निङ्वाॽफु साम्लोसुम् 108 - लिम्बुसे़ःप्सिङ्मारे़ लागि पेलि दाउदरे़ कुसाम्लो 1 निङ्वाॽफुमाङ्ङे, आङ्गाॽ थधप् मे़ल्लॽए आनिङ्वान् खे़ने़ॽओ युक्खुङ्लो, साम्लोआर के़रे़क् आसिक्लुङ्मोलाम्मे आङ्गाॽ के़नारा फोसुङ्लो॥ 2 आदुःङ्गे अन्मे खिङ्मनाबा आमुक्लाहाॽ आङ्गाॽ मुक्खुङ्लो, आङ्गाॽ तानाम्सा नाम् के़त्ल याःन्दुङ्लो॥ 3 यहवे दाङ्बाए, इक्सादिङ् खाम्बेःक्मोबा मे़न्छाम् सुवाङ्हाॽलुम्मो नुगे़न् पिने़रो, मे़न्छाम् याप्मिलुम्मो आङ्गाॽ खे़ने़ॽ के़नारा फोसुङ्ल साम्लोआरो॥ 4 चक्मे़ल्लॽए मनाहाॽ लुङ्माॽ के़दुक्तुसिबा पाःन्निन् साङ्ग्राम्पेदाङ्नुःल्ले़आङ् थाःङ् के़त्लो, नसाःन्साबा के़जोःक्पा पाःन्निल्ले़ ताङ्साक्पान् सुसुरो॥ 5 निङ्वाॽफुमाङ्ङे, खे़ने़ॽ साङ्ग्राम्पेदाङ्नुःल्ले़आङ् थाःङ् पोःक्खे़ॽओ, हे़क्क्याङ् खे़ने़ॽ के़मिमिदिङ्ङिन् के़रे़क् इक्सादिङ् खाम्बेःक्मो ओसेःन्धाङ् चोगे़ॽओ॥ 6 के़मुक्साम्मिल्ले़ आनिगे आसे़ःप्ते़ॽओ, आङ्गाॽ पेलि फाक्ने़बान् खे़प्से़ॽओ, हे़क्क्याङ् लुङ्माॽ के़दुक्तुसिबाहाॽ मे़दाङ् मे़याःक्लरो॥ 7 कुसेसेदे़न्लाम् निङ्वाॽफुमाङ्ङिल्ले़ पाःत्तुआङ् वाॽरो, “नाःन्दुङ्ङाङ् से़क्के़म्मिन् हासुङ्लो, हे़क्क्याङ् सुक्कोतबा तेल्लुम्हाॽ सिःक्तुङ्ङाङ् आङ्गाॽ आमनाहाॽ हाःत्तुङ्सिङ्लो॥ 8 गिलादे़ङ्ग आङ्गाॽइन्लो, मनस्सेःन्नाङ् आङ्गाॽइन्नेरो, एफ्राइम्मे़न् फे़न्जेॽ आदाङ्घुःक्लो, यहुदान् आहाङ् तक्काःत्लो॥ 9 मोआबे़न् आहप्सिङ्मादे़न्लो, एदोमबा मनाहाॽ आङ्गाॽ आसे़वा के़जोःक्पा चोगुङ्सिङ्लो, पलिस्तिहाॽ नाःन्दुङ्सिङ्ङाङ् यम्बा इक्लाओ अःक्कारो॥” 10 हाःत्ले़ आङ्गाॽ लुङ्धाक्किल्ले़ कबुबा ये़क्यक्को के़त्ताबाबे? हाःत्ले़ आङ्गाॽ ए़दोम थारिक् लाम्लोआबाबे? 11 निङ्वाॽफुमाङ्ङे, से़क्खाए याप्मि के़नाॽरे़बाबि? आनिगे थक्सुबा तुराहाॽनु लाङ्के़ङ्घेःक्ने़म्बाबि? 12 आनिगे निङ्मिहाॽनु थक्मा आभाॽरे़ॽओ, थेआङ्भे़ल्ले़ मे़न्छाम् याप्मिरे़ आम्भाॽबाङ्ग हने़ थेनाधेरक् पोङ्लो॥ 13 निङ्वाॽफुमाङ्ङिन् आनिॽ ले़प्माङ् वाॽबाल्ले़ चोगुल्ले़ थङ् आनाःन्दुम्लो, खे़ल्ले़चोगुल्ले़ आनिॽ निङ्मिहाॽ खुने़ॽ हारि चाःत्तुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.