निङ्वाॽफु साम्लोसुम् 107 - लिम्बुकुलक् ङासि ( निङ् सुम् १०७–१५० ) निङ्वाॽफुमाङ्ङिन् कुनारा फोमा 1 यहवे दाङ्बान् नुगे़न् पिरे़म्मे़ॽओ थेआङ्भे़ल्ले़ खुने़ॽ के़नुॽबा चोक्लो, हे़क्क्याङ् चक्मे़ल्लॽए मनाहाॽ लुङ्माॽ तुक्तुसिरो॥ 2 खिनिॽ आत्तिन्हाॽ यहवे दाङ्बे़ल्ले़ के़से़ःप्तिआङ् के़वयि, कन् पाःन्हाॽ खुने़ॽ कुनारा के़भोसुम्मिल्ले़ याम्मो मे़त्ते़म्मे़ॽओ॥ खिनिॽ निङ्मिहाॽरे़ खुनिॽ हुक्कोलाम्बा खुने़ॽ खिनिॽ के़से़ःप्तिआङ् वाॽरो॥ 3 खुने़ॽ याप्मि लाजेॽबा नाङ्गे़न् नु नाम्धा पिसाङ्लाम्बा के़सुप्सिरो, हे़क्क्याङ् थाङ्गे़त् नु लाङ्गे़त् पिसाङ्बा माःङ्घा लाजेॽलाम् के़भुक्खिरो॥ 4 मुरे़क् खारे़क् थेआङ् के़होप्पादे़न्नो कुभा लाम्बे मे़ले़क्ते़आङ् मे़इरे़रो, खे़ङ्हाॽ ये़क्यक्को पेःक्माआङ् याङ्धोःक्मा लाम् मे़ङ्घोसुल्लो॥ 5 खे़ङ्हाॽ से़त्लाःक्मा नु वामिमाल्ले़ याःन्दुसिआङ् वये़रो, के़रे़क् पाःन्हाॽओ खे़ङ्हाॽरे़ खुनिॽ निङ्साङ् पुगे़आङ् वये़रो॥ 6 खे़ब्याङ् खे़ङ्हाॽ तुक्खे लाक्खे मे़दुमे़ल्ले़ यहवे दाङ्बान् पेलि मे़भाक्तुरो, हे़क्क्याङ् खुने़ॽ खे़ङ्हाॽ ताङ्से़ःप्तुसिरो॥ 7 खुने़ॽ खे़ङ्हाॽ तोःन्दोम्बा लाम्मो लाम्लोसुसिरो, हे़क्क्याङ् याङ्धोःक्से़ ये़क्यक्को के़त्तुसिरो॥ 8 यहवे दाङ्बे़ल्ले़ खे़ङ्हाॽ चक्मे़ल्लॽए लुङ्माॽ तुक्तुसिबाल्ले़ लागि खुने़ॽ नुगे़न् मे़बिरुर पोङ्लो, हे़क्क्याङ् खुने़ॽ चोगु पिरुसिबा निङ्वाॽ के़माबा याःम्बक्ले़ लागि नुगे़न् मे़दोन्दुर पोङ्लो॥ 9 थेआङ्भे़ल्ले़ कुवागे़मिबाहाॽ खुनिॽ वामिःक्मान् चिप्सु पिरुसिरो, हे़क्क्याङ् कुसिक् के़लाःक्पाहाॽरे़ खुनिॽ से़त्लाःक्मान् चिप्सु पिरुसिरो॥ 10 कुभा खे़ङ्हाॽ नामाक्मा नु खामाक्मालुम्मो मे़यागे़रो, फे़न्थक्क्रङ्ङिल्ले़ इघेःङ्ङो मे़ध्ये़आङ् साक्पा के़धाबा हे़क्के तुक्खे मे़ज्ये़आङ् मे़वये़रो॥ 11 थेआङ्भे़ल्ले़ खे़ङ्हाॽरे़ के़रे़क्नुःल्ले़ पयम् यम्बा निङ्वाॽफुमाङ्ङिल्ले़ कुइङ्जाङ्हाॽ मे़अत्तुरो, हे़क्क्याङ् पिरुसिबा सिवादिङ् खाहुन्हाॽ मे़ङ्घे़प्सुल्लो॥ 12 खे़ल्ले़चोगुल्ले़ खे़ङ्हाॽ साॽरिक् के़साक्पा याःम्बक्को थासुसिआङ् पना मे़नासे़रो, खे़ङ्हाॽ हर्जुॽ हर्जुॽ मे़जोःन्दे़, कर के़भाॽबा हाःत्ताङ् होःप्ते़रो॥ 13 खे़ब्याङ् खे़ङ्हाॽ तुक्खे लाक्खे मे़दुमे़ल्ले़ यहवे दाङ्बान् पेलि मे़भाक्तुरो, हे़क्क्याङ् खुने़ॽ खे़ङ्हाॽ ताङ्से़ःप्तुसिरो॥ 14 खुने़ॽ नामाक्मा नु खामाक्मा लुम्मोलाम् खे़ङ्हाॽ लाःक्कात् लःत्तुसिरो, हे़क्क्याङ् इमे़घेःक्खुसिबा खुन्छिॽ फे़न्थक्क्रङ्हाॽ स्याक् वयाक् फुॽरु पिरुसिरो॥ 15 यहवे दाङ्बे़ल्ले़ खे़ङ्हाॽ चक्मे़ल्लॽए लुङ्माॽ तुक्तुसिबाल्ले़ लागि खुने़ॽ नुगे़न् मे़बिरुर पोङ्लो, हे़क्क्याङ् खुने़ॽ चोगु पिरुसिबा निङ्वाॽ के़माबा याःम्बक्ले़ लागि नुगे़न् मे़दोन्दुर पोङ्लो॥ 16 खे़ब्याङ् खे़ङ्हाॽ तुक्खे लाक्खे मे़दुमे़ल्ले़ यहवे दाङ्बान् पेलि मे़भाक्तुरो, हे़क्क्याङ् खुने़ॽ खे़ङ्हाॽ के़रे़क् ताङ्से़ःप्तुसिरो॥ 17 कुभा आबाङे लायो नु कुइभे़म्मारे़ अदङ् मे़बोःक्खे़रो, हे़क्क्याङ् आबाङे फे़न्याःम्बक् चोःक्मारे़ के़साक्पो मे़ध्ये़रो॥ 18 खे़ङ्हाॽ के़रे़क् कुजारे़ खुनिॽ निङ्ले़ॽरुआङ् वये़रो, हे़क्केलॽरिक् खे़ङ्हाॽ सिमालिङ्धोओ मे़गे़रे़आङ् मे़वये़रो॥ 19 खे़ब्याङ् खे़ङ्हाॽ तुक्खे लाक्खे मे़दुमे़ल्ले़ यहवे दाङ्बान् पेलि मे़भाक्तुरो, हे़क्क्याङ् खुने़ॽ खे़ङ्हाॽ ताङ्से़ःप्तुसिरो॥ 20 कुबाःन्जाक्किल्ले़ खे़ङ्हाॽ नुसुसिरो, हे़क्क्याङ् सिमे़ल्ले़ लुम्बाःत्तोलाम् से़ःप्तुसिरो॥ 21 यहवे दाङ्बे़ल्ले़ खे़ङ्हाॽ चक्मे़ल्लॽए लुङ्माॽ तुक्तुसिबाल्ले़ लागि खुने़ॽ नुगे़न् मे़बिरुर पोङ्लो, हे़क्क्याङ् खुने़ॽ चोगु पिरुसिबा निङ्वाॽ के़माबा याःम्बक्ले़ लागि नुगे़न् मे़दोन्दुर पोङ्लो॥ 22 खे़ङ्हाॽरे़ वयागे़न् सिदुङ्जभा मे़दोन्दुर खुने़ॽ नुगे़न् मे़बिरुर पोङ्लो, हे़क्क्याङ् निङ्वाॽ के़दाबा साम्लोहाॽ साम्मे़मे़त्तुर खुने़ॽ कुयाःम्बक्हाॽ मे़बाःत्तु मे़जे़क्खुररो॥ 23 कुभाग वालाधाहाॽओ मे़लासे़आङ् पयम् यम्बा वरःङ्ङो मे़बेरो, हे़क्क्याङ् साप्पोक् हिङ्मारे़ लागि वरःङ्ङो याःम्बक् मे़जोगे़रो॥ 24 यहवे दाङ्बे़ल्ले़ थे चोःक्मा सुक्तु खे़न् खे़ङ्हाॽरे़ मे़निसुरो, कुदिम्बे केःम्बा वरःङ्ङो खुने़ॽ चोगुबा निङ्वाॽ के़माबा पाःन्हाॽ खे़ङ्हाॽरे़ मे़निसुरो॥ 25 खुने़ॽ कुइङ्जाङ्ङिल्ले़ किप्मागे़घुबा सुरित् केजङ् हुमा हेःक्ते़रो, वरःङ्ङो वाभे़ल्ले़ङ्ङिन् पोःक्मा हेःक्ते़रो॥ 26 वाभे़ल्ले़ङ्ङिल्ले़ वालाधाहाॽ थाःङ् पक्खुसिरो, हे़क्क्याङ् वरःङ्ङिल्ले़ याङ्यो निःप्सुसिरो, अक्तङ्बा के़साक्पा तुक्खेओ वालाधा के़लोङ्बाहाॽ आःन्छिङ्मा मे़न्छुक्ते़ल्लो॥ 27 खे़ङ्हाॽ थिःल्ले़ मयुसिबा मना कुइसिक् चोनाःम् चोनाःम् मे़लॽरे़र मे़जोःन्दे़रो, खे़ङ्हाॽरे़ थे चोःक्माआङ् खुनिॽ ने़हिरे़ मे़धाप्तुल्लो॥ 28 खे़ब्याङ् खे़ङ्हाॽ तुक्खे लाक्खे मे़दुमे़ल्ले़ यहवे दाङ्बान् पेलि मे़भाक्तुरो, हे़क्क्याङ् खुने़ॽ खे़ङ्हाॽ ताङ्से़ःप्तुसिरो॥ 29 खुने़ॽ सुरित् केजङ्ङिन् चिजि ये़म्ये़म् चोगुरो, हे़क्क्याङ् वरःङ्ङोबा वाभे़ल्ले़ङ्हाॽ चिःक्तु लासे़रो॥ 30 सुरित् केजङ्ङिन् चिजि ये़म्ये़म् पोःक्खे़आङ् खे़ङ्हाॽ मे़सःत्ते़रो, हे़क्क्याङ् खुने़ॽ खे़ङ्हाॽरे़ निङ्वाॽ मे़जोगुबा वालाधा ये़प्नाओ के़त्तुसिरो॥ 31 यहवे दाङ्बे़ल्ले़ खे़ङ्हाॽ चक्मे़ल्लॽए लुङ्माॽ तुक्तुसिबाल्ले़ लागि खुने़ॽ नुगे़न् मे़बिरुर पोङ्लो, हे़क्क्याङ् खुने़ॽ चोगु पिरुसिबा निङ्वाॽ के़माबा याःम्बक्ले़ लागि नुगे़न् मे़दोन्दुर पोङ्लो॥ 32 खे़ङ्हाॽरे़ मे़न्छाम् याप्मि चुम्लुङ्ङो निङ्वाॽफुमाङ्ङिल्ले़ कुनारा मे़भोसुररो, हे़क्क्याङ् लाम्लोबाहाॽरे़ खुनिॽ चुम्भोओ खुने़ॽ कुमिङ्सो कुधाःङ्सो मे़जोगुररो॥ 33 यहवे दाङ्बे़ल्ले़ यङ्घङ्हाॽ चप्प्रे़क् चप्सुरो, हे़क्क्याङ् वहःङ्हाॽ च्वाःत् मेःन्नेबा चोगुरो॥ 34 खे़प्मोबा मनाहाॽरे़ खुनिॽ कुइभे़म्माल्ले़ चोगुल्ले़ चा के़नुॽबा खाम्मिन् युम् के़लाःक्पा चोगुरो, हे़क्क्याङ् खे़न् खाम्मिन् चा मे़न्नुॽमनाबा चोगुरो॥ 35 खुने़ॽ ये़ःङ्घादे़न्निन् वरक् पोःक्खे़र चोगुरो, हे़क्क्याङ् के़हेबा ते़न्नो च्वाःत् पुन्दे़र चोगुरो॥ 36 यहवे दाङ्बे़ल्ले़ कुसे़त्के़लाःक्पाहाॽ खे़प्मो युङ्मा पाङ्घुसिरो, युङ्मारे़ लागि खे़ङ्हाॽरे़ खे़ॽयो ये़क्यक् मे़जोगुरो॥ 37 प्याङ्सिगे़न् इक्ताप्पाहाॽओ खे़ङ्हाॽरे़ याॽरिःम्बान् मे़हेॽरुरो, हे़क्क्याङ् चे़ल्ले़क्सेॽ मे़लेःत्तुरो, खे़ब्याङ् मुल्लुक् कुजा मे़सुप्सुरो॥ 38 निङ्वाॽफुमाङ्ङिल्ले़ कुमनाहाॽ हाङ्वागे़न् मुॽइसाम् पिरुसिरो, हे़क्क्याङ् खे़ङ्हाॽ यरिक् मे़बोःन्दे़ मे़धे़ॽरे़रो, खे़ब्याङ् खुने़ॽ खे़ङ्हाॽरे़ खुनिॽ पित् साःङ्वाहाॽ फोसुसिरो॥ 39 कुइगे़भे़म्बाहाॽरे़ मे़घुम्सुसि, साॽरिक् तुक्खे मे़जाःत्तुसिरो हे़क्क्याङ् मिक्वा मे़धाप्सु मे़बिरुसिरुरो, खे़ल्ले़चोगुल्ले़, निङ्वाॽफुमाङ्ङिल्ले़ कुमनाहाॽ मे़युमे़रो॥ 40 कुमना तुक्खे के़जाःप्पा युक्साबाहाॽ खुने़ॽ सिरिङ् मे़मर याःन्दुसिरो, हे़क्क्याङ् लाम् के़होप्पा ये़ःङ्घादे़न्नो खे़ङ्हाॽ ताक्के़गम्बाआङ् के़वाॽबा चोगुसिरो॥ 41 कर खुने़ॽ याङ्गे़साॽबा नु तुक्खेओ के़धाबाहाॽ से़ःप्तुसिरो, हे़क्क्याङ् खे़ङ्हाॽरे़ खुनिॽ हिम्सयङ्हाॽ मे़ल्लुक् लुप् हे़क्के फोसुसिरो॥ 42 कुदोःप्माहाॽरे़ कन् मे़निसुआङ् मे़सःत्लो, कर कुइगे़भे़म्बाहाॽ मे़म्बाःत्ने़ल्ल याःन्दुसिरो॥ 43 सिक्कुम्साबाहाॽरे़ कन् पाःन्निन् निङ्वाॽ मे़इःत्तुररो, खे़ङ्हाॽरे़ यहवे दाङ्बे़ल्ले़ चक्मे़ल्लॽए लुङ्माॽ तुक्तुसिबान् निङ्वाॽओ मे़युक्खुररो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.