निङ्वाॽफु साम्लोसुम् 110 - लिम्बुयहवे दाङ्बे़ल्ले़ हाङ्ङिन् युक् पिरु दाउदरे़ कुसाम्लो 1 यहवे दाङ्बे़ल्ले़ आन्दाङ्बान् मे़त्तुरो, “के़निङ्मिहाॽ के़युक्को मे़न्दाःत्छिङ्ङे थारिक् आङ्गाॽ आजुप्साङ् ले़प्माङ् युङे़ॽओ॥” 2 यहवे दाङ्बे़ल्ले़ सियोनलाम्बा के़हाङ्युक् चोःक्मा मुक्साम् फोसुरो, खुने़ॽ पाःत्तु, “के़निङ्मिहाॽ सम्धाङ् हाङ्युक् चोःक्मा के़घोसुरो॥” 3 के़निङ्मिहाॽनु थङ् थक्से़ के़बेःक्किल्ले़ आबाङे निङ्वाःल्ले़ के़मनाहाॽरे़ के़म्भाॽरो, तानाम् के़धाबा सेःक्वा हे़क्तङ्बा थाङ्बे़न् के़मनाहाॽ खे़ने़ॽ के़वाॽबा सेसे कोःक्माओ मे़धाङ्लो॥ 4 यहवे दाङ्बे़ल्ले़ चोगुबा माङ्हुप्पिन् आभे़ल्ले़आङ् मे़ले़क्खुन्लो— “खे़ने़ॽग मल्किसे़दे़क कुइसिःक्पा सदादिङ् के़वाॽबा निङ्वाॽफुसाम्बाने़रो॥” 5 यहवे दाङ्बान् के़जुप्साङ् ले़प्माङ् वाॽरो, खुने़ॽ कुसिक् पोःक्किल्ले़ हाङ्हाॽ नाःन्दुसिरो॥ 6 खुने़ॽग इक्सादिङ् खाम्बेःक्मोबा मे़न्छाम् सुवाङ्हाॽ खुम्दिङ् पिरुसिरो॥ हे़क्क्याङ् लाजेन् चेहाॽरे़ थिम्सुरो, खे़ब्याङ् के़रे़क् इक्सादिङ् खाम्बेःक्कोबा हाङ्हाॽ खुने़ॽ नाःन्दुसिरो॥ 7 कर खे़ने़ॽ के़हाङ्ङिल्ले़ लाम्बेसाङ् के़ने़बा यङ्घङ्ङोबा च्वाःत्तिन् थुङुरो, हे़क्क्याङ् खुने़ॽ थङ् के़नाःम्बा पोङ्ङाङ् चाङ्जाङ् ये़प्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.