खानिःत् 8 - लिम्बुसेमियुङ्दे़न् युङ्मा थिम् 1 यहवे दाङ्बे़ल्ले़ मोसान् मे़त्तु, 2 “खे़ने़ॽ हारुने़न् मे़त्ते़ॽ—‘खे़ने़ॽ नुसि सेमिहाॽ के़युक्खुल्ले़ खे़न् सेमिहाॽरे़ सेमियुङ्दे़न् तगि ले़प्माङ्बा ते़न्निन् थोॽरुर॥’” 3 हे़क्क्याङ् हारुने़ल्ले़ हे़क्केए चोगु॥ यहवे दाङ्बे़ल्ले़ मोसान् इङ्जाङ् पिरुबा कुइसिःक्के सेमि युङ्दे़न्निल्ले़ तगि ले़प्माङ् थोॽरुर खुने़ॽ सेमिहाॽ युक्खु॥ 4 खे़ल्ले़ कुयुक्नाआङ्धो कुभुङ्हाॽ थारिक् सेमि युङ्दे़न्निन् थक्मनाबा साम्म्याङ् कुलःप्पा चोगे़॥ यहवे दाङ्बे़ल्ले़ मोसान् कुबि ओःन्धाक्तुबा कुइसिक् खे़न् सेमि युङ्दे़न्निन् मे़जोगुरो॥ ले़बिहाॽरे़ खुन्छिॽ सुत्थो चोःक्सिङ्मा नु तोःन्छिङ्मा 5 यहवे दाङ्बे़ल्ले़ मोसान् मे़त्तु, 6 “खे़ने़ॽ इस्राइलिहाॽरे़ खुन्छिॽलुम्मोबा ले़बिहाॽ तेॽरे़से़ॽआङ् खे़ङ्हाॽ थिम् कुइसिक् सुत्थो चोगे़से़ॽ॥ 7 खे़ङ्हाॽ सुत्थो चोःक्मासिरे़ लागि खे़ने़ॽ अक्खे चोगे़ॽ—खे़ङ्हाॽरे़ खुन्छिॽ सम्धाङ् सुत्थो चोःक्सिङ्मा च्वाःत्तिन् साक्खे़ॽ, हे़क्क्याङ् खे़ङ्हाॽरे़ खुन्छिॽ थक्कोबा के़रे़क् मुरिक्हाॽ मे़नःक्सुआङ् खुन्छिॽ आप्फेक् आप्फेक् चाङ्हाॽ वामे़हप्तुर हे़क्क्याङ् खे़ङ्हाॽ सुत्थो मे़बोङ्ल॥ 8 खे़ङ्हाॽरे़ कुम्बाबा पित्सात् थिक् नु निःङ्गेॽ सॽमनाबा चुन्जुम्बा फेॽरुम्मिल्ले़न् पोगुगे़न् कुजा सिदुङ्जभा मे़दारुर, खे़ब्याङ् लायोलाम् ले़प्मि खोमा सिदुङ्जभारे़ लागिग खे़ने़ॽ वेॽ कुम्बाबा पित्सात् थिक् तारे़ॽ॥ 9 खे़ने़ॽ ले़बिहाॽ तुम्मादे़न् साःङ्गाहिम् तगि तारे़से़ॽआङ् इस्राइलिहाॽरे़ खुन्छिॽ के़रे़क् सङ्जुम्भोःन् फुक्खे़से़ॽ॥ 10 खे़ने़ॽ ले़बिहाॽ यहवे दाङ्बे़ल्ले़ कुदगि तारे़से़ॽ, हे़क्क्याङ् इस्राइलिहाॽरे़ खुन्छिॽ आप्फेक् आप्फेक् हुक्हाॽ ले़बिहाॽरे़ खुन्छिॽ सम्धाङ् मे़ने़स्सुर॥ 11 यहवे दाङ्बे़ल्ले़ कुलागि माङ्से़वा याःम्बक् चोःक्से़ ले़बिहाॽ यारिप् मे़बोङ्ल फाॽआङ् इस्राइलिहाॽलाम् थाःङ् पङ्मनाबा सिदुङ्जभा कुइसिक् ले़बिहाॽ यहवे दाङ्बे़ल्ले़ कुदगि हारुने़ल्ले़ तोःन्दुसिर॥ 12 “खे़न् एगाङ् ले़बिहाॽरे़ खुन्छिॽ हुक्हाॽ खे़न् ने़त्छि कुम्बाबा पित्सात्हाॽरे़ खुन्छिॽ थे़गेःक्हाॽ सम्धाङ् मे़ने़स्सुॽ॥ ले़बिहाॽरे़ खुन्छि लायोल्ले़ लागि ले़प्मि नाःक्मा लत्छा पित्सात्ते़न् सुत्थो पोङ्मा वयागे़न् सिदुङ्जभारे़ लागि नु वेॽ पित्सात्ते़न् मिधिङ्मनादेमनाबा वयागे़न् सिदुङ्जभारे़ लागि यहवे दाङ्बाओ मे़दोन्दुसिर॥ 13 खे़ने़ॽ ले़बिहाॽ हारुने़न् नु खुने़ॽ कुस्साहारे़ खुन्छिॽ तगि ये़प्से़से़ॽ हे़क्क्याङ् यहवे दाङ्बाल्ले़ कुलागि थाःङ् पङ्मनाबा सिदुङ्जभा कुइसिक् खे़ङ्हाॽ तोःन्दे़से़ॽ॥ 14 कम्भलॽरिक् खे़ने़ॽ ले़बिहाॽ वेॽ इस्राइलिहाॽलाम् एःक् से़न्दे़से़ॽ, हे़क्क्याङ् ले़बिहाॽ आङ्गाॽ आमनासिरो॥ 15 “खे़ने़ॽ ले़बिहाॽ सुत्थो के़जोगुसिआङ् थाःङ् पङ्मनाबा सिदुङ्जभा हे़क्के खे़ङ्हाॽ तोःन्दे़से़ॽ खे़न् एगाङ् तुम्मादे़न् साःङ्गाहिम्मो माङ्से़वा चोःक्मारे़ लागि ले़बिहाॽ सिगाङ् मे़लाःत्ल॥ 16 इस्राइलिहाॽरे़ खुन्छिॽ लुम्मोलाम् खे़ङ्हाॽ के़रे़क्के आङ्गाॽओ मे़दोन्दुसिबारो॥ इस्राइलिहाॽरे़ खुन्छिॽ तुम्बा साहाॽरे़ खुन्छिॽ ले़क्वाओ आङ्गाॽ आप्फेक् आमना हे़क्के खे़ङ्हाॽ ताःक्तुङ्सिङ्ङाङ् वाॽआ॥ 17 इस्राइलओ, मनासाङ्, थक्सासाङ्, तगि सागे़वाःन्छिङ्बा के़धाप्पाहाॽ के़रे़क् आङ्गाॽ आमना आधक्सासिरो॥ मिस्रिहाॽरे़ खुन्छिॽ के़रे़क् तुम्बा साहाॽ आङ्गाॽ से़रुङ्सिङ्बा ये़न्नो कन्हाॽ आङ्गाॽ आलागि एःक् से़न्दुङ्सिङ्॥ 18 हे़क्क्याङ् इस्राइलिहाॽरे़ खुन्छिॽ तुम्बा साहाॽ के़रे़क्ले़ खुन्छिॽ ले़क्वाओ आङ्गाॽ ले़बिहाॽ ताःक्तुङ्सिङ्ङाङ् मे़वाॽ॥ 19 हे़क्क्याङ् के़रे़क् इस्राइलिहाॽलाम्, आङ्गाॽ ले़बिहाॽ हारुने़न् नु कुस्साहाॽ पिरुङ्सिङ्ङाङ् वाॽ॥ इस्राइलिहाॽरे़ खुन्छिॽ ले़क्वाओ खे़ङ्हाॽरे़ तुम्मादे़न् साःङ्गाहिम्मो याःम्बक् मे़जोगु मे़बिरुसिर हे़क्क्याङ् मनाहाॽ लायोल्ले़ लागि ले़प्मि नाःक्मा फाॽआङ् सिदुङ्भजाहाॽ मे़जोगु मे़बिरुसिर हे़क्केलॽरिक् इस्राइलिहाॽ सेसेदे़न्नो मे़दाःल्ले़ तुक्मा लाःक्मारे़ मे़दरुसिन्ल॥” 20 ले़बिहाॽरे़ खुनिॽ याःम्बेओ यहवे दाङ्बे़ल्ले़ मोसान् इङ्जाङ् पिरुबा कुइसिक् मोसा, हारुन नु इस्राइलबा के़रे़क् सङ्जुम्भोःल्ले़ ले़बिहाॽ मे़दोन्दुसि॥ 21 ले़बिहाॽरे़ खुन्छिॽ आप्फेक् आप्फेक् सुत्थो मे़जोःक्सिङ्ङाङ् खुन्छिॽ चाङ्हाॽ वामे़हप्तु॥ खे़ब्याङ् हारुने़ल्ले़ खे़ङ्हाॽ थाःङ् पङ्मनाबा सिदुङ्जभा कुइसिक् यहवे दाङ्बे़ल्ले़ कुदगि तोःन्दुसि, हे़क्क्याङ् खुने़ॽ खे़ङ्हाॽ सुत्थो चोःक्मासि फाॽआङ् लायोल्ले़ लागि ले़प्मि नाःक्मा याःम्बक् चोगु॥ 22 खे़न् एगाङ् तुम्मादे़न् साःङ्गाहिम्मो हारुने़न् नु खुने़ॽ कुस्साहाॽरे़ खुन्छिॽ युक्को खुन्छिॽ आप्फेक् आप्फेक् याःम्बक् चोःक्से़ ले़बिहाॽ सिगाङ् मे़लासे़॥ ले़बिहाॽरे़ खुन्छिॽ याःम्बेओ यहवे दाङ्बे़ल्ले़ इङ्जाङ् पिरुसिबा कुइसिक् खे़ङ्हाॽरे़ मे़जोगु॥ 23 यहवे दाङ्बे़ल्ले़ मोसान् मे़त्तु, 24 “ले़बिहाॽरे़ खुन्छिॽ याःम्बक्किल्ले़ थिम्मिन् हाबा कन्लो—निबोङ्ङाङ् ङासि तङ्बे के़गे़प्पा नु खे़न्नुःल्ले़ थोबाहाॽ तुम्मादे़न् साःङ्गाहिम्मो याःम्बक् चोःक्से़ मे़लाःत्ल॥ 25 कर ङाबोङ् तङ्बे मे़गे़त्ताङ् एगाङ् खे़ङ्हाॽरे़ याःम्बक् मे़न्जोगुन्ल, हे़क्क्याङ् याःम्बक्लाम् खे़ङ्हाॽ मे़अङ्सिङ्ल, खे़ब्याङ् याम्मो याःम्बक् मे़न्जोगुन्ल॥ 26 कर याःम्बक् हे़न्या चोःक्माआङ् वाॽमारे़ लागि ले़बि फुॽनुसाॽ तुम्मादे़न् साःङ्गाहिम्मो मे़भाॽरुसिर मे़वाॽर, कर खे़ङ्हाॽरे़ आप्फेक् याःम्बक् मे़न्जोगुन्ल॥ ले़बिहाॽरे़ खुन्छिॽ चोःक्मा के़बोङ्बा याःम्बक्किल्ले़ कुयाःम्बेओ खे़ने़ॽ अक्खेए चोगे़ॽओ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.