निङ्वाॽफु साम्लोसुम् 101 - लिम्बुहाङ्ङिल्ले़ चोगुबा माङ्हुप् दाउदरे़ कुसाम्लो 1 के़मिःम्जि नु के़घासे़न्निल्ले़ आङ्गाॽ कुयाःम्बेओ साम्लोआरो, यहवे दाङ्बाए, आङ्गाॽ के़नारा फोसुङ्लो॥ 2 आङ्गाॽ आप्तिक् मेःन्नेबा पोङ्मारे़ लागि सिङ्सिङ् ये़क्ये़क्काङ् वाॽआरो, आभे़ल्ले़ आङ्गाॽओ के़दाबाबे? आहिम्मो सेसेसाङ्साङ् पोङ्ङाआङ् हिङ्ङारो॥ 3 ताप्फे़ःम्बा पाःन्हाॽ आभे़ल्ले़आङ् ओमे़मे़त्तान्लो, निङ्वाॽफुमाङ्लाम् माःङ्घा के़बोङ्बाहाॽरे़ खुनिॽ याःम्बक्किन् आङ्गाॽ चिःत्तुङ्लो, खे़ङ्हाॽ आभे़ल्ले़आङ् तेःङ्जुम् मे़लेःत्तासिङ्ङिन्लो॥ 4 ताक्के़भे़ॽबाहाॽलाम् आङ्गाॽ माःङ्घा वाॽआरो, फे़न्याःम्बक्लाम् आङ्गाॽ लाःत्लाःत् वाॽआरो॥ 5 हिम्बेसाङ्बाहाॽ स्वाःत्ताङ् चे़ॽया इङ्दो के़मे़प्पाहाॽ नासि मे़धःत्तासिङ्ङिल्लो, यम्बा के़ले़ङ्सिङ्बाहाॽ नु कुनिङ्वाॽ के़जिःप्पाहाॽ आङ्गाॽ तेःङ् मे़मे़त्तासिङ्ङिल्लो॥ 6 निङ्वाॽफुमाङ्ङो नसाःन्साबाहाॽ आसिराॽ मे़धाङ्लो, खे़ङ्हाॽ आहाङ्हिम्मो युक्खुङ्सिङ्लो, कुदोःप्मा मनाहाॽ आसे़वा चोःक्मा पाङ्घुङ्सिङ्लो॥ 7 इङ्ले़क् के़बाःप्पा मनाहाॽ आहाङ्हिम्मो युङ्मा मे़ङ्घोने़ल्लो, इङ्ले़क् के़जोःक्पा मनाहाॽ आहाङ्हिम्मो वाॽमा मे़ङ्घोने़ल्लो॥ 8 आनिॽ लाजेॽओबा ताक्के़भे़ॽबा मनाहाॽ आङ्गाॽ थिक्याःन्धक् मे़क्खुङ्सिङ्लो, यहवे दाङ्बे़ल्ले़ कुये़क्यक्कोलाम् कुइगे़भे़म्बा मनाहाॽ नाःत्तुङ्देसुङ्सिङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.