खाहुन् 8 - लिम्बुसिक्कुम्दिङ् निङ्वाॽइल्ले़ उःत्तुसिरो 1 थे सिक्कुम्दिङ् निङ्वाःल्ले़ यम्बा इक्लाओ उवा मे़जोगुन्नाङ्बि? थे खासिङ्निःप्मा निङ्वाःल्ले़ कुइक्लान् यम्बा मे़जोगुन्नाङ्बि? 2 लाम्गोओबा केःम्ब केःम्बा ते़न्हाॽओ, लाम्दोओ खे़न् ये़म्सिङ्सिङ्लो, 3 ये़क्यक् ले़प्माङ् पेःक्मा यम्बा लाम्धेःत्तिल्ले़ कुयाओ, लाःप्मा लाम्धेःत्तो, खे़न् यम्बा इक्लाओ अक्खेलॽरिक् अःक्लो 4 “मे़न्छाम् याप्मिसे, आङ्गाॽ खिनिॽ मे़त्निङ्लो, आङ्गाॽ के़रे़क् मे़न्छाम् याप्मिहाॽ मे़त्तुङ्सिङ्लो॥ 5 कुनिङ्वाॽ के़बाःक्पासे, खासिङ्निःत्त़ेम्म़ेॽओ॥ सिक्कुम्दिङ् निङ्वाॽ खोसे़म्मे़ॽओ, अदङ्से, ने़हिनिङ्वाॽ हुॽआसिम्मे़ॽओ॥ 6 खे़प्से़म्मे़ॽ, खिनिॽ मे़प्मा के़बोङ्बा मिङ्सोथाःङ्सो पाःन्हाॽ आङ्गाॽ कत्तुङ्लो, के़वाॽबा पान् पाःत्छे़ आङ्गाॽ आम्ब्रा हन्दुङ्लो॥ 7 आङ्गाॽ आम्ब्राःल्ले़ से़क्खाबा पान् पाःत्तुरो, थेआङ्भे़ल्ले़ आङ्गाॽ आम्ब्रासेॽइल्ले़ फे़न्याःम्बक्किन् कुसिक्ले़ःङ्लो॥ 8 आम्ब्राओबा के़रे़क् पाःन्हाॽ कुदोःप्मा चोक्लो, खे़ङ्हाॽओबा आत्तिन्नाङ् पे़र्गे़क् वर्गे़क्पा मे़जोक्ने़ल्लो॥ 9 सिङ्सिङ् ये़क्ये़क्पा मनाःल्ले़ कुलागि खे़ङ्हाॽ के़रे़क् के़वाॽबाए चोक्लो, कुने़हि कुनिङ्वाॽ के़वाॽबा मनाःल्ले़ कुलागि खे़ङ्हाॽ कुदोःप्मा चोक्लो॥ 10 युप्पाःल्ले़ कुले़क्वा आङ्गाॽ आघाहुन्निन्, इसेःङ्बा साम्म्याङ्ङिल्नुःल्ले़ग परुमाल्ले़ खे़ने़ॽ सिक्कुम्दिङ् निङ्वान्ने सेगे़ॽओ, 11 थेआङ्भे़ल्ले़ सिक्कुम्दिङ् निङ्वान् मुधिङ् ले़ङ्नुःल्ले़आङ् इमे़ल्लुङ्बा चोक्लो, हे़क्क्याङ् खे़ने़ॽ खोमा निङ्वाॽ के़जोगुबा आत्तिन् पाःन्निन्नाङ् खे़न्नु तङ्मा सुक्मे़दे़त्ने़न्लो॥ 12 “आङ्गाॽ सिक्कुम्दिङ् निङ्वाॽआरो, आङ्गाॽ सिङ्सिङ् ये़क्ये़क्काङ् युङ्ङा वाॽआरो, आङ्गाॽ ने़हिनिङ्वाॽ नु खासिङ्निःप्मान् कत्तुङ्लो॥ 13 यहवे दाङ्बे़न्नु किमाग ताप्फे़ःम्बा पाःन्निन् चिःप्मारो, आङ्दिङ् लॽमा, यम्बा हे़न्छिङ्मा, ताप्फे़ःम्बा सुत्ना नु मना हुमा पङ्मा पाःन्हाॽ आङ्गाॽ चिःत्तुङ्लो॥ 14 सुजापान् नु निःन्धो पाःन्हाॽ आङ्गाॽ लाम्मे पोङ्लो खे़ब्याङ् खे़न् हे़क्केए याःम्बक् चोगुङ्लो, आङ्गाॽ खासिङ्निःप्मा नु मुक्साम् कत्तुङ्लो॥ 15 आङ्गाॽ लाम्बाए हाङ्हाॽरे़ हाङ्युक् मे़जोगुरो, हे़क्क्याङ् युक्साबाहाॽरे़ के़वाॽबा कुभाङ् मे़जोगुरो, 16 आङ्गाॽ लाम्बाए हाङ्युक्पाहाॽरे़ हाङ्युक् मे़जोगुरो, हे़क्क्याङ् के़रे़क् थोधोक्पा सुहाङ्युक्पाहाॽरे़ इक्सादिङ् खाम्बेःक्मो के़रे़क् युक् मे़जोगुरो॥ 17 आङ्गाॽ मिःम् के़मे़प्पाहाॽ मिःम् मे़त्तुङ्सिङ्लो, आङ्गाॽ के़गोःप्पाहाॽरे़ आङ्गाॽ मे़घोआरो॥ 18 आङ्गाॽनु के़वाॽबा मिमिदिङ्, मिङ्सो इङ्धाङ्, आभे़ल्ले़साङ् के़वाॽबा याङ्साकुन्धे नु नुॽमादामान् के़गत्तुरो॥ 19 आङ्गाॽलाम् के़धोःक्पा सिङ्सेॽइन् साम्म्याङ् इस्सेःङ्बान्नुःल्ले़ नुबा चोक्लो, आङ्गाॽ आत्तिन् पाःन्निन् लःत्तुङ्ॽ, खे़ल्ले़ युप्पा इसेःङ्बान् नाःन्दुरो॥ 20 आङ्गाॽ साम्योबा लाम्मो नु कुदोःप्मा खासे़न्बा माराम्मो लाङ्घेःक्कारो॥ 21 आङ्गाॽ याप्मि मिःम् के़मे़प्पाहाॽ आङ्गाॽ याङ्साकुन्धेःल्ले़ थिम्सुङ्सिङ्लो, हे़क्क्याङ् आङ्गाॽ खे़ङ्हाॽरे़ खुन्छिॽ चायाङ्मा थाःङ्हाॽ थिम्सुङ् पिरुङ्सिङ्लो॥ 22 “यहवे दाङ्बे़ल्ले़ नावागे़न् चइःत्तिल्ले़ कुहेःक्सिङ्मोए आङ्गाॽ चोगाङ्लो, खुने़ॽ कुहेःक्सिङ्मोबा के़रे़क् याःम्बक्हाॽनुःल्ले़आङ् तगिए चोगाङ्लो॥ 23 नुप्मे़न्दिङ्ङाङ्धोए युक्तिङ् चोगाङ्ङाङ् वये़रो, के़रे़क्नुःल्ले़ तगि, योॽबान् कुहेःक्सिङ्मा पोःक्खे़बानुःल्ले़ तगिए चोगाङ्बारो॥ 24 पयम् यम्बा तुङ्गोदिङ् वरःङ्हाॽ मे़म्बोङ्ङे आङ्गाॽ सावाःन्छिङ्ङाआङ् वयाङ्लो, च्वाःत्तिल्ले़ के़दिम्बा यहःङ् वहःङ्हाॽ लःम्मानुःल्ले़ तगिए आङ्गाॽ वयाङ्लो॥ 25 कोःक्मा फाङ्जङ्हाॽ आप्फेक् युक्नादे़न्नो युङ्सिङ्मानुःल्ले़ तगिए, थे़गु माङ्वाहाॽनुःल्ले़ तगिए, आङ्गाॽ सावाःन्छिङ्ङाआङ् वयाङ्लो॥ 26 खुने़ॽ इक्सादिङ् खाम्बेःक्मान् इग्र कल्ले़ कुयुक्ना खाम्बाङ्ङिन् इग्र योॽबाओ खाम्भुत्छ्रुम्बा कुजिॽ चोःक्मानुःल्ले़ तगि आङ्गाॽ नावागे़न् चइःत् पोःक्खाङ्लो॥ 27 खुने़ॽ ताङ्साङ्बे़न् कुबप्मादे़न्नो फत्छुल्ले़, तुङ्गोदिङ् वरःङ्ङिन् नियारानिधाःप्पिल्ले़ कबुल्ले़, आङ्गाॽ खे़प्मो वयाङ्लो॥ 28 खुने़ॽ ताङ्साक्पो खाॽमिःप्पान् फत्छुल्ले़, हे़क्क्याङ् तुङ्गोदिङ् वरःङ्ङिल्ले़ कुबुन्हाॽ कुबुम्मादे़न्नो थधप् मे़ल्लॽए लःत्तुल्ले़, 29 खुने़ॽ वरःङ्ङिल्ले़ कुइःन्दोहाॽ ने़स्सुल्ले़— खुने़ॽ कुइङ्जाङ्ङिन् काःक्तुआङ् च्वाःत्तिन् लाःक्कात् मे़ल्लःम्मा मे़म्बेःक्मारे़ लागि नु— खुने़ॽ इक्सादिङ् खाम्बेःक्माल्ले़ कुबुङ्हाॽ युक्खुल्ले़, 30 आङ्गाॽ काब्रोबा हे़क्के खुने़ॽ कुबेसाङ् वयाङ्लो, आङ्गाॽ थिक्याःन्धक् आनिङ्वाॽ त्ये़आङ् वयाङ्लो, खुने़ॽ कुबेःक्साङ् आङ्गाॽ पसःत्सःत्ताङ्लो॥ 31 खुने़ॽ नावागे़न् चइःत् ने़स्सुबा इक्सादिङ् खाम्बेःक्मो मे़न्छाम् याप्मिहाॽरे़ मे़जोगुल्ले़ आसिक् समे़आङ् वयाङ्लो॥ 32 “आल्ल आस्सासे, आबाःन्निन् खे़प्से़म्मे़ॽओ, आङ्गाॽ आलाम्हाॽ आत्तिन्हाॽरे़ मे़नाःत्तु मे़दिम्दु खे़ङ्हाॽ मुॽइसाबासिरो॥ 33 आङ्गाॽ आघाहुन्निन् खे़प्से़म्मे़ॽओ, हे़क्क्याङ् सिक्कुम्निबा पोःक्खे़म्मे़ॽओ, खे़न् हिनाःम् मे़मे़त्ते़म्मिन्ने़ॽओ॥ 34 आत्तिल्ले़ आङ्गाॽ आबाःन्निन् खे़प्सुॽ, आत्तिन् थिक्याःन्धक् आलाम्धेःप्पो ताआङ् इगेःक्काङ् ओमे़त्तार, आलाम्धेःप्पो हाङ्ङा मुॽइसाबा मनाःङ्ग हाबा खे़न्नेरो॥ 35 थेआङ्भे़ल्ले़ आत्तिल्ले़ आङ्गाॽ खोआ, खे़ल्ले़ हिङ्मन् खोसुरो, हे़क्क्याङ् यहवे दाङ्बे़न् खे़न्नु कुनिङ्वाॽ तारो॥ 36 कर आत्तिल्ले़ आङ्गाॽ खोमा मे़घोआन्, खे़न् आबाङे हान्ति चोःक्सिङ्लो, आङ्गाॽ के़जिःप्पा काक्ले़ सिमे़न् खुन्छिॽ सिराॽथाङ्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.