खानिःत् 6 - लिम्बुनाजिरिहाॽरे़ लागि थिम्हाॽ 1 यहवे दाङ्बे़ल्ले़ मोसान् मे़त्तु, 2 “खे़ने़ॽ इस्राइलिहाॽ मे़त्ते़से़ॽ—‘कुभा ये़म्बित्छाहाॽ इग्र मे़न्छुमाहाॽरे़ चोःक्माए के़बोङ्बा माङ्हुप्, यहवे दाङ्बे़ल्ले़ कुलागि लाःत्लाःत् पोङ्मा फाॽआङ् नाजिरि चोःक्सिङ्मा माङ्हुप् चोःक्मा निङ्वाॽ मे़जोगुने़भग्र, 3 चे़ल्ले़क्सेॽ सेजःङ्वा नु थिलाम् खे़ङ्हाॽ लाःत्लाःत् मे़बोङ्ल॥ खे़ङ्हाॽरे़ के़सुःप्पा चे़ल्ले़क्सेॽ सेजःङ्वा नु के़सुःप्पा थि मे़न्धुङुन्ल, हे़क्क्याङ् चे़ल्ले़क्सेल्ले़ कुवा इग्र कुरेःत्ला किग्र नाम्भे़प्मनाबा चे़ल्ले़क्सेॽहाॽ मे़न्जने़न्ल॥ 4 नाजिरि मे़बोङ्ङाङ् मे़वाॽर थारिक् खे़न्हाॽरे़ चे़ल्ले़क्सेॽ लिःम्बान् इग्र कुहोरिक्पान् मे़न्जने़ल्ल॥ 5 “‘खे़न् लाःत्लाःत् पोङ्मा माङ्हुप् मे़जोगुबा के़रे़क् ये़न्हाॽ मे़ङ्गे़त्ते थारिक् खे़ङ्हाॽरे़ खुन्छिॽ थे़गेःक्किन् मे़न्नःक्खुन्ल॥ आभे़ल्ले़ थारिक् यहवे दाङ्बे़ल्ले़ कुलागि खे़ङ्हाॽ लाःत्लाःत् मे़जोःक्सिङ्ॽ, खे़न् ये़म्मिन् मे़ङ्गे़त्ते थे़म्बा खे़ङ्हाॽ सुत्थो मे़बोङ्ङाङ् मे़युङ्ल॥ खे़ङ्हाॽरे़ खुन्छिॽ थे़गेःक्किन् केःम्बा मे़हिङ्घुर॥ 6 “‘आभे़ल्ले़ थारिक् खे़ङ्हाॽ यहवे दाङ्बे़ल्ले़ कुलागि लाःत्लाःत् मे़बोङ्ङाङ् मे़युङ्, खे़म्म्याक् ये़न् थारिक्के खे़ङ्हाॽ चेःल्ले़ कुबेसाङ् मे़म्बेःक्ने़ल्ल॥ 7 खे़ङ्हाॽरे़ खुन्छिॽ पानुदिङ् पा इग्र मानुदिङ् मा, किग्र खुन्छिॽ फुॽनुसाॽ इग्र ने़ॽनुसाॽ मे़स्सिसाङ् खे़ङ्हाॽरे़ लागि खुन्छिॽ आसुत्थो मे़न्जोःक्सिङ्ङिन्ल, थेआङ्भे़ल्ले़ खुन्छिॽ आप्फेक् निङ्वाॽफुमाङ्ङिल्ले़ कुलागि एःक् मे़से़न्छिङ्बा मिक्सेःन्निन् खे़ङ्हाॽरे़ खुन्छिॽ थे़गेःक्पो पत्॥ 8 खे़ङ्हाॽरे़ खुन्छिॽ एःक् से़न्छिङ्मा के़रे़क् ये़न् थारिक् खे़ङ्हाॽ यहवे दाङ्बे़ल्ले़ कुलागि सेसेबा मे़बोङ्ॽ॥ 9 “‘हक्चघत् कुभा मनाधिक् खे़ङ्हाॽरे़ खुन्छिॽ पेसाङ् सिआङ् खे़ङ्हाॽरे़ मे़दोन्दुबा खुन्छिॽ थे़गेःक्इःन् आसुत्थो पोङ्ने़भग्र, सुत्थो पोङ्मा नुसिगेक्पा ये़न्नो खे़ङ्हाॽरे़ खुन्छिॽ थे़गेःक्किन् मे़नःक्खुर॥ 10 हे़क्क्याङ् ये़त्छिगेक्पा ये़न्नो खे़ङ्हाॽरे़ ने़त्छि साप्पे़त्त्रुःक्मा इग्र पे़र्वाज्याःक् ने़त्छि तुम्मादे़न् साःङ्गाहिम्मोबा लाःप्मादे़न्नो निङ्वाॽफुसाम्बाओ मे़दारुर॥ 11 चेःल्ले़ कुबेसाङ् मे़बोःक्खे़आङ् खे़ङ्हाॽ आसुत्थो मे़जोगुबाल्ले़ चोगुल्ले़ निङ्वाॽफुसाम्बे़ल्ले़ खे़ङ्हाॽरे़ खुन्छिॽ लागि लायोलाम् ले़प्मि खोमा सिदुङ्जभा हे़क्क्याङ् खे़ङ्हाॽलाम् लत्छा थिम् कुइसिक् सुत्थो पोङ्मा वयागे़न् सिदुङ्जभा, वेॽइन् मिधिङ्मनादेमनाबा सिदुङ्जभा चोगुआङ् तोःन्दुर॥ हे़क्क्याङ् हाबा खे़ल्ले़ याःन्दिक् खे़ङ्हाॽरे़ खुन्छिॽ थे़गेःक्किन् सेसेबा मे़जोगुर॥ 12 खे़ङ्हाॽ एःक् मे़से़न्छिङ्ङाङ् मे़वये़बा ये़म्मो आसुत्थो मे़बोःक्खे़बाल्ले़ चोगुल्ले़, खे़न् तगिबा ये़न्हाॽ निःप्मा मे़बोङ्ने़न्॥ खे़ङ्हाॽरे़ खुन्छिॽ मे़जोगुबा माङ्हुप्पिन् के़रे़क् के़प्मारे़ लागि नाजिरि कुइसिक् यहवे दाङ्बाओ खे़ङ्हाॽ याम्मो मे़दोःन्छिङ्ल पोङ्ॽ, हे़क्क्याङ् आप्तिक्लाम् ले़प्मि खोमा वायागे़न् सिदुङ्जभाःल्ले़ लागि तङ्बेधिक् के़गे़प्पा लत्छा थुःम्बा मे़दारुर॥ 13 “‘खुन्छिॽ एःक् मे़से़न्छिङ्बा ये़म्मिन् के़प्मा चुःत्ताङ् एगाङ् नाजिरिहाॽरे़ लागि थिम् आम्भा कन्लो॥ खे़ङ्हाॽ तुम्मादे़न् साःङ्गाहिम् लाःप्मादे़न्नो ताःप्मासि पोङ्ॽ॥ 14 खे़ङ्हाॽरे़ यहवे दाङ्बाल्ले़ लागि कन् सिदुङ्जभाहाॽ तोःम्मासि पोङ्ॽ—मिधिङ्मनादेमनाबा सिदुङ्जभारे़ लागि तङ्बेधिक् के़गे़प्पा मे़ङ्गाःम्मनाबा लत्छा कुम्बाबा मे़ल्लुक्साःत्, थिम् कुइसिक् लायोलाम् ले़प्मि खोमा सिदुङ्जभारे़ लागि तङ्बेधिक् के़गे़प्मा मे़ङ्गाःम्ना लत्छा कुम्मामा मे़ल्लुक्साःत्, हे़क्क्याङ् तङ्जुम् वायागे़न् सिदुङ्जभारे़ लागि मे़ङ्गाःम्मनाबा लत्छा थुःम्बा, 15 पक्वाधिक् खरे़ःङ् के़भङ्बा सिदाॽ मे़न्याक्केबा खरे़ःङ्—निःङ्गेॽ सॽमनाबा चुन्जुम्बा फेॽरुम्मिल्ले़न् के़धुङ्बा चारःप्पा नु निःङ्गेॽ हुःप्मनाबा पाॽबाःम्बा खरे़ःङ्—हे़क्क्याङ् खे़ङ्हाॽनु सोरिक्पा पोगुगे़न् कुजा सिदुङ्जभा नु चे़ल्ले़क्सेॽ सेजःङ्वा सिदुङ्जभा॥ 16 “‘खे़ब्याङ् निङ्वाॽफुसाम्बे़ल्ले़ यहवे दाङ्बे़ल्ले़ कुदगि खे़ङ्हाॽरे़ खुन्छिॽ लागि लायोलाम् ले़प्मि खोमा सिदुङ्जभा नु मिधिङ्मनादेमनाबा सिदुङ्जभान् तोःन्दुर॥ 17 निङ्वाॽफुसाम्बे़ल्ले़ यहवे दाङ्बाल्ले़ कुलागि तङ्जुम् वायागे़न् सिदुङ्जभारे़ कुइसिक् पक्वाओ के़याक्पा के़भङ्बा सिदाॽ मे़न्याक्मनाबा खरे़ःङ्ङिन् नु थुःम्बाःन् तङ्जुम् वयागे़न् सिदुङ्जभा कुइसिक् तोःन्दुर, हे़क्क्याङ् खे़न्नु सोसोरिक् खे़ङ्हाॽरे़ खुन्छिॽ पोगुगे़न् कुजा सिदुङ्जभान् नु चे़ल्ले़क्सेॽ सेजःङ्वा सिदुङ्जभान् तोःन्दुर॥ 18 “‘खे़ब्याङ् खे़न् नाजिरिहाॽरे़ तुम्मादे़न् साःङ्गाहिम् लाःप्मादे़न्नो खुन्छिॽ मे़दोन्दुबा थे़गेःक्इःन् मे़नःक्खुर, हे़क्क्याङ् खे़न् थे़गेःक्इःन् मे़देॽरुआङ् तङ्जुम् वायागे़न् सिदुङ्जभाःल्ले़ कुसिगाङ्बा मिओ मे़गेःत्तुर॥ 19 “‘खे़ङ्हाॽरे़ मे़दोन्दुबा खुन्छिॽ थे़गेःक्इःन् मे़नःक्खु मे़सुरुआङ् एगाङ् निङ्वाॽफुसाम्बे़ल्ले़ मे़धे़न्दुबा मे़ल्लुक्किल्ले़ कुभक्ताङ्ङिन्, पक्वाओ के़याक्पा खरे़ःङ् के़भङ्बा सिदाॽ मे़न्याक्केबा चारःप्पा थिक् नु खरे़ःङ् के़भङ्बा सिदाॽ मे़न्याक्केबा खरे़ःङ्ङिन् याङ्सिङ्ङाङ् खे़न् नाजिरिहाॽरे़ खुन्छिॽ हुक्को केःत्तु पिरुसिर॥ 20 हे़क्क्याङ् निङ्वाॽफुसाम्बे़ल्ले़ खे़न् थाःङ् पङ्मनाबा सिदुङ्जभा कुइसिक् यहवे दाङ्बे़ल्ले़ कुदगि खे़न् थाःङ् पक्खुर॥ कन्हाॽ नु थाःङ् पङ्मनाबा सा सङ्बप्मान् हे़क्क्याङ् तोःम्मनाबा कुलाङ्भे़ल्ले़क्मान् निङ्वाॽफुसाम्बे़ल्ले़ कुलागि सेसेबा कुघोमा लक् पोङ्ॽ॥ खे़न् एगाङ् खे़न् नाजिरिहाॽरे़ चे़ल्ले़क्सेॽ सेजङ्वान् मे़धुङुल्ले़ नुॽ॥ 21 “‘नाजिरिहाॽरे़ चोःक्मा के़बोङ्बा माङ्हुप्पिल्ले़ लागि थिम् आम्भा कन्लो॥ खे़ङ्हाॽ आप्फेक् मे़दोःन्छिङ्बा कुइसिक् यहवे दाङ्बाओ तोःम्मा के़बोङ्बा सिदुङ्जभान् हाबा कन्लो॥ खे़ङ्हाॽरे़ मे़सुक्तुने़भग्र कुयोॽबा सिदुङ्जभाहाॽआङ् ताःप्मा मे़सुक्तुॽ॥ खे़ङ्हाॽरे़ खुन्छिॽ मे़जोगुबा माङ्हुप्पिन् नाजिरि थिम् कुइसिक् खे़ङ्हाॽरे़ के़रे़क् इःप्मा नाःप्मा पोङ्लो॥’” निङ्वाॽफुसाम्बाहाॽरे़ थामा के़बोङ्बा मुॽइसाम् 22 यहवे दाङ्बे़ल्ले़ मोसान् मे़त्तु, 23 “हारुने़न् नु खुने़ॽ कुस्साहाॽ मे़त्ते़से़ॽ, ‘इस्राइलिहाॽ खिनिॽ मुॽइसाम् के़बिरुम्सुम्मिल्ले़ अक्खे मे़त्ते़म्सिम्मे़ॽओ— 24 “‘यहवे दाङ्बे़ल्ले़ खिनिॽ हाङ्वागे़न् मुॽइसाम् के़बिरिररो, हे़क्क्याङ् खिनिॽ ताप्थेक् याम्धेक् के़गत्तिररो॥ 25 यहवे दाङ्बाल्ले़ कुजित्लि नारान् खिनिॽ सम्धाङ् ओःत्लरो, हे़क्क्याङ् खुने़ॽ लुङ्माॽ के़दुक्तिररो॥ 26 यहवे दाङ्बाल्ले़ कुजित्लि नारान् खिनिॽ सम्धाङ् हिसुररो, हे़क्क्याङ् खुने़ॽ नुॽमा तामा सनारुङ् के़बिरिररो॥’” 27 “कम्भलॽरिक्के खे़ङ्हाॽरे़ इस्राइलिहाॽओ आङ्गाॽ आमिङ्ङिन् वाॽर मे़याःन्दुॽ, हे़क्क्याङ् आङ्गाॽ खे़ङ्हाॽ हाङ्वागे़न् मुॽइसाम् पिरुङ्सिङ्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.