निङ्वाॽफु साम्लोसुम् 102 - लिम्बुतुक्खेओबा पेलि तुक्खे के़जाबा मनान् कुधना ले़ङ्ङिल्ले़ कुमे़रिङ् थक्मा पाःन्हाॽ यहवे दाङ्बे़ल्ले़ कुदगि युक्खुबा पेलि 1 यहवे दाङ्बाए, पेलि फाक्ने़बान् खे़प्से़ॽओ, फाॽराङ्ङे़ॽ फाॽआङ् मे़त्ने़बा पाःन्नो निङ्वाॽ पिरे़ॽओ॥ 2 ये़त्तुक्खे तुम्माआङ् याक्काल्ले़ आङ्गाॽलाम् खे़ने़ॽ माःङ्घा मे़बोःक्खे़न्ने़ॽओ, आङ्गाॽ पेलि फाक्ने़ल्ले़ खे़प्से़ॽआङ् आङ्गाॽ हारा नुगप् पिराङ्ङे़ॽओ॥ 3 थेआङ्भे़ल्ले़ आङ्गाॽ आहिङ्मन्निन् मिःक्खुॽ कुइसिक् माबेःक्लो, नासिङ्गे़न् आधक्किन् मिदःत्तिल्ले़ ओॽरुबा हे़क्के आङ्गाॽ ओॽआरो॥ 4 आङ्गाॽग याःन्सुङ् कुइसिक् हेराङ् चबाङ्ङाङ् वाॽआरो, कुजा चामाआङ् मे़सुक्काल्लो॥ 5 तुक्खेःल्ले़ चोगुल्ले़ आङ्गाॽ साॽरिक् याःत्तारो, आङ्गाॽग ये़त् नु होरिक्पारक् पोःक्खाङ्लो॥ 6 मुरे़ःक् खे़रे़ःक् थेआङ् के़होःप्पादे़न्नोबा फक्थिःम्बा कुइसिक् पोःक्खाङ्ङाङ् वाॽआरो, के़धुप्पा के़यःप्पा हिम्हाॽओ याङ्गे़धोःक्पा खक्तिःम्बा हे़क्के पोःक्खाङ्ङाङ् वाॽआरो॥ 7 आङ्गाॽ मे़न्इम्मे ने़आरो, हिम्धुरिओ के़युङ्बा पु कुइसिक् आङ्गाॽ ए़क्लेःक् पोःक्खाङ्लो॥ 8 ले़न्दिक् नाम्धाधा आनिङ्मिहाॽरे़ आजाःत्थि मे़देसुरो, आङ्गाॽ हिनाःम् के़मे़प्पहाॽरे़ माङ्दे साक्मुरा मे़मे़त्तारो॥ 9 खाप्पुःन् आजामा पोःक्खे़आङ् वाॽरो, हे़क्क्याङ् आङ्गाॽ आधुङ्मा च्वाःत्तो मिक्वान् पःन्दे़आङ् याक्लो॥ 10 थेआङ्भे़ल्ले़ खे़ने़ॽ के़सिक् पोगे़आङ् आङ्गाॽ थाःङ् के़बक्खाङ्लो, हे़क्क्याङ् आङ्गाॽग खे़ने़ॽ थिक्ले़प्माङ् लाप्के़भुसाङ्ङाङ् वाॽआरो॥ 11 आङ्गाॽ आहिङ्मन्निङ्ग माक्थःम्धःम्बा साम्म्रिःप्पा कुइसिक् पोःक्खे़आङ् वाॽरो, आङ्गाॽ यान् हे़क्के इरे़माङ्ङाङ् वाॽआरो॥ 12 कर यहवे दाङ्बाए, खे़ने़ॽग सदादिङ् आभे़ल्ले़साङ् हाङ्युक्नाओ के़युङ्लो, खे़ने़ॽ के़मिङ्सो इङ्धाङ्ङिङ्ग थाःक् थाःक् ताःन्दि थारिक् पोङ्लो॥ 13 खे़ने़ॽ के़बोःक्काङ् सियोनबा के़मनाहाॽ के़लुङ्माॽ मे़दुक्लो, खे़ङ्हाॽ सम्धाङ् लुङ्माॽ स्याःत् लॽमा सुये़म्मिन् त्ये़आङ् वाॽरो हे़क्क्याङ् कन् ये़म्मिङ्ग आल्लोएरो॥ 14 सियोने़न् मे़गे़आङ् वाॽरो, करसाङ् के़से़वारोबाहाॽरे़ खे़न् लुङ्माॽ मे़दुक्तुरो, खे़न् खाप्पुथ्यःङ् पोःक्खे़आङ् वाॽरो, हम्भसाङ् खे़ङ्हाॽरे़ खे़न् सम्धाङ् खुनिॽ लुङ्माॽ स्याःत् लॽरो॥ 15 इक्सादिङ् खाम्बेःक्मोबा मे़न्छाम् सुवाङ्हाॽरे़ यहवे दाङ्बे़न् मे़गिरुरो, इक्साबा के़रे़क् हाङ्हाॽरे़ कुमुक्साम्मिन् मिङ्सो इङ्धाङ् मे़बिरुरो॥ 16 थेआङ्भे़ल्ले़ यहवे दाङ्बे़ल्ले़ सियोने़न् याम्मो चोगुरो, हे़क्क्याङ् खुने़ॽ कुहाङ्वा कुमाङ्वान् ओसेःन्दाङ् चोगुरो॥ 17 खुने़ॽ याङ्गे़साॽहाॽरे़ पेलि मे़भाक्तुबान् खे़प्सुरो, हे़क्क्याङ् खे़ङ्हाॽरे़ मे़जोगुबा तुवाओ निङ्वाॽ पिरुरो॥ 18 निङ्वाॽफुमाङ्ङिल्ले़ थे चोगु, खे़न् के़दाबा मे़न्छाम् थाःक्हाॽरे़ लागि साप्ते़म् युक्खे़म्मे़ॽओ, हे़क्केःल्ले़ ताःन्दि के़दाबा मनाहाॽरे़ कुनारा मे़भोसुरो॥ 19 यहवे दाङ्बान् कुसेसेदे़न्लाम् यो ओमये़रो, साङ्ग्राम्पेदाङ्लाम्बा यो इक्सादिङ् खाम्बेःक्मान् ओमे़त्तुरो॥ 20 पुङ्लाहिम्मो साक्पा के़धाबाहाॽरे़ मे़याःत्ल पेलि मे़भाक्तुबान् खुने़ॽ खे़प्सुरो, हे़क्क्याङ् सिमे़ल्ले़ खुम्दिङ् के़घोबाहाॽ से़न्लप् पिरुसिरो॥ 21 अक्खेलॽरिक् सियोनओ यहवे दाङ्बे़ल्ले़ कुमिङ्ङिन् इङ्मे़भोसुरो, हे़क्क्याङ् यरुसले़ःम्मो खुने़ॽ कुनारा मे़भोसुरो॥ 22 खे़न् ये़म्मो हाङ्जुम्हाॽ नु मे़न्छाम् सुवाङ्हाॽ मे़जुम् मे़दारो, हे़क्क्याङ् यहवे दाङ्बे़ल्ले़ कुसे़वा मे़जोगुरो॥ 23 खुने़ॽग थाङ्बे़न् वयाङ्लए आङ्गाॽ मे़न्धुम्मनाबा चोगाङ्लो, हे़क्क्याङ् खुने़ॽ आधाक् सॽरे़र याःन्दाङ्लो॥ 24 हे़क्केःल्ले़ मे़त्तुङ्, “आनिङ्वाॽफुमाङ्ङे, आङ्गाॽ काप्पोबा मे़न्दुम्मे, आल्लोसा आङ्गाॽ मे़देॽराङ्ङिन्ने़ॽओ, खे़ने़ॽग सदादिङ् के़हिङ्लो॥ 25 कुहेःक्सिङ्मोए इक्सादिङ् खाम्बेःक्मान् के़जोगुरो, आबाङे के़हुक्किल्ले़ तरःङ्दिङ् ताङ्साक् के़भत्छुरो॥ 26 इक्सादिङ् खाम्बेःक्मान् नु ताङ्साङपान् माबेःक्लो, कर खे़ने़ॽग सदादिङ् के़वाॽरो॥ इक्सादिङ् खाम्बेःक्मान् नु ताङ्साङपान् चिरिक् कुइसिक् यःत्ताङ् ते़ःङ्बेःक्लो, तेत् लाप्फुमनाबा हे़क्के के़जोगुआङ् खे़न् माबेःक्लो॥ 27 कर खे़ने़ॽग सदादिङ् कुइसिक् के़वाॽरो, खे़ने़ॽ आभे़ल्ले़आङ् के़न्नुप्ने़ल्लो॥ 28 के़से़वारोबाहाॽरे़ खुनिॽ साएहाॽग थेआङ् मे़ल्लॽए मे़हिङ्लो, हे़क्क्याङ् खे़ङ्हाॽरे़ खुनिॽ मुॽइदाङ्साहाॽ के़गम्ब्राङ्ङो थेआङ् मे़ल्लॽए मे़वाॽरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.