निङ्वाॽफु साम्लोसुम् 105 - लिम्बुनिङ्वाॽफुमाङ्ङिल्ले़ कुमनाहाॽ से़ःप्तुसि 1 यहवे दाङ्बान् नुगे़न् पिरे़म्मे़ॽओ, खुने़ॽ पयम् यम्बा चोक् फाॽआङ् यम्बा इक्लाओ इङ्भोसे़म्मे़ॽओ॥ खुने़ॽ चोगुबा याःम्बक्किन् इक्सादिङ् खाम्बेःक्कोबा मे़न्छाम् सुवाङ्हाॽ चे़क्ते़म्सिम्मे़ॽओ॥ 2 साम्लोराम्मे़ॽर निङ्वाॽफुमाङ्ङिल्ले़ कुनारा फोसे़म्मे़ॽओ, खुने़ॽ चोगुबा निङ्वाॽ के़माबा याःम्बक्किन् चे़क्खे़म्मे़ पाःत्ते़म्मे़ॽओ॥ 3 खुने़ॽ कुसेसे मिङ्ङो खिनिॽ ने़बो फोसे़म्मे़ॽओ, यहवे दाङ्बे़न् के़गोःप्पाहाॽरे़ खुन्छिॽ निङ्वाॽ ताररो॥ 4 यहवे दाङ्बे़न् नु खुने़ॽ कुमुक्साम्मिन् हक्से़म्मे़ॽओ, खुने़ॽ कुनारान् ओमे़प्मा चक्मे़ल्लॽए कोःत्ते़म्मे़ॽओ॥ 5 खुने़ॽ चोगुबा निङ्वाॽ के़माबा याःम्बक्हाॽ इःत्ते़म्मे़ॽओ, ने़हिनिङ्वाॽरे़ मे़न्धाप्मनाबा कुयाःम्बक्हाॽ नु खुने़ॽ के़जे़क्तिबा कुघासे़न्हाॽ निङ्वाॽ इःत्ते़म्मे़ॽओ, 6 खुने़ॽ कुसे़वारोबा अब्राहामरे़ कुमुॽइदाङ्सासे, खुने़ॽ सेगुबा मना याकुबरे़ कुस्सासे॥ 7 खुने़ॽग यहवे दाङ्बा आनिॽ निङ्वाॽफुमाङ्लो, काक् इक्सादिङ् खाम्बेःक्मो खुने़ॽ कुघासे़न्हाॽ वाॽरो॥ 8 खुने़ॽ चोगुबा माङ्हुप्पिन् सदादिङ् निङ्वाॽ इःत्तुरो, हे़क्क्याङ् कुबाःन्जाक्किन् हे़न्छिङ् हे़न्छिङ् मे़न्छाम् थाःक् थारिक् वाॽरो॥ 9 खे़न् माङ्हुप्पिन् अब्राहाम्मिन्नु चोगुआङ् वये़रो, हाबा खे़न् माङ्हुप्पिन् खुने़ॽ इसहाक्के़न्नु माङ्हे़क् चोगुआङ् वये़रो॥ 10 खुने़ॽ खे़न् इङ्जाङ् कुइसिक् याकुबे़न्नु निःन्धो चोगुरो, हे़क्क्याङ् इस्राइले़न्नु खुने़ॽ अक्खे पाःत्तुआङ् आप्फाल्ले़आङ् मे़न्नुप्मनाबा माङ्हुप् कुइसिक् हुप्तुरो— 11 खुने़ॽ पाःत्तु, “खे़ने़ॽ कनान लाजेन् पिने़रो, हे़क्क्याङ् खे़न् खे़ने़ॽ के़लक् पोङ्लो॥” 12 निङ्वाॽफुमाङ्ङिल्ले़ कुमनाहाॽ साॽरिक् मे़सुःन्दे़रो, खे़ङ्हाॽ कनान लाजेॽओ ताक्कन्निबा मे़वये़रो॥ 13 खे़ङ्हाॽ थिक् लाजेॽ नु वेॽ लाजेॽहाॽओ ताक्मे़गन्दे़रो, थिक् हाङ्जुम् नु वेॽ हाङ्जुम्हाॽओ मे़वये़रो॥ 14 कर यहवे दाङ्बे़ल्ले़ आत्तिन्हाॽआङ् खे़ङ्हाॽ तुक्खे चाःप्मा मे़भाःक्तुसिन्लो॥ खे़ङ्हाॽ से़ःप्मासिरे़ लागि हाङ्हाॽआङ् खुने़ॽ अक्खेलॽरिक् फे़ःक्तुसिरो— 15 “सेःन्दुङ्सिङ्बा आसे़वारोबाहाॽ मे़सुसे़म्सिम्मिन्ने़ॽओ, माङ्निङ्वाॽपान् के़बाःप्पा आमनाहाॽ मे़घाःन्दे़म्सिम्मिन्ने़ॽओ॥” 16 खुने़ॽ खे़न् लाजेॽओ पयम् यम्बा साक् पोगे़र याःन्दुरो, हे़क्क्याङ् खे़ङ्हाॽरे़ खुनिॽ के़रे़क् इक्ताप्हाॽ कुजाॽ मे़धोःक्ते़ल्ल चोगुरो॥ 17 खुने़ॽ युसुफे़न् खे़ङ्हाॽरे़ खुनिॽ तगि पाङ्घुरो, खे़ङ्ग योक् पोङ्से़ मे़सङ्घुरो॥ 18 खुने़ॽ कुलाङ्हाॽ थक्क्रङ्ङिल्ले़ इमे़घेःक्खुरो, हे़क्क्याङ् कुनिगिःङ्मा-कुसित्लाओ खे़ङ्हाॽरे़ फे़न्सिक्किःन् मे़भत्छुरो॥ 19 खुने़ॽ पाःत्तुबा माङ्निङ्वाॽपान्निन् मे़ङ्गे़त्ते थारिक् योक् पोःक्खे़रो, हे़क्क्याङ् यहवे दाङ्बे़ल्ले़ कुनिङ्वाॽ साॽरुरो॥ 20 मिस्रबा हाङ्ङिल्ले़ मना पाङ्घुसिआङ् थे़ॽरुरो, हाङ्युक्पाल्ले़ इघेःङ्लाम् खुने़ॽ ले़रुरो॥ 21 हाङ्ङिल्ले़ कुहिम्मो खुने़ॽ यम्बा मना चोगुरो, हे़क्क्याङ् लाजेॽ के़रे़क् युक्साबा चोगुरो॥ 22 खुने़ॽग सुहाङ्युक्पाहाॽ मुरामे़प्मा सुक्तुसिरो, हे़क्क्याङ् खुने़ॽ तुम्म्याङ्हाङ्हाॽ सिक्कुम् निङ्वाॽरे़ पाःन्हाॽ हुॽमा सुक्तुसिरो॥ 23 हे़क्क्याङ् याकुबे़न् मिस्र लाजेॽओ पेरो, हे़क्क्याङ् खुने़ॽ हामरे़ कुलाजेॽओ वे़प्मिबा पोःक्खे़रो॥ 24 निङ्वाॽफुमाङ्ङिल्ले़ खुने़ॽ कुमनाहाॽ साॽरिक् मे़बोःन्दे़ मे़धे़ॽरे़र चोगुसिरो, खे़ङ्हाॽ खुनिॽ निङ्मिहाॽनुःल्ले़आङ् यरिक् फोसुसिरो॥ 25 निङ्वाॽफुमाङ्ङिल्ले़ कुमना इस्राइलिहाॽ मिस्रिहाॽरे़ मे़जिःत्तुसिर याःन्दुसिरो, हे़क्क्याङ् खुने़ॽ कुसे़वारोबाहाॽ खे़ङ्हाॽरे़ इङ्मे़ले़क्तुसिर चोगुरो॥ 26 कर खुने़ॽ मोसा नु हारुने़न् सेगुसिरो, हे़क्क्याङ् खे़न् कुसे़वारोबाहाॽ खे़प्मो पाङ्घुसिरो॥ 27 खे़ङ्हाॽरे़ निङ्वाॽफुमाङ्ङिल्ले़ कुलागि मुक्साम्साबा याःम्बक्हाॽ चोगे़सुरो, हे़क्क्याङ् हामरे़ कुलाजेॽओ निङ्वाॽ के़माबा याःम्बक्हाॽ ओसेःन्धाक्ते़सुरो॥ 28 निङ्वाॽफुमाङ्ङिल्ले़ खे़न् लाजेन् खामाक्ते़र याःन्दुरो, हे़क्केसाङ् मिस्रिहाॽरे़ खुने़ॽ पाःत्तुबा हे़क्के कुमनाहाॽ पाङ्मासि मे़न्दे़न्दे़ल्लो॥ 29 खे़ङ्हाॽरे़ खुनिॽ च्वाःत्तिन् माक्खिॽ पोःक्खे़र याःन्दुरो, हे़क्क्याङ् के़रे़क् ङाहाॽ हदॽ मे़स्ये़रो॥ 30 खे़ङ्हाॽरे़ खुनिॽ लाजेन् पे़दःक्हाॽरे़ सिदे़प् मे़दे़प्तुरो, हाङ्हिम्मो सुहाङ्युक्पाहाॽरे़ खुनिॽ इम्मादे़न्हाॽआङ् सधे़क् मे़धिम्सुरो॥ 31 खुने़ॽ सिजा सिक्चा हयङ् हयङ् मे़दार फाॽआङ् पाःत्तुरो, हे़क्क्याङ् लाजेन् के़रे़क् सिजा नु याङ्नाःल्ले़ तिम्से़रो॥ 32 खे़न् लाजेॽओ पाङ्गे़न्दिङ् वहित्तिल्ले़ कुले़क्वा फःन् थ्ये़रो, मिस्र लाजेॽओ के़रे़क् साःम्भे ले़क्ते़रो॥ 33 खुने़ॽग मिस्रबा चे़ल्ले़क्सेॽ नु पये़प्पा पःत्छेॽबुङ्हाॽ मे़क्खु पिरुसिरो, खे़न् लाजेॽबा थाबु सिङ्लाहाॽ सोःन्दु पिरुसिॽरो॥ 34 खुने़ॽ पाःत्तुआङ् आत्तातान्ने यरिक् निःङ्घुक्वाहाॽ मे़द्ये़रो, हे़क्क्याङ् प्याःप्पाहाॽआङ् साॽरिक् सिदत् मे़द्ये़रो॥ 35 खे़ङ्हाॽरे़ खे़न् लाजेॽबा के़रे़क् सिङ्जःक् लुङ्जःक्हाॽ मे़जमे़देसुरो, हे़क्क्याङ् खुनिॽ प्याङ्सिगे़न् इक्ताप्पोबा पोगुगे़न् कुजाहाॽ मुरे़ःक् खे़रे़ःक् मे़जोगुरो॥ 36 हे़क्क्याङ् खुने़ॽ मिस्र लाजेॽबा के़रे़क् तुम्बा साहाॽ से़रुसिरो, खे़ङ्हाॽरे़ मे़गत्तुसिबा तगिबा साहाॽ मे़क्खुसिरो॥ 37 मिस्र लाजेॽलाम्बा खुने़ॽ इस्राइलिहाॽ लःत्तु थाक्तुसिरो, खे़ङ्हाॽरे़ साम्म्याङ् युप्पाहाॽ मे़धाक्तुआङ् मे़धाङे़रो, हे़क्क्याङ् खे़ङ्हाॽओ हाःत्ताङ् मे़न्जोःन्दे़न् मे़ङ्गे़ङे़ल्लो॥ 38 खे़ङ्हाॽ मे़लःन्दे़ मे़बेबाओ मिस्रिहाॽ मे़सःत्ते़रो, थेआङ्भे़ल्ले़ खे़ङ्हाॽ इस्राइलिहाॽनु मे़गिसे़रो॥ 39 निङ्वाॽफुमाङ्ङिल्ले़ खे़ङ्हाॽ थेःक्मासिरे़ लागि खाॽमिःप्पान् फत्छुरो, हे़क्क्याङ् से़न्दिक् मिःल्ले़ थोॽरुसिरो॥ 40 खे़ङ्हाॽरे़ सा चामा मे़नाःक्तुल्ले़ उःत्लुङ्घे मुःत्लुङ्गे पुहाॽ पिरुसिरो, साङ्ग्राम्पेदाङ्बा खरे़ःङ्ङिल्ले़ खे़ङ्हाॽ खाःत्तुसिरो॥ 41 खुने़ॽ पयम् यम्बा लुङ्ङिन् फःक्खुल्ले़ खे़प्मोलाम् च्वाःत् पुन्दे़लःन्दे़रो, हे़क्क्याङ् खे़न् च्वाःत्तिन् ये़ःङ्घादे़न्नो वहःङ् पोःक्खे़रो॥ 42 थेआङ्भे़ल्ले़ खुने़ॽग कुसे़वारोबा अब्राहाम्मिन्नु चोगुबा सेसेमाङ्हुप्पिन् निङ्वाॽ लिङ्घुरो॥ 43 हे़क्केलॽरिक् सेगुसिबा कुमनाहाॽ खुने़ॽ मिस्रलाम् लःत्तु थाक्तुसिरो, खे़ङ्हाॽ मे़सःत्ते़र यम्बा इक्लाओ मे़अःक्ते़रो॥ 44 खे़ङ्हाॽ इक्सादिङ् खाम्बेःक्मोबा मे़न्छाम् सुवाङ्हाॽरे़ खुनिॽ लाजेॽ सिङ्बुङ्हाॽ पिरुसिरो, खे़ङ्हाॽरे़ खुनिॽ प्याङ्सिगे़न् इक्ताप्हाॽ हुक्सुप्तुसिरो॥ 45 कुमनाहाॽरे़ कुइङ्जाङ्ङिन् मे़इःत्तु मे़नाःत्तुररो, हे़क्क्याङ् कुधिम्मिन् इःप्मा नाःप्मा मे़दे़न्ल फाॽआङ् खुने़ॽ अक्खे चोगुबारो॥ यहवे दाङ्बे़ल्ले़ कुनारा पोररो! |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.