खाहुन् 21 - लिम्बु1 हाङ्ङिल्ले़ कुसिक्कुम्मिन् यहवे दाङ्बे़ल्ले़ कुहुक्को वाॽरो, वहःङ्ङोबा च्वाःत्ते़न् कुइसिक् आत्ति हिमादेमा निङ्वाॽ चोगुॽ, खुने़ॽ खे़त्नाए हिसुदेसुरो॥ 2 मनाःल्ले़ के़रे़क् कुलाम्हाॽ कुदोःप्मा चोक् फाॽआङ् इःत्तुबिला, कर सिक्लुङ्माॽ के़साॽबाग यहवे दाङ्बे़न्ने वाॽरो॥ 3 आत्तिन् पाःन्निन् नुबा चोक् हे़क्क्याङ् के़वाॽबा खासे़न् चोक्, हाबा खे़न्ने सिदुङ्जभानुःल्ले़आङ् यरिक् यहवे दाङ्बे़ल्ले़ कुसिराॽथाङ्लो॥ 4 के़हे़न्छिङ्बा मिक् नु आङ्दिङ् के़लॽबा सिक्लुङ्मान्, कुॽइगे़भे़म्बे़ल्ले़ कुसेमिरो, खे़ङ्ग लायोरो! 5 स्याङ्मे़न्दाङ् याःम्बक् के़जोःक्पे़ल्ले़ कुनिङ्सेःक्हाॽरे़ थोबो पोमा पान् ले़प्माङ् खे़न् लाम्लोसुरो, हे़क्केलॽरिक्के हारावरा के़जोक्पे़न् याङ्गे़साॽबा पोङ्लो॥ 6 इङ्ले़क्के ले़सोःत्ते़ल्ले़ आप्फेक् तॽयाःन्निन् तोःम्माग के़बे़बा के़बेःक्पा हाःङ्गुबा नु आसे़त्से़प्पा इजोरो॥ 7 ताक्के़भे़ॽबे़ल्ले़ कुघर्मे़न्दक् चोःक्मे़ल्ले़ए खे़ङ्हाॽ उःक्खुदेॽरुसिरो, थेआङ्भे़ल्ले़ कुदोःप्मा पाःन्निन् चोःक्मा खे़ङ्हाॽ मे़न्दे़न्ने़न्लो॥ 8 आप्तिक्साबे़न् किक्वे़ःङ्गे़ःङ्बा लाम्मो लाङ्घेःक्लो, कर कुदोःप्मा मनान् कुदोःप्मा लाम्मो लाङ्घेःक्लो॥ 9 खे़माॽ के़जोःक्मा मेःत्ते़न्नु लत्छा हिम्मो युङ्मानुःल्ले़ग कौसिःल्ले़ लत्छा कुसुक्पो एःक् युङ्मा नुबारो॥ 10 ताक्के़भे़ॽबा मनाःल्ले़ ताप्फे़ःम्बा पाःन्नो मिक्केःत्तुरो, खे़ल्ले़ कुहिम्बेसाङ्बे़ल्ले़ खुने़ॽलाम् लुङ्माॽ तुक्मा मे़घोसुन्लो॥ 11 कुनामे़न्छाॽ याप्मि आमे़प्मे़प्पे़न् खुम्दिङ् पिमे़ल्ले़, खे़ब्याङ् खादाःक्पा मनाःल्ले़ सिक्कुम् निङ्वाॽ खोसुरो, सिक्कुम्साबे़न् निसाम् पिमे़ल्ले़, खे़ल्ले़ ने़हिनिङ्वाॽ खोसुरो॥ 12 साम्योबा निङ्वाॽफुमाङ्ङिन् ताक्के़भे़बे़ल्ले़ कुहिम्सयङ्ङिन् निङ्वाॽ इगेःक् इःत्तुरो, हे़क्क्याङ् खुने़ॽ ताक्के़भे़ॽबे़बाहाॽओ मे़क्मासिमान् तारुरो॥ 13 याङ्गे़साॽबे़ल्ले़ कुबेलिन् मनाःल्ले़ खे़म्घे़म् मे़लाप्तुन्ने़भग्र, खुने़ॽआङ् पेलि फाक्किल्ले़ कुबेःल्लिःल्ले़ नुगप् मे़घोसुन्लो॥ 14 स्वाःत्ताङ् पिमनाबा मिक्तोःक्किल्ले़ याःक्ले़ॽमे़न् चिःक्तुरो, हे़क्क्याङ् पःत्थाङ्ङो सुङ्मनाआङ् पिमनाबा सुरुत् याङ्ङिल्ले़ साक्के़न्निल्ले़ मि के़बोङ्बा सिक्पोःक्मे़न् नःम्नःम्बा चोगुरो॥ 15 कुदोःप्मा खासे़न् पोङ्ङिल्ले़ साम्योबा मनाहाॽ मे़सःत्लो, कर ताक्के़भे़ॽबा मनाहाॽग खुन्छिॽ यङ्मा के़त्लो॥ 16 खासिङ्निःप्मालाम् माःङ्घा के़बोङ्बा मनान् के़सिबाहाॽरे़ खुन्छिॽ तङ्जुम्मो नाःम्सिङ्से़ के़त्लो॥ 17 सुक्खेवाओ वाॽमा कुसिराॽ के़धाङ्बे़न् याङ्गे़साॽबा पोङ्लो, चे़ल्ले़क्से थि नु, जैतुन निःङ्गेॽ कुसिराॽ के़धाङ्बे़न् आभे़ल्ले़आङ् याङ्साकुन्धेसाबा मे़बोङ्ने़न्लो॥ 18 साम्योबान् के़धे़ॽबा कुॽइगे़भे़म्बे़न् पोङ्लो, हे़क्क्याङ् निङ्वाॽइरे़ मे़घोप्तुम्बान् कुदोःप्माहाॽरे़ लागि थे़ॽमा चिगक्वा मे़बोङ्लो॥ 19 हाजे़क्चे़क्मा नु कुसिक् के़बोःक्मा मेःत्ते़न्नु युङ्मानुःल्ले़ मुरे़क् खारे़क् थेआङ् के़होप्पा ये़ःङ्घादे़न्नो वाॽमा नुबारो॥ 20 सिक्कुम्निबे़ल्ले़ कुहिम्मिन् नुबा कुजा नु निःङ्गेल्ले़ तिम्लो, कर अदङ् मनाःल्ले़ खुने़ॽ कत्तुबा के़रे़क् थ्यःङ् माःन्दुरो॥ 21 साम्योनिमा हे़क्क्याङ् थधप् मे़न्लॽमनाबा मिःम्जिन् के़इःप्पा के़नाःप्पे़ल्ले़, हिङ्मन्, नुॽमादामा नु मिङ्सो इङ्धाङ् खोसुरो॥ 22 सिक्कुम्निबा मनाःल्ले़ के़धुम्बे़ल्ले़ कुये़क्यक्किन् फत्तुरो, हे़क्क्याङ् खे़ङ्हाॽरे़ मे़हे़न्दुबा के़धुम्बा यक्किन् लुःन्दुदेसुरो॥ 23 आप्फेक् मुरा नु ले़सोःप्पा कम्ब्राङ् के़मे़प्पा मनान् खुने़ॽ के़साक्पा तुक्खेलाक्खेओ ताङ्से़ःप्सिङ्लो॥ 24 आङ्दिङ् के़लॽबा नु यम्बा के़हे़न्छिङ्बा मनाःल्ले़ खुने़ॽ कुमिङ् “कुनामे़न्छाॽ याप्मि आमे़प्मे़प्पारो” खे़ल्ले़ आङ्गाॽ एःक् के़लॽबा सुत्ना ओसेःन्धाङ् चोगुरो॥ 25 ले़म्सुवाबे़ल्ले़ खोमा निङ्वाॽ चोगुबा पाःन्निल्ले़ए खुने़ॽ स्ये़रुरो, थेआङ्भे़ल्ले़ खुने़ॽ कुहुक्हाॽ याःम्बक् चोःक्मा मे़दे़न्ने़न्लो॥ 26 ले़न्दिक् नाम्धाधाए खे़ल्ले़ छे़न्ना यरिक् खोमा निङ्वाॽ चोगुरो, कर साम्योबाल्ले़ग हुक्पक् यम्बा चोगुआङ् आबिरो॥ 27 ताक्के़भे़ॽबे़ल्ले़ तोःन्दुबा सिदुङ्जभान् याम्गे़सिङ्बा चोक्लो, ताप्फे़ःम्बा निङ्वाःल्ले़ तोःम्मनाबे़न् आक्खे़न् साॽरिक् सिक्ले़ःङ्ङिरो! 28 मे़न्वाॽमनाबा इङ्ले़क्पा तोःन्दि के़बाःप्पे़न् मे़क्लो, कर नुरिक् के़घे़म्बे़ल्ले़ कुलिङ्दो के़त्ल निसुबे़न् पाःत्तुरो॥ 29 कुॽइगे़भे़म्बा मनान् हाङ्हाङ् के़लॽबा कुइसिक् लाङ्घेःक्लो, कर कुदोःप्माआङ् के़वाॽबा मनाःल्ले़ कुये़प्ले़क्हाॽ इःत्तुरो॥ 30 यहवे दाङ्बे़ल्ले़ कुदक्ले़ङ्वाओ कुलिङ्दो के़प्मा के़सुक्पा अक्तङ्बा सिक्कुम् निङ्वाॽ, इःत्छिङ्साम् इग्र निङ्सेक् होप्लो॥ 31 थङ् थक्मा ये़न्निल्ले़ लागि अन्हाॽ यारिप् चोःक्मासि पोङ्लो, कर थङ् नाःम्माग यहवे दाङ्बे़ल्ले़ए कुहुक्को वाॽरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.