्जाङ्हाॽरे़ आङ्गाॽ आसिक्सम्ल याःन्नारो॥ 144 खे़ने़ॽ के़साम्योथिम् इङ्जाङ्हाॽ सदादिङ् साम्योबा चोक्लो, खे़ङ्हाॽ कुसिङ् निःप्मा निङ्वाॽ पिराङ्ङे़ॽओ हे़क्क्याङ् आङ्गाॽ कुहिङ्वे़त् वाॽआरो॥ चोःक्युम्भोरे़ लागि पेलि फाक्मा 145 आसिक्लुङ्मो लाम्बाए पेलि फाक्ने़रो, यहवे दाङ्बाए, नुगप् पिराङ्ङे़ॽओ, हे़क्क्याङ् खे़ने़ॽ के़इङ्जाङ्हाॽ आङ्गाॽ इःत्तुङ् नाःत्तुङ्लो॥ 146 खे़ने़ॽ पेलि फाक्ने़रो, आङ्गाॽ से़ःप्ताङ्ङे़ॽओ, हे़क्क्याङ् के़साम्योथिम् इङ्जाङ्हाॽ आङ्गाॽ इःत्तुङ् नाःत्तुङ्लो॥ 147 नाम् के़प्मानुःल्ले़ तगि आङ्गाॽ फाॽराङ्ङे़ॽ फाॽआङ् पेलि फाक्ने़रो, खे़ने़ॽ के़माङ्हुप्पो आनिङ्वाॽ युक्खुङ्लो॥ 148 खे़ने़ॽ के़माङ्हुप्हाॽ आङ्गाॽ आनिङ्वाॽओ इःत्तुङ्लो, हे़क्केलॽरिक् से़न्दिक् नाम्दाःत्तात् आङ्गाॽ मे़न्इम्मे युङ्ङारो॥ 149 यहवे दाङ्बाए, चक्मे़ल्लॽए लुङ्माॽ के़दुक्काबाल्ले़ चोगुल्ले़ आङ्गाॽ आबेलिन् खे़प्से़ॽओ, हे़क्क्याङ् नुरिक् मे़त्ताङ्ङे़ॽआङ् आङ्गाॽ से़ःप्ताङ्ङे़ॽओ॥ 150 ताप्फे़ःम्बा निङ्वाॽ के़इःप्पा ताक्के़भे़ॽबा मनाहाॽ निःत्ताङ् मे़द्ये़आङ् मे़वाॽरो, खे़ङ्हाॽरे़ आभे़ल्ले़आङ् के़साम्यो इङ्जाङ्हाॽ मे़इःत्तुन् मे़न्नाःत्तुन्लो॥ 151 कर यहवे दाङ्बाए, खे़ने़ॽग आबेसाङ्ङे के़वाॽरो, हे़क्क्याङ् के़रे़क् के़इङ्जाङ्हाॽ से़क्खाबा चोक्लो॥ 152 उन्छेःन्छा आङ्गाॽ के़निसाम्हाॽ निसुङ् ले़सुङ्ङाङ् वाॽआरो, खे़ङ्हाॽग सदादिङ्ले़ लागि के़जोगुआङ् वाॽरो॥ कुभाॽरे़ लागि पेलि फाक्मा 153 आङ्गाॽ आदुक्खे आलाक्खेहाॽ ओमे़त्ते़ॽआङ् से़ःप्ताङ्ङे़ॽओ, थेआङ्भे़ल्ले़ के़साम्योथिम् इङ्जाङ्ङिन् निङ्वाॽमे़म्मुःन्ने वाॽआरो॥ 154 आङ्गाॽ ले़प्साङ् पत्छे़ॽआङ् पारे़ॽओ, हे़क्क्याङ् नाङाङ्ङे़ॽओ॥ माङ्हुप् के़जोगुबा कुइसिक् आङ्गाॽ से़ःप्ताङ्ङे़ॽओ॥ 155 ताक्के़भे़ॽबा मनाहाॽरे़ से़न्लप् मे़ङ्घोसुल्लो, थेआङ्भे़ल्ले़ खे़ङ्हाॽरे़ के़साम्यो इङ्जाङ्हाॽ मे़न्इःत्तुन् मे़न्नाःत्तुन्लो॥ 156 यहवे दाङ्बाए, खे़ने़ॽग आङ्गाॽ साॽरिक् लुङ्माॽ के़दुक्कारो, नुरिक् मे़त्ताङ्ङे़ॽआङ् से़ःप्ताङ्ङे़ॽओ॥ 157 आङ्गाॽ याप्मि तुक्खे के़जाःप्पा नु के़घुम्बा निङ्मिहाॽ यरिक् मे़वाॽरो, हे़क्केसाङ् के़साम्योथिम् इङ्जाङ्हाॽ इःप्मा नाःप्मा मे़न्ले़त्ते वाॽआरो॥ 158 इङ्ले़क् के़जोःक्पाहाॽ आङ्गाॽ ओमे़त्तुङ्सिङ्ङिल्ले़ आनिङ्वाॽ पङ्लो, थेआङ्भे़ल्ले़ खे़ङ्हाॽरे़ के़इङ्जाङ्हाॽ मे़न्इःत्तुन् मे़न्नाःत्तुन्लो॥ 159 ओमे़त्ते़ॽओ, यहवे दाङ्बाए, के़निसाम्हाॽ साॽरिक् आसिराॽ थाङ्लो, खे़ने़ॽग लुङ्माॽ तुक्मा आभे़ल्ले़आङ् याप्मि के़ल्ले़त्ने़ल्लो, खे़ल्ले़चोगुल्ले़ आङ्गाॽ से़ःप्ताङ्ङे़ॽओ॥ 160 के़रे़क् के़साम्योथिम् इङ्जाङ्ङिल्ले़ कुबेन् से़क्खाबा चोक्लो, हे़क्क्याङ् काक् के़साम्यो खासे़न्हाॽ सदादिङ् के़वाॽबा चोक्लो॥ यहवे दाङ्बे़ल्ले़ कुसाम्योथिम् इङ्जाङ्ङो तोःन्छिङ्मा 161 मुक्साम्साबा मनाहाॽरे़ आङ्गाॽ थेनाधे तुक्खे मे़जाःत्तारो, कर के़साम्योथिम् इङ्जाङ्ङिन् आङ्गाॽ इङ्धाङ् पिरुङ्लो॥ 162 माङ्हुप् के़जोगुबाल्ले़ चोगुल्ले़ आङ्गाॽ आनिङ्वाॽ तारो, यरिक् याङ्साकुन्धे के़घोबा मना कुइसिक् आङ्गाॽ साॽरिक् सःत्तारो॥ 163 के़रे़क् इङ्ले़क्पा पाःन्हाॽ आसिराॽ मे़धाङ्ने़न् हे़क्क्याङ् चिःत्तुङ्लो, कर खे़ने़ॽ के़साम्योथिम् इङ्जाङ्हाॽ आङ्गाॽ आसिराॽ थाङ्लो॥ 164 आङ्गाॽ थिक् ये़न्नो नुसिले़ङ् थारिक् नुगे़न् पिने़रो, थेआङ्भे़ल्ले़ के़इङ्जाङ्ङिन् साम्योबा चोक्लो॥ 165 खे़ने़ॽ के़साम्योथिम् इङ्जाङ् कुसिराॽ के़धाङ्बाहाॽ हाङ्हाङ् मे़लॽरो, हे़क्क्याङ् थेःल्ले़आङ् खे़ङ्हाॽ के़ङ्मा मे़सुक्तुन्सिल्लो॥ 166 यहवे दाङ्बाए, के़से़ःप्पा फाॽआङ् आङ्गाॽ हाङ्ने़रो, हे़क्क्याङ् के़इङ्जाङ्हाॽरे़ पाःत्तुबा हे़क्के आङ्गाॽ चोगुङ्लो॥ 167 आङ्गाॽ के़निसाम्हाॽ इःत्तुङ् नाःत्तुङ्लो, थेआङ्भे़ल्ले़ खे़न् आसिक्लुङ्मो लाम्बाए साॽरिक् आसिराॽ थाङ्लो॥ 168 आङ्गाॽ के़इङ्जाङ्हाॽ नु के़घाहुन्हाॽ इःत्तुङ् नाःत्तुङ्लो, चोगुङ्बा के़रे़क् पाःन्हाॽ आङ्गाॽ खे़ने़ॽ के़निसुरो॥ कुभाॽरे़ लागि पेलिगे़न् तुवा 169 यहवे दाङ्बाए, आङ्गाॽ फाॽराङ्ङे़ॽ फाॽआङ् पेलि फाक्ने़बान् खे़प्से़ॽओ, माङ्हुप् के़जोगुबा कुइसिक् आङ्गाॽ खासिङ्निःप्मा निङ्वाॽ पिराङ्ङे़ॽओ॥ 170 आङ्गाॽ पेलि फाक्ने़बान् खे़प्से़ॽओ, हे़क्क्याङ् माङ्हुप् के़जोगुबा कुइसिक् आङ्गाॽ से़ःप्ताङ्ङे़ॽओ॥ 171 आङ्गाॽ आभे़ल्ले़साङ् के़नारा फोसुङ्लो, थेआङ्भे़ल्ले़ के़साम्योथिम् इङ्जाङ्हाॽ आङ्गाॽ के़हुॽआरो॥ 172 आङ्गाॽ के़साम्योथिम् इङ्जाङ्ङिल्ले़ कुयाःम्बेओ साम्लोआरो, थेआङ्भे़ल्ले़ के़इङ्जाङ्हाॽ साम्योबा चोक्लो॥ 173 आङ्गाॽ फाॽमारे़ लागि सदादिङ् यारिप् वये़ॽओ, थेआङ्भे़ल्ले़ के़इङ्जाङ्हाॽ आङ्गाॽ इःत्तुङ् नाःत्तुङ्लो॥ 174 यहवे दाङ्बाए, आङ्गाॽ ताङ्गे़से़ःप्पा फाॽआङ् साॽरिक् निङ्वाॽ चोगुङ्लो, आङ्गाॽग के़साम्योथिम् इङ्जाङ्ङो आसिक्सम्लो॥ 175 आङ्गाॽ कुहिङ्वे़त् वाॽआररो, हे़क्क्याङ् के़नारा फोमा सुक्तुङ्लरो, खे़ने़ॽ के़साम्योथिम् इङ्जाङ्हाॽलाम्बा आङ्गाॽ फाॽराङ्ङे़ॽओ॥ 176 के़माबा मे़ल्लुक् कुइसिक् आङ्गाॽ ताप्पे़ॽराङ्ङाङ् वाॽआरो, ये़ॽआङ् के़से़वारोबान् कोःत्ताङ् लःत्ताङ्ङे़ॽओ, थेआङ्भे़ल्ले़ के़साम्योथिम् इङ्जाङ्हाॽ आङ्गाॽ निङ्वाॽ मे़म्भेःन्ने वाॽआरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.