खाहुन् 11 - लिम्बु1 मे़ङ्गे़प्मनाबा कुधाङ्मे़न् यहवे दाङ्बाल्ले़ कुसिक्के़ले़ःङ्लो, कर के़गे़प्पा कुसिःक्मे़न् खुने़ॽ कुसिराॽ थाङ्लो॥ 2 आङ्दिङ् लॽमा ताःल्ले़ कुनामे़न्छाॽ पोङ्माआङ् तारो, कर चुङ्जिगे़न् नःम्नःम् लॽमे़ल्ले़ सिक्कुम्दिङ् निङ्वाॽ तारुरो॥ 3 आप्तिक् मेःन्नेबा याःम्बक् चोःक्मे़न्ने कुदोःप्माहाॽरे़ खुन्छिॽ लागि लाम् ओसेःन्धाङ् के़जोःक्पा लाम्लो, कर निङ्वाॽइरे़ मे़घोप्तुम्बाहाॽ खुन्छिॽए इङ्ले़क्किल्ले़ मे़मे़क्लो॥ 4 निङ्वाॽफुमाङ्ङिल्ले़ कुसिक् पोःक्मा ये़न्नो याङ्साकुन्धेहाॽरे़ थेआङ् कुमे़ल्लुङ् होप्लो, कर साम्योनिमा याःम्बक्किल्ले़ सिमालाम् आसे़ःप्लो॥ 5 आप्तिक् मे़ःन्नेबाहाॽरे़ खुन्छिॽ साम्योबा याःम्बक्किल्ले़ खे़ङ्हाॽरे़ खुन्छिॽ लाम्मिन् कुदोःप्मा चोगु पिरुसिरो, कर ताक्के़भे़ॽबाहाॽरे़ खुन्छिॽ फे़न्याःम्बक्किल्ले़ चोगुल्ले़ खे़ङ्हाॽ योयोक् थासुसिरो॥ 6 कुदोःप्माहाॽरे़ खुन्छिॽ साम्योबा याःम्बक्किल्ले़ खे़ङ्हाॽ ताङ्से़ःप्तुसिरो कर निङ्वाॽइऱे म़ेघोःप्तुन्सिन्बाहाॽ चाङ्गो थुङुङ्गो के़लॽबा निङ्वाॽल्ले़ चोगुल्ले़ इजोओ मे़धारो॥ 7 ताक्के़भे़ॽबा मनान् सिःल्ले़ खे़ल्ले़ खोमा निङ्वाॽ चोगुबा पाःन्निनाङ् खे़न्नुए मे़क्लो॥ खुने़ॽ कुमुक्साम्मो खे़ल्ले़ खोमा निङ्वाॽ चोगुबा के़रे़क् पाःन्हाॽ हने़ थेनाधेबा पोङ्लो॥ 8 साम्योबा मनान् फे़न्याःम्बक् चोःक्मालाम् ताङ्से़ःप्लो, हे़क्क्याङ् खे़ल्ले़ कुले़क्वा कुॽइगे़भे़म्बाल्ले़ कुसम्धाङ्ङे खे़न् इदारो॥ 9 निङ्वाॽफुमाङ् नसान् मे़न्जोःक्मनाबे़ल्ले़ आप्फेक् कुम्ब्राःल्ले़ खुने़ॽ कुहिम्बेसाङ्बे़न् फे़त्लाःन्दुरो, कर ने़हिनिङ्वाःल्ले़ साम्योनिबे़न् से़ःप्सिङ्मा खोरो॥ 10 साम्योनिबे़ल्ले़ नुॽदाःल्ले़ ये़क्यक्किन्ने सःत्लो, कुॽइगे़भे़म्बान् मे़क्किल्ले़ सोसोत्लराङ् पोङ्लो॥ 11 साम्योनिबे़ल्ले़ कुहाङ्वा कुमुॽइःल्ले़ ये़क्यक्के़न् थोबो पोङ्लो, कर ताक्के़भे़बे़ल्ले़ कुम्ब्राःल्ले़ खे़न् फुत्छिङ्ज्याङ् पोङ्लो॥ 12 कुऩेहि के़होप्पा मनाःल्ले़ कुहिम्बेसाङ्बे़न् चे़क्खुरो, कर के़इत्छिङ्बा मनाःल्ले़ कुल्सोःप्पान् मे़लाःक्खुन्लो॥ 13 चाएङ् के़बङ्बे़ल्ले़ सिबिॽबा पाःन्हाॽओ इङ्आले़क्लो, कर नसाःन्साबा मनाःल्ले़ पाःन्हाॽ स्वाःत् कत्तु मे़बाःत्तुन्लो॥ 14 सिक्कुम् निङ्वाॽ के़गप्पा लाम्लोबा होःप्मारे़ लाजेन् साङ्गे़ङ्लो, कर यरिक् सुजादाङ्बाहाॽरे़ मे़जोगुल्ले़ से़क्खाए थङ्गे़नाःम्बा आबोङ्लो॥ 15 एयाङ्बा मनाःल्ले़ कुसिङ्नात्तो तोःन्दि के़युङ्सिङ्बा मनाःल्ले़ से़क्खाए खुने़ॽ कुहान्ति पोङ्लो, कर वेॽइल्ले़ कुबाःन्नो हुक्केःप्मा मे़न्दे़म्मनाबा याप्मिन् ताङ्लो॥ 16 मना लुङ्माॽ के़दुक्मा मे़न्छुमाःल्ले़ मिङ्सो इङ्धाङ् खोसुरो, कर कुलुङ्माॽ स्याःत् मे़ल्लॽमनाबा मनाहाॽरे़ याङ्साकुन्धेरक् मे़धगुरो॥ 17 मना लुङ्माॽ के़दुक्पा याप्मिःल्ले़ खुने़ॽ कुलागि नुबा पोङ्लो, कुलुङ्माॽ स्याःत् मे़ल्लॽमनाबे़ल्ले़ कुसम्धाङ् आप्फेक् मे़क्मा तारुरो॥ 18 ताक्के़भे़ॽबा मनाःल्ले़ कुइङ्ले़क्किल्ले़ कुले़क्वा खोसुरो, कर कुदोःप्मा याःम्बक् के़जोःक्पे़ल्ले़ से़क्खाबा थुम्घो खोसुरो॥ 19 कुजे़क्पा साम्योबा मनाःल्ले़ हिङ्मन् खोसुरो, कर ताप्फे़ःम्बा ले़प्माङ् के़लाःप्पा मनान् सिमाओ थारो॥ 20 फे़न्निङ्वाॽ के़गप्पा मनाहाॽ यहवे दाङ्बे़ल्ले़ कुसिक्मे़ले़ःङ्लो, कर आप्तिक् मेःन्नेबा ये़प्ले़क् के़गप्पाहाॽनु खुने़ॽ कुनिङ्वाॽ तारो॥ 21 कन् पाःन्निन् से़क्खाएरो—कुॽइगे़भे़म्बा मनाहाॽ खुम्दिङ् मे़ङ्घोए खे़त्छिङ्मा मे़ङ्घोने़न्लो, कर साम्योबाहाॽरे़ से़ःप्सिङ्मा मे़घोसुरो॥ 22 फाक्किल्ले़ कुन्भुःप्मो साम्म्याङ् मुन्द्रिःन् थेनाधेरो खासिङ्निःप्मा निङ्वाॽ मे़ङ्गप्नामा मे़न्छुमान्नाङ् हे़क्तङ्माएरो॥ 23 साम्योनिबे़ल्ले़ निङ्वाॽ चोगुबान् कुनुप्मो नुबारक् पोङ्लो, कर ताक्के़भे़ॽबा मनाःल्ले़ निङ्वाॽ चोगुबा पाःन्निन्ले़ कुनुप्मे़न् सिक्पोःक्मारक् पोङ्लो॥ 24 कुभा मनाहाॽरे़ निङ्वाॽ मे़हन्दुआङ् याङ् आम्बिरो हे़क्क्याङ् खे़ङ्हाॽरे़ आरसाङ् यरिक् मे़घोसुरो, वेॽहाॽरे़ पिमा आम्सुक्पान्नाङ् याप्मि आमे़म्बिने़न्लो, हे़क्क्याङ् खे़ङ्हाॽ याङ्गे़साॽबा मे़बोङ्लो॥ 25 कुनिङ्वाॽ यम्बा मनान् के़नुॽबा के़दाबा पोङ्लो, वेॽहाॽ च्वाःत् के़बिबा मनान् खुने़ॽआङ् च्वाःत् मे़बिरुरो॥ 26 कुजा के़जिङ्बाआङ् चाधाःङ् के़धिम्बे़न् मनाहाॽरे़ साङ्ग्रा मे़मे़त्तुॽ माङ्मे़देसुरो, कर कुनिङ्वाॽ के़हम्बाआङ् कुजा के़सङ्बा मनान् मनाहाॽरे़ हाङ्वागे़न् मुॽइसाम्मिल्ले़ मे़बिरुरो॥ 27 आत्तिल्ले़ नुबा पाःन्निन् कोःत्तुॽ, खे़ल्ले़ नुरिक् मे़प्मा पाःन्निन् खोसुरो, कर आत्तिल्ले़ ताप्फे़ःम्बा पाःन्निन् हक्सुॽ खे़ल्ले़ कुसम्धाङ् ताप्फे़ःम्बा पाःन्निन्ने इदारो॥ 28 आत्तिल्ले़ आबाङे कुयाङ्साकुन्धेओ निङ्वाॽ युक्खुॽ, खे़ङ्ग चुङ्वाःम्मा ये़म्मो मुक्के़धाबा सिङ्भे़क्वा हे़क्तङ्बारो, कर साम्योबाङ्ग सरेःक्याःप्पा सिङ्भे़क्वा हे़क्के चिनॽनॽ लॽरिक् कुजःक् लःन्धाङ्लो॥ 29 आप्फेक् कुहिम्सयङ्ङो तुक्खे लाक्खे के़दाःप्पा मनाःल्ले़ कुनुप्मो थेआङ् मे़घोसुन्लो, अदङ् मनान् सिक्कुम्साबे़ल्ले़ कुसे़वारोबा पोङ्लो॥ 30 साम्योनिमाल्ले़ कुजाॽइङ्ग हिङ्मन्ले़ सिङ्बुङ्लो, हे़क्क्याङ् आत्तिल्ले़ मनाहाॽ से़ःप्सिङ्मो तारुसिॽ, खे़ङ्ग सिक्कुम्दिङ् निङ्वाॽसाबारो॥ 31 साम्योबा मनाहाॽरे़ इक्सादिङ् खाम्बेःक्मो खुन्छिॽ मे़जोगुबाल्ले़ कुले़क्वा मे़घोसुने़भग्र, कुॽइगे़भे़म्बाहाॽ नु लायोबाहाॽरे़ग आल्लसाङ् आक्ख्यारिक् यरिक् मे़घोसुबिलारो! |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.