निङ्वाॽफु साम्लोसुम् 104 - लिम्बुचइःत्दाङ्बे़ल्ले़ कुनारा फोमा 1 आङ्गाॽ के़रे़क् आनिङ्वाॽरे़ यहवे दाङ्बे़ल्ले़ कुनारा फोसुङ्लो, यहवे दाङ्बा आनिङ्वाॽफुमाङ्ङे, खे़ने़ॽ से़क्खाए पयम् यम्बा के़जोःक्लो, खे़ने़ॽग मिमिदिङ् नु हाङ्वा माङ्वादाङ्बा के़जोःक्लो॥ 2 खे़ने़ॽग ओःत्तिःल्ले़ के़बन्छिङ्ङाङ् के़वाॽरो, पःत्थाङ् कुइसिक् ताङ्साक्पान् के़घिङ्सुआङ् पत्लो॥ 3 खाॽमिःत्तोबा च्वाःत् सम्धाङ् के़हिम् के़जोगुरो, खाॽमिःप्पान् अन्ला के़जोगुरो, हे़क्क्याङ् सुरित् केजङ्ङिन् के़युक्तुरो॥ 4 खे़ने़ॽ सुरित् केजङ्ङिन् इङ्घङ् के़साबा के़जोगुरो, हे़क्क्याङ् के़से़वारोबाहाॽ मिधुङ् मिराःक्सिरो॥ 5 इक्सादिङ् खाम्बेःक्मान् आभे़ल्ले़आङ् मे़म्मुमनाबा के़जोगुआङ् वाॽरो, खे़ने़ॽ खे़न् आभे़ल्ले़आङ् थधप् मे़ल्लॽमनाबा के़जोगुआङ् वाॽरो॥ 6 खे़न् इक्सादिङ् खाम्बेःक्मान् पःत्थाङ् कुइसिक् वरःङ्ङिल्ले़ कब्रिङ् के़घुःक्तुआङ् पत्लो, थे़गुहाॽ च्वाःत् सिगाङ् के़युक्खुआङ् युङ्लो॥ 7 कर च्वाःत्तिन् के़भे़ःक्तुल्ले़ खे़त्छिङ् पेरो, के़इङ्जाङ्ङिन् खे़प्सुआङ् खिमो खे़न् चत्छिङ् पेरो॥ 8 यारिप् के़जोगुबा ते़न्हाॽओए च्वाःत्तिन् लुम्सिङ्लो, थे़गुलाम्बा युर ने़वाला ते़म्भोयो सुम्सिङ्लो॥ 9 चभत् थुङ्वारे़ कोःक्मा थे़गुहाॽ मे़गाःक्तुल्ल फाॽआङ् इःन्दो के़युक्खुॽरो, हे़क्केलॽरिक् वादप्माल्ले़ याम्मो इक्सादिङ् खाम्बेःक्मान् मे़निःप्सुन्लो॥ 10 के़बुम्बा च्वाःत्हाॽ सेःङ्घायो वागुर के़याःन्दुरो, हे़क्क्याङ् कोःक्मा फाङ्जङ् थे़गु माङ्वालुम्मो वहःङ्हाॽ कुङ्युरो॥ 11 खे़प्मो ताम्भुङ् थक्साहाॽरे़ च्वाःत् थुङ्मा मे़घोसुरो, ताम्भुङ् अन्हाॽरे़ आःङ्गुगे़न् वामिःक्मान् मे़जिप्सुरो॥ 12 च्वाःत्तिल्ले़ कुबेसाङ् के़बे़बा पुसाहाॽरे़ हाप् मे़जोगुरो, हे़क्क्याङ् सिङ्बोराःक्हाॽओ मे़युङ्ङाङ् साम्मे़लोरो॥ 13 के़युङ्मादे़न् ताङ्साक्पोलाम्बा पाङ्गे़न्दिङ् वहित् थामा के़बाङ्घुरो खे़ब्याङ् खे़ने़ॽ थे़गु माङ्वा कोःक्मा फाङ्जङ्हाॽ वागे़भिःन्दुरो, हे़क्क्याङ् खे़ने़ॽ के़हाङ्वा मुॽइरे़ इक्सादिङ् खाम्बेःक्मान् के़धिम्सुरो॥ 14 खे़ने़ॽग कुबु थक्साहाॽरे़ लागि यान् सुङ्हाॽ पोधाङ्ल के़जोगुरो हे़क्क्याङ् मे़न्छाम् याप्मिहाॽरे़ लागि थाबु सिङ्सेॽ लिङ्ल के़याःन्दुरो खे़ब्याङ् मे़न्छाम् याप्मिहाॽरे़ पोगुगे़न् कुजा मे़भत्छुरो॥ 15 सिजङ्वाःल्ले़ मनारे़ निङ्वाॽ तासुरो, निःङ्गेॽरे़ नारा ओःत्छुरो, हे़क्क्याङ् खुने़ॽ आबिबा खरे़ःङ्ङिल्ले़ आनिॽ के़धुम्बा आजोःक्लो॥ 16 ले़बानान लाजेॽओ के़युङ्बा पयम् यम्बा साम्माङ्सिङ्हाॽ यहवे दाङ्बे़ल्ले़ लेःत्तुबारो, कन् सिङ्बुङ्हाॽ वरक्ल वहित् थासुरो॥ 17 खे़प्मो पुसाहाॽरे़ हाप् मे़जोगुरो, लिलिवाहाॽरे़ आःङ्बुङ्हाॽओ हाप् मे़जोगुआङ् मे़युङ्लो॥ 18 केःम्ब केःम्बा थे़गुहाॽओ साम्मे़ःन्दाहाॽ मे़याक्लो, हे़क्क्याङ् कुमि के़होप्पा सुबाहाॽ लुङ्भिःप्माहाॽओ मे़जिङ्सिङ्लो॥ 19 खे़ने़ॽ ये़म् से़म्मा मिक्सेःन्ले़ लाबान् के़जोगुरो, नाम्मिल्ले़ कुधामा ये़म्मिन् निसुरो॥ 20 खे़ने़ॽ खाधाम्ल के़याःन्दुरो, हे़क्क्याङ् से़न्दिक् पोङ्लो, खे़ब्याङ् ताम्भुङ् थक्साहाॽ चाराम्से़ लाःक्कात् मे़लःन्लो॥ 21 खिरिङ्बाहाॽ चामा मे़गोःत्ल मे़हुःक्लो, खे़ङ्हाॽरे़ निङ्वाॽफुलाम्बा कुजा मे़गोःत्तुरो॥ 22 खाओःत्ताङ् खे़ङ्हाॽ मे़नुःङ् मे़बेःक्लो, हे़क्क्याङ् खे़ङ्हाॽ खुनिॽ खाहाॽओ मे़इम्लो॥ 23 खे़ब्याङ् मनाहाॽ खुनिॽ याःन्धाओ मे़बेःक्लो, हे़क्क्याङ् युःन्छिक् थारिक् याःम्बक् मे़जोक्लो॥ 24 यहवे दाङ्बाए, खे़ने़ॽग यरिक् पाःन्हाॽ के़जोगुआङ् वाॽरो, पयम् यम्बा सिक्कुम्दिङ् निङ्वाॽरे़ खे़ने़ॽ खे़ङ्हाॽ के़रे़क् के़जोगुरो॥ के़जोगुसिबा थक्सा पुसाहाॽरे़ इक्सादिङ् खाम्बेःक्मान् के़दिम्बा चोक्लो॥ 25 यम्बा नु ताम्दाम्बा वरःङ्हाॽ ने़रो, खे़ॽयो चुक्सा नु यम्बा निःत्मे़न्दे़त् पाधुङ् ले़ःक्ङाहाॽ मे़याक्लो॥ 26 खे़प्मो वालाधाहाॽ ना नु कत्ना मे़लॽरो, पाङ्वार फाॽआङ् के़जोगुबा लिब्यातान् मे़प्मनाबा थक्सान् खे़ॽयो याक्लो॥ 27 कुजा आबि फाॽआङ् चामा ये़म्मो खे़ङ्हाॽरे़ खे़ने़ॽए ओगे़म्मे़त्लो, खे़ङ्हाॽरे़ खे़ने़ॽए निङ्वाॽ के़म्इःत्लो॥ 28 खे़ङ्हाॽ चा के़बिरुसिल्ले़ खे़ङ्हाॽरे़ मे़जरो, खे़न् कुजान् मे़जआङ् खे़ङ्हाॽ मे़घारो॥ 29 खे़ङ्हाॽ कुजा पिमा के़नाॽरुसिल्ले़ के़साक्पो मे़धारो, खे़ङ्हाॽरे़ खुनिॽ सक्मान् के़साक्तुल्ले़ मे़सिरो॥ हे़क्क्याङ् खाम्मोए याम्मो मे़नुःङ् मे़बेःक्लो॥ 30 कर के़सक्मान् के़बाङ्घुल्ले़ खे़ङ्हाॽ नावागे़न् चइःत् मे़बोङ्लो, हे़क्क्याङ् इक्सादिङ् खाम्बेःक्मो के़वाॽबा पाःन्हाॽ खे़ने़ॽ कुसङ् के़जोगुरो॥ 31 यहवे दाङ्बे़ल्ले़ सदादिङ् कुमिमिदिङ् पोङ्लरो, यहवे दाङ्बान् कुयाःम्बक्हाॽओ सःत्लरो॥ 32 इक्सादिङ् खाम्बेःक्मान् ओगे़मे़त्तुल्ले़ खे़न् यङ्लो, थे़गुहाॽ के़सुसुल्ले़ खे़प्मोनु मिःक्खुॽ लःन् थाङ्लो॥ 33 आङ्गाॽ हिङ्ङार थारिक् यहवे दाङ्बे़ल्ले़ कुलागि से़वासाम्लोन् साम्मे़त्तुङ्लो, आङ्गाॽ आसक्मा याक्याक् निङ्वाॽफुमाङ्ङिल्ले़ कुनारा फोसुङ्लो॥ 34 इःत्तुङ्बा पाःन्हाॽरे़ खुने़ॽ कुनिङ्वाॽ ताररो, थेआङ्भे़ल्ले़ आङ्गाॽग यहवे दाङ्बाओ सःत्तारो॥ 35 लायोबाहाॽ इक्सादिङ् खाम्बेःक्मोलाम् मे़मे़क्लरो, फे़न्याःम्बक् के़जोःक्पाहाॽरे़ खुनिॽ मिङ् माररो॥ आङ्गाॽ के़रे़क् आनिङ्वाॽरे़ यहवे दाङ्बान् मिङ्सोधाःङ्सो पिरुङ्लो, यहवे दाङ्बान् कुनारा फोसुङ्लो! |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.