निङ्वाॽफु साम्लोसुम् 103 - लिम्बुनिङ्वाॽफुमाङ्ङिल्ले़ लुङ्माॽ आदुक् दाउदरे़ कुसाम्लो 1 आङ्गाॽ के़रे़क् आनिङ्वाॽलाम्बा यहवे दाङ्बे़ल्ले़ कुनारा फोसुङ्लो, आङ्गाॽ आसिक्लुङ्मोलाम् खुने़ॽ कुसेसे मिङ्ङिन् इङ्धाङ् पिरुङ्लो॥ 2 आङ्गाॽ के़रे़क् आनिङ्वाॽलाम्बा यहवे दाङ्बे़ल्ले़ कुनारा फोसुङ्लो, हे़क्क्याङ् खुने़ॽ लुङ्माॽ आदुक्तुक्पा चोःक्पा पाःन्निन् निङ्वाॽ मे़भेःन्नाल्लो॥ 3 खुने़ॽग के़रे़क् आलायोहाॽ खे़त्तुदेसु पिआरो, हे़क्क्याङ् काक् तुक्मा यॽमालाम्बा वेःन्नारो॥ 4 खुने़ॽए आङ्गाॽ सिमालाम् ताङ्से़ःप्पारो, हे़क्क्याङ् लुङ्माॽ तुक्काआङ् मिःम्जिरे़ इङ्धाङ्नु मुॽइसाम् पिआरो॥ 5 खुने़ॽ नुःब्नुबा पाःन्हाॽरे़ आङ्गाॽ आनिङ्वाॽ तासु पिआरो, हे़क्केलॽरिक् आङ्गाॽ मया कुइसिक् याम्मो के़धुम्बा नु थाङ्बे़न् पोङ्ङारो॥ 6 मे़एःप्तु मे़युक्तुसिबाहाॽ यहवे दाङ्बे़ल्ले़ कुदोःप्मा खासे़न् चोगु पिरुसिरो, हे़क्क्याङ् खे़ङ्हाॽ युक् के़घोबा चोगुसिरो॥ 7 खुने़ॽ चोःक्मा कोःत्तुबा याःम्बक्किन् मोसान् ओसेःन्धाक्तुरो, हे़क्क्याङ् मुक्साम्साबा कुयाःम्बक्हाॽ इस्राइलबा सुवाङ्हाॽ ओःन्धाक्तुसिरो॥ 8 यहवे दाङ्बान् के़नुॽबा नु नुरिक् आमे़प्मे़प्पा चोक्लो, हारा कुसिक् मे़म्बोःक्मनाबा नु आभे़ल्ले़साङ् साॽरिक् लुङ्माॽ आदुक्तुक्पा चोक्लो॥ 9 खुने़ॽ आभे़ल्ले़साङ् पान् आन्धिक्ने़न्नाङ् मे़बत्ने़ल्लो, हे़क्क्याङ् सदादिङ् कुयाःक्काङ् मे़ले़ॽने़न्नाङ् मे़वाॽने़ल्लो॥ 10 आनिॽ लायोलाम् खोमा के़बोङ्बा खुम्दिङ् खुने़ॽ आम्बिने़ल्लो, हे़क्क्याङ् आनिॽ लायो नु फे़न्याःम्बक् आजोगुम्मिल्ले़ खुने़ॽ आङ्घुम्ने़ल्लो॥ 11 साङ्ग्राम्पेदाङ्ङिन् इक्सादिङ् खाम्बेःक्लाम् यरिक् चाङ्जाङ् लॽरो, हे़क्केलॽरिक्के खुने़ॽ मिङ्सो इङ्धाङ् के़बिबाहाॽ साॽरिक् लुङ्माॽ तुक्तुसिरो॥ 12 नाम्गे़न् पिसाङ्लाम्बा नाम्धा पिसाङ् साॽरिक् माःङ्लो, खे़म्म्याक्के माःङ्घा आनिॽ लायोहाॽ खे़त्तुदेसुरो॥ 13 आक्खेलॽरिक् पाःल्ले़ साहाॽ लुङ्माॽ तुक्तुसिरो, हे़क्केलॽरिक्के यहवे दाङ्बे़ल्ले़ खुने़ॽ मिङ्सो इङ्धाङ् के़बिबाहाॽ लुङ्माॽ तुक्तुसिॽरो॥ 14 आनिॽ थेलाम्बा आबोःक्खे़आङ् आवाॽ खे़न् खुने़ॽ निसुरो, आनिॽग खाम्लाम्बा आबोःक्खे़बान् खुने़ॽ निङ्वाॽ इःत्तुरो॥ 15 आनिॽग याःन्सुङ् कुइसिक् थाःक् सॽरो, ताम्भुङ्ङोबा फुङ् हे़क्के आभे़क्काङ् इआले़म् आबेःक्लो॥ 16 सुरित् केजङ्ङिल्ले़ खे़न् मुःत्तुआङ् मक्थारो, हे़क्क्याङ् खे़न् माबेःक्काङ् याम्मो हाःत्ले़आङ् मे़निसुल्लो॥ 17 कर यहवे दाङ्बान् मिङ्सो इङ्धाङ् के़बिबाहाॽ खुने़ॽ आभे़ल्ले़साङ् लुङ्माॽ तुक्तुसिरो॥ हे़क्क्याङ् खे़ङ्हाॽरे़ खुनिॽ सामे़न्छाॽहाॽओ सदादिङ् कुसाम्योनिमान् वाॽरो॥ 18 कुमाङ्हुप्पिन् निङ्वाॽ के़इःप्पाहाॽ लुङ्माॽ तुक्तुसिरो, हे़क्क्याङ् कुइङ्जाङ् के़इःप्पा के़नाःप्पाहाॽ खुने़ॽ नुॽमादामा पिरुसिरो॥ 19 यहवे दाङ्बे़ल्ले़ कुहाङ्युक्नान् साङ्ग्राम्पेदाङ्ङो युक्खुआङ् युङ्लो, हे़क्क्याङ् के़रे़क् सम्धाङ् हाङ्युक् चोक्लो॥ 20 खुने़ॽ कुइङ्जाङ् के़इःप्पा के़नाःप्पा नु खुने़ॽ पाःत्तुबा पान् के़घे़म्बा हे़क्क्याङ् मुक्साम्साबा माङ्लाइङ्बासे, यहवे दाङ्बे़ल्ले़ कुनारा फोसे़म्मे़ॽओ॥ 21 साङ्ग्राम्पेदाङ्ङो के़वाॽबा के़रे़क् मुक्साम्से, खुने़ॽ कुनिङ्वाॽ हे़क्के याःम्बक् के़जोःक्पा कुसे़वारोबासे, यहवे दाङ्बे़ल्ले़ कुनारा फोसे़म्मे़ॽओ॥ 22 यहवे दाङ्बे़ल्ले़ के़रे़क् कुनावागे़न् चइःत्हाॽरे़ खुने़ॽ कुनारा फोसे़म्मे़ॽओ, कुहाङ्जुम्मो के़वाॽबा के़रे़क्ले़ कुनारा फोसे़म्मे़ॽओ, आङ्गाॽ यहवे दाङ्बे़ल्ले़ कुनारा फोसुङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.