ओबदिया 1 - लिम्बुओबदियारे़ निसुबा सुफो 1 एदोमरे़ कुयाःम्बेओ यहवे दाङ्बा निङ्वाॽफुमाङ्ङिल्ले़ कुइङ्घङ्ङिन् ओबदियाओ के़रे़— यहवे दाङ्बे़ल्ले़ अक्खे पाःत्तुरो— हाङ्लाइङ्बाधिक् मे़न्छाम् सुवाङ्हाॽरे़ खुन्छिॽ लुम्मो अक्खे पाःप्मारे़ लागि मे़बाङ्घु मे़देसुआङ् वये़रो, “पोगे़म्मे़ॽओ, आनिॽ खे़ल्ले़ कुदक्ले़ङ्वाओ थङ् चोःक्से़ पेगिरो॥” 2 “ओमे़त्ते़ॽ, मे़न्छाम् सुवाङ्हाॽरे़ खुन्छिॽ लुम्मो आङ्गाॽ खे़ने़ॽ साॽरिक् चुक्सा चोःक्ने़रो के़रे़क्ले़ खे़ने़ॽ साॽरिक् हिनाःम् के़म्मे़त्लो॥ 3 खे़ने़ॽ के़निङ्वाॽओबा यम्बा के़हे़न्छिङ्मे़ल्ले़ खे़ने़ॽ इङ्ले़क्को के़धासे़आङ् के़वाॽरो॥ खे़ने़ॽ के़निङ्वाॽओ अक्खे के़बाःत्तुरो, ‘आङ्गाॽ याक्पेॽहाॽरे़ कुभिःप्माहाॽओ हे़क्क्याङ् चन्जम्बादे़न्हाॽओ के़युङ्बाआरो हाःत्ले़ आङ्गाॽ यो खाम्बाङ्ङो मुत्थामा सुक्काबे?’ 4 कर कक्कफिःक्माहाॽ कुइसिक् थाःङ् के़बे़साङ् हे़क्क्याङ् खेःम्सिक्पाहाॽ लुम्मो हाप् के़जोगुसाङ् आङ्गाॽ खे़ने़ॽ खे़प्मोलाम्बा यो मक्थाने़रो,” यहवे दाङ्बे़ल्ले़ पाःत्तुरो॥ 5 “खे़ने़ॽ खाप्पुथ्यःङ् के़बोङ्लो! के़घुःप्पा खुःन्द्रिक्पाहाॽ खे़ने़ॽओ मे़दाःल्ले़, से़न्दिक् फाःन्दाहाॽ खे़ने़ॽओ मे़दाःल्ले़, खे़ङ्हाॽरे़ खुन्छिॽ योबारक् मे़देॽरुरो॥ याःल्लेक्हाॽ मे़दाआङ् खे़ने़ॽ कुजे़ल्ले़क्सेॽ इक्को चे़ल्ले़क्सेल्ले़ कुजाॽहाॽ मे़दुबुल्ले़ खे़ङ्हाॽरे़ आजे़त् आजे़ःत्क मे़भत्छु मे़धरो॥ 6 कर एसावरे़ कुयाङ्सा कुन्धेहाॽ आक्खेलॽरिक् मे़नाप्तु मे़देॽरुबे! खुने़ॽ चिक्खु कत्तुबा चिगक्वाहाॽ आभेलॽरिक् मे़देॽरु मे़बिरुबे! 7 “खे़ने़ॽ के़रे़क् के़न्देःङ् के़न्जुम् लाजेॽहाॽरे़ खे़ने़ॽ इःन्दोओ थारिक् के़म्नात् के़म्देरो, खे़ने़ॽ के़जुम् के़दे़ङ्हाॽरे़ इङ्ले़क्को के़म्धारो हे़क्क्याङ् खे़ने़ॽ हिहोत् थे़होत् के़म्मे़त्लो॥ खे़ने़ॽ के़घरे़ःङ् के़जाबाहाॽरे़ए के़लागि चे़न् मे़गे़सुरो, कर कन् पाःन्निन् खे़ने़ॽ थेआङ् निङ्वाॽ के़ङ्घोसुन्लो॥ 8 खे़ल्ले़ याःन्दिक् एदोमरे़ सिक्कुम्साबा कुमनाहाॽ हे़क्क्याङ् एसावरे़ कुगोःक्माओबा खासिङ् के़निःप्पा मनाहाॽ थे आङ्गाॽ मे़मे़ङ्ङासिङ्ङान्बि?” यहवे दाङ्बे़ल्ले़ पाःत्तुरो॥ 9 “तेमानए, खे़ने़ॽ के़धक्सुबाहाॽ यङ्मा किमाओ मे़धारो, हे़क्क्याङ् एसावरे़ कुगोःक्माहाॽओ के़वाॽबा के़रे़क् मनाहाॽ से़त्छिङ्मो मे़धाआङ् मे़से़रुसिरो॥” एदोम्मो पोःक्खे़बा खुम्दिङ्ङिल्ले़ कुबुङ् 10 “खे़ने़ॽ आप्फेक् के़न्साॽ याकुबरे़ कुदक्ले़ङ्वाओ के़जोगुबा फे़न्याःम्बक्किल्ले़ चोगुल्ले़ सिरिङ्ममो के़धारो, हे़क्क्याङ् खे़ने़ॽ सदादिङ्ले़ लागि खाप्पुथ्यःङ् के़बोङ्लो॥ 11 खे़ने़ॽ माःङ्घा के़ये़म्सिङ्ङाङ् के़ये़बे़बा ये़न्नो, वेॽ लाजेॽबाहाॽरे़ कुयाङ्सा कुन्धेहाॽ मे़नाप्तु मे़देॽरुरो॥ हे़क्क्याङ् वेॽ लाजेॽबाहाॽ खुने़ॽ कुलाम्धेःत्हाॽओलाम् मे़लासे़आङ् यरुसले़मरे़ लागि तॽयाःन्सोन् मे़गे़सुल्ले़ खे़ने़ॽ खे़ङ्हाॽ हे़क्तङ्बाए के़जोगे़आङ् के़वये़रो॥ 12 “खे़ने़ॽ आप्फेक् के़न्साॽरे़ कुदॽयान् फे़रे़बा ये़न्नो खे़ने़ॽ सःप्माआङ् मे़न्नुॽमनाबा वये़रो, यहुदाबा मनाहाॽ खाप्पुथ्यःङ् मे़मे़गे़बा ये़न्नो खे़ने़ॽ सःप्माआङ् मे़न्नुॽमनाबा वये़रो, खे़ङ्हाॽरे़ के़साक्पा तुक्खे लाक्खे मे़दुमुबा ये़न्नो खे़ने़ॽ यम्बाआङ् हे़न्छिङ्मा मे़न्नुॽमनाबा वये़रो॥ 13 आङ्गाॽ आमनाहाॽरे़ ये़त्तुक्खे मे़दुमुबा ये़न्नो, खे़ने़ॽ खुन्छिॽ लाम्धेःत्हाॽओलाम् लाःप्मा मे़न्नुॽमना वये़रो, खे़ङ्हाॽ के़साक्पा तुक्खे लाक्खे मे़ज्ये़बा ये़न्नो खे़ने़ॽ खे़ङ्हाॽ कुनामे़न्छाॽ मे़प्मासि मे़न्नुॽमनाबा वये़रो, खे़ङ्हाॽ साॽरिक् के़साक्पा तुक्खेओ मे़ध्ये़बा ये़न्नो खुन्छिॽ याङ्साकुन्धेहाॽ नाप्मासि मे़न्नुॽमनाबा वये़रो॥ 14 खे़ङ्हाॽरे़ खुन्छिॽ के़घे़त्छिङ्बा मनाहाॽ ते़म्मासिरे़ लागि लाम्दोओ खे़ङ्हाॽ हाङ्मासिआङ् युङ्मा मे़न्नुॽमनाबा वये़रो, खे़ङ्हाॽरे़ खुन्छिॽ तुक्खे लाक्खे मे़दुमुबा ये़न्नो खे़ङ्हाॽरे़ खुन्छिॽ के़हिङ्बा मनाहाॽ ते़म्मासिआङ् निङ्मि हुक्को थामासि मे़न्नुॽमनाबा वये़रो॥” इक्साओबा सुवाङ्हाॽ निङ्वाॽफुमाङ्ङिल्ले़ खासे़न् चोगुसि 15 “के़रे़क् मे़न्छाम् सुवाङ्हाॽरे़ खुन्छिॽ लागि यहवे दाङ्बे़ल्ले़ खुम्दिङ् पिमासि कुये़न्निन् निःत्ताङ् त्ये़आङ् वाॽरो॥ एदोमए, खे़ने़ॽ इस्राइले़न् आक्खे के़मे़त्तुआङ् वये़, खे़ने़ॽआङ् हाबा हे़क्केए के़म्मे़त्लो॥ खे़ने़ॽ के़जोगुबा याःम्बक्हाॽ खे़ने़ॽओए नुःङ्दारो॥ 16 आङ्गाॽ आसेसे कोःक्माओ के़धुङुआङ् वये़बा हे़क्के, आङ्गाॽ आसाक्के़न्निल्ले़न् खोर्याओ खे़ने़ॽ नु के़रे़क् मे़न्छाम् सुवाङ्हाॽरे़ चक्मे़ल्लॽए के़धुङुम्लो खिनिॽ खाप्पुथ्यःङ् मे़म्बोङ्ङे थारिक् चक्मे़ल्लॽए हाबा के़धुङुम्माङ् के़बत्छिरो॥ 17 “कर सियोन कोःक्माओग से़ःप्सिङ्मादे़न् पोङ्लो, खे़न् लत्छा सेसेबादे़न् पोङ्ङाङ् युङ्लो॥ हे़क्क्याङ् याकुबरे़ कुहिम्सयङ्हाॽरे़ खुन्छिॽ लक्खोमा युक्हाॽ खे़ङ्हाॽरे़ आप्फेक् युक् मे़जोगुरो॥ 18 याकुबरे़ कुहिम्सयङ्हाॽ मि मे़बोङ्लो हे़क्क्याङ् योसेफरे़ कुहिम्सयङ्हाॽ मिराक् मे़बोङ्लो॥ खम्भ्याङ् एसावरे़ कुहिम्सयङ्हाॽग के़हेबा याःन्सुङ् मे़बोङ्लो, हे़क्क्याङ् खे़ङ्हाॽरे़ एसावरे़ कुहिम्सयङ्हाॽ मिमे़धिक्खुसिरो॥ खे़ब्याङ् खे़ङ्हाॽ वरे़ङ्ले़ङ् खाप्पुथ्यःङ् मे़बोङ्लो एसावरे़ कुहिम्सयङ्लाम् हाःत्ताङ् कुहिङ्वे़त् मे़न्दाङ्ने़न्लो॥” यहवे दाङ्बे़ल्ले़ कन् पाःत्तुङ्ङाङ् वाॽरो॥ 19 “नेगेबबा मनाहाॽरे़ एसावरे़ कुगोःक्माहाॽ मे़युक्तुरो, हे़क्क्याङ् थे़गु माङ्हाॽरे़ कुसिगाङ् के़युङ्बा मनाहाॽरे़ पलिस्तिहाॽरे़ खुन्छिॽ लाजेन् मे़युक्तुरो॥ खे़ङ्हाॽरे़ एफ्राइम नु सामरियाबा ते़ङ्गप्हाॽआङ् मे़युक्तुरो, बेन्यामिनरे़ गिलाद लाजेन् युक्तुरो॥ 20 लाजेॽलाम् मे़लःत्तु मे़देसुसिबा इस्राइलिहाॽरे़ कनान लाजेन् थो सारपत थारिक् मे़युक्तुरो॥ यरुसले़मलाम् मे़लःत्तु मे़देसुसिबा सपारादओ के़वाॽबाहाॽरे़ग नेगेबबा ये़क्यक्हाॽ मे़युक्तुरो॥ 21 एसावरे़ कुगोःक्माहाॽ युक्मारे़ लागि थङ् के़नाःम्बाहाॽ सियोन कोःक्माओ मे़धोःक्सिङ्लो हे़क्क्याङ् हाङ्जुम्मिङ्ग यहवे दाङ्बाल्ले़न् पोङ्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.