खाहुन् 2 - लिम्बुसिक्कुम्दिङ् निङ्वाॽलाम् खोगे़दे़प्पा थुम्घोहाॽ 1 आस्साए, आङ्गाॽ हुॽने़बा आबाःन्हाॽ खे़म्मा के़दे़न्ने़भग्र हे़क्क्याङ् आइङ्जाङ्हाॽ के़निङ्वाॽओ के़युक्खुने़भग्र, 2 सिक्कुम्दिङ् निङ्वाॽबा पाःन्हाॽ नुरिक्काङ् के़घे़प्सुने़भग्र हे़क्क्याङ् के़सिक्लुङ्मे़न् खासिङ्निःप्मा ले़प्माङ् के़हिसुने़भग्र, 3 इःत्छिङ्साम्ले़ लागि पेलिगे़न् तुवा के़जोगुने़भग्र खासिङ्निःप्मारे़ लागि यम्बा इक्लाओ पेलि के़भाक्काने़भग्र, 4 हे़क्क्याङ् खे़ने़ॽ युप्पा हे़क्के खे़न् के़गोत्तुने़भग्र खम्भ्याङ् चिङ्मनाबा याङ्भु कुइसिक् खे़न् के़दयुने़भग्र, 5 खे़ने़ॽ यहवे दाङ्बे़न् किप्मा पाःन्निन् कुसिङ् के़निःत्तुरो, हे़क्क्याङ् निङ्वाॽफुमाङ्ङिल्ले़ कुऩेहि कुनिङ्वान् के़घोसुरो॥ 6 थेआङ्भे़ल्ले़ यहवे दाङ्बे़ल्ले़ सिक्कुम् निङ्वाॽ आबिरो, खुने़ॽ कुम्ब्राओलाम् ने़हिनिङ्वाॽ नु खासिङ्निःप्मा पाःन्हाॽ लःन्लो॥ 7 आप्तिक् मेःन्नेबा याःम्बक् के़जोःक्पा मनाहाॽरे़ लागि थङ् के़नाःम्बा चोःक्मासि पाःन्निन् कुधाःङ्ङो चिक्खुआङ् युङ्लो, आत्तिन्हाॽरे़ खुन्छिॽ ये़प्ले़क्किन् कुदोःप्मा चोक् खे़ङ्हाॽरे़ खुन्छिॽ लागि खुने़ॽग आधेःक्थेःक्पा खोरो, 8 थेआङ्भे़ल्ले़ खुने़ॽ कुदोःप्मा खासे़न् लाम्मिन् से़ःप्तुरो, हे़क्क्याङ् नसाःन्नाङ् कुमाङ्सेवा के़जोःक्पाहाॽरे़ खुन्छिॽ लाम्मिन् खुने़ॽ कम्ब्राङ् मे़त्तुरो॥ 9 खे़ब्याङ् साम्योनिमा खासे़न्निन् नु के़वाॽबा पाःन्निन् थे़माबे— खे़न्नु सोरिक् के़रे़क् नुबा लाम्मिन् थेबे फाॽआङ् कुसिङ् के़निःत्तुरो॥ 10 थेआङ्भे़ल्ले़ सिक्कुम्दिङ् निङ्वान् खे़ने़ॽ के़सिक्लुङ्मो लाःत्लो, हे़क्क्याङ् ने़हिनिङ्वान् के़याम्साम्मिल्ले़ लागि ये़ये़बा पोङ्लो॥ 11 इःत्छिङ् साम्मिल्ले़ खे़ने़ॽ ताप्थेक् याम्धेक् के़गत्लो, खासिङ्निःप्मे़ल्ले़ खे़ने़ॽ ताङ्गे़से़ःप् के़गत्लो॥ 12 सिक्कुम्दिङ् निङ्वाःल्ले़ खे़ने़ॽ कुॽइभे़म्मा ये़प्ले़क्लाम्, हे़क्क्याङ् इङ्ले़क् पान् के़बाःप्पा मनाहाॽलाम् के़दाङ्लो॥ 13 हे़क्तङ्बा मनाहाॽरे़ कुदोःप्मा लाम्हाॽ मे़ले़रु मे़देसुरो हे़क्क्याङ् माक्सिःङ्ग्याःप्पा खामाक्मो लाङ्मे़घेःक्लो, 14 खे़ङ्हाॽ ताप्फे़ःम्बा याःम्बक् चोःक्माओ मे़सःत्लो खम्भ्याङ् कुॽइभे़म्मा खार्मे़न्दक् याःम्बक्को निङ्वाॽ तारो, 15 खे़ङ्हाॽरे़ मे़नाःत्तुबा लाम्मिन् पे़र्गे़क्के़क्पा चोक्लो, हे़क्क्याङ् खुन्छिॽ ये़प्ले़क्हाॽ कुदोःप्मा मे़जोक्ने़न्लो॥ 16 के़त्निमा नु ये़प्ले़क् क़ेभ़ेॽमा मे़न्छुमाःल्ले़ कुले़म्मा कुसुःम्मा पाःन्हाॽलाम् सिक्कुम्दिङ् निङ्वाःल्ले़ के़दाङ्लो, 17 खे़न् मे़न्छुमाःल्ले़ कुवे़म्मोबा कुये़म्बाःन् लाप्फुसुआङ् वाॽरो, हे़क्क्याङ् निङ्वाॽफुमाङ्ङिल्ले़ कुदगि खुने़ॽ हुप्तुबा माङ्हुप्पिन् खुने़ॽ निनि खे़प्घे़म् मे़ल्लाप्पे वाॽजारो॥ 18 खुने़ॽ कुहिम्मो के़लाःप्पे़न् सिमे़ल्ले़ सङ्माङ् तेॽरुरो, हे़क्क्याङ् खुने़ॽ कुलाम् के़नाःप्पाहाॽ खे़मा यङ्सङ्ङो मे़गे़त्लो॥ 19 खे़न् मे़न्छुमाओ के़बेःक्पाहाॽ आत्तिन्नाङ् मे़नुःङ्ने़न् मे़दाने़न्लो, हे़क्तङ्बाहाॽरे़ हिङ्मा लाम्मिन्नाङ् याम्मो खोमा मे़न्छुक्तुन्लो॥ 20 कल्ले़चोगुल्ले़ नुबा मनाहाॽरे़ खुन्छिॽ चोःङ् इःत्ते़ॽओ, हे़क्क्याङ् साम्योबा मनाःल्ले़ कुये़प्ले़क्को मे़म्मुन्ने वये़ॽओ॥ 21 थेआङ्भे़ल्ले़ साम्योबाहाॽ लाजेॽओ मे़युङ्लो, खे़ब्याङ् कुदोःप्मा मनाहाॽ खे़प्मो मे़वाॽरो॥ 22 कर ताक्के़भे़ॽबाहाॽ लाजेॽलाम् हाॽयाक् मे़आःक्खुसिरो, हे़क्क्याङ् निङ्वाॽइरे़ मे़घोप्तुम्बाहाॽ याःन्सुङ् हे़क्के लाप्मे़भुसुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.