निङ्वाॽफु साम्लोसुम् 10 - लिम्बुखासे़न्ले़ लागि पेलि 1 यहवे दाङ्बाए, खे़ने़ॽ थेआङ् माःङ्घा के़ये़प्पाबे? इनोगे़न् तुक्खेओ थ्ये़ॽइगे़ल्ले़ थेआङ् के़जिङ्सिङ्बाबे? 2 कुॽइगे़भे़ॽबाहाॽ आङ्दिङ् मे़लॽरो हे़क्क्याङ् याङ्गे़साॽबाहाॽ तुक्खे मे़जाःत्तुसिरो॥ हे़क्क्याङ् कुॽइगे़भे़म्बाहाॽ वेॽहाॽ थामासि फाॽआङ् मे़जोगुबा चे़म्भन्नो खुन्छिॽ आबाङे मे़धारो॥ 3 खे़ङ्हाॽरे़ निङ्वाॽबो मे़इःत्तुबा ताप्फे़ःम्बा पाःन्हाॽओ आङ्दिङ् मे़लॽरो, हे़क्क्याङ् के़घिःम्बाहाॽ मे़जमुसिरो हे़क्क्याङ् यहवे दाङ्बान् इङ्दो मे़मे़त्तुरो॥ 4 खे़ङ्हाॽ आङ्दिङ् मे़लॽआङ् निङ्वाॽफुमाङ्ङिन् मे़ङ्गोःत्तुन्लो, निङ्वाॽफुमाङ्ङिन् होप् लॽरिक् खुन्छिॽ निङ्वाॽओ मे़इःत्तुरो॥ 5 खे़ङ्हाॽरे़ मे़जोगुबा याःम्बक्को सदादिङ् कुलिङ्दो मे़गे़त्लो, हे़क्क्याङ् खे़ने़ॽ के़धिम्हाॽ मे़न्इःत्तुन् मे़न्नाःत्तुन्लो, खे़ङ्हाॽरे़ खुन्छिॽ निङ्मिहाॽ किनाःन्दि मे़बिरुसिरो॥ 6 आनिगे निङ्वाॽबो थेःल्ले़आङ् मे़मुन्दिगे़न्लो, आनिगे सदादिङ् सःत्तिगे़रो हे़क्क्याङ् आभे़ल्ले़आङ् इनोगे़न् तुक्खेओ आनिगे मे़ध्ये़ॽइगे़न् लॽरिक् मे़इःत्तुरो॥ 7 हे़क्तङ्बाहाॽरे़ वेॽहाॽ साक्मुरा मे़मे़त्तुसिॽ, इङ्मे़ले़क्तुसिरो, हे़क्क्याङ् यङ्मा मे़से़रुसिरो, खे़ब्याङ् आक्खेआङ् कुइगे़भे़म्बा पोङ्मा, फे़न्याःम्बक् चोःक्मा फाॽआङ् ताॽमे़जे़ङ्लो॥ 8 पाङ्भेल्ले़ कुयाओ खे़ङ्हाॽ मे़जिङ्सिङ्ङाङ् मे़युङ्लो, याःम्बक् मे़म्भेःन्ने के़वाॽबा मनाहाॽ मे़से़रुसिरो, खे़ङ्हाॽरे़ कुभाॽ के़बिबा के़होप्पा मनाहाॽ मे़सुगुसिरो॥ 9 ताम्भुङ् पोःक्ला हे़ङ्गात्ति खिरिङ्बान् कुइसिक् खे़ङ्हाॽ मे़जिङ्सिङ्ङाङ् मे़सुगुसिरो॥ कुभाॽ के़बिबा के़होप्पाहाॽ इओ थामासिरे़ लागि मे़सुगुसिरो, हे़क्क्याङ् खे़ङ्हाॽरे़ इओ मे़धासुसिआङ् मे़उःक्खु मे़देॽरुसिरो॥ 10 खे़न् कुइगे़भे़म्बाहाॽरे़ कुभाॽ के़बिबा के़होप्पा मनाहाॽ इओ मे़धासुसिआङ् मे़बे़ःत्ताङ् मे़ने़रो॥ 11 खे़ङ्हाॽरे़ निङ्वाॽफुमाङ्ङिल्ले़ याप्मि निङ्वाॽ फेःत्छे़रो, खुने़ॽ कुमिक्किन् सुबुआङ् वाॽरो हे़क्क्याङ् आभे़ल्ले़आङ् मे़निसुन् फाॽआङ् निङ्वाॽ मे़इःत्तुरो॥ 12 यहवे दाङ्बाए, पोगे़ॽओ! निङ्वाॽफुमाङ्ङे, के़हुक्किन् फोःक्खे़ॽओ, याङ्गे़साॽबाहाॽ फाॽरे़से़ॽओ॥ 13 ताक्के़भे़ॽबाल्ले़ थेआङ् निङ्वाॽफुमाङ्ङिन् इङ्दो मे़त्तुबाबे? खे़ल्ले़ कुनिङ्वाॽबो निङ्वाॽफुमाङ्ङिल्ले़ आङ्गाॽ खुम्दिङ् मे़बिआन् लॽरिक् इःत्तुरो॥ 14 कर निङ्वाॽफुमाङ्ङे, मे़रिङ् थक्मा नु तुक्खेन् के़निसुरो, हे़क्क्याङ् सदादिङ् कुभाॽ पिमा यारिप् के़वाॽरो॥ थेआङ् चोःक्मा मे़न्छुमनाबा मनान् फाॽराङ्ङे़ॽ फाॽआङ् खे़ने़ॽओ तारो॥ ये़त्छाबाहाॽरे़ कुभाॽ दाङ्बाङ्ग हाबा खे़ने़ॽने़रो॥ 15 ताक्के़भे़ॽबा नु फे़न् याःम्बक् के़जोःक्पाहाॽ खुन्छिॽ हुक् ए़क्खे़ पिरे़से़ॽओ॥ खे़ङ्हाॽरे़ खुनिॽ फे़न्याःम्बक्किन् मे़न्ले़त्ते थारिक् खुम्दिङ् पिरे़से़ॽओ॥ 16 यहवे दाङ्बान् सदादिङ्रे़ लागि हाङ्चोक्लो, हे़क्क्याङ् वेॽ माङ् साम्माङ्हाॽओ से़वा के़जोःक्पा इक्सादिङ् खाम्बेःक्मोबा मे़न्छाम् सुवाङ्हाॽ कुलाजेॽलाम्बा मे़लन् मे़बेःक्लो॥ 17 यहवे दाङ्बाए, तुक्खे के़जाबाहाॽरे़ खुनिॽ तुवान् के़घे़प्सुरो हे़क्क्याङ् खुनिॽ सिक्लुङ्मान् के़धुम्बा के़जोगुरो, खे़ङ्हाॽरे़ आभाॽरे़ फाॽआङ् के़म्उःत्तिल्ले़ खे़ने़ॽ के़घे़प्सुरो॥ 18 खे़ने़ॽ ये़त्छाबा नु तुक्खे मे़जाःत्तुसिबाहाॽ के़से़ःप्तुसिरो, हे़क्केलॽरिक् इक्सादिङ् खाम्बेःक्मोबा आत्तिन् मे़न्छाम् याप्मिःल्ले़आङ् खे़ङ्हाॽ यङ्मासे़प्मा मे़सुक्तुन्छिन्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.