निङ्वाॽफु साम्लोसुम् 118 - लिम्बुथङ् नाःम्माल्ले़ नुगे़न् तोःम्मा 1 यहवे दाङ्बान् नुगे़न् पिरे़म्मे़ॽओ, थेआङ्भे़ल्ले़ खुने़ॽ के़नुॽबा चोक्लो, हे़क्क्याङ् खुने़ॽ चक्मे़ल्लॽए सदादिङ् लुङ्माॽ आदुक्लो॥ 2 इस्राइलसमा मनाहाॽरे़ अक्खे मे़बाःत्तुररो, “निङ्वाॽफुमाङ्ङिल्ले़ चक्मे़ल्लॽए लुङ्माॽ आदुक्लो॥” 3 यहवे दाङ्बाओ से़वा के़जोःक्पा हारुनरे़ कुस्सा निङ्वाॽफुसाम्बाहाॽरे़आङ् मे़बाःत्तुररो, “खुने़ॽ चक्मे़ल्लॽए सदादिङ् लुङ्माॽ आदुक्लो॥” 4 यहवे दाङ्बान् मिङ्सो इङ्धाङ् के़बिबाहाॽ के़रे़क्ले़ मे़बाःत्तुररो, “खुने़ॽ चक्मे़ल्लॽए सदादिङ् लुङ्माॽ आदुक्लो॥” 5 आङ्गाॽ तुक्खे तुमाङ्ङिल्ले़ यहवे दाङ्बान् पेलि फाक्तुङ्लो, हे़क्क्याङ् खुने़ॽ नुगप् पिराङ्ङाङ् थे़ॽराङ्लो॥ 6 आङ्गाॽ कुभाॽ के़बिबाङ्ग यहवे दाङ्बान्लो, आङ्गाॽ मे़गिआन्लो, आङ्गाॽ हाःत्ले़ थे मे़प्मा सुक्काबे? 7 यहवे दाङ्बान् आङ्गाॽनु वाॽ, खुने़ॽग आङ्गाॽ आभाॽबाङ्लो, हे़क्क्याङ् आङ्गाॽ आनिङ्मिहाॽ के़रे़क् हारि मे़दाबान् निसुङ्लो॥ 8 मे़न्छाम् याप्मिहाॽओ खे़ःम्सिङ्मानुःल्ले़ग यहवे दाङ्बाल्लो इःम्सिङ्से़ पेःक्माए नुबारो॥ 9 मे़न्छाम् याप्मि लाम्लोबाहाॽ ताःक्पो चोःक्मासिनुःल्ले़ग यहवे दाङ्बाल्लो इःम्सिङ्से़ पेःक्माए नुबारो॥ 10 इक्सादिङ् खाम्बेःक्मोबा के़रे़क् मे़न्छाम् सुवाङ्हाॽरे़ काक् पिसाङ्लाम्बा आङ्गाॽ किर्गप् मे़गबाङ्लो, कर यहवे दाङ्बे़ल्ले़ कुमुक्साम्लाम्बा खे़ङ्हाॽ थ्यःङ् चोगुङ्सिङ्लो॥ 11 खे़ङ्हाॽरे़ काक् पिसाङ्लाम्बा आङ्गाॽ मे़गबाङ्ङाङ् वयाङ्लो, कर यहवे दाङ्बे़ल्ले़ कुमिङ्ङो खे़ङ्हाॽ थ्यःङ् चोगुङ्सिङ्लो॥ 12 खे़ङ्हाॽरे़ सक्वाहाॽरे़ कुइसिक् काक् पिसाङ्लाम्बा चिबन् मे़बन्छाङ्लो, कर तिङ्ग्रेक्पा लाओ मिगे़लाःप्पा हे़क्के खे़ङ्हाॽ मे़जेबे़ मे़लासे़रो, यहवे दाङ्बे़ल्ले़ कुमिङ्ङो खे़ङ्हाॽ थ्यःङ् चोगुङ्सिङ्लो॥ 13 किप्मा पघुघुसे़र मे़भत्ताङ्लो, हे़क्क्याङ् आङ्गाॽ खप्मे़न् हारिदामा इःत्ताङ्ङाङ् वयाङ्लो, कर यहवे दाङ्बे़ल्ले़ फाॽराङ्लो॥ 14 यहवे दाङ्बे़ल्ले़ आङ्गाॽ के़धुम्बा नु मुक्साम्साबा चोःक्कारो, हे़क्क्याङ् खुने़ॽ से़ःप्ताङ्ङाङ् वाॽआरो॥ 15 साम्योबाहाॽरे़ खुन्छिॽ साःङ्गाहिम्हाॽओ सःप्मा नु तियाहा लॽमा इक्लाहाॽ खे़म्दे़त्लो, “यहवे दाङ्बे़ल्ले़ पयम् यम्बा कुमुक्साम्मिल्ले़ अक्खे पोःक्खे़बारो॥ 16 यहवे दाङ्बे़ल्ले़ कुमुक्साम्मिल्ले़ थङ् के़नाःम्बा आजोगे़आङ् वाॽरो, यहवे दाङ्बे़ल्ले़ कुमुक्साम्मिल्ले़ निङ्वाॽ के़माबा याःम्बक्हाॽ चोगुआङ् वाॽरो॥” 17 आङ्गाॽ मे़सिआन्, कर हिङ्ङाआङ् वाॽआरो, हे़क्क्याङ् यहवे दाङ्बे़ल्ले़ चोगुबा कुयाःम्बक्किन् इङ्भन् चोगुङ्लो॥ 18 खुने़ॽ साॽरिक् खुम्दिङ् पिराङ्लो, कर आङ्गाॽ सिमा मे़बाङ्घाङ्ङिल्लो॥ 19 आङ्गाॽ आलागि साम्योबा लाम्धेःप्पाहाॽ हन्दाङ् पिराङ्ङे़ॽओ, खे़प्मो आङ्गाॽ लाःत्ताआङ् यहवे दाङ्बान् नुगे़न् पिरुङ्लो॥ 20 यहवे दाङ्बे़ल्ले़ कुलाम्धेःप्पाङ्ग आम्भा कन्लो, साम्योबाहाॽरक् कप्मोलाम् लाःप्मा मे़घोरो॥ 21 यहवे दाङ्बाए, आङ्गाॽग के़नारा फोसुङ्लो, थेआङ्भे़ल्ले़ आङ्गाॽ आबेलिन् खे़ने़ॽ के़घे़प्सु के़बिराङ्ङाङ् वाॽरो, हे़क्क्याङ् थङ् के़नाःम्बा के़जोगाङ्ङाङ् वाॽरो॥ 22 लुङ्गे़गाम्बाहाॽरे़ मे़नाॽरुबा लुङ्ङिन्ने के़रे़क्नुःल्ले़ के़ये़क्पा कुम्मालुङ् पोःक्खे़आङ् वाॽरो॥ 23 कङ्ग यहवे दाङ्बे़ल्ले़ए चोगुबारो, हे़क्क्याङ् कन् आनिॽ निमो निङ्वाॽ के़माबा चोक्लो॥ 24 आइन्बा ये़न्निन् यहवे दाङ्बे़ल्ले़ चोगुबारो, आनिॽ सःत्तिर लाःक्खिर याम्नाःम् चोगुम्लो॥ 25 यहवे दाङ्बाए, याप्मि आसे़ःप्ते़ॽओ, यहवे दाङ्बाए, आनिगे याप्मि कुलिङ्दो के़रिगे़र आयाःन्दे़ॽओ॥ 26 दाङ्बे़ल्ले़ कुमिङ्ङो के़दाबान् मुॽइसाबारो, यहवे दाङ्बे़ल्ले़ कुहिम्मोलाम् खिनिॽ हाङ्वागे़न् मुॽइसाम् पिआसिगे़रो॥ 27 यहवे दाङ्बान्ने निङ्वाॽफुमाङ्लो, आनिॽ लुम्मो खुने़ॽ नुॽमादामा आजोगे़ आबिरे़आङ् वाॽरो॥ हे़क्क्याङ् सिङ्बोराःक्हाॽ याङ्ङासिम्मे़ॽओ, ले़त्तिङ् तोःम्मादे़न् खिरि इरे़म्मे़ॽर तङ्नाम् तोसे़म्मे़ॽओ॥ 28 खे़ने़ॽग आङ्गाॽ आनिङ्वाॽफुमाङ्ने़रो, हे़क्क्याङ् खे़ने़ॽओ नुगे़न् तोःन्दुङ्लो॥ खे़ने़ॽग आङ्गाॽ आनिङ्वाॽफुमाङ्ने़रो, हे़क्क्याङ् खे़ने़ॽ पयम् यम्बा के़जोःक्पा पाःन्निन् यम्बा इक्लाःल्ले़ पाःत्तुङ्लो॥ 29 यहवे दाङ्बान् नुगे़न् पिरे़म्मे़ॽओ थेआङ्भे़ल्ले़ खुने़ॽग के़नुॽबा चोक्लो, खुने़ॽ लुङ्माॽ आदुक्पा पाःन्निन् सदादिङ् आभे़ल्ले़साङ् वाॽरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.