खाहुन् 1 - लिम्बुखाहुन्हाॽरे़ कुदारप् 1 दाउद हाङ्ङिल्ले़ कुस्सा, इस्राइलबा हाङ् सोलोमनरे़ कुघाहुन्हाॽ 2 कन्हाॽलाम्बा मनाहाॽरे़ सिक्कुम्दिङ् निङ्वाॽ नु हे़न्थिम् मे़घोसुरो कुबे हम्मा के़बोङ्बा पाःन्हाॽ कुसिङ् मे़निःत्तुरो॥ 3 खाहुन्हाॽरे़ हिङ्मन्नो आभेलॽरिक् सिक्कुम्दिङ् निङ्वाॽनु वाॽमा, से़क्खाबा, निस्सेबा, के़वाॽबा खासे़न् के़लोःम्बा नु कुदोःप्मा पोङ्मा आहुॽरो॥ 4 कन्हाॽलाम्बा कुनिङ्वाॽ के़बाःक्पाहाॽ खासिङ् के़निःप्पा मे़बोङ्लो, थाङ्बे़न्हाॽरे़ ने़हिनिङ्वाॽ नु इःत्छिङ्साम् निङ्वाॽ मे़घोसुरो॥ 5 सिक्कुम्साबाहाॽरे़ मे़घे़प्सुररो हे़क्क्याङ् खुन्छिॽ ने़हिनिङ्वाॽ पोररो, इःत्छिङ्साम् के़गप्पाहाॽरे़ लाम्लोमा ने़हिनिङ्वाॽ मे़घोसुररो, 6 खाहुन्हाॽ नु खे़दाॽहाॽ, सिक्कुम्साबे़ल्ले़ कुउवाहाॽ हे़क्क्याङ् सिबिॽ पाःन्हाॽ खे़ङ्हाॽरे़ कुसिङ् मे़निःत्तुररो॥ 7 यहवे दाङ्बे़न्नु किमे़न्ने सिक्कुम्दिङ् निङ्वाॽरे़ कुहेःक्सिङ्मारो, कर अदङ्हाॽरे़ सिक्कुम्दिङ् निङ्वान् नु हे़न्थिम्मे़न् हने़बा मे़लेःत्तुरो॥ कुहेःक्सिङ्मा—सिक्कुम्दिङ् निङ्वाॽ खोमा खाहुन् लायोबा मनाहाॽरे़ आम्उःप्पादे़न्नो पेःक्मा मेःन् के़लॽबा साम्दिङ् 8 आस्साए, खे़ने़ॽ के़म्बारे़ कुइङ्जाङ्ङिन् खे़प्से़ॽओ हे़क्क्याङ् के़म्मारे़ के़हुॽबा निसाम्मिन् मे़ले़रे़न्ने़ॽओ॥ 9 खे़ङ्हाॽ खे़ने़ॽ के़धे़गेःक्पो के़घे़म्सिङ्मा तिचःन् नु के़निगिःङ्मा सित्लाओ मिङ्सो इङ्धाङ्बा कान्धि हे़क्तङ्बा पोङ्लो॥ 10 आस्साए, लायोबा मनाहाॽरे़ खे़ने़ॽ हुमा पङ्मा के़म्गोत्ने़भाग्र, खे़ङ्हाॽरे़ खुन्छिॽ ले़म्मा सुःम्मा पाःन्नो मे़बत्छे़न्नो॥ 11 खे़ङ्हाॽरे़ खे़ने़ॽ अक्खे के़म्मे़प्पिला, “आनिगे़नु फे़रे़ॽओ, कुभा मनान् कुमाक्खिॽ से़मारे़ लागि हाङ्सुम्माङ् युङिरो, कुभा कुदोःप्मा मनान् नाप्मारे़ लागि सुगुम्माङ् युङिरो! 12 खे़मायङ्सङ्ङिल्ले़ कुम्ब्रान् हन्दुआङ् खे़न्हाॽ कुहिङ्वे़त् लरुसिबा कुइसिक् हे़क्क्याङ् लुम्बाःत्तो के़धाबाआङ् कुबुङ्ङो के़गे़प्पाहाॽ कुइसिक्, खे़ङ्हाॽ के़रे़क् आनिॽ कुहिङ्वे़त् लरुम्देसुम्सिम्लो॥ 13 के़रे़क् परिक्पा सामापुमाहाॽ आनिॽ आमे़त्छिङ्लो, हे़क्क्याङ् नाप्मनासिबा चिगक्वाहाॽरे़ आनिॽ हिम्हाॽ आधिम्सुम्लो॥ 14 खे़ने़ॽ आनिगे़नु सोरिक् लक्के़घोबा पोःक्खे़ॽओ, हे़क्क्याङ् आनिॽ नाप्मनासिबा सुक्वाओलाम् आहाःत्तासिरो॥” 15 आबुगे़न् आस्साए, हे़क्तङ्बा मनाहाॽनु मे़बेगे़न्ने़ॽओ, खे़ङ्हाॽरे़ मे़नाःत्तुबा लाम्मो लाङ्दाप्पेॽए मे़धासे़न्ने़ॽओ॥ 16 थेआङ्भे़ल्ले़ खे़ङ्हाॽरे़ खुन्छिॽ लाङ्दाप्पेन् लायो चोःक्मा चात्तुरो, खे़ङ्हाॽ माक्खिॽ से़मारे़ लागि खा यारिप् मे़बोङ्लो॥ 17 के़रे़क् पुहाॽरे़ मे़निसुरए इयुक्मासिग कुसुम् मे़न्दम्मनाबा थेनाधेरक् पोङ्लो॥ 18 कन् मनाहाॽरे़ आबाङे माक्खिन् से़मारे़ लागि मे़सुगुआङ् मे़युङ्लो, खे़ङ्हाॽ इजोओ आप्फेक् थामारे़ लागि मे़गोसुआङ् मे़युङ्लो! 19 मे़न्वाॽमनाबा याःम्बक्लाम् याङ् थक्मा ले़प्माङ् के़लाःप्पा के़रे़क्ले़ खुन्छिॽ नुप्मे़न् कन् परिक्ले़ए पोङ्लो, कम्भलॽरिक् याङ्साकुन्धे के़धक्पे़ल्ले़ कुहिङ्मे़न् कल्ले़ए पक्खु तेॽरुरो॥ सिक्कुम्दिङ् निङ्वाॽल्ले़ कुबाःन्निन् खे़म्से़ उःत्तुसिॽ 20 माराम्हाॽओ सिक्कुम्दिङ् निङ्वान् यम्बा इक्लाओ अःक्लो, खे़ल्ले़ लाम्दोहाॽओ यम्बयम्बा इक्ला लःत्तुरो, 21 हयङ् किल्लिङ् इसेःङ्बा माराम्हाॽओबा लुङ्धाक्हाॽओलाम् खे़न् यम्बा इक्लाओ साॽरिक् अःक्लो, ये़क्यक्कोबा यम्बा लाम्धेःत्हाॽओ खे़ल्ले़ कम्भलॽरिक् उवा चोगुरो— 22 “कुनिङ्वाॽ के़बाःक्पासे, आभे़ल्ले़ थारिक् खिनिॽ निङ्वाॽ के़बाःक्पा लाम्मे़न् लुङ्माॽ के़दुक्तुम्बाबे? आभे़ल्ले़ थारिक् कुनामे़न्छाॽ के़बाःप्पाहाॽरे़ नामे़न्छान् पाःप्माओ मे़सःप्पाबे? हे़क्क्याङ् अदङ्हाॽरे़ ने़हिनिङ्वान् मे़जिःत्तुर मे़वाॽबाबे? 23 आङ्गाॽ खिनिॽ फे़ःक्निङ्बा पाःन्निन् के़घे़प्सुम्ने़भग्र, आङ्गाॽ आसिक्लुङ्मोबा पाःन्हाॽ खिनिॽ मे़त्निङ्लो, हे़क्क्याङ् आनिङ्वाॽ पाःन्हाॽ कुसिङ् के़निःत्तुम्ल याःन्निङ्लो॥ 24 कर आङ्गाॽ इङ्भोःन्निङ्ङिल्ले़ खे़म्मा के़न्दे़न्दिन्बे़ल्ले़ चोगुल्ले़, हे़क्क्याङ् आङ्गाॽ आहुक्हाॽ हप्फे़ मे़त्तुङ्ङिल्ले़ आत्तिन्हाॽरे़आङ् निनि खे़म्घे़म् के़न्लाप्तुम्मिन्बे़ल्ले़ चोगुल्ले़, 25 आसुजाहाॽ के़रे़क् निनि खे़म्घे़म् के़न्लाप्तुम्मिन्बे़ल्ले़ चोगुल्ले़ हम्भ्याङ् आङ्गाॽ फे़ःक्निङ्बान् के़ङ्घे़प्सुम्मिन्बाल्ले़ चोगुल्ले़, 26 खिनिॽ तुक्खेलाक्खेओ के़ध्ये़ॽइल्ले़ आङ्गाॽ एःत्तारो, ये़तुक्खे के़दुमिल्ले़ आङ्गाॽ खिनिॽ कुनामे़न्छाॽ मे़त्निङ्लो— 27 सुरित् केजङ् कुइसिक् तुक्खे लाक्खेहाॽरे़ खिनिॽ के़दे़त्तिल्ले़, के़इक्सिङ्बा साम्मिःत् हे़क्के ये़त्तुक्खेन् खिनिॽओ इदाःल्ले़, साॽरिक् के़साक्पा तुक्खे नु लाक्खेओ खिनिॽ के़ध्ये़ॽइरो॥ 28 “खे़ब्याङ् खे़ङ्हाॽरे़ आङ्गाॽ पेलि मे़भाक्कारो, कर खे़ङ्हाॽ आङ्गाॽ नुगप् मे़बिरुङ्सिङ्ङिन्लो, खे़ङ्हाॽरे़ आङ्गाॽ मे़गोःत्ता कर आङ्गाॽ मे़ङ्घोआन्लो॥ 29 खे़ङ्हाॽरे़ ऩेहि निङ्वान् मे़जिःत्तुबाल्ले़ चोगुल्ले़, हे़क्क्याङ् यहवे दाङ्बे़न् किप्मा मे़न्दे़न्दे़न्बाल्ले़ चोगुल्ले़, 30 खे़ङ्हाॽरे़ आङ्गाॽ आसुजाहाॽ खे़म्मा मे़न्दे़न्दे़न्बाल्ले़ चोगुल्ले़, हे़क्क्याङ् फे़ःक्तुङ्सिङ्बे़न् खे़म्मा मे़न्दे़न्दे़न्बाल्ले़ चोगुल्ले़, 31 खे़ङ्हाॽरे़ खुन्छिॽ ये़प्ले़क्किल्ले़ कुले़क्वा मे़दुमुरो, हे़क्क्याङ् खुन्छिॽ इङ्ले़क्पा निङ्सेःक्के़ल्ले़ आप्फेक् ते़त्तुसिरो॥ 32 आप्फेक् निङ्वाॽ पाःप्पाःत् मे़जोगुबाल्ले़ चोगुल्ले़, निङ्वाॽ के़बाःक्पाहाॽ हदॽ मे़सिरो, खन्नाङ् अदङ्हाॽ खुन्छिॽ निङ्वाॽ याःन्दिक् तामारे़ चोगुल्ले़ खे़ङ्हाॽरे़ खुन्छिॽ सम्धाङ् मे़क्मासिमे़न् तारो॥ 33 कर आङ्गाॽ पाःत्तुङ्बा पाःन्निन् आत्तिन्हाॽरे़ मे़घे़प्सुॽ खे़ङ्हाॽ थेआङ् मे़ल्लॽए ताप्थेक् याम्धेक्को मे़हिङ्लो, हे़क्क्याङ् हान्ति मे़म्बोङ्ङे मे़ङ्गिए हाङ्हाङ्ङाङ् मे़वाॽरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.