खानिःत् 4 - लिम्बुले़बि थाःक्कोबा कहात हिम्सयङ्हाॽरे़ खुन्छिॽ याःम्बक्हाॽ 1 यहवे दाङ्बे़ल्ले़ मोसान् नु हारुने़न् मे़त्तुसि, 2 “ले़बिःल्ले़ कुधाःक् लुम्मोलाम्बा कहातिहाॽ खुन्छिॽ आप्फेक् आप्फेक् थाःक् नु हिम्सयङ् कुइसिक् खे़ङ्हाॽ निरे़से़ॽ॥ 3 तुम्मादे़न् साःङ्गाहिम्मो याःम्बक् चोःक् से़ के़दाबा खे़न् सुम्बोङ्ङाङ्धो ङाबोङ् तङ्बे थारिक् के़गे़प्पा ये़म्बित्छाहाॽ के़रे़क् निरे़से़ॽ॥ 4 “तुम्मादे़न् साःङ्गाहिम्मो साॽरिक् सेसेबा चिगक्वा पाःन्हाॽ कहातिहाॽरे़ खुन्छिॽ ओमे़प्मा याःम्बक्लो॥ 5 साःङ्गाहिम्हाॽ तगि चप्मा तेॽमे़ल्ले़ हारुने़न् नु खुने़ॽ कुस्साहाॽ सेसे साःङ्गाहिम्मो मे़लाःत्ल हे़क्क्याङ् कुधेःक्मा फोःन्दान् मे़धासुआङ् माङ्हुप् साप्लुङ् के़याक्पा सन्दोक्किन् आम्भा खे़ल्ले़ मे़दे़प्तुर॥ 6 खे़ङ्हाॽरे़ खे़ल्ले़ कुसम्धाङ् साॽरिक् नुबा साहोरिक्किल्ले़ मे़दे़प्तुर, खे़ब्याङ् खे़ल्ले़ कुसम्धाङ् के़रे़क् हिःक्कोःम्कोःम्बा चिरिक्किल्ले़ मे़घाप्तुर॥ कुनुप्मो, खे़ङ्हाॽरे़ माङ्हुप् सन्दोक्किल्ले़ कुबङ्मा तक्लाङ्हाॽ कुयाक्नाओ मे़याक्तुर॥ 7 “खे़ङ्हाॽरे़ सेसे खरे़ःङ् ने़मा चप्ते़न्निल्ले़ कुसम्धाङ् लत्छा हिःक्कोःम्कोःम्बा चिरिक् थिक् मे़भे़सुर हे़क्क्याङ् खे़ल्ले़ कुसम्धाङ् चे़त्थ्याहाॽ, सुक्पा हाःम्मा साङ्ते़रे़ःङ्हाॽ, छे़ःङ्ग्याहाॽ नु चे़ल्ले़क्सेॽ सेजःङ्वा सिदुङ्जभा याङ्मा चल्लाङ्ना खोर्याहाॽ मे़युक्खुर, खे़ब्याङ् खे़प्मो आभे़ल्ले़साङ् के़ने़बा खरे़ःङ्ङिन् खे़ल्ले़ कुसम्धाङ् मे़ने़स्सुर॥ 8 खे़ङ्हाॽरे़ खे़ल्ले़ कुसम्धाङ् हे़ःत्ताङ्बा चिरिक्किल्ले़न् मे़भे़सुर हे़क्क्याङ् खे़ल्ले़ कुसम्धाङ् वरःङ्ङोबा थक्सा होरिक्किन् मे़भत्छुर, खे़ब्याङ् चप्ते़न्निल्ले़ कुबङ्मा तक्लाङ्हाॽ कुयाक्नाओ मे़याक्तुर॥ 9 “खे़ङ्हाॽरे़ हिःक्कोःम्बा चिरिक्किन् मे़याङ्सिङ्ङाङ् सेमियुङ्दे़न्, खे़ल्ले़ कुहाःम्मा सेमिहाॽ नु सेमि हाःम्मा खिःल्ले़ कुघक्मा ने़ॽयाहाॽ, माक्सुःन्दाःल्ले़ कुदाःक्मे़न् हे़क्क्याङ् के़रे़क् निःङ्गेॽ याङ्मा खप्प्याहाॽ मे़दे़प्तुर॥ 10 खे़न् एगाङ् खे़ङ्हाॽरे़ सेमि युङ्दे़न्निन् नु खे़प्मोबा के़रे़क् सामा चिगक्वाहाॽआङ् साॽरिक् नुबा साहोरिक्किल्ले़ मे़गित्तुआङ् खे़ल्ले़ कुबङ्मा तक्लाङ्ङो मे़भत्छुर॥ 11 “खे़ङ्हाॽरे़ साम्म्याङ्ले़न् ले़त्ति तोःम्मादे़न्निल्ले़ कुसम्धाङ् हिःक्कोःम्कोःम्बा चिरिक्किन् मे़भे़सुर हे़क्क्याङ् वरःङ्ङो के़याक्पा थक्साःल्ले़न् नुबा साहोरिक्किल्ले़ मे़दे़प्तुर, खे़ब्याङ् खे़ल्ले़ कुबङ्मा तक्लाङ्हाॽ याक्मादे़न्नो मे़धे़क्तुर॥ 12 “सेसेदे़न्नो खे़ङ्हाॽरे़ खुन्छिॽ याङ्मा के़रे़क् माङ्से़वा याःम्बक् चोःक्मा सामाहाॽ मे़याङ्सिङ्ङाङ् खे़ङ्हाॽ हिःक्कोःम्कोःम्बा चिरिक्को मे़ने़स्सुर खे़ब्याङ् वरःङ्ङो के़याक्पा थक्साःल्ले़न् नुबा साहोरिक्किल्ले़ मे़बन्छुर हे़क्क्याङ् खे़ङ्हाॽ कुबङ्मा तक्लाङ्हाॽरे़ कुसम्धाङ् मे़भत्छुर॥ 13 “खे़ङ्हाॽरे़ कासाःल्ले़न् ले़त्ति तोःम्मालाम् खाप्पुःन् मे़लःत्तुर हे़क्क्याङ् खे़ल्ले़ कुसम्धाङ् परान्ला चाःम्बा चिरिक्किन् मे़भे़सुर॥ 14 खे़ल्ले़ कुसम्धाङ् खे़ङ्हाॽरे़ ले़त्ति तोःम्मादे़न्नो माङ्से़वा चोःक्मे़ल्ले़ याङ्मनाबा के़रे़क् खप्प्याहाॽ, इग्र मि ने़मा साङ्ते़रे़ःङ्हाॽ, सा उःङ्मा सुम्जुलिहाॽ, ताबिल्लोहाॽ, सामाक्खिॽ साङ्मा छे़ःङ्ग्याहाॽ नु ले़त्ति तोःम्मादे़न्नोबा के़रे़क् सामा चिगक्वाहाॽ मे़युक्खुर, खे़ब्याङ् खे़ल्ले़ कुसम्धाङ् खे़ङ्हाॽरे़ वरःङ्ङोबा थक्सा होरिक्किन् मे़भे़सुआङ् खे़ल्ले़ कुबङ्मा तक्लाङ्हाॽ कुयाक्मादे़न्नो मे़लिःक्खुर॥ 15 “साःङ्गाहिम्हाॽ तगि चप्मा ये़म् पोङ्ङिल्ले़ हारुने़न् नु खुने़ॽ कुस्साहाॽ सेसेदे़न्नोबा के़रे़क् सुत्थो सामा चिगक्वाहाॽ मे़दे़प्तु मे़सुरुआङ् खे़ङ्हाॽ कुबङ्से़ कहातिहाॽ मे़दार॥ कर खे़ङ्हाॽरे़ सेसेबा चिगक्वा सामाहाॽ मे़न्छुसुन्ल, मेःन्ने़भग्र खे़ङ्हाॽ हदॽ मे़स्सिःॽ॥ तुम्मादे़न् साःङ्गाहिम्मोबा के़रे़क् चिगक्वाहाॽ कहातिहाॽरे़ मे़बक्खुर॥ 16 “निङ्वाॽफुसाम्बा हारुने़ल्ले़ कुस्सा एलाजारे़ल्ले़ कुलक्पे़न्नो हुक्सुप्मनाबा पाःन्हाॽ हाबा कन्हाॽरो—सेमि हाःम्मारे़ लागि निःङ्गेॽ, कुनाम्गे़नुॽबा सुक्पा, थिक्याःन्धक्पा पोगुगे़न् कुजा सिदुङ्जभा, माङ्थोःक्ना पिमा निःङ्गेॽ—के़रे़क् सेसेदे़न्निन् नु खे़प्मो के़युङ्बा खक्पे़त् सामापुमाहाॽ॥” 17 यहवे दाङ्बे़ल्ले़ मोसान् नु हारुने़न् मे़त्तुसि, 18 “कहातिहाॽरे़ खुन्छिॽ थाःक्हाॽ ले़बिहाॽरे़ मे़मे़क्खुसिर मे़जोगे़से़न्ने़ॽ॥ 19 खे़ङ्हाॽ साॽरिक् सेसेबा पाःन्हाॽरे़ कुबेसाङ् मे़दाःल्ले़ मे़न्छिने़न्ल फाॽआङ् कन् खुन्छिॽ लागि चोगे़से़ॽ—हारुन नु खे़ल्ले़ कुस्साहाॽ सेसेदे़न्नो मे़बेःक्ल हे़क्क्याङ् खे़ङ्हाॽ के़रे़क्ले़ खुन्छिॽ आप्फेक् आप्फेक् याःम्बक् नु थे़मा थे़माहाॽ पङ्मा पोङ्ॽ मुरामे़त्ते़से़ॽ॥ 20 कर कहातिहाॽ सेसेबा पाःन्हाॽ ओमे़त्छे़ सप्फा थिक्ले़ लागि सिगाङ् मे़न्लाःत्ने़न्ल, मेःन्ने़भग्र खे़ङ्हाॽ मे़सिरो॥” ले़बि थाःक्हाॽरे़ खुन्छिॽ याःम्बक्हाॽ 21 यहवे दाङ्बे़ल्ले़ मोसान् मे़त्तु, 22 “गेर्सोनि सुवाङ्हाॽआङ् खुन्छिॽ आप्फेक् आप्फेक् हिम्सयङ् नु खुन्छिॽ थाःक्हाॽ कुइसिक् निरे़से़ॽ॥ 23 तुम्मादे़न् साःङ्गाहिम्मो याःम्बक् चोःक्से़ के़दाबा सुम्बोङ् तङ्बेआङ्धो ङाबोङ् तङ्बे थारिक्पा ये़म्बित्छाहाॽ के़रे़क् निरे़से़ॽ॥ 24 “कक् कुमा नु याःम्बक् चोःक्मारे़ लागि गेर्सोन सुवाङ्हाॽरे़ याःम्बक्किन् आम्भा कन्लो— 25 सेसे साःङ्गाहिम्मोबा फोःन्दाहाॽ, तुम्मादे़न् साःङ्गाहिम्, खे़ल्ले़ कुघाप्मा, खे़ल्ले़ कुसम्धाङ्बा साॽरिक् नुबा साहोरिक् कुघाप्मा नु सेसे साःङ्गाहिम् लाःप्मादे़न्नो के़बप्पा फोःन्दा, 26 सेसे साःङ्गाहिम् नु ले़त्ति तोःम्मादे़न् के़रे़क् पिसाङ्बा लक्खुम्मोबा फोःन्दाहाॽ, खे़प्मोबा लाःम्धेःत् फोःन्दा, थाक्पाहाॽ, हे़क्क्याङ् खे़ल्ले़ कुसे़वा याःम्बक्ले़ लागि याङ्मनाबा के़रे़क् सामा चिगक्वाहाॽ मे़बक्खुर॥ कन् के़रे़क् पाःन्हाॽलाम् च्याज्या याःम्बक् चोःक्मा के़बोङ्बा पोङ्ॽ, खे़ङ्हाॽआङ् गेर्सोन सुवाङ्हाॽरे़ए मे़जोगुर॥ 27 खे़ङ्हाॽरे़ खुन्छिॽ के़रे़क् माङ्से़वा याःम्बक्हाॽ, इग्र कक् कुमा याःम्बक् पोङ्साङ् किग्र वेॽ याःम्बक् पोङ्साङ्, खे़ङ्हाॽ के़रे़क् हारुन नु खुने़ॽ कुस्साहाॽरे़ मुरामे़मे़त्तुसिबा कुइसिक् गेर्सोन सुवाङ्हाॽरे़ मे़जोगुर॥ खे़ङ्हाॽरे़ चोःक्मा के़बोङ्बा के़रे़क् याःम्बक्हाॽ खे़निॽए मुरामे़त्ते़म्से़ॽ॥ 28 तुम्मादे़न् साःङ्गाहिम्मो गेर्सोनि सुवाङ्हाॽरे़ खुन्छिॽ याःम्बक्किन् हाबा कन्लो॥ खे़ङ्हाॽरे़ चोःक्मा के़बोङ्बा लक्पे़न्निन् निङ्वाॽफुसाम्बा हारुने़ल्ले़ कुस्सा इतामारे़ल्ले़ कुयुक्को वाॽररो॥” मरारि थाःक्कोबा ले़बिहाॽरे़ खुन्छिॽ याःम्बक्हाॽ 29 यहवे दाङ्बे़ल्ले़ मोसान् मे़त्तु, “खे़ने़ॽ मरारिहाॽ खुन्छिॽ आप्फेक् आप्फेक् थाःक् नु हिम्सयङ् कुइसिक् निरे़से़ॽ॥ 30 तुम्मादे़न् साःङ्गाहिम्मो याःम्बक् चोःक्से़ के़दाबा सुम्बोङ् तङ्बेआङ्धो ङाबोङ् तङ्बे थारिक् के़गे़प्पा ये़म्बित्छाहाॽ के़रे़क् निरे़से़ॽ॥ 31 तुम्मादे़न् साःङ्गाहिम्मो खे़ङ्हाॽरे़ चोःक्मा के़बोङ्बा याःम्बक्हाॽ हाबा कन्हाॽएरो—सेसे साःङ्गाहिम्मोबा सिङ्भे़ल्ले़क्हाॽ, खे़ल्ले़ कुसाक्माहाॽ, तक्लाङ्हाॽ, सित्लाङ्हाॽ नु कुयुङ्नाहाॽ, 32 खे़न्नु सोसोरिक् के़रे़क् पिसाङ्बा लक्खुम्मोबा सित्लाङ्हाॽ, हे़क्क्याङ् खे़ल्ले़ कुयुक्नाहाॽ, लक्चुहाॽ, थाक्पाहाॽ नु खे़न्नु सोरिक्पा सामा चिगक्वाहाॽ, खे़ब्याङ् कन्हाॽ याङ्मारे़ चाहा के़जोःक्पा के़रे़क् पाःन्हाॽ खे़ङ्हाॽरे़ मे़बक्खुर॥ परिक् परिक्पा सामाहाॽ पङ्मारे़ लागि खे़ङ्हाॽओ आप्फेक् आप्फेक् खुन्छिॽ मिङ् कुइसिक् मनाहाॽ मुरामे़त्ते़से़ॽ॥ 33 तुम्मादे़न् साःङ्गाहिम्मो मरारि थाःक्हाॽरे़ निङ्वाॽफुसाम्बा हारुनरे़ कुस्सा इतामारे़ल्ले़ कुइङ्जाङ्ङो चोःक्मा के़बोङ्बा याःम्बक्हाॽ हाबा कन् वये़रो॥” ले़बिरे़ कुधाःक्हाॽ खानिःत् मे़जोगुसि 34 मोसा, हारुन नु सङ्जुम्भोबा लाम्लोबाहाॽरे़ कहातिहाॽ खुन्छिॽ आप्फेक् आप्फेक् थाःक् नु हिम्सयङ् इसिःक् मे़निरुसि॥ 35 तुम्मादे़न् साःङ्गाहिम्मो याःम्बक् चोःक्मारे़ लागि युक्तिङ् के़बोङ्बा सुम्बोङ् तङ्बेआङ्धो ङाबोङ् तङ्बे थारिक् के़गे़प्पा खक्पे़त् ये़म्बित्छाहाॽ, 36 थाःक्थाःक् मे़जोगुसिआङ् मे़निरुसिबाहाॽ के़रे़क्ले़ २,७५० मे़वये़॥ 37 यहवे दाङ्बे़ल्ले़ मोसाःन्लाम् पिरुसिबा इङ्जाङ् कुइसिक् मोसान् नु हारुने़ल्ले़ निरे़छुसिबा तुम्मादे़न् साःङ्गाहिम्मो याःम्बक् के़जोःक्पा कहातिहाॽरे़ खुन्छिॽ के़रे़क् खानिःत् हाबा कन् वये़॥ 38 गेर्सोनिहाॽ खुन्छिॽ आप्फेक् आप्फेक् थाःक् नु हिम्सयङ् कुइसिक् मे़निरुसिआङ् वये़॥ 39 तुम्मादे़न् साःङ्गाहिम्मो याःम्बक् चोःक्मारे़ लागि युक्तिङ् के़बोङ्बा सुम्बोङ्ङाङ्धो ङाबोङ् तङ्बे थारिक् के़गे़प्पा खक्पे़त् ये़म्बित्छाहाॽ, 40 खे़न् थाःक्थाःक् नु मे़निरुसिबा हिम्सयङ्हाॽ के़रे़क् २,६३० मे़वये़॥ 41 यहवे दाङ्बाल्ले़ कुइङ्जाङ् कुइसिक् मोसान् नु हारुनरे़ निरे़छुसिबा तुम्मादे़न् साःङ्गाहिम्मो याःम्बक् के़जोःक्पा गेर्सोनिहाॽरे़ खुन्छिॽ के़रे़क् खानिःत्तिन् आम्भा कन् वये़॥ 42 मरारिहाॽ खुन्छिॽ आप्फेक् आप्फेक् थाःक् नु हिम्सयङ् कुइसिक् मे़निरुसिआङ् मे़वये़॥ 43 तुम्मादे़न् साःङ्गाहिम्मो याःम्बक् चोःक्मारे़ लागि युक्तिङ् के़बोङ्बा सुम्बोङ्ङाङ्धो ङाबोङ् तङ्बे थारिक् के़गे़प्पा खक्पे़त् ये़म्बित्छाहाॽ, 44 खे़न् थाःक्थाःक् मे़निरुसिबाहाॽ के़रे़क् ३,२०० मे़वये़॥ 45 यहवे दाङ्बाल्ले़ कुइङ्जाङ् कुइसिक् मोसान् नु हारुनरे़ निरे़छुसिबा तुम्मादे़न् साःङ्गाहिम्मो याःम्बक् के़जोःक्पा मरारिहाॽरे़ खुन्छिॽ के़रे़क् खानिःत्तिन् आम्भा कन् वये़॥ 46 कम्भलॽरिक् मोसा, हारुन नु इस्राइलि लाम्लोबाहाॽरे़ के़रे़क् ले़बिहाॽरे़ खुन्छिॽ आप्फेक् आप्फेक् थाःक्थाःक् नु हिम्सयङ् कुइसिक् मे़निरुसि॥ 47 तुम्मादे़न् साःङ्गाहिम्मो याःम्बक् चोःक्मा नु कक् कुमारे़ लागि युक्तिङ् के़बोङ्बा सुम्बोङ्ङाङ्धो ङाबोङ् तङ्बे थारिक् के़गे़प्पा खक्पे़त् ये़म्बित्छाहाॽ, 48 खे़न् मे़निरुसिबाहाॽ के़रे़क् ८,५८० मे़वये़॥ 49 खुन्छिॽ आप्फेक् आप्फेक् खुन्छिॽ याःम्बक् नु कक् कुमा याःम्बक् कुइसिक् यहवे दाङ्बाल्ले़ कुइङ्जाङ् कुइसिक् मोसाःन्लाम् खे़ङ्हाॽ युक्तिङ् मे़बोःक्खे़आङ् मे़वये़॥ यहवे दाङ्बे़ल्ले़ मोसान् मे़त्तुबा कुइसिक् खुने़ॽ खे़ङ्हाॽ निरुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.