खानिःत् 5 - लिम्बुसाःङ्गाहिम्हाॽओ पोङ्मा के़बोङ्बा सुत्थो 1 यहवे दाङ्बे़ल्ले़ मोसान् मे़त्तु, 2 “होरिक्पो आलिःक्लिःक्पा याङ्घेःक् के़लःम्बा, थक्कोलाम् वयुमा तुक्मा के़गप्पा, हे़क्क्याङ् चे के़सुबाआङ् आसुत्थो के़बोङ्बा इस्राइलिहाॽ साःङ्गाहिम्हाॽलाम् लाःक्कात् लाःत्लाःत् मे़वाॽर के़लॽबा इङ्जाङ् पिरे़से़ॽ॥ 3 ये़म्बित्छा नु मे़न्छुमा ने़प्माङ् लाःक्कात् युक्खे़से़ॽ॥ खे़ङ्हाॽरे़ खुन्छिॽ लुम्मो आङ्गाॽ याङ्धोःक्काबा साःङ्गाहिम्हाॽ खे़ङ्हाॽरे़ आसुत्थो मे़न्जोगुन्ल॥” 4 इस्राइलिहाॽरे़ हे़क्केए मे़जोगु, खे़ङ्हाॽ साःङ्गाहिम्हाॽलाम् लाःक्कात् मे़युक्खुसि॥ यहवे दाङ्बे़ल्ले़ मोसान् मे़त्तुबा हे़क्केए इस्राइलिहाॽरे़ मे़जोगुरो॥ फेन्याःम्बक्ले़ कुले़क्वा हुङ्मा के़बोङ्बा साम्बान् 5 यहवे दाङ्बे़ल्ले़ मोसान् मे़त्तु, 6 “खे़ने़ॽ इस्राइलिहाॽ मे़त्ते़से़ॽ—‘आल्ल कुभा ये़म्बित्छा इग्र मे़न्छुमाःल्ले़ यहवे दाङ्बान् इङ्ले़क् मे़त्तुआङ् कुभा वेॽ परिक्पा लायो फे़न्याःम्बक् चोगुने़भग्र, खे़न् मनान् आप्तिक्साबा पोङ्ॽ, 7 हे़क्क्याङ् खे़ल्ले़ खुने़ॽ चोगुबा लायोबा पाःन्नो ते़म्मा पोङ्ॽ॥ खे़ल्ले़ हात् ताप्फे़ःम्बा मे़त्तुआङ् वाॽ, खुने़ॽ खे़न् मे़त्तुबा आप्तिक्ले़ कुले़क्वा के़रे़क् साम्बान् नु आल्लसाङ् ङासिगेक्पा लक् पिरुर पोङ्ॽ॥ 8 कर खे़न् मनान् स्ये़घे़रे़आङ् कुआप्तिक्किल्ले़ कुले़क्वा साम्बान् के़हुङ्बा हाःत्ताङ् कुमना मे़होःप्ने़भग्र, खे़न् साम्बान् चिगक्वान् यहवे दाङ्बे़ल्ले़न् पोङ्ङाङ् निङ्वाॽफुसाम्बे़न् पिमा पोङ्ॽ॥ साम्बान् हुङ्मा नु आप्तिक्साबे़ल्ले़ कुलायोल्ले़ लागि ले़प्मि नाःक्मा लत्छा थुःम्बाधिक् निङ्वाॽफुसाम्बे़न् पिमा पोङ्ॽ॥ 9 इस्राइलिहाॽरे़ निङ्वाॽफुसाम्बाओ मे़दोन्दु मे़दारुबा सेसेबा सिदुङ्जभाहाॽ निङ्वाॽफुसाम्बे़ल्ले़न् पोङ्ल॥ 10 के़रे़क् मनाहाॽरे़ खुन्छिॽ सेसेबा मिक्तोःक्हाॽ खुन्छिॽइन्नेरो, कर मनाहाॽरे़ निङ्वाॽफुसाम्बे़न् मे़बिरुबा थे़माःन्छाङ् निङ्वाॽफुसाम्बे़ल्ले़न्ने पोङ्लरो॥’” कुनागे़हे़म्बा ये़म्बित्छाहाॽरे़ खुन्छिॽ मेःत्हाॽ 11 खे़ब्याङ् यहवे दाङ्बे़ल्ले़ मोसान् मे़त्तु, 12 “खे़ने़ॽ इस्राइलिहाॽ मे़त्ते़से़ॽ—‘कुभा मनाःल्ले़ कुमेःत्तिन् ताप्पे़ॽ हे़क्क्याङ् खे़ल्ले़ कुये़म्बाःन् इङ्ले़क्को थासुआङ् 13 वेॽ ये़म्बित्छाःन्नु इम्मा याःम्बक् चोगुॽ, हे़क्क्याङ् कन् पाःन्निन् कुये़म्बाःल्ले़ निङ्वाॽ मे़ङ्घोए कत्तुॽ, खम्भ्याङ् खे़न् मे़न्छुमान् फे़त्लारे़साङ् खुने़ॽ कुदक्ले़ङ्वाओ हाःत्ताङ् के़निबा होःप्ते़बे़ल्ले़ चोगुल्ले़ खुने़ॽ मे़न्याङ्ङेआङ् वये़, 14 हे़क्क्याङ् खे़न् फे़क्के़लाॽमा कुमेःत्तिन् खुने़ॽ कुनिङ्वाॽओ नाहे़त्तु, खे़ब्याङ् मिक्चोबोॽमा हेःक्तु, इग्र खे़ल्ले़ कुमेःत्तिन् फे़त्मे़ल्लाॽए वाॽसाङ् कुनाहे़न्नाङ् नाहे़त्तुने़भग्र, 15 खे़न् मनाःल्ले़ खुने़ॽ कुमेःत्तिन् निङ्वाॽफुसाम्बाओ तारुर, हे़क्क्याङ् खुने़ॽ खे़ल्ले़ कुलागि माना लिसि यारिक् हःक्सि फेॽरुम् सिदुङ्जभा तोःन्दुर॥ खुने़ॽ खे़प्मो निःङ्गेॽ इग्र सुक्पा मे़याक्तुन्ल, थेआङ्भे़ल्ले़ कङ्ग आप्तिक्के़न् निङ्वाॽसुम् के़लॽबा, इग्र नाहे़न्ले़ लागि तोःम्मनाबा पोगुगे़न् कुजा सिदुङ्जभारो॥ 16 “‘हे़क्क्याङ् निङ्वाॽफुसाम्बे़ल्ले़ खे़न् मे़न्छुमान् निःत्ताङ् तारुआङ् यहवे दाङ्बे़ल्ले़ कुदगि ले़त्ति तोःम्मादे़न्नो ये़प्सुर॥ 17 खे़न् एगाङ् निङ्वाॽफुसाम्बे़ल्ले़ खाम् खप्प्याओ सेसेबा च्वाःत् तारुर, खे़ब्याङ् सेसे साःङ्गाहिम् सिगाङ्बा खाम्बाङ्ङोबा खाम्हिःक्किन् याङ्सिङ्ङाङ् खे़न् च्वाःत्तो केःत्तुर॥ 18 खम्भ्याङ् निङ्वाॽफुसाम्बे़ल्ले़ खे़न् मे़न्छुमान् यहवे दाङ्बे़ल्ले़ कुदगि ले़त्ति तोःम्मादे़न्नो ये़प्सुआङ् एगाङ् कुधे़गेक् इःन् फाःक्खु पिरुर हे़क्क्याङ् खे़ल्ले़ कुहुक्को निङ्वाॽसोक् सिदुङ्जभा नाहे़न् सिदुङ्जभान् केःत्तु पिरुर, हे़क्क्याङ् माङ्दे साङ्ग्रा के़दाःप्पा के़घिःक्पा च्वाःत्तिन् निङ्वाॽफुसाम्बे़ल्ले़ कुहुक्को याङ्सिङ्ल॥ 19 खे़ब्याङ् निङ्वाॽफुसाम्बे़ल्ले़ खे़न् मे़न्छुमान् माङ्हे़क्सिङ्मा पाङ्घुआङ् अक्खे मे़त्तुर, “कुभा ये़म्बित्छान् खे़ने़ॽनु मे़न्ने़ए वाॽ, हे़क्क्याङ् खे़ने़ॽ के़ये़म्बाःल्ले़ कुयुक्को के़वये़ल्ले़ फे़त्लाॽमा लाम्मो मे़न्वाॽए के़वये़आङ् आसुत्थो मे़म्बोङ्ङे के़वाॽने़भग्र, माङ्दे साङ्ग्रा के़दाःप्पा कन् के़घिःक्पा च्वाःत्तिल्ले़ खे़ने़ॽ थे़माआङ् हान्ति के़न्जोःक्ने़न्ल॥ 20 कर खे़ने़ॽ के़ये़म्बाःल्ले़ कुयुक्को के़वये़ल्ले़ खे़ने़ॽ ताप्के़बे़ॽरे़ के़बेआङ् के़वाॽ, हे़क्क्याङ् खे़ने़ॽ के़ये़म्बाःन्नुःल्ले़आङ् वेॽ ये़म्बित्छाःन्नु खे़ने़ॽ के़ने़स्से़आङ् फे़क्के़लाॽरे़आङ् के़वाॽने़भग्र,” 21 (कन् ये़म्मो, निङ्वाॽफुसाम्बे़ल्ले़ खे़न् मे़न्छुमान् माङ्दे साङ्ग्राबा माङ्हे़क् चोःक्मा पाङ्घुर) “यहवे दाङ्बे़ल्ले़ खे़ने़ॽ कुस्सा मे़न्याक्मनामा नु खे़ने़ॽ के़साप्पोक् के़धङ्मा के़जोःक्किल्ले़, खुने़ॽ खे़ने़ॽ के़मनाहाॽरे़ खुन्छिॽ लुम्मो माङ्दे साङ्ग्रा के़दाःप्मा नु चिःत्ते़ स्ये़मा के़जोःक्ल॥ 22 कन् माङ्दे साङ्ग्रा के़दाःप्पा च्वाःत्तिन् के़साप्पोःक्को लाःत्ताङ् कुसाप्पोक् के़धङ्मा नु कुस्सा मे़न्याक्मनामा के़जोःक्ल॥” “‘खे़ब्याङ् खे़न् मे़न्छुमाःल्ले़ अक्खे पाःत्तुर “आमिन्, अक्तङ्बाए पोङ्ल॥” 23 “‘हे़क्क्याङ् निङ्वाॽफुसाम्बे़ल्ले़ खे़न् माङ्दे साङ्ग्राहाॽ साप्लाथःङ्मो साप्तुर खे़ब्याङ् के़घिःक्पा च्वाःत् के़याक्पा खोर्याओ खे़न् केःत्तुआङ् वाहप्तुदेसुर, 24 खम्भ्याङ् खुने़ॽ खे़न् मे़न्छुमान् खे़न् माङ्दे के़दाःप्पा के़घिःक्पा च्वाःत्तिन् थुङ्मा पाङ्घुर, हे़क्क्याङ् खे़न् माङ्दे के़दाःप्पा च्वाःत्तिन् खे़न् मे़न्छुमाओ लाःत्ताङ् खुने़ॽ आप्तिक्सामा चोःक्ने़भग्र खे़न् च्वाःत्तिल्ले़ साॽरिक् के़दुक्मा पोङ्ल याःन्दुॽ॥ 25 खे़ब्याङ् निङ्वाॽफुसाम्बे़ल्ले़ नाहे़म्मा पोगुगे़न् कुजा सिदुङ्जभान् खे़न् मे़न्छुमाःल्ले़ कुहुक्कोलाम् याङ्सिङ्ङाङ् यहवे दाङ्बे़ल्ले़ कुदगि खे़न् पोगुगे़न् सिदुङ्जभान् थाःङ् पक्खुर, हे़क्क्याङ् ले़त्ति तोःम्मादे़न्नो तारुर॥ 26 निङ्वाॽफुसाम्बे़ल्ले़ पोगुगे़न् कुजा सिदुङ्जभालाम् हुक्पक् थिक् याङ्सिङ्ल हे़क्क्याङ् निङ्वाॽसोक् सिदुङ्जभा तङ्बा ले़त्ति तोःम्मादे़न्नो खे़न् मिधिक्खुर, हे़क्क्याङ् खे़न् एगाङ् खे़न् च्वाःत्तिन् खे़न् मे़न्छुमान् थुङ्मा पाङ्घुर॥ 27 आल्ल खुने़ॽ खे़न् मे़न्छुमान् च्वाःत् थुङ्मा पाङ्घुल्ले़, खे़न् फे़त्लाॽरे़आङ् वाॽ हे़क्क्याङ् खे़ल्ले़ खुने़ॽ कुये़म्बाःल्ले़ कुदक्ले़ङ्वाओ फे़न्याःम्बक् चोगुआङ् वाॽने़भग्र, खे़न् माङ्दे के़दाःप्पा च्वाःत्तिन् खुने़ॽ कुसाप्पोःक्को लाःत्ताङ् साॽरिक् थःप्माए मे़सुक्तुन्ल थारिक् तुक्॥ खे़ल्ले़ कुसाप्पोःक्किन् थङ्दुॽ हे़क्क्याङ् खे़ल्ले़ कुस्सा मे़न्याक्मनामा पोङ्ॽ, हे़क्क्याङ् खे़न् मे़न्छुमान् खुने़ॽ कुमनाहाॽरे़ खुन्छिॽ लुम्मो माङ्दे साङ्ग्रा के़दाःप्मा पोङ्ॽ॥ 28 कर खे़न् मे़न्छुमान् फे़त्मे़न्लाॽए वाॽआङ् कुआप्तिक् आसुत्थो मे़म्बोङ्ङे वाॽने़भग्र, खे़न् आप्तिक् मे़ःन्नेमा कुदोःप्मा पोङ्ङाङ् सागप्मारे़ लागि मे़न्छुक्मा पोङ्मा सुक्॥ 29 “‘कुये़म्बाःल्ले़ कुयुक्को के़वाॽमा मेःत्तिन् ताक्कन् हे़क्क्याङ् इङ्ले़क्स्वामा पोङ्ङाङ् आसुत्थो के़बोङ्मा, 30 इग्र निङ्वाॽओ नाहे़न् के़इःप्पाआङ् कुमेत् मिक्चो के़बोॽबाल्ले़ लागि थिम्बे आम्भा कन्लो॥ निङ्वाॽफुसाम्बे़ल्ले़ खे़न् मे़न्छुमान् यहवे दाङ्बे़ल्ले़ कुदगि ये़प्सुर, हे़क्क्याङ् कन् थिम्बेइन् के़रे़क् खुने़ॽ कुःत्तुर॥ 31 खे़ब्याङ् खे़न् कुये़म्बाःन् कुभा परिक्पा फे़न्याःम्बक्लाम् आप्तिक् मेःन्नेबा पोङ्ॽ, कर खे़न् मे़न्छुमाःल्ले़ग खुने़ॽ चोगुबा कुभे़न् याःम्बक्किल्ले़ कुले़क्वा खुम्दिङ् तुमुरो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.