खानिःत् 7 - लिम्बुसेसे साःङ्गाहिम्मिन् मे़दोन्दुबा ये़न्नोबा हुक्सोयाङ्हाॽ 1 मोसाःल्ले़ सेसे साःङ्गाहिम्मिन् चोगु सुरुआङ् एगाङ्, खे़न् साःङ्गाहिम्मिन् नु खे़प्मोबा के़रे़क् सामाहाॽ, हे़क्क्याङ् खे़न्नु सोरिक्पा ले़त्ति तोःम्मादे़न्निन् नु खे़प्मोबा के़रे़क् खप्प्या सामाहाॽ माङ्थोःक्ना चोगुआङ् सेसेसाङ्साङ् चोगु॥ 2 खे़ब्याङ् इस्राइलबा लाम्लोबाहाॽ—खानिःत् चोःक्मा याःम्बक् के़जोःक्पा थाःक्लाम्लोबा हिम्सयङ्बा लाम्लोबाहाॽरे़ खुन्छिॽ आप्फेक् आप्फेक् सिदुङ्जभाहाॽ मे़दोन्दु॥ 3 खे़ङ्हाॽरे़ यहवे दाङ्बे़ल्ले़ कुदगि ते़प्मनाबा तुक्सि पित्लाधाहाॽ नु थिबोङ्ङाङ् ने़त्छि पित्हाॽ, ने़त्छि ने़त्छि थाःक्लाम्लोबाहाॽरे़ खुन्छिॽ लागि लत्छा लत्छा पित्लाधा नु लाम्लोबाहाॽ थक्मा लत्छा लत्छा पित् खुन्छिॽ आप्फेक् आप्फेक् सिदुङ्जभा मे़दारुआङ् सेसे साःङ्गाहिम्मिल्ले़ कुदगि मे़दोन्दुसि॥ 4 खे़ब्याङ् यहवे दाङ्बे़ल्ले़ मोसान् मे़त्तु, 5 “खे़ङ्हाॽलाम् खे़न् मे़दारुसिबाहाॽ ताःक्ते़ॽ, हे़क्क्याङ् तुम्मादे़न् साःङ्गाहिम्मोबा याःम्बक्को खे़ङ्हाॽ ओगप् मे़जोगुसिर॥ ले़बिहाॽरे़ खुन्छिॽ आप्फेक् आप्फेक् याःम्बक् कुइसिक् खे़ङ्हाॽ खे़ने़ॽ पिरे़से़ॽ॥” 6 खे़ब्याङ् मोसाःल्ले़ खे़न् पित्लाधाहाॽ नु पित्हाॽ ले़बिहाॽ पिरुसि॥ 7 ने़त्छि पित्लाधाबा नु लिसि पित्हाॽ खुने़ॽ खे़ङ्हाॽ खुन्छिॽ याःम्बक् कुइसिक् गेर्सोनिहाॽ पिरुसि॥ 8 खुने़ॽ मरारिहाॽ खुन्छिॽ याःम्बक् कुइसिक् खुने़ॽ लिसि पित्लाधा नु ये़त्छि पित् पिरुसि॥ खे़ङ्हाॽ के़रे़क् निङ्वाॽफुसाम्बा हारुने़ल्ले़ कुस्सा इमातारे़ल्ले़ कुयुक्को याःम्बक् के़जोःक्पा मे़वये़॥ 9 कर कहातिहाॽ खुने़ॽ थे़माआङ् मे़बिरुसिन्, थेआङ्भे़ल्ले़ खे़ङ्हाॽरे़ खुन्छिॽ फक्ताङ्ङो सेसेबा सामाहाॽ पङ्मा के़बोङ्बा खुन्छिॽ याःम्बक् वये़॥ 10 ले़त्ति तोःम्मादे़न्निन् माङ्धोःक्ना मे़जोगुबा ये़न्निल्ले़ याःन्दिक् थाःक्लाम्लोबाहाॽरे़ खे़न् तोःम्मा याःम्बक्को खुन्छिॽ आप्फेक् आप्फेक् हुक्वाहाॽ मे़दारुआङ् ले़त्ति तोःम्मादे़न् तगि मे़दोन्दु॥ 11 थेआङ्भे़ल्ले़ यहवे दाङ्बे़ल्ले़ मोसान् अक्खे मे़त्तुआङ् वये़, “ले़त्ति तोःम्मादे़न्निन् तोःम्मा याःम्बक्किल्ले़ लागि थिक्याःन्धक्मा थाःक्लाम्लोबाहाॽओ लत्छारे़ खुने़ॽ कुहुक्वान् तोःन्दुर॥” 12 यहुदा थाःक्कोबा अम्मिनादाबरे़ कुस्सा नहसोने़न् थिक्सिगेक्पा ये़न्नो हुक्वा के़दोम्बा वये़॥ 13 खे़ल्ले़ तोःन्दुबा हुक्वान् हाबा कन् वये़—सेसेदे़न्नोबा सेकेल कुइसिक् १३० सेकेलबा लत्छा युप्पा च्ये़त्थ्या, ७० सेकेलबा लत्छा युप्पा सामाक्खिॽ साङ्मा छे़ःङ्ग्या—कन्हाॽ ने़प्माङ् पोगुगे़न् कुजा सिदुङ्जभाःल्ले़ लागि निःङ्गेॽ सॽमनाबा चुन्जुम्बा फेॽरुम्मिल्ले़ के़दिम्बा चोगे़— 14 सुक्पाल्ले़ के़दिम्बा थिबोङ् सेकेलबा लत्छा साम्म्याङ् साङ्ते़रे़ःङ्, 15 मिधिङ्मनादेमनाबा सिदुङ्जभाःल्ले़ लागि लत्छा कुम्बाबा पित्सात्, लत्छा थुःम्बा नु तङ्बे थिक् के़गे़प्पा लत्छा मे़ल्लुक्, 16 लायोलाम् ले़प्मि खोमा सिदुङ्जभारे़ लागि लत्छा मे़ःन्दबका, 17 हे़क्क्याङ् तङ्जुम् वयागे़न् सिदुङ्जभाःल्ले़ लागिग से़गम्बा ने़त्छि, ङासि थुःम्बा, ङासि मे़ःन्दबका नु तङ्बे थिक् के़गे़प्पा ङासि मे़ल्लुक्साःत्॥ अम्मिनादाबरे़ कुस्सा नहसोनरे़ कुहुक्वा हाबा कन्हाॽ वये़॥ 18 निसिगेक्पा ये़न्नो इस्साखारबा थाःक्लाम्लोबा सुआररे़ कुस्सा नाताने़ल्ले़ कुहुक्वान् तारु॥ 19 खे़ल्ले़ तारुबा हुक्वान् आम्भा कन् वये़—सेसेदे़न्नोबा सेकेल कुइसिक् १३० सेकेलबा लत्छा युप्पा चे़त्थ्या, नुबोङ् सेकेलबा लत्छा सामाक्खिॽ साङ्मा युप्पा छे़ःङ्ग्या—खे़न्हाॽ ने़प्माङ् पोगुगे़न् कुजा सिदुङ्जभाःल्ले़ लागि निःङ्गेॽ सॽमनाबा चुन्जुम्बा फेॽरुम्मिल्ले़ के़दिम्बा चोगे़— 20 सुक्पाल्ले़ के़दिम्बा थिबोङ् सेकेलबा लत्छा साम्म्याङ् साङ्ते़रे़ःङ्, 21 मिधिङ्मनादेमनाबा सिदुङ्जभाःल्ले़ लागि लत्छा कुम्बाबा पित्सात्, लत्छा थुःम्बा नु तङ्बे थिक् के़गे़प्पा लत्छा मे़ल्लुक्, 22 लायोलाम् ले़प्मि खोमा सिदुङ्जभारे़ लागि लत्छा मे़ःन्दबका, 23 हे़क्क्याङ् तङ्जुम् वायागे़न् सिदुङ्जभाःल्ले़ लागिग से़गम्बा ने़त्छि, थुःम्बा ङासि, मे़ःन्दबका ङासि नु तङ्बे थिक् के़गे़प्पा मे़ल्लुक्साःत् ङासि॥ सुआररे़ कुस्सा नतनेलरे़ कुहुक्वा आम्भा कन्हाॽ वये़॥ 24 सुम्सिगेक्पा ये़न्नो जबुलुनबा थाःक्लाम्लोबा हेलोनरे़ कुस्सा एलिआबरे़ कुहुक्वान् तारु॥ 25 खे़ल्ले़ कुहुक्वान् हाबा कन् वये़—सेसेदे़न्नोबा सेकेल कुइसिक् १३० सेकेलबा लत्छा युप्पा च्ये़त्थ्या, नुबोङ् सेकेलबा लत्छा सामाक्खिॽ साङ्मा युप्पा छे़ःङ्ग्या—कन्हाॽ ने़प्माङ् पोगुगे़न् कुजा सिदुङ्जभाःल्ले़ लागि निःङ्गेॽ सॽमनाबा चुन्जुम्बा फेॽरुम्मिल्ले़ के़दिम्बा चोगे़॥ 26 सुक्पाल्ले़ के़दिम्बा थिबोङ् सेकेलबा लत्छा साम्म्याङ् साङ्ते़रे़ःङ्, 27 मिधिङ्मनादेमनाबा सिदुङ्जभाःल्ले़ लागि कुम्बाबा पित्सात् थिक्, थुःम्बा थिक् नु तङ्बे थिक् के़गे़प्पा मे़ल्लुक्साःत्थिक्, 28 लायोलाम् ले़प्मि खोमा सिदुङ्जभारे़ लागि मे़ःन्दबका थिक्, 29 हे़क्क्याङ् तङ्जुम् वयागे़न् सिदुङ्जभाःल्ले़ लागिग, से़गम्बा ने़त्छि, थुःम्बा ङासि, मे़ःन्दबका ङासि नु तङ्बे थिक् के़गे़प्पा मे़ल्लुक्साःत् ङासि॥ हेलोनरे़ कुस्सा एलिआबरे़ कुहुक्वा आम्भा कन् वये़॥ 30 लिसिगेक्पा ये़न्नो रुबेनले़ कुधाःक्लाम्लोबा सउररे़ कुस्सा एलिसुररे़ कुहुक्वान् तारु॥ 31 खे़ल्ले़ कुहुक्वान् हाबा कन् वये़—सेसेदे़न्नोबा सेकेल कुइसिक् १३० सेकेलबा लत्छा युप्पा च्ये़त्थ्या, नुबोङ् सेकेलबा लत्छा सामाक्खिॽ साङ्मा युप्पा छे़ःङ्ग्या—कन्हाॽ ने़प्माङ् पोगुगे़न् सिदुङ्जभाःल्ले़ लागि निःङ्गेॽ सॽमनाबा चुन्जुम्बा फेॽरुम्मिल्ले़ के़दिम्बा चोगे़॥ 32 सुक्पाल्ले़ के़दिम्बा थिबोङ् सेकेलबा लत्छा साम्म्याङ् साङ्ते़रे़ःङ्, 33 मिधिङ्मनादेमनाबा सिदुङ्जभाःल्ले़ लागि कुम्बाबा पित्सात् थिक्, थुःम्बा थिक् नु तङ्बे थिक् के़गे़प्पा मे़ल्लुक्साःत्थिक्, 34 लायोलाम् ले़प्मि खोमा सिदुङ्जभारे़ लागि मे़ःन्दबका थिक्, 35 हे़क्क्याङ् तङ्जुम् वायागे़न् सिदुङ्जभाःल्ले़ लागिग से़गम्बा ने़त्छि, थुःम्बा ङासि, मे़ःन्दबका ङासि नु तङ्बे थिक् के़गे़प्पा मे़ल्लुक्सात् ङासि॥ सदेउररे़ कुस्सा एलिसुररे़ कुहुक्वा हाबा कन् वये़॥ 36 ङासिगेक्पा ये़न्नो सिमियोनबा थाःक्लाम्लोबा सुरिसद्दैरे़ कुस्सा सलुमिएलरे़ खुने़ॽ कुहुक्वान् तारु॥ 37 खे़ल्ले़ कुहुक्वान् आम्भा कन् वये़—सेसेदे़न्नोबा सेकेल कुइसिक् १३० सेकेलबा लत्छा युप्पा चे़त्थ्या, नुबोङ् सेकेलबा लत्छा सामाक्खिॽ साङ्मा युप्पा छे़ःङ्ग्या—कन्हाॽ ने़प्माङ् पोगुगे़न् कुजा सिदुङ्जभाःल्ले़ लागि चुन्जुम्बा फेॽरुम्मिल्ले़ के़दिम्बा चोगे़— 38 सुक्पाल्ले़ के़दिम्बा थिबोङ् सेकेलबा लत्छा सम्म्याङ् साङ्ते़रे़ःङ्, 39 मिधिङ्मनादेमनाबा सिदुङ्जभाःल्ले़ लागि कुम्बाबा पित्सात् थिक्, थुःम्बा थिक् नु तङ्बे थिक् के़गे़प्पा लत्छा मे़ल्लुक्साःत्, 40 लायोलाम् ले़प्मि खोमा सिदुङ्जभारे़ लागि मे़ःन्दबका थिक्, 41 हे़क्क्याङ् तङ्जुम् वायागे़न् सिदुङ्जभाःल्ले़ लागि से़गम्बा ने़त्छि, थुःम्बा ङासि, मे़ःन्दबका ङासि नु तङ्बे थिक् के़गे़प्पा मे़ल्लुक्साःत् ङासि॥ सुरिसद्दैरे़ कुस्सा सलुमिएलरे़ कुहुक्वा हाबा कन् वये़॥ 42 तुक्सिगेक्पा ये़न्नो गादबा थाःक्लाम्लोबा दुएलरे़ कुस्सा एल्यासापरे़ कुहुक्वान् तारु॥ 43 खे़ल्ले़ कुहुक्वान् आम्भा कन् वये़—सेसेदे़न्नोबा सेकेल कुइसिक् १३० सेकेलबा लत्छा युप्पा चे़त्थ्या, नुबोङ् सेकेलबा लत्छा सामाक्खिॽ साङ्मा युप्पा छे़ःङ्ग्या—कन्हाॽ ने़प्माङ् पोगुगे़न् कुजा सिदुङ्जभाःल्ले़ लागि निःङ्गेॽ सॽमनाबा चुन्जुम्बा फेॽरुम्मिल्ले़ के़दिम्बा चोगे़॥ 44 सुक्पाल्ले़ के़दिम्बा थिबोङ् सेकेलबा लत्छा साम्म्याङ् साङ्ते़रे़ःङ्, 45 मिधिङ्मनादेमनाबा सिदुङ्जभाःल्ले़ लागि कुम्बाबा पित्सात् थिक्, थुःम्बा थिक् नु तङ्बे थिक् के़गे़प्पा मे़ल्लुक्साःत्थिक्, 46 लायोलाम् ले़प्मि खोमा सिदुङ्जभारे़ लागि मे़ःन्दबका थिक्, 47 हे़क्क्याङ् तङ्जुम् वयागे़न् सिदुङ्जभाःल्ले़ लागि से़गम्बा ने़त्छि, थुःम्बा ङासि, मे़ःन्दबका ङासि नु तङ्बे थिक् के़गे़प्पा मे़ल्लुक्साःत् ङासि॥ दुएलरे़ कुस्सा एल्यासापरे़ कुहुक्वान् आम्भा कन् वये़॥ 48 नुसिगेक्पा ये़न्नो एफ्राइमरे़ कुधाःक्लाम्लोबा अम्मिहुदरे़ कुस्सा एलिसामाःल्ले़ कुहुक्वान् तारु॥ 49 खे़ल्ले़ कुहुक्वान् हाबा कन् वये़—सेसेदे़न्नोबा सेकेल कुइसिक् १३० सेकेलबा लत्छा युप्पा चे़त्थ्या, नुबोङ् सेकेलबा लत्छा सामाक्खिॽ साङ्मा युप्पा छे़ःङ्ग्या—कन्हाॽ ने़प्माङ् पोगुगे़न् कुजा सिदुङ्जभाःल्ले़ लागि निःङ्गेॽ सॽमनाबा चुन्जुम्बा फेॽरुम्मिल्ले़ के़दिम्बा चोगे़॥ 50 सुक्पाल्ले़ के़दिम्बा थिबोङ् सेकेलबा लत्छा साम्म्याङ् साङ्ते़रे़ःङ्, 51 मिधिङ्मनादेमनाबा सिदुङ्जभाःल्ले़ लागि कुम्बाबा पित्सात् थिक्, थुःम्बा थिक् नु तङ्बे थिक् के़गे़प्पा मे़ल्लुक्साःत्थिक्, 52 लायोलाम् ले़प्मि खोमा सिदुङ्जभारे़ लागि मे़ःन्दबका थिक्, 53 हे़क्क्याङ् तङ्जुम् वयागे़न् सिदुङ्जभाःल्ले़ लागि से़गम्बा ने़त्छि, थुःम्बा ङासि, मे़ःन्दबका ङासि, खे़ब्याङ् तङ्बे थिक् के़गे़प्पा मे़ल्लुक्साःत् ङासि॥ अम्मिहुदरे़ कुस्सा एलिसामाःल्ले़ कुहुक्वान् आम्भा कन् वये़॥ 54 ये़त्छिगेक्पा ये़न्नो मनस्सेबा थाःक्लाम्लोबा पदासुररे़ कुस्सा गमलिएलरे़ कुहुक्वान् तारु॥ 55 खे़ल्ले़ कुहुक्वान् हाबा कन् वये़—सेसेदे़न्नोबा सेकेल कुइसिक् १३० सेकेलबा युप्पा चे़त्थ्या थिक्, नुबोङ् सेकेलबा लत्छा सामाक्खिॽ साङ्मा युप्पा छे़ःङ्ग्या थिक्—कन्हाॽ ने़प्माङ् पोगुगे़न् कुजा सिदुङ्जभाःल्ले़ लागि निःङ्गेॽ सॽमनाबा चुन्जुम्बा फेॽरुम्मिल्ले़ के़दिम्बा चोगे़— 56 सुक्पाल्ले़ के़दिम्बा थिबोङ् सेकेलबा साम्म्याङ् साङ्ते़रे़ःङ्, 57 मिधिङ्मनादेमनाबा सिदुङ्जभाःल्ले़ लागि कुम्बाबा पित्सात् थिक्, थुःम्बा थिक् नु तङ्बे थिक् के़गे़प्पा मे़ल्लुक्साःत्थिक्, 58 लायोलाम् ले़प्मि खोमा सिदुङ्जभारे़ लागि मे़ःन्दबका थिक्, 59 हे़क्क्याङ् तङ्जुम् वयागे़न् सिदुङ्जभाःल्ले़ लागि से़गम्बा ने़त्छि, थुःम्बा ङासि, मे़ःन्दबका ङासि नु तङ्बे थिक् के़गे़प्पा मे़ल्लुक्साःत् ङासि॥ पदासुररे़ कुस्सा गमलिएलरे़ कुहुक्वा हाबा कन् वये़॥ 60 फाङ्सिगेक्पा ये़न्नो बेन्यामिन थाःक्लाम्लोबा गिदेओनिरे़ कुस्सा अबिदानरे़ कुहुक्वान् तारु॥ 61 खे़ल्ले़ कुहुक्वा आम्भा कन् वये़—सेसेदे़न्नोबा सेकेल कुइसिक् १३० सेकेलबा युप्पा चे़त्थ्या थिक्, नुबोङ् सेकेलबा लत्छा सामाक्खिॽ साङ्मा युप्पा छे़ःङ्ग्या थिक्—कन्हाॽ ने़प्माङ् पोगुगे़न् कुजा सिदुङ्जभाःल्ले़ लागि निःङ्गेॽ सॽमनाबा चुन्जुम्बा फेॽरुम्मिल्ले़ के़दिम्बा चोगे़— 62 सुक्पाल्ले़ के़दिम्बा थिबोङ् सेकेलबा लत्छा साम्म्याङ् साङ्ते़रे़ःङ्, 63 मिधिङ्मनादेमनाबा सिदुङ्जभाःल्ले़ लागि कुम्बाबा पित्सात् थिक्, मे़ल्लुक्साःत्थिक् नु तङ्बे थिक् के़गे़प्पा थुःम्बा थिक्, 64 लायोलाम् ले़प्मि खोमा सिदुङ्जभारे़ लागि मे़ःन्दबका थिक्, 65 हे़क्क्याङ् तङ्जुम् वयागे़न् सिदुङ्जभाःल्ले़ लागि से़गम्बा ने़त्छि, मे़ल्लुक्साःत् ङासि, मे़ःन्दबका ङासि नु तङ्बे थिक् के़गे़प्पा थुःम्बा ङासि॥ गिदेओनिःल्ले़ कुस्सा अबिदानरे़ कुहुक्वान् हाबा कन् वये़॥ 66 थिबोङ्गेक्पा ये़न्नो दानरे़ कुधाःक्लाम्लोबा अम्मिसद्दैरे़ कुस्सा अहिएजेररे़ कुहुक्वान् तारु॥ 67 खे़ल्ले़ कुहुक्वान् हाबा कन् वये़—सेसेदे़न्नोबा सेकेल कुइसिक् १३० सेकेलबा युप्पा चे़त्थ्या थिक्, नुबोङ् सेकेलबा लत्छा सामाक्खिॽ साङ्मा युप्पा छे़ःङ्ग्या थिक्, कन्हाॽ ने़प्माङ् पोगुगे़न् कुजा सिदुङ्जभाःल्ले़ लागि निःङ्गेॽ सॽमनाबा चुन्जुम्बा फेॽरुम्मिल्ले़ के़दिम्बा चोगे़— 68 सुक्पाल्ले़ के़दिम्बा थिबोङ् सेकेलबा साम्म्याङ् साङ्ते़रे़ःङ् थिक्, 69 हे़क्क्याङ् मिधिङ्मनादेमनाबा सिदुङ्जभाःल्ले़ लागि कुम्बाबा पित्सात् थिक्, थुःम्बा थिक् नु तङ्बे थिक् के़गे़प्पा मे़ल्लुक्साःत्थिक्, 70 लायोलाम् ले़प्मि खोमा सिदुङ्जभारे़ लागि मे़ःन्दबका थिक्, 71 तङ्जुम् सिदुङ्जभाःल्ले़ लागिग से़गम्बा ने़त्छि, थुःम्बा ङासि, मे़ःन्दबका ङासि नु तङ्बे थिक् के़गे़प्पा मे़ल्लुक्साःत् ङासि॥ अम्मिसद्दैरे़ कुस्सा अहिएजेररे़ कुहुक्वा आम्भा कन् वये़॥ 72 थिबोङ्ङाङ् थिक्सिगेक्पा ये़न्नो आसेरबा थाःक्लाम्लोबा ओक्रानरे़ कुस्सा पगिएलरे़ कुहुक्वान् तारु॥ 73 खे़ल्ले़ कुहुक्वा आम्भा कन् वये़—सेसेदे़न्नोबा सेकेल कुइसिक् १३० सेकेलबा युप्पा चे़त्थ्या थिक्, नुबोङ् सेकेलबा लत्छा सामाक्खिॽ साङ्मा युप्पा छे़ःङ्ग्या थिक्—कन्हाॽ ने़प्माङ् पोगुगे़न् कुजा सिदुङ्जभाःल्ले़ लागि निःङ्गेॽ सॽमनाबा चुन्जुम्बा फेॽरुम्मिल्ले़ के़दिम्बा चोगे़— 74 सुक्पाल्ले़ के़दिम्बा थिबोङ् सेकेलबा लत्छा साम्म्याङ् साङ्ते़रे़ःङ् थिक्, 75 मिधिङ्मनादेमनाबा सिदुङ्जभाःल्ले़ लागि कुम्बाबा पित्सात् थिक्, थुःम्बा थिक् नु तङ्बे थिक् के़गे़प्पा मे़ल्लुक्साःत्थिक्, 76 लायोलाम् ले़प्मि खोमा सिदुङ्जभारे़ लागि मे़ःन्दबका थिक्, 77 हे़क्क्याङ् तङ्जुम् वायागे़न् सिदुङ्जभाःल्ले़ लागि से़गम्बा ने़त्छि, थुःम्बा ङासि, मे़ःन्दबका ङासि नु तङ्बे थिक् के़गे़प्पा मे़ल्लुक्साःत् ङासि॥ ओक्रानरे़ कुस्सा पगिएलरे़ तारुबा कुहुक्वान् आम्भा कन् वये़॥ 78 थिबोङ्ङाङ् ने़त्छिगेक्पा ये़न्नो नप्तालिबा थाःक्लाम्लोबा एलानरे़ कुस्सा अहिररे़ कुहुक्वान् तारु॥ 79 खे़ल्ले़ कुहुक्वान् आम्भा कन् वये़—सेसेदे़न्नोबा सेकेल कुइसिक् १३० सेकेलबा युप्पा चे़त्थ्या थिक्, नुबोङ् सेकेलबा लत्छा सामाक्खिॽ साङ्मा युप्पा छे़ःङ्ग्या थिक्—कन्हाॽ ने़प्माङ् पोगुगे़न् कुजा सिदुङ्जभाःल्ले़ लागि निःङ्गेॽ सॽमनाबा चुन्जुम्बा फेॽरुम्मिल्ले़ के़दिम्बा चोगे़— 80 सुक्पाल्ले़ के़दिम्बा थिबोङ् सेकेलबा साम्म्याङ् साङ्ते़रे़ःङ् थिक्, 81 मिधिङ्मनादेमनाबा सिदुङ्जभाःल्ले़ लागि कुम्बाबा पित्सात् थिक्, थुःम्बा थिक् नु तङ्बे थिक् के़गे़प्पा मे़ल्लुक्साःत्थिक्, 82 लायोलाम् ले़प्मि खोमा सिदुङ्जभारे़ लागि मे़ःन्दबका थिक्, 83 हे़क्क्याङ् तङ्जुम् वायागे़न् सिदुङ्जभाःल्ले़ लागि से़गम्बा ने़त्छि, थुःम्बा ङासि, मे़ःन्दबका ङासि नु तङ्बे थिक् के़गे़प्पा मे़ल्लुक्साःत् ङासि॥ एनानरे़ कुस्सा अहिररे़ कुहुक्वा हाबा कन् वये़॥ 84 ले़त्ति तोःम्मादे़न्निन् माङ्धोःक्ना चोःक्मा नु तोःम्मा याःम्बक्को इस्राइलबा थाःक्लाम्लोबाहाॽरे़ मे़दोन्दुबा हुक्वाहाॽ हाबा कन्हाॽए वये़—थिबोङ्ङाङ् ने़त्छि युप्पा चे़त्थ्या, थिबोङ्ङाङ् ने़त्छि सामाक्खिॽ साङ्मा युप्पा छे़ःङ्ग्याहाॽ, हे़क्क्याङ् थिबोङ् ने़त्छि साम्म्याङ् साङ्ते़रे़ःङ्॥ 85 के़रे़क् युप्पा चे़त्थ्याहाॽ १३० सेकेल यारिक् के़लिःप्पा चोगे़ हे़क्क्याङ् सामाक्खिॽ साङ्मा युप्पा छे़ःङ्ग्याहाॽ नुबोङ् सेकेल यारिक् के़लिःप्पा चोगे़॥ खप्प्या सामाहाॽरे़ के़रे़क् युप्पाःल्ले़ कुलिःप्मान् सेसेदे़न्नोबा सेकेल कुइसिक् २,४०० सेकेल योरे़॥ 86 सुक्पाल्ले़ के़दिम्बा थिबोङ्ङाङ् ने़त्छि साम्म्याङ् साङ्ते़रे़ःङ्हाॽ, सेसेदे़न्नोबा सेकेल कुइसिक् के़रे़क् थिबोङ् थिबोङ् सेकेलबा साम्म्याङ् साङ्ते़रे़ःङ्हाॽ १२० सेकेल के़लिःप्पा चोगे़॥ 87 मिधिङ्मनादेमनाबा सिदुङ्जभाःल्ले़ लागि, खे़न् पोगुगे़न् कुजा सिदुङ्जभाःन्नु सोसोरिक्, थिबोङ्ङाङ् ने़त्छि से़गम्बा, थिबोङ्ङाङ् ने़त्छि थुःम्बाहाॽ नु तङ्बे थिक् के़गे़प्पा थिबोङ्ङाङ् ने़त्छि मे़ल्लुक्साःत् मे़वये़ हे़क्क्याङ् लायोलाम् ले़प्मि खोमा सिदुङ्जभारे़ लागि थिबोङ्ङाङ् ने़त्छि मे़ःन्दबका मे़वये़॥ 88 हे़क्क्याङ् तङ्जुम् वायागे़न् सिदुङ्जभाःल्ले़ लागि थक्साहाॽनु सोसोरिक् के़रे़क् निबोङ्ङाङ् लिसि से़गम्बा, तुक्पोङ् थुःम्बा, तुक्पोङ् मे़ःन्दबका नु तङ्बे थिक् के़गे़प्पा तुक्पोङ् मे़ल्लुक्साःत् मे़वये़॥ ले़त्ति तोःम्मादे़न्निन् माङ्थोःक्ना पोःक्खे़आङ् एगाङ् खे़न् तोःम्मा याःम्बक्ले़ लागि हुक्वाहाॽ आम्भा कन्हाॽए वये़॥ 89 मोसान् तुम्मादे़न् साःङ्गाहिम्मो यहवे दाङ्बे़न्नु पाःप्मारे़ लागि सिगाङ् लासे़धक्मा निङ्वाॽफुमाङ् माङ्हुप् साप्लुङ् के़याक्पा सन्दोक्किल्ले़ कुसम्धाङ्बा ने़त्छि करुबहाॽरे़ खुन्छिॽ लुम्मोलाम् खुने़ॽ यहवे दाङ्बे़ल्ले़ कुइक्लान् खे़प्सु॥ अक्खेलॽरिक् यहवे दाङ्बे़न् खुने़ॽनु पारे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.